| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
பத³பா⁴ஜனீயவண்ணனா
Padabhājanīyavaṇṇanā
யோ விய தி³ஸ்ஸதீதி யாதி³ஸோ, யங்-ஸத்³த³த்தே² யதா²-ஸத்³தோ³ வத்ததீதி ஆஹ ‘‘யேன வா தேன வா யுத்தோ’’தி. யேன தேனாதி ஹி பத³த்³வயேன அனியமதோ யங்-ஸத்³த³த்தோ²வ த³ஸ்ஸிதோ. வாஸது⁴ரயுத்தோதி விபஸ்ஸனாது⁴ரயுத்தோ. யா ஜாதி அஸ்ஸாதி யங்ஜாதி, புக்³க³லோ, ஸோவ யங்ஜச்சோ ஸகத்தே² யபச்சயங் கத்வா. கொ³த்தவஸேன யேன வா தேன வா கொ³த்தேன யதா²கொ³த்தோ வா ததா²கொ³த்தோ வா ஹோதூதி ஸம்ப³ந்தோ⁴. ஸீலேஸூதி பகதீஸு. அத² கோ²தி இத³ங் கிந்தூதி இமஸ்மிங் அத்தே². கிங் வுத்தங் ஹோதீதி அத்தோ². இமஸ்மிங் அத்தே²தி இமஸ்மிங் பாராஜிகவிஸயே. ஏஸோதி யதா²வுத்தேஹி பகாரேஹி யுத்தோ. அரியாயாதி ‘‘உத்³தி³ஸ்ஸ அரியா திட்ட²ந்தி, ஏஸா அரியானங் யாசனா’’தி ஏவங் வுத்தாய, ந, ‘‘தே³ஹி மே’’தி கபணாய. லிங்க³ஸம்படிச்ச²னேனாதி ‘‘பி⁴க்க²ங் சரிஸ்ஸாமீ’’தி சித்தாபா⁴வேபி பி⁴க்கா²ஹாரனிஸ்ஸிதபப்³ப³ஜ்ஜாலிங்க³ஸ்ஸ ஸம்படிச்ச²னேன. காஜப⁴த்தந்தி காஜேஹி ஆனீதப⁴த்தங். அத⁴ம்மிகாயாதி அதி⁴ஸீலஸிக்கா²தி³பி⁴க்கு²கு³ணாபா⁴வதோ வுத்தங், தேனாஹ ‘‘அபூ⁴தாயா’’தி. ‘‘மயங் பி⁴க்கூ²’’தி வத³ந்தா படிஞ்ஞாமத்தேனேவ பி⁴க்கூ², ந அத்த²தோதி அத்தோ². இத³ஞ்ச ‘‘மயங் பி⁴க்கூ²’’தி படிஜானநஸ்ஸாபி ஸம்ப⁴வதோ வுத்தங். ‘‘மயங் பி⁴க்கூ²’’தி அப்படிஜானந்தாபி ஹி பி⁴க்கு²வோஹாரனிமித்தஸ்ஸ லிங்க³ஸ்ஸ க³ஹணேன சேவ பி⁴க்கூ²னங் தி³ன்னபச்சயபா⁴க³க்³க³ஹணாதி³னா ச பி⁴க்கு²படிஞ்ஞா ஏவ நாம ஹொந்தி. ததா² ஹி வுத்தங் புக்³க³லபஞ்ஞத்திஅட்ட²கதா²யங் –
Yo viya dissatīti yādiso, yaṃ-saddatthe yathā-saddo vattatīti āha ‘‘yena vā tena vā yutto’’ti. Yena tenāti hi padadvayena aniyamato yaṃ-saddatthova dassito. Vāsadhurayuttoti vipassanādhurayutto. Yā jāti assāti yaṃjāti, puggalo, sova yaṃjacco sakatthe yapaccayaṃ katvā. Gottavasena yena vā tena vā gottena yathāgotto vā tathāgotto vā hotūti