| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
பத³பா⁴ஜனீயவண்ணனா
Padabhājanīyavaṇṇanā
199. அஸுப⁴ஜ்ஜா²னாதீ³னீதி ஆதி³-ஸத்³தே³ன காயக³தாஸதிஜ்ஜா²னஞ்ச கஸிணஜ்ஜா²னஞ்ச ஸங்க³ண்ஹாதி. தேன ‘‘காயக³தாஸதிஜ்ஜா²னங் பத²வீகஸிணஜ்ஜா²னங் ஸமாபஜ்ஜி’’ந்திஆதி³ங் வத³ந்தோபி பாராஜிகோவ ஹோதீதி வேதி³தப்³ப³ங். விமொக்கோ²தி எத்த² வி-ஸத்³தோ³ விஸேஸத்தோ² விவித⁴த்தோ² வாதி த³ஸ்ஸெந்தோ ஆஹ ‘‘ஸுட்டு² முத்தோ’’திஆதி³. விமொக்கோ²தி சத்தாரோ அரியமக்³கா³. தஸ்ஸ ஸகு³ணதோ ஸுஞ்ஞதாதி³னாமலாப⁴ங் த³ஸ்ஸெந்தோ ஆஹ ‘‘ஸோ பனாய’’ ந்திஆதி³. மக்³கோ³ ஹி நாம பஞ்சஹி காரணேஹி நாமங் லப⁴தி ஸரஸேன வா பச்சனீகேன வா ஸகு³ணேன வா ஆரம்மணேன வா ஆக³மனேன வா. ஸசே ஹி ஸங்கா²ருபெக்கா² அனிச்சதோ ஸங்கா²ரே ஸம்மஸித்வா வுட்டா²தி, அனிமித்தவிமொக்கே²ன விமுச்சதி, ஸசே து³க்க²தோ ஸம்மஸித்வா வுட்டா²தி, அப்பணிஹிதவிமொக்கே²ன விமுச்சதி, ஸசே அனத்ததோ ஸம்மஸித்வா வுட்டா²தி, ஸுஞ்ஞதவிமொக்கே²ன விமுச்சதி, இத³ங் ஸரஸதோ நாமங் நாம. யஸ்மா பனேஸ அனிச்சானுபஸ்ஸனாய ஸங்கா²ரானங் க⁴னவினிப்³போ⁴க³ங் கத்வா நிச்சனிமித்தது⁴வனிமித்தஸஸ்ஸதனிமித்தானி பஜஹந்தோ ஆக³தோ, தஸ்மா அனிமித்தோ. து³க்கா²னுபஸ்ஸனாய பன ஸுக²ஸஞ்ஞங் பஹாய பணிதி⁴ங் பத்த²னங் ஸுக்கா²பெத்வா ஆக³தத்தா அப்பணிஹிதோ. அனத்தானுபஸ்ஸனாய அத்தஸத்தபுக்³க³லஸஞ்ஞங் பஹாய ஸங்கா²ரானங் ஸுஞ்ஞதோ தி³ட்ட²த்தா ஸுஞ்ஞதோதி இத³ங் பச்சனீகதோ நாமங் நாம.
199.Asubhajjhānādīnīti ādi-saddena kāyagatāsatijjhānañca kasiṇajjhānañca saṅgaṇhāti. Tena ‘‘kāyagatāsatijjhānaṃ pathavīkasiṇajjhānaṃ samāpajji’’ntiādiṃ vadantopi pārājikova hotīti veditabbaṃ. Vimokkhoti ettha vi-saddo visesattho vividhattho vāti dassento āha ‘‘suṭṭhu mutto’’tiādi. Vimokkhoti cattāro ariyamaggā. Tassa saguṇato suññatādināmalābhaṃ dassento āha ‘‘so panāya’’ ntiādi. Maggo hi nāma pañcahi kāraṇehi nāmaṃ labhati sarasena vā paccanīkena vā saguṇena vā ārammaṇena vā āgamanena vā. Sace hi saṅkhārupekkhā aniccato saṅkhāre sammasitvā vuṭṭhāti, animittavimokkhena vimuccati, sace dukkhato sammasitvā vuṭṭhāti, appaṇihitavimokkhena vimuccati, sace anattato sammasitvā vuṭṭhāti, suññatavimokkhena vimuccati, idaṃ sarasato nāmaṃ nāma. Yasmā panesa aniccānupassanāya saṅkhārānaṃ ghanavinibbhogaṃ katvā niccanimittadhuvanimittasassatanimittāni pajahanto āgato, tasmā animitto. Dukkhānupassanāya pana sukhasaññaṃ pahāya paṇidhiṃ patthanaṃ sukkhāpetvā āgatattā appaṇihito. Anattānupassanāya attasattapuggalasaññaṃ pahāya saṅkhārānaṃ suññato diṭṭhattā suññatoti idaṃ paccanīkato nāmaṃ nāma.
