| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
பத³பா⁴ஜனீயவண்ணனா
Padabhājanīyavaṇṇanā
172. ப்³யஞ்ஜனே ஆத³ரங் அகத்வாதி ஜானித்வா ஸஞ்ஜானித்வாதிஆதி³னா ப்³யஞ்ஜனானுரூபங் அவுத்தத்தா வுத்தங். பாணோதி ஜானந்தோதி இத³ங் மனுஸ்ஸோதி அஜானித்வாபி கேவலங் ஸத்தஸஞ்ஞாய ஏவ பாராஜிகபா⁴வத³ஸ்ஸனத்த²ங் வுத்தங். வத⁴கசேதனாவஸேன சேதெத்வாதி ‘‘இமங் மாரேமீ’’தி வத⁴கசேதனாய சிந்தெத்வா. பகப்பெத்வாதி ‘‘வதா⁴மி ந’’ந்தி ஏவங் சித்தேன பரிச்சி²ந்தி³த்வா. அபி⁴விதரித்வாதி ஸன்னிட்டா²னங் கத்வா, தேனாஹ ‘‘நிராஸங்கசித்தங் பேஸெத்வா’’தி. ஸிகா²ப்பத்தோ அத்தோ²தி ஸஞ்சிச்சாதி புப்³ப³காலகிரியாவஸேன வுத்தஸ்ஸபி வீதிக்கமபூ⁴தஸ்ஸ அபரகாலகிரியாயுத்தத³ஸ்ஸனேன கோடிப்பத்தோ அத்தோ². ஜாதிஉண்ணா நாம தத³ஹுஜாதஏளகஸ்ஸ லோமங். ஏவங் வண்ணப்படிபா⁴க³ந்தி ஏவங் வண்ணஸண்டா²னங். ததோ வா உத்³த⁴ந்தி து³தியஸத்தாஹாதீ³ஸு அப்³பு³தா³தி³பா⁴வப்பத்தங் ஸந்தா⁴ய வுத்தங். பரிஹீனவேக³ஸ்ஸ ஸந்தானஸ்ஸ பச்சயோ ஹோதீதி ஸஹகாரீபச்சயோ ஹோதி, ந ஜனகோ. கம்மமேவ ஹி க²ணே க²ணே உப்பஜ்ஜமானானங் கம்மஜரூபானங் ஜனகபச்சயோ, தஞ்ச பவத்தியங் புப்³பே³ உப்பஜ்ஜித்வா டி²தங் அனுபஹதங் சதுஸந்ததிரூபங் ஸஹகாரீபச்சயங் லபி⁴த்வாவ காதுங் ஸக்கோதி, ந அஞ்ஞதா², யேன கேனசி விரோதி⁴பச்சயேன நிருத்³த⁴சக்கா²தி³ப்பஸாதா³னங் புக்³க³லானங் விஜ்ஜமானம்பி கம்மங் சக்கா²தி³கங் ஜனேதுங் ந ஸக்கோதீதி ஸித்³த⁴மேவ ஹோதி.
172.Byañjane ādaraṃ akatvāti jānitvā sañjānitvātiādinā byañjanānurūpaṃ avuttattā vuttaṃ. Pāṇoti jānantoti idaṃ manussoti ajānitvāpi kevalaṃ sattasaññāya eva pārājikabhāvadassanatthaṃ vuttaṃ. Vadhakacetanāvasena cetetvāti ‘‘imaṃ māremī’’ti vadhakacetanāya cintetvā. Pakappetvāti ‘‘vadhāmi na’’nti evaṃ cittena paricchinditvā. Abhivitaritvāti sanniṭṭhānaṃ katvā, tenāha ‘‘nirāsaṅkacittaṃ pesetvā’’ti. Sikhāppatto atthoti sañciccāti pubbakālakiriyāvasena vuttassapi vītikkamabhūtassa aparakālakiriyāyuttadassanena koṭippatto attho. Jātiuṇṇā nāma tadahujātaeḷakassa lomaṃ. Evaṃ vaṇṇappaṭibhāganti evaṃ vaṇṇasaṇṭhānaṃ. Tato vā uddhanti dutiyasattāhādīsu abbudādibhāvappattaṃ sandhāya vuttaṃ. Parihīnavegassa santānassa paccayo hotīti sahakārīpaccayo hoti, na janako. Kammameva hi khaṇe khaṇe uppajjamānānaṃ kammajarūpānaṃ janakapaccayo, tañca pavattiyaṃ pubbe uppajjitvā ṭhitaṃ anupahataṃ catusantatirūpaṃ sahakārīpaccayaṃ labhitvāva kātuṃ sakkoti, na aññathā, yena kenaci virodhipaccayena niruddhacakkhādippasādānaṃ puggalānaṃ vijjamānampi kammaṃ cakkhādikaṃ janetuṃ na sakkotīti siddhameva hoti.