sambandho. Sīlesūti pakatīsu. Atha khoti idaṃ kintūti imasmiṃ atthe. Kiṃ vuttaṃ hotīti attho. Imasmiṃ attheti imasmiṃ pārājikavisaye. Esoti yathāvuttehi pakārehi yutto. Ariyāyāti ‘‘uddissa ariyā tiṭṭhanti, esā ariyānaṃ yācanā’’ti evaṃ vuttāya, na, ‘‘dehi me’’ti kapaṇāya. Liṅgasampaṭicchanenāti ‘‘bhikkhaṃ carissāmī’’ti cittābhāvepi bhikkhāhāranissitapabbajjāliṅgassa sampaṭicchanena. Kājabhattanti kājehi ānītabhattaṃ. Adhammikāyāti adhisīlasikkhādibhikkhuguṇābhāvato vuttaṃ, tenāha ‘‘abhūtāyā’’ti. ‘‘Mayaṃ bhikkhū’’ti vadantā paṭiññāmatteneva bhikkhū, na atthatoti attho. Idañca ‘‘mayaṃ bhikkhū’’ti paṭijānanassāpi sambhavato vuttaṃ. ‘‘Mayaṃ bhikkhū’’ti appaṭijānantāpi hi bhikkhuvohāranimittassa liṅgassa gahaṇena ceva bhikkhūnaṃ dinnapaccayabhāgaggahaṇādinā ca bhikkhupaṭiññā eva nāma honti. Tathā hi vuttaṃ puggalapaññattiaṭṭhakathāyaṃ –
‘‘‘அப்³ரஹ்மசாரீ ப்³ரஹ்மசாரிபடிஞ்ஞோ’தி அஞ்ஞே ப்³ரஹ்மசாரினோ ஸுனிவத்தே² ஸுபாருதே ஸும்ப⁴கபத்தத⁴ரே கா³மனிக³மஜனபத³ராஜதா⁴னீஸு பிண்டா³ய சரித்வா ஜீவிகங் கப்பெந்தே தி³ஸ்வா ஸயம்பி தாதி³ஸேன ஆகாரேன ததா² படிபஜ்ஜனதோ ‘அஹங் ப்³ரஹ்மசாரீ’தி படிஞ்ஞங் தெ³ந்தோ விய ஹோதி. ‘அஹங் பி⁴க்கூ²’தி வத்வா உபோஸத²க்³கா³தீ³னி பவிஸந்தோ பன ப்³ரஹ்மசாரிபடிஞ்ஞோ ஹோதியேவ, ததா² ஸங்கி⁴கங் லாப⁴ங் க³ண்ஹந்தோ’’தி (பு॰ ப॰ அட்ட²॰ 91).
‘‘‘Abrahmacārī brahmacāripaṭiñño’ti aññe brahmacārino sunivatthe supārute sumbhakapattadhare gāmanigamajanapadarājadhānīsu piṇḍāya caritvā jīvikaṃ kappente disvā sayampi tādisena ākārena tathā paṭipajjanato ‘ahaṃ brahmacārī’ti paṭiññaṃ dento viya hoti. ‘Ahaṃ bhikkhū’ti vatvā uposathaggādīni pavisanto pana brahmacāripaṭiñño hotiyeva, tathā saṅghikaṃ lābhaṃ gaṇhanto’’ti (pu. pa. aṭṭha. 91).
