| Library / Tipiṭaka / ತಿಪಿಟಕ • Tipiṭaka / ವಿಮತಿವಿನೋದನೀ-ಟೀಕಾ • Vimativinodanī-ṭīkā |
ಪಾಚಿತ್ತಿಯವಣ್ಣನಾ
Pācittiyavaṇṇanā
೪೭೬. ಸಬ್ಬಾನಿ ನಾನಾವತ್ಥುಕಾನೀತಿ ಸಪ್ಪಿನವನೀತಾದೀನಂ ಪಞ್ಚನ್ನಂ ವತ್ಥೂನಂ ಭೇದೇನ ಪಾಚಿತ್ತಿಯಾನಿ ಪಞ್ಚ ನಾನಾವತ್ಥುಕಾನಿ। ಏಸ ನಯೋ ಪಣೀತಭೋಜನವಿಸಯೇ ನವ ಪಾಚಿತ್ತಿಯಾನೀತಿಆದೀಸುಪಿ। ಏತೇನ ಭೇಸಜ್ಜಪಣೀತಭೋಜನಸಿಕ್ಖಾಪದಾನಿ ಏಕೇಕಸಿಕ್ಖಾಪದವಸೇನ ಪಞ್ಞತ್ತಾನಿಪಿ ವತ್ಥುಭೇದೇನ ಪಚ್ಚೇಕಂ ಪಞ್ಚಸಿಕ್ಖಾಪದನವಸಿಕ್ಖಾಪದಸದಿಸಾನಿ ಭಿಕ್ಖುನೀನಂ ಪಾಟಿದೇಸನೀಯಾಪತ್ತಿಯೋ ವಿಯಾತಿ ದಸ್ಸೇತಿ। ತೇನೇವ ‘‘ನಾನಾವತ್ಥುಕಾನೀ’’ತಿ ವುತ್ತಂ। ಸಪ್ಪಿಂ ಏವ ಪಟಿಗ್ಗಹೇತ್ವಾ ಅನೇಕಭಾಜನೇಸು ಠಪೇತ್ವಾ ಸತ್ತಾಹಂ ಅತಿಕ್ಕಾಮೇನ್ತಸ್ಸ ಭಾಜನಗಣನಾಯ ಸಮ್ಭವನ್ತಿಯೋ ಬಹುಕಾಪಿ ಆಪತ್ತಿಯೋ ಏಕವತ್ಥುಕಾ ಏವ ಹೋನ್ತಿ, ಏವಂ ಸಪ್ಪಿಭೋಜನಮೇವ ಬಹೂಸು ಠಾನೇಸು ವಿಞ್ಞಾಪೇತ್ವಾ ಏಕತೋ ವಾ ವಿಸುಂ ವಿಸುಮೇವ ವಾ ಭುಞ್ಜನ್ತಸ್ಸ ಆಪತ್ತಿಯೋ ಏಕವತ್ಥುಕಾ ಏವಾತಿ ದಟ್ಠಬ್ಬಾ।
476.Sabbāninānāvatthukānīti sappinavanītādīnaṃ pañcannaṃ vatthūnaṃ bhedena pācittiyāni pañca nānāvatthukāni. Esa nayo paṇītabhojanavisaye nava pācittiyānītiādīsupi. Etena bhesajjapaṇītabhojanasikkhāpadāni ekekasikkhāpadavasena paññattānipi vatthubhedena paccekaṃ pañcasikkhāpadanavasikkhāpadasadisāni bhikkhunīnaṃ pāṭidesanīyāpattiyo viyāti dasseti. Teneva ‘‘nānāvatthukānī’’ti vuttaṃ. Sappiṃ eva paṭiggahetvā anekabhājanesu ṭhapetvā sattāhaṃ atikkāmentassa bhājanagaṇanāya sambhavantiyo bahukāpi āpattiyo ekavatthukā eva honti, evaṃ sappibhojanameva bahūsu ṭhānesu viññāpetvā ekato vā visuṃ visumeva vā bhuñjantassa āpattiyo ekavatthukā evāti daṭṭhabbā.
ಪಾಳಿಯಂ ಏಕವಾಚಾಯ ದೇಸೇಯ್ಯ, ವುತ್ತಾ ಆದಿಚ್ಚಬನ್ಧುನಾತಿ ಏತ್ಥ ‘‘ದೇಸೇಯ್ಯಾತಿ ವುತ್ತಾ’’ತಿ ಇತಿ-ಸದ್ದಂ ಅಜ್ಝಾಹರಿತ್ವಾ ಯೋಜೇತಬ್ಬಂ। ಏವಂ ಸೇಸೇಸುಪಿ।
Pāḷiyaṃ ekavācāya deseyya, vuttā ādiccabandhunāti ettha ‘‘deseyyāti vuttā’’ti iti-saddaṃ ajjhāharitvā yojetabbaṃ. Evaṃ sesesupi.