அதிபாதெந்தோதி அதிபாதெந்தோ வினாஸெந்தோ. வுத்தபகாரமேவாதி ஜீவிதிந்த்³ரியாதிபாதனவிதா⁴னங் வுத்தப்பகாரமேவ. ஸரஸேனேவ பதனஸபா⁴வஸ்ஸ ஸணிகங் பதிதுங் அத³த்வா அதீவ பாதனங் ஸீக⁴பாதனங் அதிபாதோ, பாணஸ்ஸ அதிபாதோ பாணாதிபாதோ. ஆத²ப்³ப³ணிகாதி அத²ப்³ப³ணவேதி³னோ. அத²ப்³ப³ணந்தி அத²ப்³ப³ணவேத³விஹிதங். மந்தங் பயோஜெந்தீதி அலோணபோ⁴ஜனத³ப்³ப³ஸயனஸுஸானக³மனாதீ³ஹி பயோகே³ஹி மந்தங் பரிவத்தெந்தி, தேன யதி²ச்சி²தபாணவதா⁴தி³ப²லங் உபபஜ்ஜதி, தஸ்மா தங் காயவசீகம்மேஸு பவிட்ட²ங். ஈதிந்தி பீளங். உபத்³த³வந்தி ததோ அதி⁴கதரங் பீளங். பஜ்ஜரகந்தி விஸமஜ்ஜரங். ஸூசிகந்தி ஸூசீஹி விய விஜ்ஜ²மானங் ஸூலங். விஸூசிகந்தி ஸஸூலங் ஆமாதிஸாரங். பக்க²ந்தி³யந்தி ரத்தாதிஸாரங். விஜ்ஜங் பரிவத்தெத்வாதி க³ந்தா⁴ரவிஜ்ஜாதி³கங் அத்தனோ விஜ்ஜங் கதூபசாரங் மந்தபட²னக்கமேன பரிஜப்பித்வா. தேஹீதி தேஹி வத்தூ²ஹி. பயோஜனந்தி பவத்தனங். அஹோ வதாயந்தி அயங் தங் குச்சி²க³தங். க³ப்³ப⁴ந்தி இத³ங் குச்சி²க³தங் க³ப்³ப⁴ங். குலும்ப³ஸ்ஸாதி க³ப்³ப⁴ஸ்ஸ, குலஸ்ஸேவ வா, குடும்ப³ஸ்ஸாதி வுத்தங் ஹோதி. பா⁴வனாமயித்³தி⁴யாதி அதி⁴ட்டா²னித்³தி⁴ங் ஸந்தா⁴ய வுத்தங். தங் தேஸங் இச்சா²மத்தந்தி ஸுத்தத்த²தோ ந ஸமேதீதி அதி⁴ப்பாயோ. அத²ப்³ப³ணித்³தி⁴வஸேனேவ ஹி ஸுத்தே ‘‘இத்³தி⁴மா சேதோவஸிப்பத்தோ’’தி வுத்தங், ந பா⁴வனாமயித்³தி⁴வஸேனாதி த³ட்ட²ப்³ப³ங்.
