| Library / Tipiṭaka / ਤਿਪਿਟਕ • Tipiṭaka / ਪਰਿવਾਰ-ਅਟ੍ਠਕਥਾ • Parivāra-aṭṭhakathā |
(੩) ਪਾਚਿਤ੍ਤਿਯવਣ੍ਣਨਾ
(3) Pācittiyavaṇṇanā
੪੭੬. ਪਞ੍ਚ ਪਾਚਿਤ੍ਤਿਯਾਨੀਤਿ ਪਞ੍ਚ ਭੇਸਜ੍ਜਾਨਿ ਪਟਿਗ੍ਗਹੇਤ੍વਾ ਨਾਨਾਭਾਜਨੇਸੁ વਾ ਏਕਭਾਜਨੇ વਾ ਅਮਿਸ੍ਸੇਤ੍વਾ ਠਪਿਤਾਨਿ ਹੋਨ੍ਤਿ, ਸਤ੍ਤਾਹਾਤਿਕ੍ਕਮੇ ਸੋ ਭਿਕ੍ਖੁ ਪਞ੍ਚ ਪਾਚਿਤ੍ਤਿਯਾਨਿ ਸਬ੍ਬਾਨਿ ਨਾਨਾવਤ੍ਥੁਕਾਨਿ ਏਕਕ੍ਖਣੇ ਆਪਜ੍ਜਤਿ, ‘‘ਇਮਂ ਪਠਮਂ ਆਪਨ੍ਨੋ, ਇਮਂ ਪਚ੍ਛਾ’’ਤਿ ਨ વਤ੍ਤਬ੍ਬੋ।
476.Pañca pācittiyānīti pañca bhesajjāni paṭiggahetvā nānābhājanesu vā ekabhājane vā amissetvā ṭhapitāni honti, sattāhātikkame so bhikkhu pañca pācittiyāni sabbāni nānāvatthukāni ekakkhaṇe āpajjati, ‘‘imaṃ paṭhamaṃ āpanno, imaṃ pacchā’’ti na vattabbo.
ਨવ ਪਾਚਿਤ੍ਤਿਯਾਨੀਤਿ ਯੋ ਭਿਕ੍ਖੁ ਨવ ਪਣੀਤਭੋਜਨਾਨਿ વਿਞ੍ਞਾਪੇਤ੍વਾ ਤੇਹਿ ਸਦ੍ਧਿਂ ਏਕਤੋ ਏਕਂ ਕਬਲ਼ਂ ਓਮਦ੍ਦਿਤ੍વਾ ਮੁਖੇ ਪਕ੍ਖਿਪਿਤ੍વਾ ਪਰਗਲ਼ਂ ਅਤਿਕ੍ਕਾਮੇਤਿ, ਅਯਂ ਨવ ਪਾਚਿਤ੍ਤਿਯਾਨਿ ਸਬ੍ਬਾਨਿ ਨਾਨਾવਤ੍ਥੁਕਾਨਿ ਏਕਕ੍ਖਣੇ ਆਪਜ੍ਜਤਿ ‘‘ਇਮਂ ਪਠਮਂ ਆਪਨ੍ਨੋ, ਇਮਂ ਪਚ੍ਛਾ’’ਤਿ ਨ વਤ੍ਤਬ੍ਬੋ। ਏਕવਾਚਾਯ ਦੇਸੇਯ੍ਯਾਤਿ ‘‘ਅਹਂ, ਭਨ੍ਤੇ, ਪਞ੍ਚ ਭੇਸਜ੍ਜਾਨਿ ਪਟਿਗ੍ਗਹੇਤ੍વਾ ਸਤ੍ਤਾਹਂ ਅਤਿਕ੍ਕਾਮੇਤ੍વਾ ਪਞ੍ਚ ਆਪਤ੍ਤਿਯੋ ਆਪਨ੍ਨੋ, ਤਾ ਤੁਮ੍ਹਮੂਲੇ ਪਟਿਦੇਸੇਮੀ’’ਤਿ ਏવਂ ਏਕવਾਚਾਯ ਦੇਸੇਯ੍ਯ, ਦੇਸਿਤਾવ ਹੋਨ੍ਤਿ, ਦ੍વੀਹਿ ਤੀਹਿ વਾਚਾਹਿ ਕਿਚ੍ਚਂ ਨਾਮ ਨਤ੍ਥਿ। ਦੁਤਿਯવਿਸ੍ਸਜ੍ਜਨੇਪਿ ‘‘ਅਹਂ, ਭਨ੍ਤੇ, ਨવ ਪਣੀਤਭੋਜਨਾਨਿ વਿਞ੍ਞਾਪੇਤ੍વਾ ਭੁਞ੍ਜਿਤ੍વਾ ਨવ ਆਪਤ੍ਤਿਯੋ ਆਪਨ੍ਨੋ, ਤਾ ਤੁਮ੍ਹਮੂਲੇ ਪਟਿਦੇਸੇਮੀ’’ਤਿ વਤ੍ਤਬ੍ਬਂ।
Nava pācittiyānīti yo bhikkhu nava paṇītabhojanāni viññāpetvā tehi saddhiṃ ekato ekaṃ kabaḷaṃ omadditvā mukhe pakkhipitvā paragaḷaṃ atikkāmeti, ayaṃ nava pācittiyāni sabbāni nānāvatthukāni ekakkhaṇe āpajjati ‘‘imaṃ paṭhamaṃ āpanno, imaṃ pacchā’’ti na vattabbo. Ekavācāya deseyyāti ‘‘ahaṃ, bhante, pañca bhesajjāni paṭiggahetvā sattāhaṃ atikkāmetvā pañca āpattiyo āpanno, tā tumhamūle paṭidesemī’’ti evaṃ ekavācāya deseyya, desitāva honti, dvīhi tīhi vācāhi kiccaṃ nāma natthi. Dutiyavissajjanepi ‘‘ahaṃ, bhante, nava paṇītabhojanāni viññāpetvā bhuñjitvā nava āpattiyo āpanno, tā tumhamūle paṭidesemī’’ti vattabbaṃ.