தஸ்மா ஏவரூபேஹி படிஞ்ஞாய பி⁴க்கூ²ஹி கொ³த்ரபு⁴பரியோஸானேஹி ஸத்³தி⁴ங் ஸம்போ⁴க³பரிபோ⁴கோ³ ந வட்டதி, அலஜ்ஜீபரிபோ⁴கோ³வ ஹோதி. ஸஞ்சிச்ச ஆபத்திஆபஜ்ஜனாதி³அலஜ்ஜீலக்க²ணங் பன உக்கட்டா²னங் பி⁴க்கூ²னங் வஸேன வுத்தங் ஸாமணேராதீ³னம்பி அலஜ்ஜீவோஹாரத³ஸ்ஸனதோ. ‘‘அலஜ்ஜீஸாமணேரேஹி ஹத்த²கம்மம்பி ந காரேதப்³ப³’’ந்தி ஹி வுத்தங். யதா²விஹிதபடிபத்தியங் அதிட்ட²னஞ்ஹி ஸப்³ப³ஸாதா⁴ரணங் அலஜ்ஜீலக்க²ணங். து³ஸ்ஸீலா லிங்க³க்³க³ஹணதோ பட்டா²ய யதா²விஹிதபடிபத்தியா அபா⁴வதோ ஏகந்தா லஜ்ஜினோவ மஹாஸங்கி⁴காதி³னிகாயந்தரிகா விய, லிங்க³த்தே²னகாத³யோ விய, ச. யாவ 11 ச தேஸங் பி⁴க்கு²படிஞ்ஞா அனுவத்ததி, தாவ பி⁴க்கு² ஏவ, தேஹி ச பரிபோ⁴கோ³ அலஜ்ஜிபஅபோ⁴கோ³வ, தேஸஞ்ச பி⁴க்கு²ஸங்க⁴ஸஞ்ஞாய தி³ன்னங் ஸங்கே⁴ தி³ன்னங் நாம ஹோதி. வுத்தஞ்ஹி ப⁴க³வதா –
Tasmā evarūpehi paṭiññāya bhikkhūhi gotrabhupariyosānehi saddhiṃ sambhogaparibhogo na vaṭṭati, alajjīparibhogova hoti. Sañcicca āpattiāpajjanādialajjīlakkhaṇaṃ pana ukkaṭṭhānaṃ bhikkhūnaṃ vasena vuttaṃ sāmaṇerādīnampi alajjīvohāradassanato. ‘‘Alajjīsāmaṇerehi hatthakammampi na kāretabba’’nti hi vuttaṃ. Yathāvihitapaṭipattiyaṃ atiṭṭhanañhi sabbasādhāraṇaṃ alajjīlakkhaṇaṃ. Dussīlā liṅgaggahaṇato paṭṭhāya yathāvihitapaṭipattiyā abhāvato ekantā lajjinova mahāsaṅghikādinikāyantarikā viya, liṅgatthenakādayo viya, ca. Yāva 11 ca tesaṃ bhikkhupaṭiññā anuvattati, tāva bhikkhu eva, tehi ca paribhogo alajjipaabhogova, tesañca bhikkhusaṅghasaññāya dinnaṃ saṅghe dinnaṃ nāma hoti. Vuttañhi bhagavatā –
‘‘ப⁴விஸ்ஸந்தி கோ² பனானந்த³, அனாக³தமத்³தா⁴னங் கொ³த்ரபு⁴னோ காஸாவகண்டா² து³ஸ்ஸீலா பாபத⁴ம்மா, தேஸு து³ஸ்ஸீலேஸு ஸங்க⁴ங் உத்³தி³ஸ்ஸ தா³னங் த³ஸ்ஸந்தி, ததா³பாஹங், ஆனந்த³, ஸங்க⁴க³தங் த³க்கி²ணங் அஸங்க்²யெய்யங் அப்பமெய்யங் வதா³மீ’’தி (ம॰ நி॰ 3.380).
‘‘Bhavissanti kho panānanda, anāgatamaddhānaṃ gotrabhuno kāsāvakaṇṭhā dussīlā pāpadhammā, tesu dussīlesu saṅghaṃ uddissa dānaṃ dassanti, tadāpāhaṃ, ānanda, saṅghagataṃ dakkhiṇaṃ asaṅkhyeyyaṃ appameyyaṃ vadāmī’’ti (ma. ni. 3.380).