Atipātentoti atipātento vināsento. Vuttapakāramevāti jīvitindriyātipātanavidhānaṃ vuttappakārameva. Saraseneva patanasabhāvassa saṇikaṃ patituṃ adatvā atīva pātanaṃ sīghapātanaṃ atipāto, pāṇassa atipāto pāṇātipāto. Āthabbaṇikāti athabbaṇavedino. Athabbaṇanti athabbaṇavedavihitaṃ. Mantaṃ payojentīti aloṇabhojanadabbasayanasusānagamanādīhi payogehi mantaṃ parivattenti, tena yathicchitapāṇavadhādiphalaṃ upapajjati, tasmā taṃ kāyavacīkammesu paviṭṭhaṃ. Ītinti pīḷaṃ. Upaddavanti tato adhikataraṃ pīḷaṃ. Pajjarakanti visamajjaraṃ. Sūcikanti sūcīhi viya vijjhamānaṃ sūlaṃ. Visūcikanti sasūlaṃ āmātisāraṃ. Pakkhandiyanti rattātisāraṃ. Vijjaṃ parivattetvāti gandhāravijjādikaṃ attano vijjaṃ katūpacāraṃ mantapaṭhanakkamena parijappitvā. Tehīti tehi vatthūhi. Payojananti pavattanaṃ. Aho vatāyanti ayaṃ taṃ kucchigataṃ. Gabbhanti idaṃ kucchigataṃ gabbhaṃ. Kulumbassāti gabbhassa, kulasseva vā, kuṭumbassāti vuttaṃ hoti. Bhāvanāmayiddhiyāti adhiṭṭhāniddhiṃ sandhāya vuttaṃ. Taṃ tesaṃ icchāmattanti suttatthato na sametīti adhippāyo. Athabbaṇiddhivaseneva hi sutte ‘‘iddhimā cetovasippatto’’ti vuttaṃ, na bhāvanāmayiddhivasenāti daṭṭhabbaṃ.
இதரதா²தி பரியேஸெய்யாதி பத³ஸ்ஸ க³வேஸனமத்தமேவ யதா²ருதவஸேன அத்தோ² ஸியா, ததா³ பரியிட்ட²மத்தேன பரியேஸித்வா ஸத்தா²தீ³னங் லத்³த⁴மத்தேனாதி அத்தோ². ஸஸந்தி ஹிங்ஸந்தி ஏதேனாதி ஸத்த²ந்தி வதோ⁴பகரணஸ்ஸ பாஸாணரஜ்ஜுஆதி³னோ ஸப்³ப³ஸ்ஸாபி நாமந்தி ஆஹ லகு³ளாதிஆதி³. லகு³ளந்தி முக்³க³ரஸ்ஸேதங் அதி⁴வசனங். ஸத்த²ஸங்க³ஹோதி மாதிகாயங் ஸத்த²ஹாரகந்தி எத்த² வுத்தஸத்த²ஸங்க³ஹோ. பரதோ வுத்தனயத்தாதி பரதோ நிக³மனவஸேன வுத்தஸ்ஸ து³தியபத³ஸ்ஸ பத³பா⁴ஜனே வுத்தனயத்தா. சித்தஸத்³த³ஸ்ஸ அத்த²தீ³பனத்த²ங் வுத்தோதி சித்த-ஸத்³த³ஸ்ஸ விசித்தாதி³அனேகத்த²விஸயத்தா இதரேஹி நிவத்தெத்வா விஞ்ஞாணத்த²ங் நியமேதுங் வுத்தோ.
Itarathāti pariyeseyyāti padassa gavesanamattameva yathārutavasena attho siyā, tadā pariyiṭṭhamattena pariyesitvā satthādīnaṃ laddhamattenāti attho. Sasanti hiṃsanti etenāti satthanti vadhopakaraṇassa pāsāṇarajjuādino sabbassāpi nāmanti āha laguḷātiādi. Laguḷanti muggarassetaṃ adhivacanaṃ. Satthasaṅgahoti mātikāyaṃ satthahārakanti ettha vuttasatthasaṅgaho. Parato vuttanayattāti parato nigamanavasena vuttassa dutiyapadassa padabhājane vuttanayattā. Cittasaddassa atthadīpanatthaṃ vuttoti citta-saddassa vicittādianekatthavisayattā itarehi nivattetvā viññāṇatthaṃ niyametuṃ vutto.