વਤ੍ਥੁਂ ਕਿਤ੍ਤੇਤ੍વਾ ਦੇਸੇਯ੍ਯਾਤਿ ‘‘ਅਹਂ, ਭਨ੍ਤੇ, ਪਞ੍ਚ ਭੇਸਜ੍ਜਾਨਿ ਪਟਿਗ੍ਗਹੇਤ੍વਾ ਸਤ੍ਤਾਹਂ ਅਤਿਕ੍ਕਾਮੇਸਿਂ, ਯਥਾવਤ੍ਥੁਕਂ ਤਂ ਤੁਮ੍ਹਮੂਲੇ ਪਟਿਦੇਸੇਮੀ’’ਤਿ ਏવਂ વਤ੍ਥੁਂ ਕਿਤ੍ਤੇਤ੍વਾ ਦੇਸੇਯ੍ਯ, ਦੇਸਿਤਾવ ਹੋਨ੍ਤਿ ਆਪਤ੍ਤਿਯੋ, ਆਪਤ੍ਤਿਯਾ ਨਾਮਗ੍ਗਹਣੇਨ ਕਿਚ੍ਚਂ ਨਤ੍ਥਿ। ਦੁਤਿਯવਿਸ੍ਸਜ੍ਜਨੇਪਿ ‘‘ਅਹਂ, ਭਨ੍ਤੇ, ਨવ ਪਣੀਤਭੋਜਨਾਨਿ વਿਞ੍ਞਾਪੇਤ੍વਾ ਭੁਤ੍ਤੋ, ਯਥਾવਤ੍ਥੁਕਂ ਤਂ ਤੁਮ੍ਹਮੂਲੇ ਪਟਿਦੇਸੇਮੀ’’ਤਿ વਤ੍ਤਬ੍ਬਂ।
Vatthuṃ kittetvā deseyyāti ‘‘ahaṃ, bhante, pañca bhesajjāni paṭiggahetvā sattāhaṃ atikkāmesiṃ, yathāvatthukaṃ taṃ tumhamūle paṭidesemī’’ti evaṃ vatthuṃ kittetvā deseyya, desitāva honti āpattiyo, āpattiyā nāmaggahaṇena kiccaṃ natthi. Dutiyavissajjanepi ‘‘ahaṃ, bhante, nava paṇītabhojanāni viññāpetvā bhutto, yathāvatthukaṃ taṃ tumhamūle paṭidesemī’’ti vattabbaṃ.
ਯਾવਤਤਿਯਕੇ ਤਿਸ੍ਸੋਤਿ ਉਕ੍ਖਿਤ੍ਤਾਨੁવਤ੍ਤਿਕਾਯ ਪਾਰਾਜਿਕਂ ਭੇਦਕਾਨੁવਤ੍ਤਕਾਨਂ ਕੋਕਾਲਿਕਾਦੀਨਂ ਸਙ੍ਘਾਦਿਸੇਸਂ, ਪਾਪਿਕਾਯ ਦਿਟ੍ਠਿਯਾ ਅਪ੍ਪਟਿਨਿਸ੍ਸਗ੍ਗੇ ਚਣ੍ਡਕਾਲ਼ਿਕਾਯ ਚ ਭਿਕ੍ਖੁਨਿਯਾ ਪਾਚਿਤ੍ਤਿਯਨ੍ਤਿ ਇਮਾ ਯਾવਤਤਿਯਕਾ ਤਿਸ੍ਸੋ ਆਪਤ੍ਤਿਯੋ। ਛ વੋਹਾਰਪਚ੍ਚਯਾਤਿ ਪਯੁਤ੍ਤવਾਚਾਪਚ੍ਚਯਾ ਛ ਆਪਤ੍ਤਿਯੋ ਆਪਜ੍ਜਤੀਤਿ ਅਤ੍ਥੋ। ਕਥਂ? ਆਜੀવਹੇਤੁ ਆਜੀવਕਾਰਣਾ ਪਾਪਿਚ੍ਛੋ ਇਚ੍ਛਾਪਕਤੋ ਅਸਨ੍ਤਂ ਅਭੂਤਂ ਉਤ੍ਤਰਿਮਨੁਸ੍ਸਧਮ੍ਮਂ ਉਲ੍ਲਪਤਿ, ਆਪਤ੍ਤਿ ਪਾਰਾਜਿਕਸ੍ਸ। ਆਜੀવਹੇਤੁ ਆਜੀવਕਾਰਣਾ ਸਞ੍ਚਰਿਤ੍ਤਂ ਸਮਾਪਜ੍ਜਤਿ, ਆਪਤ੍ਤਿ ਸਙ੍ਘਾਦਿਸੇਸਸ੍ਸ। ਆਜੀવਹੇਤੁ ਆਜੀવਕਾਰਣਾ ਯੋ ਤੇ વਿਹਾਰੇ વਸਤਿ ਸੋ ਅਰਹਾਤਿ વਦਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ। ਆਜੀવਹੇਤੁ ਆਜੀવਕਾਰਣਾ ਭਿਕ੍ਖੁ ਪਣੀਤਭੋਜਨਾਨਿ ਅਤ੍ਤਨੋ ਅਤ੍ਥਾਯ વਿਞ੍ਞਾਪੇਤ੍વਾ ਭੁਞ੍ਜਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ। ਆਜੀવਹੇਤੁ ਆਜੀવਕਾਰਣਾ ਭਿਕ੍ਖੁਨੀ ਪਣੀਤਭੋਜਨਾਨਿ ਅਤ੍ਤਨੋ ਅਤ੍ਥਾਯ વਿਞ੍ਞਾਪੇਤ੍વਾ ਭੁਞ੍ਜਤਿ, ਆਪਤ੍ਤਿ ਪਾਟਿਦੇਸਨੀਯਸ੍ਸ। ਆਜੀવਹੇਤੁ ਆਜੀવਕਾਰਣਾ ਸੂਪਂ વਾ ਓਦਨਂ વਾ ਅਗਿਲਾਨੋ ਅਤ੍ਤਨੋ ਅਤ੍ਥਾਯ વਿਞ੍ਞਾਪੇਤ੍વਾ ਭੁਞ੍ਜਤਿ, ਆਪਤ੍ਤਿ ਦੁਕ੍ਕਟਸ੍ਸਾਤਿ।