ராகா³தீ³ஹி பனேஸ ஸுஞ்ஞதத்தா ஸுஞ்ஞதோ. ரூபனிமித்தாதீ³னங் ராக³னிமித்தாதீ³னங்யேவ வா அபா⁴வேன அனிமித்தோ. ராகா³தி³பணிதி⁴ஆதீ³னங் அபா⁴வதோ அப்பணிஹிதோதி இத³மஸ்ஸ ஸகு³ணதோ நாமங். ஸ்வாயங் ஸுஞ்ஞதங் அனிமித்தங் அப்பணிஹிதஞ்ச நிப்³பா³னங் ஆரம்மணங் கரோதீதி ஸுஞ்ஞதோ அனிமித்தோ அப்பணிஹிதோதி வுச்சதி, இத³மஸ்ஸ ஆரம்மணதோ நாமங். ஆக³மனங் பன து³வித⁴ங் விபஸ்ஸனாக³மனங் மக்³கா³க³மனஞ்ச. தத்த² மக்³கே³ விபஸ்ஸனாக³மனங் லப்³ப⁴தி, ப²லே மக்³கா³க³மனங். அனத்தானுபஸ்ஸனா ஹி ஸுஞ்ஞதா நாம, ஸுஞ்ஞதவிபஸ்ஸனாய மக்³கோ³ ஸுஞ்ஞதோ. அனிச்சானுபஸ்ஸனா அனிமித்தா நாம, அனிமித்தவிபஸ்ஸனாய மக்³கோ³ அனிமித்தோ. இத³ங் பன நாமங் ந அபி⁴த⁴ம்மபரியாயேன லப்³ப⁴தி. ததா² ஹி தங் ஸங்கா²ரனிமித்தஸ்ஸ அவிஜஹனதோ ந நிப்பரியாயேன அனிமித்தங், ஸுத்தந்தபரியாயேன பன லப்³ப⁴தி. தத்ர ஹி கொ³த்ரபு⁴ஞாணங் அனிமித்தங் நிப்³பா³னங் ஆரம்மணங் கத்வா அனிமித்தனாமகங் ஹுத்வா ஸயங் ஆக³மனியட்டா²னே ட²த்வா மக்³க³ஸ்ஸ நாமங் தே³தீதி வத³ந்தி, தேன மக்³கோ³ அனிமித்தோதி வுத்தோ. மக்³கா³க³மனேன பன ப²லங் அனிமித்தந்தி யுஜ்ஜதியேவ. து³க்கா²னுபஸ்ஸனா ஸங்கா²ரேஸு பணிதி⁴ங் ஸுக்கா²பெத்வா ஆக³தத்தா அப்பணிஹிதா நாம, அப்பணிஹிதவிபஸ்ஸனாய மக்³கோ³ அப்பணிஹிதோ, அப்பணிஹிதமக்³க³ஸ்ஸ ப²லங் அப்பணிஹிதங். ஏவங் விபஸ்ஸனா அத்தனோ நாமங் மக்³க³ஸ்ஸ தே³தி, மக்³கோ³ ப²லஸ்ஸாதி இத³ங் ஆக³மனதோ நாமங். ஸுஞ்ஞத்தாதி விவித்தத்தா. ந ஹி மக்³கே³ ராகா³த³யோ ஸந்தி, உபரூபரி உப்பஜ்ஜனகராகா³தீ³னங் காரணத்தா ராகா³த³யோ நிமித்தந்தி ஆஹ ‘‘ராக³தோ³ஸமோஹனிமித்தேஹீ’’தி. ஸவிக்³க³ஹானங் விய உபட்டா²னம்பெத்த² நிமித்தந்தி வத³ந்தி. ராகா³த³யோவ பவத்திட்டா²னட்டே²ன பணிதீ⁴தி ஆஹ ‘‘ராக³தோ³ஸமோஹபணிதீ⁴ன’’ந்தி.