ಭೇದಾನುವತ್ತಕಾನನ್ತಿ ಏತ್ಥ ಆದಿ-ಸದ್ದೋ ಲುತ್ತನಿದ್ದಿಟ್ಠೋ। ಯಾವತತಿಯಕಾ ಚ ಸಬ್ಬೇ ಉಭತೋವಿಭಙ್ಗೇ ಆಗತಾ, ಸಙ್ಘಾದಿಸೇಸಸಾಮಞ್ಞೇನ ಏಕಂ, ಪಾಚಿತ್ತಿಯಸಾಮಞ್ಞೇನ ಚ ಏಕಂ ಕತ್ವಾ ‘‘ಯಾವತತಿಯಕೇ ತಿಸ್ಸೋ’’ತಿ ವುತ್ತನ್ತಿ ದಟ್ಠಬ್ಬಂ। ಏತ್ಥ ಚ ಞತ್ತಿಯಾ ದುಕ್ಕಟಂ, ದ್ವೀಹಿ ಕಮ್ಮವಾಚಾಹಿ ಥುಲ್ಲಚ್ಚಯಾಪಿ ಸನ್ತಿ ಏವ। ತಾನಿ ಮಾತಿಕಾಯ ನ ಆಗತಾನಿ। ಮಾತಿಕಾಗತವಸೇನ ಹೇತ್ಥ ‘‘ತಿಸ್ಸೋ’’ತಿ ವುತ್ತಂ।
Bhedānuvattakānanti ettha ādi-saddo luttaniddiṭṭho. Yāvatatiyakā ca sabbe ubhatovibhaṅge āgatā, saṅghādisesasāmaññena ekaṃ, pācittiyasāmaññena ca ekaṃ katvā ‘‘yāvatatiyake tisso’’ti vuttanti daṭṭhabbaṃ. Ettha ca ñattiyā dukkaṭaṃ, dvīhi kammavācāhi thullaccayāpi santi eva. Tāni mātikāya na āgatāni. Mātikāgatavasena hettha ‘‘tisso’’ti vuttaṃ.
ಸಙ್ಘಾದೀಹೀತಿ ಸಙ್ಘಗಣಪುಗ್ಗಲೇಹಿ ಕಾರಣಭೂತೇಹಿ। ಅಬ್ಭುಣ್ಹಸೀಲೋತಿ ಪರಿಸುದ್ಧಭಾವೂಪಗಮನೇನ ಅಭಿನವುಪ್ಪನ್ನಸೀಲೋ। ಅಭಿನವುಪ್ಪನ್ನಞ್ಹಿ ‘‘ಅಬ್ಭುಣ್ಹ’’ನ್ತಿ ವುಚ್ಚತಿ, ಪರಿಸುದ್ಧಸೀಲೋತಿ ಅತ್ಥೋ। ತೇನಾಹ ‘‘ಪಾಕತಿಕೋ’’ತಿ।
Saṅghādīhīti saṅghagaṇapuggalehi kāraṇabhūtehi. Abbhuṇhasīloti parisuddhabhāvūpagamanena abhinavuppannasīlo. Abhinavuppannañhi ‘‘abbhuṇha’’nti vuccati, parisuddhasīloti attho. Tenāha ‘‘pākatiko’’ti.
‘‘ಕೋಸಮ್ಬಕಕ್ಖನ್ಧಕೇ ವುತ್ತಾನಿಸಂಸೇ’’ತಿ ಇದಂ ಕೋಸಮ್ಬಕಕ್ಖನ್ಧಕೇ ‘‘ಸಚೇ ಮಂ ಇಮೇ ಭಿಕ್ಖೂ ಆಪತ್ತಿಯಾ ಅದಸ್ಸನೇ ಉಕ್ಖಿಪಿಸ್ಸನ್ತಿ, ನ ಮಯಾ ಸದ್ಧಿಂ ಉಪೋಸಥಂ ಕರಿಸ್ಸನ್ತೀ’’ತಿಆದಿನಾ ಆಪತ್ತಿಯಾ ಅದಸ್ಸನೇ ಆದೀನವಂ ದಸ್ಸೇತ್ವಾ ಪರೇಸಮ್ಪಿ ಸದ್ಧಾಯ ಆಪತ್ತಿದೇಸನಾವಿಧಾನಮುಖೇನ ಸಾಮತ್ಥಿಯತೋ ಪಕಾಸಿತೋ। ಏಕತೋ ಉಪೋಸಥಕರಣ, ಪವಾರಣಾಕರಣ, ಸಙ್ಘಕಮ್ಮಕರಣ, ಆಸನೇನಿಸೀದನ, ಯಾಗುಪಾನೇನಿಸೀದನ, ಭತ್ತಗ್ಗೇನಿಸೀದನ, ಏಕಚ್ಛನ್ನೇಸಯನ, ಯಥಾವುಡ್ಢಅಭಿವಾದನಾದಿಕರಣಸಙ್ಖಾತೇ ಅಟ್ಠಾನಿಸಂಸೇ ಸನ್ಧಾಯ ವುತ್ತಂ।
‘‘Kosambakakkhandhake vuttānisaṃse’’ti idaṃ kosambakakkhandhake ‘‘sace maṃ ime bhikkhū āpattiyā adassane ukkhipissanti, na mayā saddhiṃ uposathaṃ karissantī’’tiādinā āpattiyā adassane ādīnavaṃ dassetvā paresampi saddhāya āpattidesanāvidhānamukhena sāmatthiyato pakāsito. Ekato uposathakaraṇa, pavāraṇākaraṇa, saṅghakammakaraṇa, āsanenisīdana, yāgupānenisīdana, bhattaggenisīdana, ekacchannesayana, yathāvuḍḍhaabhivādanādikaraṇasaṅkhāte aṭṭhānisaṃse sandhāya vuttaṃ.
