| Library / Tipiṭaka / ತಿಪಿಟಕ • Tipiṭaka / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi |
(೩) ಪಾಚಿತ್ತಿಯವಣ್ಣನಾ
(3) Pācittiyavaṇṇanā
೪೭೬. ಪಞ್ಚ ಭೇಸಜ್ಜಾನೀತಿ ಸಬ್ಬಿಆದೀನಿ ಪಞ್ಚ ಭೇಸಜ್ಜಾನಿ। ಇಮಂ ಆಪತ್ತಿನ್ತಿ ಸಮ್ಬನ್ಧೋ। ಪಚ್ಛಾ ಆಪನ್ನೋತಿ ಯೋಜನಾ।
476.Pañca bhesajjānīti sabbiādīni pañca bhesajjāni. Imaṃ āpattinti sambandho. Pacchā āpannoti yojanā.
ಏಕಂ ಕಬಳನ್ತಿ ಏಕಂ ಆಲೋಪಂ, ತುಮ್ಹಮೂಲೇತಿ ತುಮ್ಹಂ ಸನ್ತಿಕೇ।
Ekaṃkabaḷanti ekaṃ ālopaṃ, tumhamūleti tumhaṃ santike.
ಯಥಾವತ್ಥುಕನ್ತಿ ವತ್ಥುಅನುಲೋಮಂ, ಆಪತ್ತಿಯೋ ದೇಸಿತಾವ ಹೋನ್ತೀತಿ ಯೋಜನಾ।
Yathāvatthukanti vatthuanulomaṃ, āpattiyo desitāva hontīti yojanā.
ಕೋಕಾಲಿಕಾದೀನನ್ತಿಆದಿಸದ್ದೇನ ಕಟಮೋದಕತಿಸ್ಸಕಾದಯೋ (ಪಾರಾ॰ ೪೧೭) ಸಙ್ಗಣ್ಹಾತಿ। ಪಾಪಿಕಾಯ ದಿಟ್ಠಿಯಾ ಅಪ್ಪಟಿನಿಸ್ಸಗ್ಗೇ ಪಾಚಿತ್ತಿಯಞ್ಚ ಚಣ್ಡಕಾಳಿಕಾಯ ಭಿಕ್ಖುನಿಯಾ ಪಾಚಿತ್ತಿಯಞ್ಚಾತಿ ಯೋಜನಾ। ಪಯುತ್ತವಾಚಾಪಚ್ಚಯಾತಿ ವಿಞ್ಞತ್ತಿನಿಮಿತ್ತಾದೀಹಿ ಪಕಾರೇನ ಯುತ್ತಾಯ ವಾಚಾಯ ಪಚ್ಚಯಾ। ಆಪತ್ತಿ ಪಾರಾಜಿಕಸ್ಸಾತಿ ಪಾರಾಜಿಕಸ್ಸ ಆಪಜ್ಜನಂ। ಅಥವಾ ಪಾರಾಜಿಕಸ್ಸಾತಿ ಅಸ್ಸ ಭಿಕ್ಖುಸ್ಸ ಪಾರಾಜಿಕಾ ಆಪತ್ತಿ ಹೋತೀತಿ ವಾ ಪಾರಾಜಿಕಾ ಆಪತ್ತಿ ಅಸ್ಸ ಭವತೀತಿ ವಾ ಯೋಜನಾ ಕಾತಬ್ಬಾ। ಇತೀತಿ ಇಮಾ ಛ ಆಪತ್ತಿಯೋ ಆಪಜ್ಜತೀತಿ ಯೋಜನಾ।
Kokālikādīnantiādisaddena kaṭamodakatissakādayo (pārā. 417) saṅgaṇhāti. Pāpikāya diṭṭhiyā appaṭinissagge pācittiyañca caṇḍakāḷikāya bhikkhuniyā pācittiyañcāti yojanā. Payuttavācāpaccayāti viññattinimittādīhi pakārena yuttāya vācāya paccayā. Āpatti pārājikassāti pārājikassa āpajjanaṃ. Athavā pārājikassāti assa bhikkhussa pārājikā āpatti hotīti vā pārājikā āpatti assa bhavatīti vā yojanā kātabbā. Itīti imā cha āpattiyo āpajjatīti yojanā.
