| Library / Tipiṭaka / திபிடக • Tipiṭaka / வஜிரபு³த்³தி⁴-டீகா • Vajirabuddhi-ṭīkā |
பத³பா⁴ஜனீயவண்ணனா
Padabhājanīyavaṇṇanā
199. அனாக³தே உப்பஜ்ஜனகராகா³தீ³னங் காரணத்தா ராகா³த³யோவ நிமித்தங் நாம. திஸ்ஸன்னஞ்ச விஜ்ஜானங் அஞ்ஞதரங் ஸந்தா⁴ய ‘‘விஜ்ஜானங் லாபீ⁴ம்ஹீ’’தி ப⁴ணதி, பாராஜிகங், ந வத்து²விஜ்ஜாதீ³னங் கிலேஸனஹானமேவ வுத்தங், தங்க²ணத்தா உத்தரிமனுஸ்ஸத⁴ம்மப்பவத்தி ந ஹோதீதி சே? ந, மக்³க³கிச்சதீ³பனதோ. தேனேவ ‘‘மக்³கே³ன வினா நத்தீ²’’திஆதி³ வுத்தங். சித்தந்தி சித்தஸ்ஸ விக³தனீவரணதாதி அத்தோ². ‘‘யாவஞ்ச விஜ்ஜா அனாக³தா, தாவ விபஸ்ஸனாஞாணஸ்ஸ லாபீ⁴ம்ஹீ’தி வத³ந்தோ யதி³ லோகுத்தரங் ஸந்தா⁴ய வத³தி, ஸோபி ச ததா² ஜானாதி, பாராஜிகமேவ லோகுத்தரஸ்ஸபி தங்னாமத்தா’’தி வத³ந்தி. ‘‘அவிஸேஸேனாபி வத³தோ பாராஜிகங் வுத்தந்தி லோகுத்தரங் ஸந்தா⁴ய வத³தோ ‘பாராஜிக’ந்தி வத்துங் யுஜ்ஜதி. யதா² கிங் ‘விஜ்ஜானங் லாபீ⁴ம்ஹீ’தி ப⁴ணந்தோபி பாராஜிகமேவா’தி வுத்தட்டா²னே வத்து²விஜ்ஜாதீ³னங் ஸம்ப⁴வேபி தாஸங் அனதி⁴ப்பேதத்தா பாராஜிகங் ஹோதி, ஏவமிதா⁴பி. ந ஸக்கா அஞ்ஞங் பமாணங் காதுந்தி அத்தனோ கு³ணமாரோசேதுகாமோ லோகியேன ஸம்மிஸ்ஸங் அத்த²படிஸம்பி⁴த³ங் வத³தோ பாராஜிகந்தி பமாணங் காதுங் ந ஸக்கா, இதரதா² ஹோதீ’’தி அபரேஹி வுத்தங், ‘‘தங் புப்³பா³பரவிருத்³த⁴ங், தஸ்மா விஜ்ஜானித³ஸ்ஸனங் இத⁴ அனித³ஸ்ஸனங் ஸாஸனே வத்து²விஜ்ஜாதீ³னங் விஜ்ஜாவிதா⁴னாபா⁴வா. ப⁴க³வதா விப⁴த்தகெ²த்தபதே³ வா தேஸங் பரியாயவசனானங் அனாமட்ட²த்தா ந ஸக்கா அஞ்ஞங் பமாணங் காது’’ந்தி லிகி²தங். ‘‘படிஸம்பி⁴தா³னங் லாபீ⁴ம்ஹீ’தி வுத்தே பரியாயேன வுத்தத்தா து²ல்லச்சயங் யுத்த’’ந்தி வத³ந்தி, விசாரேதப்³ப³ங். வீமங்ஸித்வா க³ஹேதப்³ப³ந்தி ‘‘யோ தே விஹாரே வஸதீ’’திஆதீ³ஹி ஸங்ஸந்த³னதோ பரியாயவசனத்தா து²ல்லச்சயங் வுத்தங். ‘‘நிரோத⁴ஸமாபத்திங் ஸமாபஜ்ஜாமீ’தி வா ‘லாபீ⁴ம்ஹாஹங் தஸ்ஸா’தி வா வத³தோபீ’’தி வுத்தவசனம்பி ‘‘ஸசே பனஸ்ஸேவங் ஹோதீ’’திஆதி³வசனம்பி அத்த²தோ ஏகமேவ, ஸோபி ஹி அத்தனோ விஸேஸங் ஆரோசேதுமேவ வத³தி. ‘‘யோ தே விஹாரே வஸதீ’திஆதீ³ஸு அஹங்-வசனாபா⁴வா பரியாயோ யுஜ்ஜதி, இத⁴ பன ‘லாபீ⁴ம்ஹாஹங் தஸ்ஸா’தி அத்தானங் நித்³தி³ஸதி, தஸ்மா பாராஜிகங் ஆபஜ்ஜிதுங் யுத்தங் வியா’’தி வத³ந்தி. ‘‘மஹாபச்சரியாதி³வசனங் உத்தரிமனுஸ்ஸத⁴ம்மேஸு ஏகோபி ந ஹோதி, தஸ்மா பரியாயேன வுத்தத்தா ந ஹோதீ’’தி வத³ந்தி, ஸுட்டு² உபபரிக்கி²தப்³ப³ங். ப²லஸச்சி²கிரியா-பத³தோ பட்டா²ய ஏவ பாடோ² க³ஹேதப்³போ³, ப²லஸச்சி²கிரியாயபி ஏகேகம்பி ஏகேகப²லவஸேன பாராஜிகங் வேதி³தப்³ப³ங்.