Rāgādīhi panesa suññatattā suññato. Rūpanimittādīnaṃ rāganimittādīnaṃyeva vā abhāvena animitto. Rāgādipaṇidhiādīnaṃ abhāvato appaṇihitoti idamassa saguṇato nāmaṃ. Svāyaṃ suññataṃ animittaṃ appaṇihitañca nibbānaṃ ārammaṇaṃ karotīti suññato animitto appaṇihitoti vuccati, idamassa ārammaṇato nāmaṃ. Āgamanaṃ pana duvidhaṃ vipassanāgamanaṃ maggāgamanañca. Tattha magge vipassanāgamanaṃ labbhati, phale maggāgamanaṃ. Anattānupassanā hi suññatā nāma, suññatavipassanāya maggo suññato. Aniccānupassanā animittā nāma, animittavipassanāya maggo animitto. Idaṃ pana nāmaṃ na abhidhammapariyāyena labbhati. Tathā hi taṃ saṅkhāranimittassa avijahanato na nippariyāyena animittaṃ, suttantapariyāyena pana labbhati. Tatra hi gotrabhuñāṇaṃ animittaṃ nibbānaṃ ārammaṇaṃ katvā animittanāmakaṃ hutvā sayaṃ āgamaniyaṭṭhāne ṭhatvā maggassa nāmaṃ detīti vadanti, tena maggo animittoti vutto. Maggāgamanena pana phalaṃ animittanti yujjatiyeva. Dukkhānupassanā saṅkhāresu paṇidhiṃ sukkhāpetvā āgatattā appaṇihitā nāma, appaṇihitavipassanāya maggo appaṇihito, appaṇihitamaggassa phalaṃ appaṇihitaṃ. Evaṃ vipassanā attano nāmaṃ maggassa deti, maggo phalassāti idaṃ āgamanato nāmaṃ. Suññattāti vivittattā. Na hi magge rāgādayo santi, uparūpari uppajjanakarāgādīnaṃ kāraṇattā rāgādayo nimittanti āha ‘‘rāgadosamohanimittehī’’ti. Saviggahānaṃ viya upaṭṭhānampettha nimittanti vadanti. Rāgādayova pavattiṭṭhānaṭṭhena paṇidhīti āha ‘‘rāgadosamohapaṇidhīna’’nti.
வத்து²விஜ்ஜாதி³ங் ஸந்தா⁴ய அவசனதோ ‘‘விஜ்ஜானங் லாபீ⁴ம்ஹீ’’தி வுத்தேபி ஹோதி. ஏகேககொட்டா²ஸவஸேனாதி ஸதிபட்டா²னசதுக்காதி³ஏகேககொட்டா²ஸவஸேன. கிஞ்சாபி மஹாஅட்ட²கதா²யம்பி ஏகேககொட்டா²ஸவஸேனேவ த³ஸ்ஸிதங், தத்த² பன ‘‘லோகுத்தரானங் ஸதிபட்டா²னான’’ந்திஆதி³னா பச்சேகங் லோகுத்தர-ஸத்³த³ங் யோஜெத்வா ஏகேககொட்டா²ஸவஸேனேவ வுத்தங், இத⁴ லோகுத்தர-ஸத்³தே³ன வினாதி அயமெத்த² விஸேஸோ. தத்தா²தி தேஸு கொட்டா²ஸேஸு.
Vatthuvijjādiṃ sandhāya avacanato ‘‘vijjānaṃ lābhīmhī’’ti vuttepi hoti. Ekekakoṭṭhāsavasenāti satipaṭṭhānacatukkādiekekakoṭṭhāsavasena. Kiñcāpi mahāaṭṭhakathāyampi ekekakoṭṭhāsavaseneva dassitaṃ, tattha pana ‘‘lokuttarānaṃ satipaṭṭhānāna’’ntiādinā paccekaṃ lokuttara-saddaṃ yojetvā ekekakoṭṭhāsavaseneva vuttaṃ, idha lokuttara-saddena vināti ayamettha viseso. Tatthāti tesu koṭṭhāsesu.
நனு ச ‘‘கிலேஸப்பஹானமேவா’’தி கஸ்மா வுத்தங். ந ஹி கிலேஸானங் பஹானமத்தங் உத்தரிமனுஸ்ஸத⁴ம்மோ ஹோதீதி யோ வதெ³ய்ய, தங் ஸந்தா⁴ய கிலேஸப்பஹானஸ்ஸ மக்³க³கிச்சத்தா கிச்சவஸேன மக்³கோ³ தீ³பிதோதி த³ஸ்ஸேதுங் ‘‘தங் பனா’’திஆதி³ வுத்தங். காமராக³ங் ஸந்தா⁴ய ‘‘ததியமக்³கே³ன ஹி ராக³தோ³ஸானங் பஹான’’ந்தி வுத்தங், ந பன ரூபராக³அரூபராகே³ ஸந்தா⁴ய. ந ஹி தே தேன பஹீயந்தி சதுத்த²மக்³கே³ன பஹாதப்³ப³த்தா.