ಚತುನ್ನನ್ತಿ ವಿನಯಪಿಟಕೇ ಆಗತಾನಂ ವಸೇನ ವುತ್ತಂ। ಕತಮಾ ಪನ ಸಾತಿ ಸಾ ಚತುಬ್ಬಿಧಾ ಅಚ್ಚಯದೇಸನಾ ಕತಮಾತಿ ಅತ್ಥೋ। ಅಭಿಮಾರಾನನ್ತಿ ಮಾರಣತ್ಥಾಯ ಪಯೋಜಿತಧನುಗ್ಗಹಾನಂ। ಉಪಟ್ಠಾಯಿಕಾಯಾತಿ ಸಹಸೇಯ್ಯಸಿಕ್ಖಾಪದವತ್ಥುಸ್ಮಿಂ ಆಗತಾಯ।
Catunnanti vinayapiṭake āgatānaṃ vasena vuttaṃ. Katamā pana sāti sā catubbidhā accayadesanā katamāti attho. Abhimārānanti māraṇatthāya payojitadhanuggahānaṃ. Upaṭṭhāyikāyāti sahaseyyasikkhāpadavatthusmiṃ āgatāya.
ಅಟ್ಠನ್ನಂ ಭಿಕ್ಖುನೀನನ್ತಿ ಥೇರಾಸನತೋ ಪಟ್ಠಾಯ ಅಟ್ಠಹಿ ಭಿಕ್ಖುನೀಹಿ ಇತರಾಯ ಆಗತಾಯ ವುಡ್ಢಾಯ ಭಿಕ್ಖುನಿಯಾ ಆಸನಂ ದಾತಬ್ಬಂ। ಅಟ್ಠನ್ನಂ ಪನ ಭಿಕ್ಖುನೀನಂ ನವಕಾಯ ಆಗತಾಯ ಅದಾತುಮ್ಪಿ ವಟ್ಟತಿ। ತಾಯ ಪನ ಸಙ್ಘನವಕಾಸನೇ ಲದ್ಧೋಕಾಸೇ ನಿಸೀದಿತಬ್ಬಂ। ಅಥ ವಾ ಅಟ್ಠನ್ನಂ ವುಡ್ಢಾನಂ ಭಿಕ್ಖುನೀನಂ ಇತರಾಯ ನವಕತರಾಯ ಆಸನಂ ದಾತಬ್ಬಂ। ಕಮ್ಮಾನಿ ನವಾತಿ ಓಸಾರಣಾದೀನಿ ನವ ಏವ।
Aṭṭhannaṃ bhikkhunīnanti therāsanato paṭṭhāya aṭṭhahi bhikkhunīhi itarāya āgatāya vuḍḍhāya bhikkhuniyā āsanaṃ dātabbaṃ. Aṭṭhannaṃ pana bhikkhunīnaṃ navakāya āgatāya adātumpi vaṭṭati. Tāya pana saṅghanavakāsane laddhokāse nisīditabbaṃ. Atha vā aṭṭhannaṃ vuḍḍhānaṃ bhikkhunīnaṃ itarāya navakatarāya āsanaṃ dātabbaṃ. Kammāni navāti osāraṇādīni nava eva.
ಪಾಚಿತ್ತಿಯವಣ್ಣನಾ ನಿಟ್ಠಿತಾ।
Pācittiyavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಪರಿವಾರಪಾಳಿ • Parivārapāḷi / ೩. ಪಾಚಿತ್ತಿಯಂ • 3. Pācittiyaṃ
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಪರಿವಾರ-ಅಟ್ಠಕಥಾ • Parivāra-aṭṭhakathā / (೩) ಪಾಚಿತ್ತಿಯವಣ್ಣನಾ • (3) Pācittiyavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ಪಾಚಿತ್ತಿಯವಣ್ಣನಾ • Pācittiyavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ಪಾಚಿತ್ತಿಯವಣ್ಣನಾ • Pācittiyavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi / (೩) ಪಾಚಿತ್ತಿಯವಣ್ಣನಾ • (3) Pācittiyavaṇṇanā
