| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
பத³பா⁴ஜனீயவண்ணனா
Padabhājanīyavaṇṇanā
92. புனபி ‘‘ஆக³ந்துகாமா’’தி வுத்தத்தா ச ஸப்³ப³தா² மனுஸ்ஸேஹி அனிவுத்த²புப்³பே³ அபி⁴னவமாபிதே, ‘‘புன ந பவிஸிஸ்ஸாமா’’தி நிராலயேஹி பரிச்சத்தே ச கா³மே கா³மவோஹாராபா⁴வா கா³மப்பவேஸனாபுச்ச²னாதி³கிச்சங் நத்தீ²தி வேதி³தப்³ப³ங். அரஞ்ஞபரிச்சே²த³த³ஸ்ஸனத்த²ந்தி கா³மகா³மூபசாரேஸு த³ஸ்ஸிதேஸு தத³ஞ்ஞங் அரஞ்ஞந்தி அரஞ்ஞபரிச்சே²தோ³ ஸக்கா ஞாதுந்தி வுத்தங். மாதிகாயங் பன கா³மக்³க³ஹணேனேவ கா³மூபசாரோபி க³ஹிதோதி த³ட்ட²ப்³போ³. இந்த³கீ²லேதி உம்மாரே. அரஞ்ஞஸங்கே²பங் க³ச்ச²தி ததா² அபி⁴த⁴ம்மே வுத்தத்தா. அஸதிபி இந்த³கீ²லே இந்த³கீ²லட்டா²னியத்தா ‘‘வேமஜ்ஜ²மேவ இந்த³கீ²லோதி வுச்சதீ’’தி வுத்தங். யத்த² பன த்³வாரபா³ஹாபி நத்தி², தத்த² பாகாரவேமஜ்ஜ²மேவ இந்த³கீ²லோதி க³ஹேதப்³ப³ங். லுடி²த்வாதி பவட்டித்வா.
92.Punapi ‘‘āgantukāmā’’ti vuttattā ca sabbathā manussehi anivutthapubbe abhinavamāpite, ‘‘puna na pavisissāmā’’ti nirālayehi pariccatte ca gāme gāmavohārābhāvā gāmappavesanāpucchanādikiccaṃ natthīti veditabbaṃ. Araññaparicchedadassanatthanti gāmagāmūpacāresu dassitesu tadaññaṃ araññanti araññaparicchedo sakkā ñātunti vuttaṃ. Mātikāyaṃ pana gāmaggahaṇeneva gāmūpacāropi gahitoti daṭṭhabbo. Indakhīleti ummāre. Araññasaṅkhepaṃ gacchati tathā abhidhamme vuttattā. Asatipi indakhīle indakhīlaṭṭhāniyattā ‘‘vemajjhameva indakhīloti vuccatī’’ti vuttaṃ. Yattha pana dvārabāhāpi natthi, tattha pākāravemajjhameva indakhīloti gahetabbaṃ. Luṭhitvāti pavaṭṭitvā.
மஜ்ஜி²மஸ்ஸ புரிஸஸ்ஸ ஸுப்பபாதோ வாதிஆதி³ மாதுகா³மஸ்ஸ காகுட்டா²பனவஸேன க³ஹேதப்³ப³ங், ந ப³லத³ஸ்ஸனவஸேன ‘‘மாதுகா³மோ பா⁴ஜனதோ⁴வனஉத³கங் ச²ட்³டே³தீ’’தி (பாரா॰ அட்ட²॰ 1.92) உபரி வுச்சமானத்தா, தேனேவ ‘‘லெட்³டு³பாதோ’’தி அவத்வா ஸுப்பபாதோதிஆதி³ வுத்தங். குருந்த³ட்ட²கதா²யங் மஹாபச்சரியஞ்ச க⁴ரூபசாரோவ கா³மோதி அதி⁴ப்பாயேன ‘‘க⁴ரூபசாரே டி²தஸ்ஸ லெட்³டு³பாதோ கா³மூபசாரோ’’தி வுத்தங். கதபரிக்கே²போதி இமினா பரிக்கே²பதோ ப³ஹி உபசாரோ ந க³ஹேதப்³போ³தி த³ஸ்ஸேதி. ஸுப்பமுஸலபாதோபி அபரிக்கி²த்தகே³ஹஸ்ஸேவ, ஸோ ச யதோ பஹோதி, தத்தே²வ க³ஹேதப்³போ³, அப்பஹோனட்டா²னே பன விஜ்ஜமானட்டா²னமேவ க³ஹேதப்³ப³ங். யஸ்ஸ பன க⁴ரஸ்ஸ ஸமந்ததோ பாகாராதீ³ஹி பரிக்கே²போ கதோ ஹோதி, தத்த² ஸோவ பரிக்கே²போ க⁴ரூபசாரோதி க³ஹேதப்³ப³ங்.