Yāvatatiyake tissoti ukkhittānuvattikāya pārājikaṃ bhedakānuvattakānaṃ kokālikādīnaṃ saṅghādisesaṃ, pāpikāya diṭṭhiyā appaṭinissagge caṇḍakāḷikāya ca bhikkhuniyā pācittiyanti imā yāvatatiyakā tisso āpattiyo. Cha vohārapaccayāti payuttavācāpaccayā cha āpattiyo āpajjatīti attho. Kathaṃ? Ājīvahetu ājīvakāraṇā pāpiccho icchāpakato asantaṃ abhūtaṃ uttarimanussadhammaṃ ullapati, āpatti pārājikassa. Ājīvahetu ājīvakāraṇā sañcarittaṃ samāpajjati, āpatti saṅghādisesassa. Ājīvahetu ājīvakāraṇā yo te vihāre vasati so arahāti vadati, āpatti thullaccayassa. Ājīvahetu ājīvakāraṇā bhikkhu paṇītabhojanāni attano atthāya viññāpetvā bhuñjati, āpatti pācittiyassa. Ājīvahetu ājīvakāraṇā bhikkhunī paṇītabhojanāni attano atthāya viññāpetvā bhuñjati, āpatti pāṭidesanīyassa. Ājīvahetu ājīvakāraṇā sūpaṃ vā odanaṃ vā agilāno attano atthāya viññāpetvā bhuñjati, āpatti dukkaṭassāti.
ਖਾਦਨ੍ਤਸ੍ਸ ਤਿਸ੍ਸੋਤਿ ਮਨੁਸ੍ਸਮਂਸੇ ਥੁਲ੍ਲਚ੍ਚਯਂ, ਅવਸੇਸੇਸੁ ਅਕਪ੍ਪਿਯਮਂਸੇਸੁ ਦੁਕ੍ਕਟਂ, ਭਿਕ੍ਖੁਨਿਯਾ ਲਸੁਣੇ ਪਾਚਿਤ੍ਤਿਯਂ। ਪਞ੍ਚ ਭੋਜਨਪਚ੍ਚਯਾਤਿ ਅવਸ੍ਸੁਤਾ ਅવਸ੍ਸੁਤਸ੍ਸ ਪੁਰਿਸਸ੍ਸ ਹਤ੍ਥਤੋ ਭੋਜਨਂ ਗਹੇਤ੍વਾ ਤਤ੍ਥੇવ ਮਨੁਸ੍ਸਮਂਸਂ ਲਸੁਣਂ ਅਤ੍ਤਨੋ ਅਤ੍ਥਾਯ વਿਞ੍ਞਾਪੇਤ੍વਾ ਗਹਿਤਪਣੀਤਭੋਜਨਾਨਿ ਅવਸੇਸਞ੍ਚ ਅਕਪ੍ਪਿਯਮਂਸਂ ਪਕ੍ਖਿਪਿਤ੍વਾ વੋਮਿਸ੍ਸਕਂ ਓਮਦ੍ਦਿਤ੍વਾ ਅਜ੍ਝੋਹਰਮਾਨਾ ਸਙ੍ਘਾਦਿਸੇਸਂ, ਥੁਲ੍ਲਚ੍ਚਯਂ, ਪਾਚਿਤ੍ਤਿਯਂ, ਪਾਟਿਦੇਸਨੀਯਂ, ਦੁਕ੍ਕਟਨ੍ਤਿ ਇਮਾ ਪਞ੍ਚ ਆਪਤ੍ਤਿਯੋ ਭੋਜਨਪਚ੍ਚਯਾ ਆਪਜ੍ਜਤਿ।
Khādantassa tissoti manussamaṃse thullaccayaṃ, avasesesu akappiyamaṃsesu dukkaṭaṃ, bhikkhuniyā lasuṇe pācittiyaṃ. Pañca bhojanapaccayāti avassutā avassutassa purisassa hatthato bhojanaṃ gahetvā tattheva manussamaṃsaṃ lasuṇaṃ attano atthāya viññāpetvā gahitapaṇītabhojanāni avasesañca akappiyamaṃsaṃ pakkhipitvā vomissakaṃ omadditvā ajjhoharamānā saṅghādisesaṃ, thullaccayaṃ, pācittiyaṃ, pāṭidesanīyaṃ, dukkaṭanti imā pañca āpattiyo bhojanapaccayā āpajjati.
