| Library / Tipiṭaka / တိပိဋက • Tipiṭaka / ဝိမတိဝိနောဒနီ-ဋီကာ • Vimativinodanī-ṭīkā |
ပာစိတ္တိယဝဏ္ဏနာ
Pācittiyavaṇṇanā
၄၇၆. သဗ္ဗာနိ နာနာဝတ္ထုကာနီတိ သပ္ပိနဝနီတာဒီနံ ပဉ္စန္နံ ဝတ္ထူနံ ဘေဒေန ပာစိတ္တိယာနိ ပဉ္စ နာနာဝတ္ထုကာနိ။ ဧသ နယော ပဏီတဘောဇနဝိသယေ နဝ ပာစိတ္တိယာနီတိအာဒီသုပိ။ ဧတေန ဘေသဇ္ဇပဏီတဘောဇနသိက္ခာပဒာနိ ဧကေကသိက္ခာပဒဝသေန ပညတ္တာနိပိ ဝတ္ထုဘေဒေန ပစ္စေကံ ပဉ္စသိက္ခာပဒနဝသိက္ခာပဒသဒိသာနိ ဘိက္ခုနီနံ ပာဋိဒေသနီယာပတ္တိယော ဝိယာတိ ဒသ္သေတိ။ တေနေဝ ‘‘နာနာဝတ္ထုကာနီ’’တိ ဝုတ္တံ။ သပ္ပိံ ဧဝ ပဋိဂ္ဂဟေတ္ဝာ အနေကဘာဇနေသု ဌပေတ္ဝာ သတ္တာဟံ အတိက္ကာမေန္တသ္သ ဘာဇနဂဏနာယ သမ္ဘဝန္တိယော ဗဟုကာပိ အာပတ္တိယော ဧကဝတ္ထုကာ ဧဝ ဟောန္တိ, ဧဝံ သပ္ပိဘောဇနမေဝ ဗဟူသု ဌာနေသု ဝိညာပေတ္ဝာ ဧကတော ဝာ ဝိသုံ ဝိသုမေဝ ဝာ ဘုဉ္ဇန္တသ္သ အာပတ္တိယော ဧကဝတ္ထုကာ ဧဝာတိ ဒဋ္ဌဗ္ဗာ။
476.Sabbāninānāvatthukānīti sappinavanītādīnaṃ pañcannaṃ vatthūnaṃ bhedena pācittiyāni pañca nānāvatthukāni. Esa nayo paṇītabhojanavisaye nava pācittiyānītiādīsupi. Etena bhesajjapaṇītabhojanasikkhāpadāni ekekasikkhāpadavasena paññattānipi vatthubhedena paccekaṃ pañcasikkhāpadanavasikkhāpadasadisāni bhikkhunīnaṃ pāṭidesanīyāpattiyo viyāti dasseti. Teneva ‘‘nānāvatthukānī’’ti vuttaṃ. Sappiṃ eva paṭiggahetvā anekabhājanesu ṭhapetvā sattāhaṃ atikkāmentassa bhājanagaṇanāya sambhavantiyo bahukāpi āpattiyo ekavatthukā eva honti, evaṃ sappibhojanameva bahūsu ṭhānesu viññāpetvā ekato vā visuṃ visumeva vā bhuñjantassa āpattiyo ekavatthukā evāti daṭṭhabbā.
ပာဠိယံ ဧကဝာစာယ ဒေသေယ္ယ, ဝုတ္တာ အာဒိစ္စဗန္ဓုနာတိ ဧတ္ထ ‘‘ဒေသေယ္ယာတိ ဝုတ္တာ’’တိ ဣတိ-သဒ္ဒံ အဇ္ဈာဟရိတ္ဝာ ယောဇေတဗ္ဗံ။ ဧဝံ သေသေသုပိ။
Pāḷiyaṃ ekavācāya deseyya, vuttā ādiccabandhunāti ettha ‘‘deseyyāti vuttā’’ti iti-saddaṃ ajjhāharitvā yojetabbaṃ. Evaṃ sesesupi.