ಭೋಜನಂ ಗಹೇತ್ವಾ ಅಜ್ಝೋಹರಮಾನಾತಿ ಸಮ್ಬನ್ಧೋ। ತಥೇವಾತಿ ಯಥಾ ಖಾದನೇ, ತಥೇವ ಮಂಸಂ ಲಸುಣಂ ಅಜ್ಝೋಹರಮಾನಾತಿ ಯೋಜನಾ। ‘‘ಪಣೀತಭೋಜನಾನೀ’’ತಿ ಚ ‘‘ಅಕಪ್ಪಿಯಮಂಸ’’ನ್ತಿ ಚ ಪದಾನಿ ‘‘ಅಜ್ಝೋಹರಮಾನಾ’’ತಿ ಪದೇನ ಸಮ್ಬನ್ಧಿತಬ್ಬಾನಿ।
Bhojanaṃ gahetvā ajjhoharamānāti sambandho. Tathevāti yathā khādane, tatheva maṃsaṃ lasuṇaṃ ajjhoharamānāti yojanā. ‘‘Paṇītabhojanānī’’ti ca ‘‘akappiyamaṃsa’’nti ca padāni ‘‘ajjhoharamānā’’ti padena sambandhitabbāni.
ಪಞ್ಚ ಠಾನಾನೀತಿ ಪಞ್ಚ ಆಪತ್ತಿಸಙ್ಖಾತಾನಿ ಠಾನಾನಿ। ತತ್ಥಾತಿ ಪಞ್ಚಸು ಸಹಧಮ್ಮಿಕೇಸು। ದ್ವಿನ್ನನ್ತಿ ಭಿಕ್ಖುಭಿಕ್ಖುನೀನಂ। ತೇಸನ್ತಿ ಸಿಕ್ಖಮಾನಾದೀನಂ। ಪಞ್ಚನ್ನಮೇವಾತಿ ಸಹಧಮ್ಮಿಕಾನಂಯೇವ। ವಿನಿಚ್ಛಯವೋಹಾರೋತಿ ವಿನಿಚ್ಛಯವಚನಂ। ಇಮಿನಾ ಚತ್ತಾರಿ ಅಧಿಕರಣಾನಿ ಪಟಿಕ್ಖಿಪತಿ। ಅಡ್ಡಕಮ್ಮಂ ನಾಮಾತಿ ಅಭಿಯುಞ್ಜನ್ತಾನಂ ಕಮ್ಮಂ ನಾಮ।
Pañca ṭhānānīti pañca āpattisaṅkhātāni ṭhānāni. Tatthāti pañcasu sahadhammikesu. Dvinnanti bhikkhubhikkhunīnaṃ. Tesanti sikkhamānādīnaṃ. Pañcannamevāti sahadhammikānaṃyeva. Vinicchayavohāroti vinicchayavacanaṃ. Iminā cattāri adhikaraṇāni paṭikkhipati. Aḍḍakammaṃ nāmāti abhiyuñjantānaṃ kammaṃ nāma.