ਪਞ੍ਚ ਠਾਨਾਨੀਤਿ ‘‘ਉਕ੍ਖਿਤ੍ਤਾਨੁવਤ੍ਤਿਕਾਯ ਭਿਕ੍ਖੁਨਿਯਾ ਯਾવਤਤਿਯਂ ਸਮਨੁਭਾਸਨਾਯ ਅਪ੍ਪਟਿਨਿਸ੍ਸਜ੍ਜਨ੍ਤਿਯਾ ਞਤ੍ਤਿਯਾ ਦੁਕ੍ਕਟਂ, ਦ੍વੀਹਿ ਕਮ੍ਮવਾਚਾਹਿ ਥੁਲ੍ਲਚ੍ਚਯਂ, ਕਮ੍ਮવਾਚਾਪਰਿਯੋਸਾਨੇ ਆਪਤ੍ਤਿ ਪਾਰਾਜਿਕਸ੍ਸ, ਸਙ੍ਘਭੇਦਾਯ ਪਰਕ੍ਕਮਨਾਦੀਸੁ ਸਙ੍ਘਾਦਿਸੇਸੋ, ਪਾਪਿਕਾਯ ਦਿਟ੍ਠਿਯਾ ਅਪ੍ਪਟਿਨਿਸ੍ਸਗ੍ਗੇ ਪਾਚਿਤ੍ਤਿਯ’’ਨ੍ਤਿ ਏવਂ ਸਬ੍ਬਾ ਯਾવਤਤਿਯਕਾ ਪਞ੍ਚ ਠਾਨਾਨਿ ਗਚ੍ਛਨ੍ਤਿ। ਪਞ੍ਚਨ੍ਨਞ੍ਚੇવ ਆਪਤ੍ਤੀਤਿ ਆਪਤ੍ਤਿ ਨਾਮ ਪਞ੍ਚਨ੍ਨਂ ਸਹਧਮ੍ਮਿਕਾਨਂ ਹੋਤਿ, ਤਤ੍ਥ ਦ੍વਿਨ੍ਨਂ ਨਿਪ੍ਪਰਿਯਾਯੇਨ ਆਪਤ੍ਤਿਯੇવ, ਸਿਕ੍ਖਾਮਾਨਸਾਮਣੇਰਿਸਾਮਣੇਰਾਨਂ ਪਨ ਅਕਪ੍ਪਿਯਤ੍ਤਾ ਨ વਟ੍ਟਤਿ। ਇਮਿਨਾ ਪਰਿਯਾਯੇਨ ਤੇਸਂ ਆਪਤ੍ਤਿ ਨ ਦੇਸਾਪੇਤਬ੍ਬਾ, ਦਣ੍ਡਕਮ੍ਮਂ ਪਨ ਤੇਸਂ ਕਾਤਬ੍ਬਂ। ਪਞ੍ਚਨ੍ਨਂ ਅਧਿਕਰਣੇਨ ਚਾਤਿ ਅਧਿਕਰਣਞ੍ਚ ਪਞ੍ਚਨ੍ਨਮੇવਾਤਿ ਅਤ੍ਥੋ। ਏਤੇਸਂਯੇવ ਹਿ ਪਞ੍ਚਨ੍ਨਂ ਪਤ੍ਤਚੀવਰਾਦੀਨਂ ਅਤ੍ਥਾਯ વਿਨਿਚ੍ਛਯવੋਹਾਰੋ ਅਧਿਕਰਣਨ੍ਤਿ વੁਚ੍ਚਤਿ, ਗਿਹੀਨਂ ਪਨ ਅਡ੍ਡਕਮ੍ਮਂ ਨਾਮ ਹੋਤਿ।
Pañca ṭhānānīti ‘‘ukkhittānuvattikāya bhikkhuniyā yāvatatiyaṃ samanubhāsanāya appaṭinissajjantiyā ñattiyā dukkaṭaṃ, dvīhi kammavācāhi thullaccayaṃ, kammavācāpariyosāne āpatti pārājikassa, saṅghabhedāya parakkamanādīsu saṅghādiseso, pāpikāya diṭṭhiyā appaṭinissagge pācittiya’’nti evaṃ sabbā yāvatatiyakā pañca ṭhānāni gacchanti. Pañcannañceva āpattīti āpatti nāma pañcannaṃ sahadhammikānaṃ hoti, tattha dvinnaṃ nippariyāyena āpattiyeva, sikkhāmānasāmaṇerisāmaṇerānaṃ pana akappiyattā na vaṭṭati. Iminā pariyāyena tesaṃ āpatti na desāpetabbā, daṇḍakammaṃ pana tesaṃ kātabbaṃ. Pañcannaṃ adhikaraṇena cāti adhikaraṇañca pañcannamevāti attho. Etesaṃyeva hi pañcannaṃ pattacīvarādīnaṃ atthāya vinicchayavohāro adhikaraṇanti vuccati, gihīnaṃ pana aḍḍakammaṃ nāma hoti.
