| Library / Tipiṭaka / තිපිටක • Tipiṭaka / විමතිවිනොදනී-ටීකා • Vimativinodanī-ṭīkā |
පාචිත්‌තියවණ්‌ණනා
Pācittiyavaṇṇanā
476. සබ්‌බානි නානාවත්‌ථුකානීති සප්‌පිනවනීතාදීනං පඤ්‌චන්‌නං වත්‌ථූනං භෙදෙන පාචිත්‌තියානි පඤ්‌ච නානාවත්‌ථුකානි. එස නයො පණීතභොජනවිසයෙ නව පාචිත්‌තියානීතිආදීසුපි. එතෙන භෙසජ්‌ජපණීතභොජනසික්‌ඛාපදානි එකෙකසික්‌ඛාපදවසෙන පඤ්‌ඤත්‌තානිපි වත්‌ථුභෙදෙන පච්‌චෙකං පඤ්‌චසික්‌ඛාපදනවසික්‌ඛාපදසදිසානි භික්‌ඛුනීනං පාටිදෙසනීයාපත්‌තියො වියාති දස්‌සෙති. තෙනෙව ‘‘නානාවත්‌ථුකානී’’ති වුත්‌තං. සප්‌පිං එව පටිග්‌ගහෙත්‌වා අනෙකභාජනෙසු ඨපෙත්‌වා සත්‌තාහං අතික්‌කාමෙන්‌තස්‌ස භාජනගණනාය සම්‌භවන්‌තියො බහුකාපි ආපත්‌තියො එකවත්‌ථුකා එව හොන්‌ති, එවං සප්‌පිභොජනමෙව බහූසු ඨානෙසු විඤ්‌ඤාපෙත්‌වා එකතො වා විසුං විසුමෙව වා භුඤ්‌ජන්‌තස්‌ස ආපත්‌තියො එකවත්‌ථුකා එවාති දට්‌ඨබ්‌බා.
476.Sabbāninānāvatthukānīti sappinavanītādīnaṃ pañcannaṃ vatthūnaṃ bhedena pācittiyāni pañca nānāvatthukāni. Esa nayo paṇītabhojanavisaye nava pācittiyānītiādīsupi. Etena bhesajjapaṇītabhojanasikkhāpadāni ekekasikkhāpadavasena paññattānipi vatthubhedena paccekaṃ pañcasikkhāpadanavasikkhāpadasadisāni bhikkhunīnaṃ pāṭidesanīyāpattiyo viyāti dasseti. Teneva ‘‘nānāvatthukānī’’ti vuttaṃ. Sappiṃ eva paṭiggahetvā anekabhājanesu ṭhapetvā sattāhaṃ atikkāmentassa bhājanagaṇanāya sambhavantiyo bahukāpi āpattiyo ekavatthukā eva honti, evaṃ sappibhojanameva bahūsu ṭhānesu viññāpetvā ekato vā visuṃ visumeva vā bhuñjantassa āpattiyo ekavatthukā evāti daṭṭhabbā.
පාළියං එකවාචාය දෙසෙය්‍ය, වුත්‌තා ආදිච්‌චබන්‌ධුනාති එත්‌ථ ‘‘දෙසෙය්‍යාති වුත්‌තා’’ති ඉති-සද්‌දං අජ්‌ඣාහරිත්‌වා යොජෙතබ්‌බං. එවං සෙසෙසුපි.
Pāḷiyaṃ ekavācāya deseyya, vuttā ādiccabandhunāti ettha ‘‘deseyyāti vuttā’’ti iti-saddaṃ ajjhāharitvā yojetabbaṃ. Evaṃ sesesupi.
භෙදානුවත්‌තකානන්‌ති එත්‌ථ ආදි-සද්‌දො ලුත්‌තනිද්‌දිට්‌ඨො. යාවතතියකා ච සබ්‌බෙ උභතොවිභඞ්‌ගෙ ආගතා, සඞ්‌ඝාදිසෙසසාමඤ්‌ඤෙන එකං, පාචිත්‌තියසාමඤ්‌ඤෙන ච එකං කත්‌වා ‘‘යාවතතියකෙ තිස්‌සො’’ති වුත්‌තන්‌ති දට්‌ඨබ්‌බං. එත්‌ථ ච ඤත්‌තියා දුක්‌කටං, ද්‌වීහි කම්‌මවාචාහි ථුල්‌ලච්‌චයාපි සන්‌ති එව. තානි මාතිකාය න ආගතානි. මාතිකාගතවසෙන හෙත්‌ථ ‘‘තිස්‌සො’’ති වුත්‌තං.
Bhedānuvattakānanti ettha ādi-saddo luttaniddiṭṭho. Yāvatatiyakā ca sabbe ubhatovibhaṅge āgatā, saṅghādisesasāmaññena ekaṃ, pācittiyasāmaññena ca ekaṃ katvā ‘‘yāvatatiyake tisso’’ti vuttanti daṭṭhabbaṃ. Ettha ca ñattiyā dukkaṭaṃ, dvīhi kammavācāhi thullaccayāpi santi eva. Tāni mātikāya na āgatāni. Mātikāgatavasena hettha ‘‘tisso’’ti vuttaṃ.
සඞ්‌ඝාදීහීති සඞ්‌ඝගණපුග්‌ගලෙහි කාරණභූතෙහි. අබ්‌භුණ්‌හසීලොති පරිසුද්‌ධභාවූපගමනෙන අභිනවුප්‌පන්‌නසීලො. අභිනවුප්‌පන්‌නඤ්‌හි ‘‘අබ්‌භුණ්‌හ’’න්‌ති වුච්‌චති, පරිසුද්‌ධසීලොති අත්‌ථො. තෙනාහ ‘‘පාකතිකො’’ති.
