| Library / Tipiṭaka / திபிடக • Tipiṭaka / வஜிரபு³த்³தி⁴-டீகா • Vajirabuddhi-ṭīkā |
பத³பா⁴ஜனீயவண்ணனா
Padabhājanīyavaṇṇanā
285. வுத்தனயமேவாதி ‘‘காயஸங்ஸக்³கே³ இத்தி²லக்க²ணேனா’’தி லிகி²தங். ‘‘இத்தி²லக்க²ணேனா’’தி கிர மஹாஅட்ட²கதா²பாடோ². ஸீஸங் ந ஏதீதி அக்கோஸனங் ந ஹோதி, க⁴டிதே பன ஹோதி. தத்ராயங் விஸேஸோ – இமேஹி தீஹி க⁴டிதே ஏவ ஸங்கா⁴தி³ஸேஸோ வச்சமக்³க³பஸ்ஸாவமக்³கா³னங் நியதவசனத்தா, அச்சோளாரிகத்தா வா, ந அஞ்ஞேஹி அனிமித்தாஸீதிஆதீ³ஹி அட்ட²ஹி. தத்த² அலோஹிதாஸி, து⁴வலோஹிதாஸி, து⁴வசோளாஸி, பக்³க⁴ரணீஸி, இத்தி²பண்ட³காஸி, வேபுரிஸிகாஸீதி ஏதானி ச² மக்³கா³னங் அனியதவசனானி, அனிமித்தாஸி, நிமித்தமத்தாஸீதி த்³வே பதா³னி அனச்சோளாரிகானி ச, யதோ அட்ட²பதா³னி ‘‘ஸங்கா⁴தி³ஸேஸங் ந ஜனெந்தீ’’தி வுத்தானி, தஸ்மா தானி து²ல்லச்சயவத்தூ²னி. பரிப்³பா³ஜகவத்து²ம்ஹி விய அக்கோஸமத்தத்தா து³க்கடவத்தூ²னீதி ஏகே. இத்தி²பண்ட³காஸி, வேபுரிஸிகாஸீதி ஏதானேவ பதா³னி ஸகலஸரீரஸண்டா²னபே⁴த³தீ³பகானி ஸுத்³தா⁴னி ஸங்கா⁴தி³ஸேஸங் ந ஜனெந்தி ஸகலஸரீரஸாமஞ்ஞத்தா, இதரானி ஜனெந்தி அஸாமஞ்ஞத்தா. தானி ஹி பஸ்ஸாவமக்³க³மேவ தீ³பெந்தி ஸிக²ரணீ-பத³ங் விய. உப⁴தொப்³யஞ்ஜனாஸீதி வசனங் பன புரிஸனிமித்தேன அஸங்கா⁴தி³ஸேஸவத்து²னா மிஸ்ஸவசனங். புரிஸஉப⁴தொப்³யஞ்ஜனகஸ்ஸ ச இத்தி²னிமித்தங் படிச்ச²ன்னங், புரிஸனிமித்தங் பாகடங் ஹோதி. யதி³ தம்பி ஜனேதி, கத²ங் அனிமித்தாஸீதிஆதி³பதா³னி ந ஸங்கா⁴தி³ஸேஸங் ஜனெந்தீதி ஏகே, தங் ந யுத்தங். புரிஸஸ்ஸபி நிமித்தாதி⁴வசனதோ, ‘‘மேது²னுபஸங்ஹிதாஹி ஸங்கா⁴தி³ஸேஸோ’’தி மாதிகாய லக்க²ணஸ்ஸ வுத்தத்தா ச மேது²னுபஸங்ஹிதாஹிபி ஓபா⁴ஸனே படிவிஜானந்தியா ஸங்கா⁴தி³ஸேஸோ, அப்படிவிஜானந்தியா து²ல்லச்சயங், இதரேஹி ஓபா⁴ஸனே படிவிஜானந்தியா து²ல்லச்சயங், அப்படிவிஜானந்தியா து³க்கடந்தி ஏகே, ஸப்³ப³ங் ஸுட்டு² விசாரெத்வா க³ஹேதப்³ப³ங்.
285.Vuttanayamevāti ‘‘kāyasaṃsagge itthilakkhaṇenā’’ti likhitaṃ. ‘‘Itthilakkhaṇenā’’ti kira mahāaṭṭhakathāpāṭho. Sīsaṃ na etīti akkosanaṃ na hoti, ghaṭite pana hoti. Tatrāyaṃ viseso – imehi tīhi ghaṭite eva saṅghādiseso vaccamaggapassāvamaggānaṃ niyatavacanattā, accoḷārikattā vā, na aññehi animittāsītiādīhi aṭṭhahi. Tattha alohitāsi, dhuvalohitāsi, dhuvacoḷāsi, paggharaṇīsi, itthipaṇḍakāsi, vepurisikāsīti etāni cha maggānaṃ aniyatavacanāni, animittāsi, nimittamattāsīti dve padāni anaccoḷārikāni ca, yato aṭṭhapadāni ‘‘saṅghādisesaṃ na janentī’’ti vuttāni, tasmā tāni thullaccayavatthūni. Paribbājakavatthumhi viya akkosamattattā dukkaṭavatthūnīti eke. Itthipaṇḍakāsi, vepurisikāsīti etāneva padāni sakalasarīrasaṇṭhānabhedadīpakāni suddhāni saṅghādisesaṃ na janenti sakalasarīrasāmaññattā, itarāni janenti asāmaññattā. Tāni hi passāvamaggameva dīpenti sikharaṇī-padaṃ viya. Ubhatobyañjanāsīti vacanaṃ pana purisanimittena asaṅghādisesavatthunā missavacanaṃ. Purisaubhatobyañjanakassa ca itthinimittaṃ paṭicchannaṃ, purisanimittaṃ pākaṭaṃ hoti. Yadi tampi janeti, kathaṃ animittāsītiādipadāni na saṅghādisesaṃ janentīti eke, taṃ na yuttaṃ. Purisassapi nimittādhivacanato, ‘‘methunupasaṃhitāhi saṅghādiseso’’ti mātikāya lakkhaṇassa vuttattā ca methunupasaṃhitāhipi obhāsane paṭivijānantiyā saṅghādiseso, appaṭivijānantiyā thullaccayaṃ, itarehi obhāsane paṭivijānantiyā thullaccayaṃ, appaṭivijānantiyā dukkaṭanti eke, sabbaṃ suṭṭhu vicāretvā gahetabbaṃ.
287. ஹஸந்தோதி யங் உத்³தி³ஸ்ஸ ப⁴ணதி, ஸா சே படிவிஜானாதி, ஸங்கா⁴தி³ஸேஸோ.
287.Hasantoti yaṃ uddissa bhaṇati, sā ce paṭivijānāti, saṅghādiseso.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 3. து³ட்டு²ல்லவாசாஸிக்கா²பத³ங் • 3. Duṭṭhullavācāsikkhāpadaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 3. து³ட்டு²ல்லவாசாஸிக்கா²பத³வண்ணனா • 3. Duṭṭhullavācāsikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 3. து³ட்டு²ல்லவாசாஸிக்கா²பத³வண்ணனா • 3. Duṭṭhullavācāsikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 3. து³ட்டு²ல்லவாசாஸிக்கா²பத³வண்ணனா • 3. Duṭṭhullavācāsikkhāpadavaṇṇanā