ਪਞ੍ਚਨ੍ਨਂ વਿਨਿਚ੍ਛਯੋ ਹੋਤੀਤਿ ਪਞ੍ਚਨ੍ਨਂ ਸਹਧਮ੍ਮਿਕਾਨਂਯੇવ વਿਨਿਚ੍ਛਯੋ ਨਾਮ ਹੋਤਿ। ਪਞ੍ਚਨ੍ਨਂ વੂਪਸਮੇਨ ਚਾਤਿ ਏਤੇਸਂਯੇવ ਪਞ੍ਚਨ੍ਨਂ ਅਧਿਕਰਣਂ વਿਨਿਚ੍ਛਿਤਂ વੂਪਸਨ੍ਤਂ ਨਾਮ ਹੋਤੀਤਿ ਅਤ੍ਥੋ। ਪਞ੍ਚਨ੍ਨਞ੍ਚੇવ ਅਨਾਪਤ੍ਤੀਤਿ ਏਤੇਸਂਯੇવ ਪਞ੍ਚਨ੍ਨਂ ਅਨਾਪਤ੍ਤਿ ਨਾਮ ਹੋਤੀਤਿ ਅਤ੍ਥੋ। ਤੀਹਿ ਠਾਨੇਹਿ ਸੋਭਤੀਤਿ ਸਙ੍ਘਾਦੀਹਿ ਤੀਹਿ ਕਾਰਣੇਹਿ ਸੋਭਤਿ। ਕਤવੀਤਿਕ੍ਕਮੋ ਹਿ ਪੁਗ੍ਗਲੋ ਸਪ੍ਪਟਿਕਮ੍ਮਂ ਆਪਤ੍ਤਿਂ ਸਙ੍ਘਮਜ੍ਝੇ ਗਣਮਜ੍ਝੇ ਪੁਗ੍ਗਲਸਨ੍ਤਿਕੇ વਾ ਪਟਿਕਰਿਤ੍વਾ ਅਬ੍ਭੁਣ੍ਹਸੀਲੋ ਪਾਕਤਿਕੋ ਹੋਤਿ, ਤਸ੍ਮਾ ਤੀਹਿ ਠਾਨੇਹਿ ਸੋਭਤੀਤਿ વੁਚ੍ਚਤਿ।
Pañcannaṃ vinicchayo hotīti pañcannaṃ sahadhammikānaṃyeva vinicchayo nāma hoti. Pañcannaṃ vūpasamena cāti etesaṃyeva pañcannaṃ adhikaraṇaṃ vinicchitaṃ vūpasantaṃ nāma hotīti attho. Pañcannañceva anāpattīti etesaṃyeva pañcannaṃ anāpatti nāma hotīti attho. Tīhi ṭhānehi sobhatīti saṅghādīhi tīhi kāraṇehi sobhati. Katavītikkamo hi puggalo sappaṭikammaṃ āpattiṃ saṅghamajjhe gaṇamajjhe puggalasantike vā paṭikaritvā abbhuṇhasīlo pākatiko hoti, tasmā tīhi ṭhānehi sobhatīti vuccati.
ਦ੍વੇ ਕਾਯਿਕਾ ਰਤ੍ਤਿਨ੍ਤਿ ਭਿਕ੍ਖੁਨੀ ਰਤ੍ਤਨ੍ਧਕਾਰੇ ਪੁਰਿਸਸ੍ਸ ਹਤ੍ਥਪਾਸੇ ਠਾਨਨਿਸਜ੍ਜਸਯਨਾਨਿ ਕਪ੍ਪਯਮਾਨਾ ਪਾਚਿਤ੍ਤਿਯਂ, ਹਤ੍ਥਪਾਸਂ વਿਜਹਿਤ੍વਾ ਠਾਨਾਦੀਨਿ ਕਪ੍ਪਯਮਾਨਾ ਦੁਕ੍ਕਟਨ੍ਤਿ ਦ੍વੇ ਕਾਯਦ੍વਾਰਸਮ੍ਭવਾ ਆਪਤ੍ਤਿਯੋ ਰਤ੍ਤਿਂ ਆਪਜ੍ਜਤਿ। ਦ੍વੇ ਕਾਯਿਕਾ ਦਿવਾਤਿ ਏਤੇਨੇવ ਉਪਾਯੇਨ ਦਿવਾ ਪਟਿਚ੍ਛਨ੍ਨੇ ਓਕਾਸੇ ਦ੍વੇ ਆਪਤ੍ਤਿਯੋ ਆਪਜ੍ਜਤਿ। ਨਿਜ੍ਝਾਯਨ੍ਤਸ੍ਸ ਏਕਾ ਆਪਤ੍ਤੀਤਿ ‘‘ਨ ਚ, ਭਿਕ੍ਖવੇ, ਸਾਰਤ੍ਤੇਨ ਮਾਤੁਗਾਮਸ੍ਸ ਅਙ੍ਗਜਾਤਂ ਉਪਨਿਜ੍ਝਾਯਿਤਬ੍ਬਂ । ਯੋ ਉਪਨਿਜ੍ਝਾਯੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਪਾਰਾ॰ ੨੬੬) ਨਿਜ੍ਝਾਯਨ੍ਤਸ੍ਸ ਅਯਮੇਕਾ ਆਪਤ੍ਤਿ। ਏਕਾ ਪਿਣ੍ਡਪਾਤਪਚ੍ਚਯਾਤਿ ‘‘ਨ ਚ, ਭਿਕ੍ਖવੇ, ਭਿਕ੍ਖਾਦਾਯਿਕਾਯ ਮੁਖਂ ਓਲੋਕੇਤਬ੍ਬ’’ਨ੍ਤਿ (ਚੂਲ਼વ॰ ੩੬੬) ਏਤ੍ਥ ਦੁਕ੍ਕਟਾਪਤ੍ਤਿ, ਅਨ੍ਤਮਸੋ ਯਾਗੁਂ વਾ ਬ੍ਯਞ੍ਜਨਂ વਾ ਦੇਨ੍ਤਸ੍ਸ ਸਾਮਣੇਰਸ੍ਸਾਪਿ ਹਿ ਮੁਖਂ ਉਲ੍ਲੋਕਯਤੋ ਦੁਕ੍ਕਟਮੇવ। ਕੁਰੁਨ੍ਦਿਯਂ ਪਨ ‘‘ਏਕਾ ਪਿਣ੍ਡਪਾਤਪਚ੍ਚਯਾਤਿ ਭਿਕ੍ਖੁਨਿਪਰਿਪਾਚਿਤਂ ਪਿਣ੍ਡਪਾਤਂ ਭੁਞ੍ਜਨ੍ਤਸ੍ਸ ਪਾਚਿਤ੍ਤਿਯ’’ਨ੍ਤਿ વੁਤ੍ਤਂ।