ப⁴க³வதோ ஸங்க⁴ங் உத்³தி³ஸ்ஸ தி³ன்னத்தா த³க்கி²ணா அஸங்க்²யெய்யா அப்பமெய்யா ஜாதா. து³ஸ்ஸீலானங் தி³ன்னத்தா நாதி சே? ந, தேஸு ஸங்க⁴ங் உத்³தி³ஸ்ஸாதி கொ³த்ரபூ⁴னங் படிக்³கா³ஹகத்தேன பராமட்ட²த்தா, இதரதா² ‘‘யேஸு கேஸுசி க³ஹட்டே²ஸு வா பப்³ப³ஜிதேஸு வா ஸங்க⁴ங் உத்³தி³ஸ்ஸா’’தி வத்தப்³ப³தாபஸங்க³தோ, ததா² ச ‘‘ததா³பாஹங், ஆனந்தா³’’தி ஹெட்டி²மகோடித³ஸ்ஸனஸ்ஸ பயோஜனங் ந ஸியா. தஸ்மா கொ³த்ரபூ⁴னம்பி அபா⁴வே ஸங்க⁴ங் உத்³தி³ஸ்ஸ தா³னங் நத்தி², ஹெட்டி²மகோடியா தேஸுபி தி³ன்னா ஸங்க⁴க³தா த³க்கி²ணா அஸங்க்²யெய்யா, ந ததோ பரங் ஸிஜ்ஜ²தீதி தேபி படிஞ்ஞாய பி⁴க்கு² ஏவாதி க³ஹேதப்³ப³ங்.
Bhagavato saṅghaṃ uddissa dinnattā dakkhiṇā asaṅkhyeyyā appameyyā jātā. Dussīlānaṃ dinnattā nāti ce? Na, tesu saṅghaṃ uddissāti gotrabhūnaṃ paṭiggāhakattena parāmaṭṭhattā, itarathā ‘‘yesu kesuci gahaṭṭhesu vā pabbajitesu vā saṅghaṃ uddissā’’ti vattabbatāpasaṅgato, tathā ca ‘‘tadāpāhaṃ, ānandā’’ti heṭṭhimakoṭidassanassa payojanaṃ na siyā. Tasmā gotrabhūnampi abhāve saṅghaṃ uddissa dānaṃ natthi, heṭṭhimakoṭiyā tesupi dinnā saṅghagatā dakkhiṇā asaṅkhyeyyā, na tato paraṃ sijjhatīti tepi paṭiññāya bhikkhu evāti gahetabbaṃ.
ப்³ரஹ்மகோ⁴ஸந்தி உத்தமகோ⁴ஸங், ப்³ரஹ்முனோ கோ⁴ஸஸதி³ஸங் வா கோ⁴ஸங். ஏஹி பி⁴க்கூ²தி ‘‘பி⁴க்கூ²’’திஸம்போ³த⁴னங். ஸங்ஸாரே ப⁴யஇக்க²க தஸ்ஸ ப⁴யஸ்ஸ ஸப்³ப³ஸோ வினாஸனத்த²ங் திஸரணங், ஸாஸனங் வா ஏஹி மனஸா ‘‘தாணங் லேண’’ந்தி பவிஸ உபக³ச்ச². உபக³ந்த்வாபி சர ப்³ரஹ்மசரியந்தி ஸாஸனப்³ரஹ்மசரியங் மக்³க³ப்³ரஹ்மசரியஞ்ச சரஸ்ஸு. ப⁴ண்டூ³தி முண்டி³தகேஸோ. வாஸீதி த³ந்தகட்டா²தி³ச்சே²த³னவாஸி. ப³ந்த⁴னந்தி காயப³ந்த⁴னங். யுத்தோ யோகோ³ ஸமாதி⁴பஞ்ஞாவஸேன ஸோ யுத்தயோகோ³, தஸ்ஸ அட்டே²தே பரிக்கா²ராதி ஸேஸோ. ஸரீரே படிமுக்கேஹியேவ உபலக்கி²தோதி ஸேஸோ. ‘‘தீணி ஸதானீ’’தி வத்தப்³பே³ கா³தா²ப³ந்த⁴ஸுக²த்த²ங் ‘‘தீணி ஸத’’ந்தி வுத்தங்.
Brahmaghosanti uttamaghosaṃ, brahmuno ghosasadisaṃ vā ghosaṃ. Ehi bhikkhūti ‘‘bhikkhū’’tisambodhanaṃ. Saṃsāre bhayaikkhaka tassa bhayassa sabbaso vināsanatthaṃ tisaraṇaṃ, sāsanaṃ vā ehi manasā ‘‘tāṇaṃ leṇa’’nti pavisa upagaccha. Upagantvāpi cara brahmacariyanti sāsanabrahmacariyaṃ maggabrahmacariyañca carassu. Bhaṇḍūti muṇḍitakeso. Vāsīti dantakaṭṭhādicchedanavāsi. Bandhananti kāyabandhanaṃ. Yutto yogo samādhipaññāvasena so yuttayogo, tassa aṭṭhete parikkhārāti seso. Sarīre paṭimukkehiyeva upalakkhitoti seso. ‘‘Tīṇi satānī’’ti vattabbe gāthābandhasukhatthaṃ ‘‘tīṇi sata’’nti vuttaṃ.