ဘေဒာနုဝတ္တကာနန္တိ ဧတ္ထ အာဒိ-သဒ္ဒော လုတ္တနိဒ္ဒိဋ္ဌော။ ယာဝတတိယကာ စ သဗ္ဗေ ဥဘတောဝိဘင္ဂေ အာဂတာ, သင္ဃာဒိသေသသာမညေန ဧကံ, ပာစိတ္တိယသာမညေန စ ဧကံ ကတ္ဝာ ‘‘ယာဝတတိယကေ တိသ္သော’’တိ ဝုတ္တန္တိ ဒဋ္ဌဗ္ဗံ။ ဧတ္ထ စ ဉတ္တိယာ ဒုက္ကဋံ, ဒ္ဝီဟိ ကမ္မဝာစာဟိ ထုလ္လစ္စယာပိ သန္တိ ဧဝ။ တာနိ မာတိကာယ န အာဂတာနိ။ မာတိကာဂတဝသေန ဟေတ္ထ ‘‘တိသ္သော’’တိ ဝုတ္တံ။
Bhedānuvattakānanti ettha ādi-saddo luttaniddiṭṭho. Yāvatatiyakā ca sabbe ubhatovibhaṅge āgatā, saṅghādisesasāmaññena ekaṃ, pācittiyasāmaññena ca ekaṃ katvā ‘‘yāvatatiyake tisso’’ti vuttanti daṭṭhabbaṃ. Ettha ca ñattiyā dukkaṭaṃ, dvīhi kammavācāhi thullaccayāpi santi eva. Tāni mātikāya na āgatāni. Mātikāgatavasena hettha ‘‘tisso’’ti vuttaṃ.
သင္ဃာဒီဟီတိ သင္ဃဂဏပုဂ္ဂလေဟိ ကာရဏဘူတေဟိ။ အဗ္ဘုဏ္ဟသီလောတိ ပရိသုဒ္ဓဘာဝူပဂမနေန အဘိနဝုပ္ပန္နသီလော။ အဘိနဝုပ္ပန္နဉ္ဟိ ‘‘အဗ္ဘုဏ္ဟ’’န္တိ ဝုစ္စတိ, ပရိသုဒ္ဓသီလောတိ အတ္ထော။ တေနာဟ ‘‘ပာကတိကော’’တိ။
Saṅghādīhīti saṅghagaṇapuggalehi kāraṇabhūtehi. Abbhuṇhasīloti parisuddhabhāvūpagamanena abhinavuppannasīlo. Abhinavuppannañhi ‘‘abbhuṇha’’nti vuccati, parisuddhasīloti attho. Tenāha ‘‘pākatiko’’ti.
‘‘ကောသမ္ဗကက္ခန္ဓကေ ဝုတ္တာနိသံသေ’’တိ ဣဒံ ကောသမ္ဗကက္ခန္ဓကေ ‘‘သစေ မံ ဣမေ ဘိက္ခူ အာပတ္တိယာ အဒသ္သနေ ဥက္ခိပိသ္သန္တိ, န မယာ သဒ္ဓိံ ဥပောသထံ ကရိသ္သန္တီ’’တိအာဒိနာ အာပတ္တိယာ အဒသ္သနေ အာဒီနဝံ ဒသ္သေတ္ဝာ ပရေသမ္ပိ သဒ္ဓာယ အာပတ္တိဒေသနာဝိဓာနမုခေန သာမတ္ထိယတော ပကာသိတော။ ဧကတော ဥပောသထကရဏ, ပဝာရဏာကရဏ, သင္ဃကမ္မကရဏ, အာသနေနိသီဒန, ယာဂုပာနေနိသီဒန, ဘတ္တဂ္ဂေနိသီဒန, ဧကစ္ဆန္နေသယန, ယထာဝုဍ္ဎအဘိဝာဒနာဒိကရဏသင္ခာတေ အဋ္ဌာနိသံသေ သန္ဓာယ ဝုတ္တံ။
‘‘Kosambakakkhandhake vuttānisaṃse’’ti idaṃ kosambakakkhandhake ‘‘sace maṃ ime bhikkhū āpattiyā adassane ukkhipissanti, na mayā saddhiṃ uposathaṃ karissantī’’tiādinā āpattiyā adassane ādīnavaṃ dassetvā paresampi saddhāya āpattidesanāvidhānamukhena sāmatthiyato pakāsito. Ekato uposathakaraṇa, pavāraṇākaraṇa, saṅghakammakaraṇa, āsanenisīdana, yāgupānenisīdana, bhattaggenisīdana, ekacchannesayana, yathāvuḍḍhaabhivādanādikaraṇasaṅkhāte aṭṭhānisaṃse sandhāya vuttaṃ.