Majjhimassa purisassa suppapāto vātiādi mātugāmassa kākuṭṭhāpanavasena gahetabbaṃ, na baladassanavasena ‘‘mātugāmo bhājanadhovanaudakaṃ chaḍḍetī’’ti (pārā. aṭṭha. 1.92) upari vuccamānattā, teneva ‘‘leḍḍupāto’’ti avatvā suppapātotiādi vuttaṃ. Kurundaṭṭhakathāyaṃ mahāpaccariyañca gharūpacārova gāmoti adhippāyena ‘‘gharūpacāre ṭhitassa leḍḍupāto gāmūpacāro’’ti vuttaṃ. Kataparikkhepoti iminā parikkhepato bahi upacāro na gahetabboti dasseti. Suppamusalapātopi aparikkhittagehasseva, so ca yato pahoti, tattheva gahetabbo, appahonaṭṭhāne pana vijjamānaṭṭhānameva gahetabbaṃ. Yassa pana gharassa samantato pākārādīhi parikkhepo kato hoti, tattha sova parikkhepo gharūpacāroti gahetabbaṃ.
புப்³பே³ வுத்தனயேனாதி பரிக்கி²த்தகா³மே வுத்தனயேன. ஸங்கரீயதீதி மிஸ்ஸீயதி. விகாலே கா³மப்பவேஸனே ‘‘பரிக்கி²த்தஸ்ஸ கா³மஸ்ஸ பரிக்கே²பங் அதிக்கமந்தஸ்ஸ ஆபத்தி பாசித்தியஸ்ஸ. அபரிக்கி²த்தஸ்ஸ கா³மஸ்ஸ உபசாரங் ஓக்கமந்தஸ்ஸ ஆபத்தி பாசித்தியஸ்ஸா’’தி (பாசி॰ 513) வுத்தத்தா கா³மகா³மூபசாரானங் அஸங்கரதா இச்சி²தப்³பா³தி ஆஹ அஸங்கரதோ சாதிஆதி³. கேசி பனெத்த² பாளியங் ‘‘அபரிக்கி²த்தஸ்ஸ கா³மஸ்ஸ உபசாரங் ஓக்கமந்தஸ்ஸாதி இத³ங் பரிக்கே²பாரஹட்டா²னங் ஸந்தா⁴ய வுத்தங், ந ததோ பரங் ஏகலெட்³டு³பாதபரிச்சி²ன்னங் உபசாரங் . தஸ்மா பரிக்கே²பாரஹட்டா²னஸங்கா²தங் கா³மங் ஓக்கமந்தஸ்ஸேவ ஆபத்தி, ந உபசார’’ந்தி வத³ந்தி, தங் ந க³ஹேதப்³ப³ங் ‘‘க⁴ரூபசாரே டி²தஸ்ஸ மஜ்ஜி²மஸ்ஸ புரிஸஸ்ஸ லெட்³டு³பாதப்³ப⁴ந்தரங் கா³மோ நாம. ததோ அஞ்ஞஸ்ஸ லெட்³டு³பாதஸ்ஸ அப்³ப⁴ந்தரங் கா³மூபசாரோ நாமா’’தி (பாரா॰ அட்ட²॰ 1.92) இதே⁴வ அட்ட²கதா²யங் வுத்தத்தா. விகாலே கா³மப்பவேஸனஸிக்கா²பத³ட்ட²கதா²யஞ்ஹி அபரிக்கி²த்தஸ்ஸ கா³மஸ்ஸ உபசாரோ அதி³ன்னாதா³னே வுத்தனயேனேவ வேதி³தப்³போ³தி (பாசி॰ அட்ட²॰ 512) அயமேவ நயோ அதிதி³ஸிதோ. தேனேவ மாதிகாட்ட²கதா²யம்பி ‘‘ய்வாயங் அபரிக்கி²த்தஸ்ஸ கா³மஸ்ஸ உபசாரோ த³ஸ்ஸிதோ, தஸ்ஸ வஸேன விகாலே கா³மப்பவேஸனாதீ³ஸு ஆபத்தி பரிச்சி²ந்தி³தப்³பா³’’தி (கங்கா²॰ அட்ட²॰ து³தியபாராஜிகவண்ணனா) வுத்தங், தஸ்மா பரிக்கி²த்தஸ்ஸ கா³மஸ்ஸ பரிக்கே²பங் அதிக்கமந்தஸ்ஸ, அபரிக்கி²த்தஸ்ஸ கா³மஸ்ஸ க⁴ரூபசாரதோ பட்டா²ய து³தியலெட்³டு³பாதஸங்கா²தங் கா³மூபசாரங் ஓக்கமந்தஸ்ஸ விகாலே கா³மப்பவேஸனாபத்தி ஹோதி, மாதிகாயஞ்ச விகாலே கா³மங் பவிஸெய்யாதி கா³மக்³க³ஹணேனேவ கா³மூபசாரோபி க³ஹிதோதி வேதி³தப்³ப³ங். விகாலே கா³மப்பவேஸனாதீ³ஸூதி ஆதி³-ஸத்³தே³ன க⁴ரக⁴ரூபசாராதீ³ஸு டி²தானங் உப்பன்னலாப⁴பா⁴ஜனாதி³ங் ஸங்க³ண்ஹாதி.