தஸ்மாதி ப⁴க³வா ஹெட்டா² வுத்தங் பராமஸதி. ஹெட்டா² ஹி ‘‘அஹங் கோ² பன, கஸ்ஸப, ஜானஞ்ஞேவ வதா³மி ‘ஜானாமீ’தி, பஸ்ஸஞ்ஞேவ வதா³மி ‘பஸ்ஸாமீ’’’தி (ஸங்॰ நி॰ 2.154) வுத்தங், தங் பராமஸதி, யஸ்மா அஹங் ஜானங் வதா³மி, தஸ்மாதி அத்தோ². இஹாதி இமஸ்மிங் ஸாஸனே. திப்³ப³ந்தி மஹந்தங். பச்சுபட்டி²தங் ப⁴விஸ்ஸதீதி தே²ராதி³உபஸங்கமனதோ புரேதரமேவ தேஸு யங்னூன மே ஹிரொத்தப்பங் உபட்டி²தங் ப⁴விஸ்ஸதீதி அத்தோ². குஸலூபஸங்ஹிதந்தி அனவஜ்ஜத⁴ம்மனிஸ்ஸிதங். அட்டி²ங் கத்வாதி அத்தானங் தேன த⁴ம்மேன அட்டி²கங் கத்வா, தங் வா த⁴ம்மங் ‘‘ஏஸ மே அத்தோ²’’தி அத்த²ங் கத்வா. ஓஹிதஸோதோதி த⁴ம்மே நிஹிதஸோதோ. ஏவஞ்ஹி தே, கஸ்ஸப, ஸிக்கி²தப்³ப³ந்தி ஞாணஸோதஞ்ச பஸாத³ஸோதஞ்ச ஓத³ஹித்வா ‘‘த⁴ம்மங் ஸக்கச்சமேவ ஸுணிஸ்ஸாமீ’’தி ஏவமேவ தயா ஸிக்கி²தப்³ப³ங். ஸாதஸஹக³தா ச மே காயக³தாஸதீதி அஸுபே⁴ஸு சேவ ஆனாபானே ச பட²மஜ்ஜா²னவஸேன ஸுக²ஸம்பயுத்தகாயக³தாஸதி. யங் பனேதஸ்ஸ ஓவாத³ஸ்ஸ ஸக்கச்சபடிக்³க³ஹணங், அயமேவ தே²ரஸ்ஸ பப்³ப³ஜ்ஜா ச உபஸம்பதா³ ச அஹோஸி (ஸங்॰ நி॰ அட்ட²॰ 2.2.154).
Tasmāti bhagavā heṭṭhā vuttaṃ parāmasati. Heṭṭhā hi ‘‘ahaṃ kho pana, kassapa, jānaññeva vadāmi ‘jānāmī’ti, passaññeva vadāmi ‘passāmī’’’ti (saṃ. ni. 2.154) vuttaṃ, taṃ parāmasati, yasmā ahaṃ jānaṃ vadāmi, tasmāti attho. Ihāti imasmiṃ sāsane. Tibbanti mahantaṃ. Paccupaṭṭhitaṃ bhavissatīti therādiupasaṅkamanato puretarameva tesu yaṃnūna me hirottappaṃ upaṭṭhitaṃ bhavissatīti attho. Kusalūpasaṃhitanti anavajjadhammanissitaṃ. Aṭṭhiṃ katvāti attānaṃ tena dhammena aṭṭhikaṃ katvā, taṃ vā dhammaṃ ‘‘esa me attho’’ti atthaṃ katvā. Ohitasototi dhamme nihitasoto. Evañhi te, kassapa, sikkhitabbanti ñāṇasotañca pasādasotañca odahitvā ‘‘dhammaṃ sakkaccameva suṇissāmī’’ti evameva tayā sikkhitabbaṃ. Sātasahagatā ca me kāyagatāsatīti asubhesu ceva ānāpāne ca paṭhamajjhānavasena sukhasampayuttakāyagatāsati. Yaṃ panetassa ovādassa sakkaccapaṭiggahaṇaṃ, ayameva therassa pabbajjā ca upasampadā ca ahosi (saṃ. ni. aṭṭha. 2.2.154).