‘‘ಸಹಧಮ್ಮಿಕಾನ’’ನ್ತಿ ಇಮಿನಾ ಪಞ್ಜನ್ನಂ ವಿನಿಚ್ಛಯೋತಿ ಏತ್ಥ ಪಞ್ಚಸರೂಪಂ ದಸ್ಸೇತಿ। ಸೋಭಣಭಾವಂ ವಿತ್ಥಾರೇನ್ತೋ ಆಹ ‘‘ಕತವೀತಿಕ್ಕಮೋ ಹೀ’’ತಿಆದಿ। ಅಬ್ಭುಣ್ಹಸೀಲೋತಿ ಅಭಿನವುಪ್ಪನ್ನಸೀಲೋ। ಅಬ್ಭುಣ್ಹಸೀಲೋ ನಾಮ ಅತ್ಥತೋ ಪಾಕತಿಕಸೀಲೋತಿ ಆಹ ‘‘ಪಾಕತಿಕೋ’’ತಿ, ಪಕತಿಸೀಲೇನ ನಿಯುತ್ತೋತಿ ಅತ್ಥೋ।
‘‘Sahadhammikāna’’nti iminā pañjannaṃ vinicchayoti ettha pañcasarūpaṃ dasseti. Sobhaṇabhāvaṃ vitthārento āha ‘‘katavītikkamo hī’’tiādi. Abbhuṇhasīloti abhinavuppannasīlo. Abbhuṇhasīlo nāma atthato pākatikasīloti āha ‘‘pākatiko’’ti, pakatisīlena niyuttoti attho.
‘‘ಕಾಯದ್ವಾರಸಮ್ಭವಾ’’ತಿ ಇಮಿನಾ ಕಾಯಿಕಾತಿ ಪದಸ್ಸ ತದ್ಧಿತಭಾವಂ ದಸ್ಸೇತಿ। ಮುಖಂ ಓಲೋಕೇತಬ್ಬನ್ತಿ ಏತ್ಥ ವುತ್ತಾತಿ ಸಮ್ಬನ್ಧೋ।
‘‘Kāyadvārasambhavā’’ti iminā kāyikāti padassa taddhitabhāvaṃ dasseti. Mukhaṃ oloketabbanti ettha vuttāti sambandho.
ಚತುನ್ನಂ ದೇಸನಾಯ ಚಾತಿ ಏತ್ಥ ‘‘ದೇಸನಾಯಾ’’ತಿ ಪದಂ ಆದಿಪದಲೋಪನ್ತಿ ಆಹ ‘‘ಅಚ್ಚಯದೇಸನಾಯಾ’’ತಿ। ಸಾತಿ ಅಚ್ಚಯದೇಸನಾ। ಅಭಿನಿಲೀಯಿತ್ವಾ ಧನುನಾ ಮಾರೇನ್ತೀತಿ ಅಭಿಮಾರಾ।
Catunnaṃ desanāya cāti ettha ‘‘desanāyā’’ti padaṃ ādipadalopanti āha ‘‘accayadesanāyā’’ti. Sāti accayadesanā. Abhinilīyitvā dhanunā mārentīti abhimārā.
ಛೇಜ್ಜಂ ಹೋತೀತಿ ಏತ್ಥ ಛೇಜ್ಜಂ ನಾಮ ಪಾರಾಜಿಕಾಪಜ್ಜನಮೇವಾತಿ ಆಹ ‘‘ದೇವದತ್ತೋ ವಿಯ ಪಾರಾಜಿಕಂ ಆಪಜ್ಜತೀ’’ತಿ। ಇಮಾ ಪನ ಆಪತ್ತಿಯೋತಿ ಪಾರಾಜಿಕಥುಲ್ಲಚ್ಚಯಾಪತ್ತಿಯೋ।
Chejjaṃhotīti ettha chejjaṃ nāma pārājikāpajjanamevāti āha ‘‘devadatto viya pārājikaṃ āpajjatī’’ti. Imā pana āpattiyoti pārājikathullaccayāpattiyo.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಪರಿವಾರಪಾಳಿ • Parivārapāḷi / ೩. ಪಾಚಿತ್ತಿಯಂ • 3. Pācittiyaṃ
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಪರಿವಾರ-ಅಟ್ಠಕಥಾ • Parivāra-aṭṭhakathā / (೩) ಪಾಚಿತ್ತಿಯವಣ್ಣನಾ • (3) Pācittiyavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ಪಾಚಿತ್ತಿಯವಣ್ಣನಾ • Pācittiyavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ಪಾಚಿತ್ತಿಯವಣ್ಣನಾ • Pācittiyavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ಪಾಚಿತ್ತಿಯವಣ್ಣನಾ • Pācittiyavaṇṇanā