Pubbe vuttanayenāti parikkhittagāme vuttanayena. Saṅkarīyatīti missīyati. Vikāle gāmappavesane ‘‘parikkhittassa gāmassa parikkhepaṃ atikkamantassa āpatti pācittiyassa. Aparikkhittassa gāmassa upacāraṃ okkamantassa āpatti pācittiyassā’’ti (pāci. 513) vuttattā gāmagāmūpacārānaṃ asaṅkaratā icchitabbāti āha asaṅkarato cātiādi. Keci panettha pāḷiyaṃ ‘‘aparikkhittassa gāmassa upacāraṃ okkamantassāti idaṃ parikkhepārahaṭṭhānaṃ sandhāya vuttaṃ, na tato paraṃ ekaleḍḍupātaparicchinnaṃ upacāraṃ . Tasmā parikkhepārahaṭṭhānasaṅkhātaṃ gāmaṃ okkamantasseva āpatti, na upacāra’’nti vadanti, taṃ na gahetabbaṃ ‘‘gharūpacāre ṭhitassa majjhimassa purisassa leḍḍupātabbhantaraṃ gāmo nāma. Tato aññassa leḍḍupātassa abbhantaraṃ gāmūpacāro nāmā’’ti (pārā. aṭṭha. 1.92) idheva aṭṭhakathāyaṃ vuttattā. Vikāle gāmappavesanasikkhāpadaṭṭhakathāyañhi aparikkhittassa gāmassa upacāro adinnādāne vuttanayeneva veditabboti (pāci. aṭṭha. 512) ayameva nayo atidisito. Teneva mātikāṭṭhakathāyampi ‘‘yvāyaṃ aparikkhittassa gāmassa upacāro dassito, tassa vasena vikāle gāmappavesanādīsu āpatti paricchinditabbā’’ti (kaṅkhā. aṭṭha. dutiyapārājikavaṇṇanā) vuttaṃ, tasmā parikkhittassa gāmassa parikkhepaṃ atikkamantassa, aparikkhittassa gāmassa gharūpacārato paṭṭhāya dutiyaleḍḍupātasaṅkhātaṃ gāmūpacāraṃ okkamantassa vikāle gāmappavesanāpatti hoti, mātikāyañca vikāle gāmaṃ paviseyyāti gāmaggahaṇeneva gāmūpacāropi gahitoti veditabbaṃ. Vikāle gāmappavesanādīsūti ādi-saddena gharagharūpacārādīsu ṭhitānaṃ uppannalābhabhājanādiṃ saṅgaṇhāti.
நிக்க²மித்வா ப³ஹி இந்த³கீ²லாதி இந்த³கீ²லதோ ப³ஹி நிக்க²மித்வா டி²தங் யங் டா²னங் ஸப்³ப³மேதங் அரஞ்ஞந்தி யோஜனா. ஆசரியத⁴னு நாம பகதிஹத்தே²ன நவவித³த்தி²பமாணங், ஜியாய பன ஆரோபிதாய ஸத்தட்ட²வித³த்தி²மத்தந்தி வத³ந்தி.
Nikkhamitvā bahi indakhīlāti indakhīlato bahi nikkhamitvā ṭhitaṃ yaṃ ṭhānaṃ sabbametaṃ araññanti yojanā. Ācariyadhanu nāma pakatihatthena navavidatthipamāṇaṃ, jiyāya pana āropitāya sattaṭṭhavidatthimattanti vadanti.