உத்³து⁴மாதகபடிபா⁴கா³ரம்மணங் ஜா²னங் உத்³து⁴மாதகஸஞ்ஞா. கஸிணாரம்மணங் ரூபாவசரஜ்ஜா²னங் ரூபஸஞ்ஞா. இமேதி ஸஞ்ஞாஸீஸேன நித்³தி³ட்டா² இமே த்³வே ஜா²னத⁴ம்மா. ஸோபாகோ ச ப⁴க³வதா புட்டோ² ‘‘ரூபாவசரபா⁴வேன ஏகத்தா², ப்³யஞ்ஜனமேவ நான’’ந்தி ஆஹ. ஆரத்³த⁴சித்தோதி ஆராதி⁴தசித்தோ. க³ருத⁴ம்மபடிக்³க³ஹணாதி³உபஸம்பதா³ உபரி ஸயமேவ ஆவி ப⁴விஸ்ஸதி.
Uddhumātakapaṭibhāgārammaṇaṃ jhānaṃ uddhumātakasaññā. Kasiṇārammaṇaṃ rūpāvacarajjhānaṃ rūpasaññā. Imeti saññāsīsena niddiṭṭhā ime dve jhānadhammā. Sopāko ca bhagavatā puṭṭho ‘‘rūpāvacarabhāvena ekatthā, byañjanameva nāna’’nti āha. Āraddhacittoti ārādhitacitto. Garudhammapaṭiggahaṇādiupasampadā upari sayameva āvi bhavissati.
ஸப்³ப³ந்திமேன பரியாயேனாதி ஸப்³ப³ந்திமேன பரிச்சே²தே³ன. ஞத்திசதுத்தா² கம்மவாசா உபஸம்பதா³கம்மஸ்ஸ காரணத்தா டா²னங், தஸ்ஸ டா²னஸ்ஸ அரஹங் அனுச்ச²விகந்தி வத்து²தோ³ஸாதி³வினிமுத்தகம்மங் ‘‘டா²னாரஹ’’ந்தி வுத்தங் வத்தா²தி³தோ³ஸயுத்தஸ்ஸ கம்மஸ்ஸ ஸபா⁴வதோ கம்மவாசாரஹத்தாபா⁴வா. அத² வா டா²னந்தி நிப்³பா³னப்பத்திஹேதுதோ ஸிக்க²த்தயஸங்க³ஹங் ஸாஸனங் வுச்சதி, தஸ்ஸ அனுச்ச²விகங் கம்மங் டா²னாரஹங். யதா²விஹிதலக்க²ணேன ஹி கம்மேன உபஸம்பன்னோவ ஸகலங் ஸாஸனங் ஸமாதா³ய பரிபூரேதுமரஹதி. தஸ்மா பரிஸுத்³த⁴கம்மவாசாபரியோஸானங் ஸப்³ப³ங் ஸங்க⁴கிச்சங் டா²னாரஹங் நாம, தேனாஹ ‘‘ஸத்து²ஸாஸனாரஹேனா’’தி, ஸீலாதி³ஸகலஸாஸனபரிபுண்ணஸ்ஸ அனுச்ச²விகேனாதி அத்தோ². அயங் இமஸ்மிங் அத்தே²தி ஞத்திசதுத்த²கம்மேன உபஸம்பன்னஸ்ஸேவ ஸப்³ப³ஸிக்கா²பதே³ஸு வுத்தத்தா கிஞ்சாபி ஏஹிபி⁴க்கூ²பஸம்பதா³தீ³ஹி உபஸம்பன்னானங் ஸுத்³த⁴ஸத்தானங் பண்ணத்திவஜ்ஜஸிக்கா²பத³வீதிக்கமேபி அப⁴ப்³ப³தா வா தோ³ஸாபா⁴வோ வா ஸத்³த³தோ பஞ்ஞாயதி, ததா²பி அத்த²தோ தேஸம்பி பண்ணத்திவஜ்ஜேஸு, லோகவஜ்ஜேஸுபி வா ஸுராபானாதி³லஹுகேஸு மக்³கு³ப்பத்திதோ புப்³பே³ அஸஞ்சிச்சாதி³னா ஆபத்திஆபஜ்ஜனங் ஸிஜ்ஜ²தியேவ. ததா² ஹி ‘‘த்³வே புக்³க³லா அப⁴ப்³பா³ ஆபத்திங் ஆபஜ்ஜிதுங் பு³த்³தா⁴ ச பச்சேகபு³த்³தா⁴ ச. த்³வே புக்³க³லா ப⁴ப்³பா³ ஆபத்திங் ஆபஜ்ஜிதுங் பி⁴க்கூ² ச பி⁴க்கு²னியோ சா’’தி (பரி॰ 322) வுத்தங். ஞத்திசதுத்தே²ன கம்மேன உபஸம்பன்னோதி இத³ங் பன ஸப்³ப³ஸிக்கா²பத³வீதிக்கமாரஹே ஸப்³ப³காலிகே ச பி⁴க்கூ² க³ஹெத்வா யேபு⁴ய்யவஸேன வுத்தங். நிருத்திவஸேனாதி நிப்³ப³சனவஸேன. அபி⁴லாபவஸேனாதி வோஹாரவஸேன. கு³ணவஸேனாதி பி⁴க்கு²வோஹாரனிமித்தானங் கு³ணானங் வஸேன.
Sabbantimena pariyāyenāti sabbantimena paricchedena. Ñatticatutthā kammavācā upasampadākammassa kāraṇattā ṭhānaṃ, tassa ṭhānassa arahaṃ anucchavikanti vatthudosādivinimuttakammaṃ ‘‘ṭhānāraha’’nti vuttaṃ vatthādidosayuttassa kammassa sabhāvato kammavācārahattābhāvā. Atha vā ṭhānanti nibbānappattihetuto sikkhattayasaṅgahaṃ sāsanaṃ vuccati, tassa anucchavikaṃ kammaṃ ṭhānārahaṃ. Yathāvihitalakkhaṇena hi kammena upasampannova sakalaṃ sāsanaṃ samādāya paripūretumarahati. Tasmā parisuddhakammavācāpariyosānaṃ sabbaṃ saṅghakiccaṃ ṭhānārahaṃ nāma, tenāha ‘‘satthusāsanārahenā’’ti, sīlādisakalasāsanaparipuṇṇassa anucchavikenāti attho. Ayaṃ imasmiṃ attheti ñatticatutthakammena upasampannasseva sabbasikkhāpadesu vuttattā kiñcāpi ehibhikkhūpasampadādīhi upasampannānaṃ suddhasattānaṃ paṇṇattivajjasikkhāpadavītikkamepi abhabbatā vā dosābhāvo vā saddato paññāyati, tathāpi atthato tesampi paṇṇattivajjesu, lokavajjesupi vā surāpānādilahukesu magguppattito pubbe asañciccādinā āpattiāpajjanaṃ sijjhatiyeva. Tathā hi ‘‘dve puggalā abhabbā āpattiṃ āpajjituṃ buddhā ca paccekabuddhā ca. Dve puggalā bhabbā āpattiṃ āpajjituṃ bhikkhū ca bhikkhuniyo cā’’ti (pari. 322) vuttaṃ. Ñatticatutthena kammena upasampannoti idaṃ pana sabbasikkhāpadavītikkamārahe sabbakālike ca bhikkhū gahetvā yebhuyyavasena vuttaṃ. Niruttivasenāti nibbacanavasena. Abhilāpavasenāti vohāravasena. Guṇavasenāti bhikkhuvohāranimittānaṃ guṇānaṃ vasena.