Saṅghādīhīti saṅghagaṇapuggalehi kāraṇabhūtehi. Abbhuṇhasīloti parisuddhabhāvūpagamanena abhinavuppannasīlo. Abhinavuppannañhi ‘‘abbhuṇha’’nti vuccati, parisuddhasīloti attho. Tenāha ‘‘pākatiko’’ti.
‘‘කොසම්‌බකක්‌ඛන්‌ධකෙ වුත්‌තානිසංසෙ’’ති ඉදං කොසම්‌බකක්‌ඛන්‌ධකෙ ‘‘සචෙ මං ඉමෙ භික්‌ඛූ ආපත්‌තියා අදස්‌සනෙ උක්‌ඛිපිස්‌සන්‌ති, න මයා සද්‌ධිං උපොසථං කරිස්‌සන්‌තී’’තිආදිනා ආපත්‌තියා අදස්‌සනෙ ආදීනවං දස්‌සෙත්‌වා පරෙසම්‌පි සද්‌ධාය ආපත්‌තිදෙසනාවිධානමුඛෙන සාමත්‌ථියතො පකාසිතො. එකතො උපොසථකරණ, පවාරණාකරණ, සඞ්‌ඝකම්‌මකරණ, ආසනෙනිසීදන, යාගුපානෙනිසීදන, භත්‌තග්‌ගෙනිසීදන, එකච්‌ඡන්‌නෙසයන, යථාවුඩ්‌ඪඅභිවාදනාදිකරණසඞ්‌ඛාතෙ අට්‌ඨානිසංසෙ සන්‌ධාය වුත්‌තං.
‘‘Kosambakakkhandhake vuttānisaṃse’’ti idaṃ kosambakakkhandhake ‘‘sace maṃ ime bhikkhū āpattiyā adassane ukkhipissanti, na mayā saddhiṃ uposathaṃ karissantī’’tiādinā āpattiyā adassane ādīnavaṃ dassetvā paresampi saddhāya āpattidesanāvidhānamukhena sāmatthiyato pakāsito. Ekato uposathakaraṇa, pavāraṇākaraṇa, saṅghakammakaraṇa, āsanenisīdana, yāgupānenisīdana, bhattaggenisīdana, ekacchannesayana, yathāvuḍḍhaabhivādanādikaraṇasaṅkhāte aṭṭhānisaṃse sandhāya vuttaṃ.
චතුන්‌නන්‌ති විනයපිටකෙ ආගතානං වසෙන වුත්‌තං. කතමා පන සාති සා චතුබ්‌බිධා අච්‌චයදෙසනා කතමාති අත්‌ථො. අභිමාරානන්‌ති මාරණත්‌ථාය පයොජිතධනුග්‌ගහානං. උපට්‌ඨායිකායාති සහසෙය්‍යසික්‌ඛාපදවත්‌ථුස්‌මිං ආගතාය.
Catunnanti vinayapiṭake āgatānaṃ vasena vuttaṃ. Katamā pana sāti sā catubbidhā accayadesanā katamāti attho. Abhimārānanti māraṇatthāya payojitadhanuggahānaṃ. Upaṭṭhāyikāyāti sahaseyyasikkhāpadavatthusmiṃ āgatāya.
අට්‌ඨන්‌නං භික්‌ඛුනීනන්‌ති ථෙරාසනතො පට්‌ඨාය අට්‌ඨහි භික්‌ඛුනීහි ඉතරාය ආගතාය වුඩ්‌ඪාය භික්‌ඛුනියා ආසනං දාතබ්‌බං. අට්‌ඨන්‌නං පන භික්‌ඛුනීනං නවකාය ආගතාය අදාතුම්‌පි වට්‌ටති. තාය පන සඞ්‌ඝනවකාසනෙ ලද්‌ධොකාසෙ නිසීදිතබ්‌බං. අථ වා අට්‌ඨන්‌නං වුඩ්‌ඪානං භික්‌ඛුනීනං ඉතරාය නවකතරාය ආසනං දාතබ්‌බං. කම්‌මානි නවාති ඔසාරණාදීනි නව එව.
Aṭṭhannaṃ bhikkhunīnanti therāsanato paṭṭhāya aṭṭhahi bhikkhunīhi itarāya āgatāya vuḍḍhāya bhikkhuniyā āsanaṃ dātabbaṃ. Aṭṭhannaṃ pana bhikkhunīnaṃ navakāya āgatāya adātumpi vaṭṭati. Tāya pana saṅghanavakāsane laddhokāse nisīditabbaṃ. Atha vā aṭṭhannaṃ vuḍḍhānaṃ bhikkhunīnaṃ itarāya navakatarāya āsanaṃ dātabbaṃ. Kammāni navāti osāraṇādīni nava eva.
පාචිත්‌තියවණ්‌ණනා නිට්‌ඨිතා.
Pācittiyavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / පරිවාරපාළි • Parivārapāḷi / 3. පාචිත්‌තියං • 3. Pācittiyaṃ
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / පරිවාර-අට්‌ඨකථා • Parivāra-aṭṭhakathā / (3) පාචිත්‌තියවණ්‌ණනා • (3) Pācittiyavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / පාචිත්‌තියවණ්‌ණනා • Pācittiyavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / පාචිත්‌තියවණ්‌ණනා • Pācittiyavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / (3) පාචිත්‌තියවණ්‌ණනා • (3) Pācittiyavaṇṇanā