Dve kāyikā rattinti bhikkhunī rattandhakāre purisassa hatthapāse ṭhānanisajjasayanāni kappayamānā pācittiyaṃ, hatthapāsaṃ vijahitvā ṭhānādīni kappayamānā dukkaṭanti dve kāyadvārasambhavā āpattiyo rattiṃ āpajjati. Dve kāyikā divāti eteneva upāyena divā paṭicchanne okāse dve āpattiyo āpajjati. Nijjhāyantassa ekā āpattīti ‘‘na ca, bhikkhave, sārattena mātugāmassa aṅgajātaṃ upanijjhāyitabbaṃ . Yo upanijjhāyeyya, āpatti dukkaṭassā’’ti (pārā. 266) nijjhāyantassa ayamekā āpatti. Ekā piṇḍapātapaccayāti ‘‘na ca, bhikkhave, bhikkhādāyikāya mukhaṃ oloketabba’’nti (cūḷava. 366) ettha dukkaṭāpatti, antamaso yāguṃ vā byañjanaṃ vā dentassa sāmaṇerassāpi hi mukhaṃ ullokayato dukkaṭameva. Kurundiyaṃ pana ‘‘ekā piṇḍapātapaccayāti bhikkhuniparipācitaṃ piṇḍapātaṃ bhuñjantassa pācittiya’’nti vuttaṃ.
ਅਟ੍ਠਾਨਿਸਂਸੇ ਸਮ੍ਪਸ੍ਸਨ੍ਤਿ ਕੋਸਮ੍ਬਕਕ੍ਖਨ੍ਧਕੇ વੁਤ੍ਤਾਨਿਸਂਸੇ। ਉਕ੍ਖਿਤ੍ਤਕਾ ਤਯੋ વੁਤ੍ਤਾਤਿ ਆਪਤ੍ਤਿਯਾ ਅਦਸ੍ਸਨੇ ਅਪ੍ਪਟਿਕਮ੍ਮੇ ਪਾਪਿਕਾਯ ਚ ਦਿਟ੍ਠਿਯਾ ਅਪ੍ਪਟਿਨਿਸ੍ਸਗ੍ਗੇਤਿ। ਤੇਚਤ੍ਤਾਲੀਸ ਸਮ੍ਮਾવਤ੍ਤਨਾਤਿ ਤੇਸਂਯੇવ ਉਕ੍ਖਿਤ੍ਤਕਾਨਂ ਏਤ੍ਤਕੇਸੁ વਤ੍ਤੇਸੁ વਤ੍ਤਨਾ।
Aṭṭhānisaṃse sampassanti kosambakakkhandhake vuttānisaṃse. Ukkhittakā tayo vuttāti āpattiyā adassane appaṭikamme pāpikāya ca diṭṭhiyā appaṭinissaggeti. Tecattālīsa sammāvattanāti tesaṃyeva ukkhittakānaṃ ettakesu vattesu vattanā.