Nanu ca ‘‘kilesappahānamevā’’ti kasmā vuttaṃ. Na hi kilesānaṃ pahānamattaṃ uttarimanussadhammo hotīti yo vadeyya, taṃ sandhāya kilesappahānassa maggakiccattā kiccavasena maggo dīpitoti dassetuṃ ‘‘taṃ panā’’tiādi vuttaṃ. Kāmarāgaṃ sandhāya ‘‘tatiyamaggena hi rāgadosānaṃ pahāna’’nti vuttaṃ, na pana rūparāgaarūparāge sandhāya. Na hi te tena pahīyanti catutthamaggena pahātabbattā.
ராகா³ சித்தங் வினீவரணதாதி ராகா³ சித்தஸ்ஸ வினீவரணதாதி வுத்தங் ஹோதி. ராகா³ விமுத்தஸ்ஸ சித்தஸ்ஸ தஸ்ஸேவ ராக³னீவரணஸ்ஸ அபா⁴வேன விக³தனீவரணத்தா வினீவரணதாதி அத்தோ² வேதி³தப்³போ³. ஏஸ நயோ ஸேஸேஸுபி.
Rāgācittaṃ vinīvaraṇatāti rāgā cittassa vinīvaraṇatāti vuttaṃ hoti. Rāgā vimuttassa cittassa tasseva rāganīvaraṇassa abhāvena vigatanīvaraṇattā vinīvaraṇatāti attho veditabbo. Esa nayo sesesupi.
யா ச பஞ்ச விஜ்ஜாதி யோஜேதப்³ப³ங். நிப்³ப³ட்டிதலோகுத்தரத்தாதி விஸுங்யேவ லோகதோ அபக³தலோகுத்தரத்தா. யதா² வினா லோகுத்தர-ஸத்³தே³ன ‘‘ஸதிபட்டா²னாதீ³னங் லாபீ⁴ம்ஹீ’’தி வுத்தேபி பாராஜிகங் ஹோதி, ஏவமிதா⁴பி ‘‘அத்த²படிஸம்பி⁴தா³ய லாபீ⁴ம்ஹீதி வுத்தேபி ஹோதியேவா’’தி வத்துங் யுஜ்ஜதி. கிஞ்சாபி யுஜ்ஜதி, அத² கோ² மஹாஅட்ட²கதா²யங் விபா⁴கே³ன வுத்தத்தா ந ஸக்கா ஏவமித³ங் வத்துந்தி த³ஸ்ஸேதுங் ‘‘மஹாஅட்ட²கதா²யங் பன…பே॰… ந ஸக்கா அஞ்ஞங் பமாணங் காது’’ந்தி வுத்தங். தம்பி தத்தே²வ படிக்கி²த்தந்தி ஸம்ப³ந்தோ⁴.
Yā ca pañca vijjāti yojetabbaṃ. Nibbaṭṭitalokuttarattāti visuṃyeva lokato apagatalokuttarattā. Yathā vinā lokuttara-saddena ‘‘satipaṭṭhānādīnaṃ lābhīmhī’’ti vuttepi pārājikaṃ hoti, evamidhāpi ‘‘atthapaṭisambhidāya lābhīmhīti vuttepi hotiyevā’’ti vattuṃ yujjati. Kiñcāpi yujjati, atha kho mahāaṭṭhakathāyaṃ vibhāgena vuttattā na sakkā evamidaṃ vattunti dassetuṃ ‘‘mahāaṭṭhakathāyaṃ pana…pe… na sakkā aññaṃ pamāṇaṃ kātu’’nti vuttaṃ. Tampi tattheva paṭikkhittanti sambandho.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 4. சதுத்த²பாராஜிகங் • 4. Catutthapārājikaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 4. சதுத்த²பாராஜிகங் • 4. Catutthapārājikaṃ
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / பத³பா⁴ஜனீயவண்ணனா • Padabhājanīyavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / பத³பா⁴ஜனீயவண்ணனா • Padabhājanīyavaṇṇanā