စတုန္နန္တိ ဝိနယပိဋကေ အာဂတာနံ ဝသေန ဝုတ္တံ။ ကတမာ ပန သာတိ သာ စတုဗ္ဗိဓာ အစ္စယဒေသနာ ကတမာတိ အတ္ထော။ အဘိမာရာနန္တိ မာရဏတ္ထာယ ပယောဇိတဓနုဂ္ဂဟာနံ။ ဥပဋ္ဌာယိကာယာတိ သဟသေယ္ယသိက္ခာပဒဝတ္ထုသ္မိံ အာဂတာယ။
Catunnanti vinayapiṭake āgatānaṃ vasena vuttaṃ. Katamā pana sāti sā catubbidhā accayadesanā katamāti attho. Abhimārānanti māraṇatthāya payojitadhanuggahānaṃ. Upaṭṭhāyikāyāti sahaseyyasikkhāpadavatthusmiṃ āgatāya.
အဋ္ဌန္နံ ဘိက္ခုနီနန္တိ ထေရာသနတော ပဋ္ဌာယ အဋ္ဌဟိ ဘိက္ခုနီဟိ ဣတရာယ အာဂတာယ ဝုဍ္ဎာယ ဘိက္ခုနိယာ အာသနံ ဒာတဗ္ဗံ။ အဋ္ဌန္နံ ပန ဘိက္ခုနီနံ နဝကာယ အာဂတာယ အဒာတုမ္ပိ ဝဋ္ဋတိ။ တာယ ပန သင္ဃနဝကာသနေ လဒ္ဓောကာသေ နိသီဒိတဗ္ဗံ။ အထ ဝာ အဋ္ဌန္နံ ဝုဍ္ဎာနံ ဘိက္ခုနီနံ ဣတရာယ နဝကတရာယ အာသနံ ဒာတဗ္ဗံ။ ကမ္မာနိ နဝာတိ ဩသာရဏာဒီနိ နဝ ဧဝ။
Aṭṭhannaṃ bhikkhunīnanti therāsanato paṭṭhāya aṭṭhahi bhikkhunīhi itarāya āgatāya vuḍḍhāya bhikkhuniyā āsanaṃ dātabbaṃ. Aṭṭhannaṃ pana bhikkhunīnaṃ navakāya āgatāya adātumpi vaṭṭati. Tāya pana saṅghanavakāsane laddhokāse nisīditabbaṃ. Atha vā aṭṭhannaṃ vuḍḍhānaṃ bhikkhunīnaṃ itarāya navakatarāya āsanaṃ dātabbaṃ. Kammāni navāti osāraṇādīni nava eva.
ပာစိတ္တိယဝဏ္ဏနာ နိဋ္ဌိတာ။
Pācittiyavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / ပရိဝာရပာဠိ • Parivārapāḷi / ၃. ပာစိတ္တိယံ • 3. Pācittiyaṃ
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / ပရိဝာရ-အဋ္ဌကထာ • Parivāra-aṭṭhakathā / (၃) ပာစိတ္တိယဝဏ္ဏနာ • (3) Pācittiyavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ပာစိတ္တိယဝဏ္ဏနာ • Pācittiyavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / ပာစိတ္တိယဝဏ္ဏနာ • Pācittiyavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / (၃) ပာစိတ္တိယဝဏ္ဏနာ • (3) Pācittiyavaṇṇanā