ਪਞ੍ਚਠਾਨੇ ਮੁਸਾવਾਦੋਤਿ ਪਾਰਾਜਿਕਸਙ੍ਘਾਦਿਸੇਸਥੁਲ੍ਲਚ੍ਚਯਪਾਚਿਤ੍ਤਿਯਦੁਕ੍ਕਟਸਙ੍ਖਾਤੇ ਪਞ੍ਚਟ੍ਠਾਨੇ ਮੁਸਾવਾਦੋ ਗਚ੍ਛਤਿ। ਚੁਦ੍ਦਸ ਪਰਮਨ੍ਤਿ વੁਚ੍ਚਤੀਤਿ ਦਸਾਹਪਰਮਾਦਿਨਯੇਨ ਹੇਟ੍ਠਾ વੁਤ੍ਤਂ। ਦ੍વਾਦਸ ਪਾਟਿਦੇਸਨੀਯਾਤਿ ਭਿਕ੍ਖੂਨਂ ਚਤ੍ਤਾਰਿ ਭਿਕ੍ਖੁਨੀਨਂ ਅਟ੍ਠ। ਚਤੁਨ੍ਨਂ ਦੇਸਨਾਯ ਚਾਤਿ ਚਤੁਨ੍ਨਂ ਅਚ੍ਚਯਦੇਸਨਾਯਾਤਿ ਅਤ੍ਥੋ। ਕਤਮਾ ਪਨ ਸਾਤਿ? ਦੇવਦਤ੍ਤੇਨ ਪਯੋਜਿਤਾਨਂ ਅਭਿਮਾਰਾਨਂ ਅਚ੍ਚਯਦੇਸਨਾ, ਅਨੁਰੁਦ੍ਧਤ੍ਥੇਰਸ੍ਸ ਉਪਟ੍ਠਾਯਿਕਾਯ ਅਚ੍ਚਯਦੇਸਨਾ, વਡ੍ਢਸ੍ਸ ਲਿਚ੍ਛવਿਨੋ ਅਚ੍ਚਯਦੇਸਨਾ, વਾਸਭਗਾਮਿਯਤ੍ਥੇਰਸ੍ਸ ਉਕ੍ਖੇਪਨੀਯਕਮ੍ਮਂ ਕਤ੍વਾ ਆਗਤਾਨਂ ਭਿਕ੍ਖੂਨਂ ਅਚ੍ਚਯਦੇਸਨਾਤਿ ਅਯਂ ਚਤੁਨ੍ਨਂ ਅਚ੍ਚਯਦੇਸਨਾ ਨਾਮ।
Pañcaṭhāne musāvādoti pārājikasaṅghādisesathullaccayapācittiyadukkaṭasaṅkhāte pañcaṭṭhāne musāvādo gacchati. Cuddasa paramanti vuccatīti dasāhaparamādinayena heṭṭhā vuttaṃ. Dvādasa pāṭidesanīyāti bhikkhūnaṃ cattāri bhikkhunīnaṃ aṭṭha. Catunnaṃ desanāya cāti catunnaṃ accayadesanāyāti attho. Katamā pana sāti? Devadattena payojitānaṃ abhimārānaṃ accayadesanā, anuruddhattherassa upaṭṭhāyikāya accayadesanā, vaḍḍhassa licchavino accayadesanā, vāsabhagāmiyattherassa ukkhepanīyakammaṃ katvā āgatānaṃ bhikkhūnaṃ accayadesanāti ayaṃ catunnaṃ accayadesanā nāma.
ਅਟ੍ਠਙ੍ਗਿਕੋ ਮੁਸਾવਾਦੋਤਿ ‘‘ਪੁਬ੍ਬੇવਸ੍ਸ ਹੋਤਿ ਮੁਸਾ ਭਣਿਸ੍ਸ’’ਨ੍ਤਿ ਆਦਿਂ ਕਤ੍વਾ ‘‘વਿਨਿਧਾਯ ਸਞ੍ਞ’’ਨ੍ਤਿ ਪਰਿਯੋਸਾਨੇਹਿ (ਪਾਚਿ॰ ੪-੫; ਪਰਿ॰ ੪੫੯) ਅਟ੍ਠਹਿ ਅਙ੍ਗੇਹਿ ਅਟ੍ਠਙ੍ਗਿਕੋ। ਉਪੋਸਥਙ੍ਗਾਨਿਪਿ ਪਾਣਂ ਨ ਹਨੇਤਿਆਦਿਨਾ ਨਯੇਨ વੁਤ੍ਤਾਨੇવ। ਅਟ੍ਠ ਦੂਤੇਯ੍ਯਙ੍ਗਾਨੀਤਿ ‘‘ਇਧ, ਭਿਕ੍ਖવੇ, ਭਿਕ੍ਖੁ ਸੋਤਾ ਚ ਹੋਤਿ ਸਾવੇਤਾ ਚਾ’’ਤਿਆਦਿਨਾ (ਚੂਲ਼વ॰ ੩੪੭) ਨਯੇਨ ਸਙ੍ਘਭੇਦਕੇ વੁਤ੍ਤਾਨਿ। ਅਟ੍ਠ ਤਿਤ੍ਥਿਯવਤ੍ਤਾਨਿ ਮਹਾਖਨ੍ਧਕੇ વੁਤ੍ਤਾਨਿ।
Aṭṭhaṅgiko musāvādoti ‘‘pubbevassa hoti musā bhaṇissa’’nti ādiṃ katvā ‘‘vinidhāya sañña’’nti pariyosānehi (pāci. 4-5; pari. 459) aṭṭhahi aṅgehi aṭṭhaṅgiko. Uposathaṅgānipi pāṇaṃ na hanetiādinā nayena vuttāneva. Aṭṭha dūteyyaṅgānīti ‘‘idha, bhikkhave, bhikkhu sotā ca hoti sāvetā cā’’tiādinā (cūḷava. 347) nayena saṅghabhedake vuttāni. Aṭṭha titthiyavattāni mahākhandhake vuttāni.