199. Anāgate uppajjanakarāgādīnaṃ kāraṇattā rāgādayova nimittaṃ nāma. Tissannañca vijjānaṃ aññataraṃ sandhāya ‘‘vijjānaṃ lābhīmhī’’ti bhaṇati, pārājikaṃ, na vatthuvijjādīnaṃ kilesanahānameva vuttaṃ, taṃkhaṇattā uttarimanussadhammappavatti na hotīti ce? Na, maggakiccadīpanato. Teneva ‘‘maggena vinā natthī’’tiādi vuttaṃ. Cittanti cittassa vigatanīvaraṇatāti attho. ‘‘Yāvañca vijjā anāgatā, tāva vipassanāñāṇassa lābhīmhī’ti vadanto yadi lokuttaraṃ sandhāya vadati, sopi ca tathā jānāti, pārājikameva lokuttarassapi taṃnāmattā’’ti vadanti. ‘‘Avisesenāpi vadato pārājikaṃ vuttanti lokuttaraṃ sandhāya vadato ‘pārājika’nti vattuṃ yujjati. Yathā kiṃ ‘vijjānaṃ lābhīmhī’ti bhaṇantopi pārājikamevā’ti vuttaṭṭhāne vatthuvijjādīnaṃ sambhavepi tāsaṃ anadhippetattā pārājikaṃ hoti, evamidhāpi. Na sakkā aññaṃ pamāṇaṃ kātunti attano guṇamārocetukāmo lokiyena sammissaṃ atthapaṭisambhidaṃ vadato pārājikanti pamāṇaṃ kātuṃ na sakkā, itarathā hotī’’ti aparehi vuttaṃ, ‘‘taṃ pubbāparaviruddhaṃ, tasmā vijjānidassanaṃ idha anidassanaṃ sāsane vatthuvijjādīnaṃ vijjāvidhānābhāvā. Bhagavatā vibhattakhettapade vā tesaṃ pariyāyavacanānaṃ anāmaṭṭhattā na sakkā aññaṃ pamāṇaṃ kātu’’nti likhitaṃ. ‘‘Paṭisambhidānaṃ lābhīmhī’ti vutte pariyāyena vuttattā thullaccayaṃ yutta’’nti vadanti, vicāretabbaṃ. Vīmaṃsitvā gahetabbanti ‘‘yo te vihāre vasatī’’tiādīhi saṃsandanato pariyāyavacanattā thullaccayaṃ vuttaṃ. ‘‘Nirodhasamāpattiṃ samāpajjāmī’ti vā ‘lābhīmhāhaṃ tassā’ti vā vadatopī’’ti vuttavacanampi ‘‘sace panassevaṃ hotī’’tiādivacanampi atthato ekameva, sopi hi attano visesaṃ ārocetumeva vadati. ‘‘Yo te vihāre vasatī’tiādīsu ahaṃ-vacanābhāvā pariyāyo yujjati, idha pana ‘lābhīmhāhaṃ tassā’ti attānaṃ niddisati, tasmā pārājikaṃ āpajjituṃ yuttaṃ viyā’’ti vadanti. ‘‘Mahāpaccariyādivacanaṃ uttarimanussadhammesu ekopi na hoti, tasmā pariyāyena vuttattā na hotī’’ti vadanti, suṭṭhu upaparikkhitabbaṃ. Phalasacchikiriyā-padato paṭṭhāya eva pāṭho gahetabbo, phalasacchikiriyāyapi ekekampi ekekaphalavasena pārājikaṃ veditabbaṃ.