கப்பியந்தி அனுரூபவஸேன வுத்தங் அகப்பியஸ்ஸாபி அப்படிக்³க³ஹிதஸ்ஸ பரிபோ⁴கே³ பாசித்தியத்தா. பரிச்சாகா³தி³ம்ஹி அகதே ‘‘இத³ங் மய்ஹங் ஸந்தக’’ந்தி வத்து²ஸாமினா அவிதி³தம்பி பரிக்³க³ஹிதமேவ பா³லும்மத்தாதீ³னங் ஸந்தகங் விய, தாதி³ஸங் அவஹரந்தோபி ஞாதகாதீ³ஹி பச்சா² ஞத்வா வத்து²ஸாமினா ச அனுப³ந்தி⁴தப்³ப³தோ பாராஜிகோவ ஹோதி. யஸ்ஸ வஸேன புரிஸோ தே²னோ ஹோதி, தங் தெ²ய்யந்தி ஆஹ ‘‘அவஹரணசித்தஸ்ஸேதங் அதி⁴வசன’’ந்தி. பபஞ்சஸங்கா²தி தண்ஹாமானதி³ட்டி²ஸங்கா²தா பபஞ்சகொட்டா²ஸா. ஏகோ சித்தகொட்டா²ஸோதி டா²னாசாவனபயோக³ஸமுட்டா²பகோ ஏகோ சித்தகொட்டா²ஸோதி அத்தோ².
Kappiyanti anurūpavasena vuttaṃ akappiyassāpi appaṭiggahitassa paribhoge pācittiyattā. Pariccāgādimhi akate ‘‘idaṃ mayhaṃ santaka’’nti vatthusāminā aviditampi pariggahitameva bālummattādīnaṃ santakaṃ viya, tādisaṃ avaharantopi ñātakādīhi pacchā ñatvā vatthusāminā ca anubandhitabbato pārājikova hoti. Yassa vasena puriso theno hoti, taṃ theyyanti āha ‘‘avaharaṇacittassetaṃ adhivacana’’nti. Papañcasaṅkhāti taṇhāmānadiṭṭhisaṅkhātā papañcakoṭṭhāsā. Eko cittakoṭṭhāsoti ṭhānācāvanapayogasamuṭṭhāpako eko cittakoṭṭhāsoti attho.
அபி⁴யோக³வஸேனாதி அட்டகரணவஸேன. ஸவிஞ்ஞாணகேனேவாதி இத³ங் ஸவிஞ்ஞாணகானஞ்ஞேவ ஆவேணிகவினிச்ச²யங் ஸந்தா⁴ய வுத்தங். பாணோ அபத³ந்திஆதீ³ஸு ஹி ‘‘பத³ஸா நெஸ்ஸாமீ’’தி பட²மங் பாத³ங் ஸங்காமேதி, ஆபத்தி து²ல்லச்சயஸ்ஸாதிஆதி³னா பாளியங் (பாரா॰ 111), பி⁴க்கு² தா³ஸங் தி³ஸ்வா ஸுக²து³க்க²ங் புச்சி²த்வா வா அபுச்சி²த்வா வா ‘‘க³ச்ச², பலாயித்வா ஸுக²ங் ஜீவா’’தி வத³தி, ஸோ சே பலாயதி, து³தியபத³வாரே பாராஜிகந்திஆதி³னா (பாரா॰ அட்ட²॰ 1.114) அட்ட²கதா²யஞ்ச யோ ஸவிஞ்ஞாணகானஞ்ஞேவ ஆவேணிகோ வினிச்ச²யோ வுத்தோ, ஸோ ஆராமாதி³அவிஞ்ஞாணகேஸு ந லப்³ப⁴தீதி தாதி³ஸங் ஸந்தா⁴ய ‘‘ஸவிஞ்ஞாணகேனேவா’’தி வுத்தங். யோ பன வினிச்ச²யோ ஆராமாதி³அவிஞ்ஞாணகேஸு லப்³ப⁴தி, ஸோ யஸ்மா ஸவிஞ்ஞாணகேஸு அலப்³ப⁴னகோ நாம நத்தி², தஸ்மா வுத்தங் ‘‘நானாப⁴ண்ட³வஸேன ஸவிஞ்ஞாணகாவிஞ்ஞாணகமிஸ்ஸகேனா’’தி. ஸவிஞ்ஞாணகேன ச அவிஞ்ஞாணகேன சாதி அத்தோ². யஸ்மா செத்த² அவிஞ்ஞாணகேனேவ ஆதி³யனாதீ³னி ச²பி பதா³னி ந ஸக்கா யோஜேதுங் இரியாபத²விகோபனஸ்ஸ ஸவிஞ்ஞாணகவஸேனேவ யோஜேதப்³ப³தோ, தஸ்மா ‘‘அவிஞ்ஞாணகேனேவா’’தி ததியங் பகாரங் ந வுத்தந்தி த³ட்ட²ப்³ப³ங்.