ਅਟ੍ਠવਾਚਿਕਾ ਉਪਸਮ੍ਪਦਾਤਿ ਭਿਕ੍ਖੁਨੀਨਂ ਉਪਸਮ੍ਪਦਂ ਸਨ੍ਧਾਯ વੁਤ੍ਤਂ। ਅਟ੍ਠਨ੍ਨਂ ਪਚ੍ਚੁਟ੍ਠਾਤਬ੍ਬਨ੍ਤਿ ਭਤ੍ਤਗ੍ਗੇ ਅਟ੍ਠਨ੍ਨਂ ਭਿਕ੍ਖੁਨੀਨਂ ਇਤਰਾਹਿ ਪਚ੍ਚੁਟ੍ਠਾਯ ਆਸਨਂ ਦਾਤਬ੍ਬਂ । ਭਿਕ੍ਖੁਨੋવਾਦਕੋ ਅਟ੍ਠਹੀਤਿ ਅਟ੍ਠਹਙ੍ਗੇਹਿ ਸਮਨ੍ਨਾਗਤੋ ਭਿਕ੍ਖੁ ਭਿਕ੍ਖੁਨੋવਾਦਕੋ ਸਮ੍ਮਨ੍ਨਿਤਬ੍ਬੋ।
Aṭṭhavācikā upasampadāti bhikkhunīnaṃ upasampadaṃ sandhāya vuttaṃ. Aṭṭhannaṃ paccuṭṭhātabbanti bhattagge aṭṭhannaṃ bhikkhunīnaṃ itarāhi paccuṭṭhāya āsanaṃ dātabbaṃ . Bhikkhunovādako aṭṭhahīti aṭṭhahaṅgehi samannāgato bhikkhu bhikkhunovādako sammannitabbo.
ਏਕਸ੍ਸ ਛੇਜ੍ਜਨ੍ਤਿ ਗਾਥਾਯ ਨવਸੁ ਜਨੇਸੁ ਯੋ ਸਲਾਕਂ ਗਾਹੇਤ੍વਾ ਸਙ੍ਘਂ ਭਿਨ੍ਦਤਿ, ਤਸ੍ਸੇવ ਛੇਜ੍ਜਂ ਹੋਤਿ, ਦੇવਦਤ੍ਤੋ વਿਯ ਪਾਰਾਜਿਕਂ ਆਪਜ੍ਜਤਿ। ਭੇਦਕਾਨੁવਤ੍ਤਕਾਨਂ ਚਤੁਨ੍ਨਂ ਥੁਲ੍ਲਚ੍ਚਯਂ ਕੋਕਾਲਿਕਾਦੀਨਂ વਿਯ, ਧਮ੍ਮવਾਦੀਨਂ ਚਤੁਨ੍ਨਂ ਅਨਾਪਤ੍ਤਿ। ਇਮਾ ਪਨ ਆਪਤ੍ਤਿਯੋ ਚ ਅਨਾਪਤ੍ਤਿਯੋ ਚ ਸਬ੍ਬੇਸਂ ਏਕવਤ੍ਥੁਕਾ ਸਙ੍ਘਭੇਦવਤ੍ਥੁਕਾ ਏવ।
Ekassa chejjanti gāthāya navasu janesu yo salākaṃ gāhetvā saṅghaṃ bhindati, tasseva chejjaṃ hoti, devadatto viya pārājikaṃ āpajjati. Bhedakānuvattakānaṃ catunnaṃ thullaccayaṃ kokālikādīnaṃ viya, dhammavādīnaṃ catunnaṃ anāpatti. Imā pana āpattiyo ca anāpattiyo ca sabbesaṃ ekavatthukā saṅghabhedavatthukā eva.
ਨવ ਆਘਾਤવਤ੍ਥੂਨੀਤਿ ਗਾਥਾਯ ਨવਹੀਤਿ ਨવਹਿ ਭਿਕ੍ਖੂਹਿ ਸਙ੍ਘੋ ਭਿਜ੍ਜਤਿ। ਞਤ੍ਤਿਯਾ ਕਰਣਾ ਨવਾਤਿ ਞਤ੍ਤਿਯਾ ਕਾਤਬ੍ਬਾਨਿ ਕਮ੍ਮਾਨਿ ਨવਾਤਿ ਅਤ੍ਥੋ। ਸੇਸਂ ਉਤ੍ਤਾਨਮੇવ।
Nava āghātavatthūnīti gāthāya navahīti navahi bhikkhūhi saṅgho bhijjati. Ñattiyā karaṇā navāti ñattiyā kātabbāni kammāni navāti attho. Sesaṃ uttānameva.
Related texts:
ਤਿਪਿਟਕ (ਮੂਲ) • Tipiṭaka (Mūla) / વਿਨਯਪਿਟਕ • Vinayapiṭaka / ਪਰਿવਾਰਪਾਲ਼ਿ • Parivārapāḷi / ੩. ਪਾਚਿਤ੍ਤਿਯਂ • 3. Pācittiyaṃ
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / ਸਾਰਤ੍ਥਦੀਪਨੀ-ਟੀਕਾ • Sāratthadīpanī-ṭīkā / ਪਾਚਿਤ੍ਤਿਯવਣ੍ਣਨਾ • Pācittiyavaṇṇanā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / વਜਿਰਬੁਦ੍ਧਿ-ਟੀਕਾ • Vajirabuddhi-ṭīkā / ਪਾਚਿਤ੍ਤਿਯવਣ੍ਣਨਾ • Pācittiyavaṇṇanā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / વਿਮਤਿવਿਨੋਦਨੀ-ਟੀਕਾ • Vimativinodanī-ṭīkā / ਪਾਚਿਤ੍ਤਿਯવਣ੍ਣਨਾ • Pācittiyavaṇṇanā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / ਪਾਚਿਤ੍ਯਾਦਿਯੋਜਨਾਪਾਲ਼ਿ • Pācityādiyojanāpāḷi / (੩) ਪਾਚਿਤ੍ਤਿਯવਣ੍ਣਨਾ • (3) Pācittiyavaṇṇanā