ராக³ஸ்ஸ பஹானந்திஆதி³த்திகே கிலேஸப்பஹானமேவ வுத்தங், தங் பன யஸ்மா மக்³கே³ன வினா நத்தி². ததியமக்³கே³ன ஹி ராக³தோ³ஸானங் பஹானங், சதுத்தே²ன மோஹஸ்ஸ, தஸ்மா ‘‘ராகோ³ மே பஹீனோ’’திஆதீ³னி வத³தோபி பாராஜிகங். ராகா³ சித்தங் வினீவரணதாதிஆதி³த்திகே லோகுத்தரமேவ வுத்தங், தஸ்மா ‘‘ராகா³ மே சித்தங் வினீவரண’’ந்திஆதீ³னி வத³தோ பாராஜிகமேவாதி. அகுப்பத⁴ம்மத்தாதி கேசி உத்தரவிஹாரவாஸினோ. கஸ்மா ந ஹோதீதி சே? ‘‘இதி ஜானாமி, இதி பஸ்ஸாமீ’’தி வத்தமானவசனேனேவ மாதிகாயங் வுத்தத்தா. யதி³ ஏவங் பத³பா⁴ஜனே ‘‘ஸமாபஜ்ஜிங், ஸமாபன்னோ’’திஆதி³னா வுத்தத்தா ‘‘அதீதத்தபா⁴வே ஸோதாபன்னொம்ஹீ’’தி வத³தோபி ஹோதூதி சே? ந, அஞ்ஞதா² அத்த²ஸம்ப⁴வதோ. கத²ங்? அத்³தா⁴பச்சுப்பன்னவஸேன வத்தமானதா க³ஹேதப்³பா³தி ஞாபனத்த²ங் வுத்தங், ந அதீதத்தபா⁴வங். அதீதத்தபா⁴வோ ஹி பரியாயேன வுத்தத்தா ‘‘து²ல்லச்சய’’ந்தி வுத்தந்தி ஆசரியா.
Rāgassa pahānantiādittike kilesappahānameva vuttaṃ, taṃ pana yasmā maggena vinā natthi. Tatiyamaggena hi rāgadosānaṃ pahānaṃ, catutthena mohassa, tasmā ‘‘rāgo me pahīno’’tiādīni vadatopi pārājikaṃ. Rāgā cittaṃ vinīvaraṇatātiādittike lokuttarameva vuttaṃ, tasmā ‘‘rāgā me cittaṃ vinīvaraṇa’’ntiādīni vadato pārājikamevāti. Akuppadhammattāti keci uttaravihāravāsino. Kasmā na hotīti ce? ‘‘Iti jānāmi, iti passāmī’’ti vattamānavacaneneva mātikāyaṃ vuttattā. Yadi evaṃ padabhājane ‘‘samāpajjiṃ, samāpanno’’tiādinā vuttattā ‘‘atītattabhāve sotāpannomhī’’ti vadatopi hotūti ce? Na, aññathā atthasambhavato. Kathaṃ? Addhāpaccuppannavasena vattamānatā gahetabbāti ñāpanatthaṃ vuttaṃ, na atītattabhāvaṃ. Atītattabhāvo hi pariyāyena vuttattā ‘‘thullaccaya’’nti vuttanti ācariyā.
200. ‘‘ஸசேபி ந ஹோதி, பாராஜிகமேவா’’தி அட்டா²னபரிகப்பவஸேன வுத்தங் கிர. ‘‘இதி வாசா திவங்கி³கா’’தி வக்க²தி. நத்தே²தந்தி புரிமே ஸதி பச்சி²மஸ்ஸாபா⁴வா ஸமாபஜ்ஜிங், ஸமாபன்னோதி இமேஸங் கிஞ்சாபி அத்த²தோ காலவிஸேஸோ நத்தி², வசனவிஸேஸோ பன அத்தி² ஏவ.
200.‘‘Sacepi na hoti, pārājikamevā’’ti aṭṭhānaparikappavasena vuttaṃ kira. ‘‘Iti vācā tivaṅgikā’’ti vakkhati. Natthetanti purime sati pacchimassābhāvā samāpajjiṃ, samāpannoti imesaṃ kiñcāpi atthato kālaviseso natthi, vacanaviseso pana atthi eva.
207. உக்கே²டிதோதி உத்தாஸிதோ. கி²ட உத்ராஸனே.
207.Ukkheṭitoti uttāsito. Khiṭa utrāsane.
ஸுத்³தி⁴கவாரகதா²வண்ணனா நிட்டி²தா.
Suddhikavārakathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 4. சதுத்த²பாராஜிகங் • 4. Catutthapārājikaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 4. சதுத்த²பாராஜிகங் • 4. Catutthapārājikaṃ
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā
பத³பா⁴ஜனீயவண்ணனா • Padabhājanīyavaṇṇanā
ஸுத்³தி⁴கவாரகதா²வண்ணனா • Suddhikavārakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / பத³பா⁴ஜனீயவண்ணனா • Padabhājanīyavaṇṇanā