Abhiyogavasenāti aṭṭakaraṇavasena. Saviññāṇakenevāti idaṃ saviññāṇakānaññeva āveṇikavinicchayaṃ sandhāya vuttaṃ. Pāṇo apadantiādīsu hi ‘‘padasā nessāmī’’ti paṭhamaṃ pādaṃ saṅkāmeti, āpatti thullaccayassātiādinā pāḷiyaṃ (pārā. 111), bhikkhu dāsaṃ disvā sukhadukkhaṃ pucchitvā vā apucchitvā vā ‘‘gaccha, palāyitvā sukhaṃ jīvā’’ti vadati, so ce palāyati, dutiyapadavāre pārājikantiādinā (pārā. aṭṭha. 1.114) aṭṭhakathāyañca yo saviññāṇakānaññeva āveṇiko vinicchayo vutto, so ārāmādiaviññāṇakesu na labbhatīti tādisaṃ sandhāya ‘‘saviññāṇakenevā’’ti vuttaṃ. Yo pana vinicchayo ārāmādiaviññāṇakesu labbhati, so yasmā saviññāṇakesu alabbhanako nāma natthi, tasmā vuttaṃ ‘‘nānābhaṇḍavasena saviññāṇakāviññāṇakamissakenā’’ti. Saviññāṇakena ca aviññāṇakena cāti attho. Yasmā cettha aviññāṇakeneva ādiyanādīni chapi padāni na sakkā yojetuṃ iriyāpathavikopanassa saviññāṇakavaseneva yojetabbato, tasmā ‘‘aviññāṇakenevā’’ti tatiyaṃ pakāraṃ na vuttanti daṭṭhabbaṃ.
ஆராமந்தி இத³ங் உபலக்க²ணமத்தங் தா³ஸாதி³ஸவிஞ்ஞாணகஸ்ஸாபி இத⁴ ஸங்க³ஹேதப்³ப³தோ, நானாப⁴ண்ட³வஸேன ஹெத்த² யோஜனா த³ஸ்ஸியதி. பரிகப்பிதட்டா²னந்தி பரிகப்பிதோகாஸங். ஸுங்ககா⁴தந்தி எத்த² மக்³க³ங் க³ச்ச²ந்தேஹி ஸத்தி²கேஹி அத்தனா நீயமானப⁴ண்ட³தோ ரஞ்ஞோ தா³தப்³ப³பா⁴கோ³ ஸுங்கோ நாம, ஸோ எத்த² ஹஞ்ஞதி அத³த்வா க³ச்ச²ந்தேஹி அவஹரீயதி, தங் வா ஹந்தி எத்த² ராஜபுரிஸா அத³த³ந்தானங் ஸந்தகங் ப³லக்காரேனாதி ஸுங்ககா⁴தோ, ‘‘எத்த² பவிட்டே²ஹி ஸுங்கோ தா³தப்³போ³’’தி ருக்க²பப்³ப³தாதி³ஸஞ்ஞாணேன நியமிதப்பதே³ஸஸ்ஸேதங் அதி⁴வசனங்.
Ārāmanti idaṃ upalakkhaṇamattaṃ dāsādisaviññāṇakassāpi idha saṅgahetabbato, nānābhaṇḍavasena hettha yojanā dassiyati. Parikappitaṭṭhānanti parikappitokāsaṃ. Suṅkaghātanti ettha maggaṃ gacchantehi satthikehi attanā nīyamānabhaṇḍato rañño dātabbabhāgo suṅko nāma, so ettha haññati adatvā gacchantehi avaharīyati, taṃ vā hanti ettha rājapurisā adadantānaṃ santakaṃ balakkārenāti suṅkaghāto, ‘‘ettha paviṭṭhehi suṅko dātabbo’’ti rukkhapabbatādisaññāṇena niyamitappadesassetaṃ adhivacanaṃ.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 2. து³தியபாராஜிகங் • 2. Dutiyapārājikaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 2. து³தியபாராஜிகங் • 2. Dutiyapārājikaṃ
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / பத³பா⁴ஜனீயவண்ணனா • Padabhājanīyavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / பத³பா⁴ஜனீயவண்ணனா • Padabhājanīyavaṇṇanā