174. கம்முனா ப³ஜ்ஜ²தீதி பாணாதிபாதகம்முனா ப³ஜ்ஜ²தி, தங் கம்மமஸ்ஸ ஸித்³த⁴ந்தி அத்தோ². உப⁴யதா²பீதி உத்³தி³ஸகானுத்³தி³ஸகவஸேன. பச்சா² வா தேன ரோகே³னாதி ஏதேன அனாக³தம்பி ஜீவிதிந்த்³ரியங் ஆரப்³ப⁴ பாணாதிபாதஸ்ஸ பவத்திங் த³ஸ்ஸேதி. ஏவஞ்ச ‘‘யதா³ ஸக்கோதி, ததா³ தங் ஜீவிதா வோரோபேஹீ’’தி ஆணத்தியா சிரேன ஸமித்³தி⁴யம்பி ஆணத்திக்க²ணேயேவ பாணாதிபாதோ. ஓபாதக²ணனாதி³தா²வரபயோகே³ஸு பயோக³கரணதோ பச்சா² க³ஹிதபடிஸந்தி⁴கஸ்ஸாபி ஸத்தஸ்ஸ மரணே பாணாதிபாதோ ச அனாக³தாரம்மணோ உபபன்னோ ஹோதி. யங் பன ஸிக்கா²பத³விப⁴ங்கே³ ‘‘பஞ்ச ஸிக்கா²பதா³னி பச்சுப்பன்னாரம்மணாயேவா’’தி வுத்தங், தங் பாணாதிபாதாதி³தோ விரதிங் ஸந்தா⁴ய வுத்தங், ந பாணாதிபாதாதி³ந்தி க³ஹேதப்³ப³ங். அஞ்ஞசித்தேனாதி அமாரேதுகாமதாசித்தேன. து³தியப்பஹாரேன மரதீதி பட²மப்பஹாரங் வினா து³தியேனேவ மரதீதி அத்தோ². பட²மப்பஹாரேனேவாதி பட²மப்பஹாரஸமுட்டா²பகசேதனாக்க²ணேயேவாதி அத்தோ². கிஞ்சாபி பட²மப்பஹாரோ ஸயமேவ ந ஸக்கோதி மாரேதுங், து³தியங் பன லபி⁴த்வா ஸக்கொந்தோ ஜீவிதவினாஸஹேது ஹோதி, தஸ்மா பட²மப்பஹாரங் வினா மரணஸ்ஸ அஸித்³த⁴த்தா ‘‘பயோகோ³ தேன ச மரண’’ந்தி இமினா ஸங்ஸந்த³னதோ பட²மப்பஹாரேனேவ கம்மப³த்³தோ⁴ யுத்தோ, ந து³தியேன தஸ்ஸ அஞ்ஞசித்தேன தி³ன்னத்தா. யதா² செத்த², ஏவங் அஞ்ஞேன புக்³க³லேன து³தியப்பஹாரதா³னாதீ³ஸு விய. யதி³ பன து³தியப்பஹாரதா³யகஸ்ஸாபி புக்³க³லஸ்ஸ வத⁴கசேதனா அத்தி², தஸ்ஸாபி அத்தனோ பயோகே³னாபி மதத்தா பயோக³க்க²ணே பாணாதிபாதோதி வேதி³தப்³ப³ங்.
174.Kammunābajjhatīti pāṇātipātakammunā bajjhati, taṃ kammamassa siddhanti attho. Ubhayathāpīti uddisakānuddisakavasena. Pacchā vā tena rogenāti etena anāgatampi jīvitindriyaṃ ārabbha pāṇātipātassa pavattiṃ dasseti. Evañca ‘‘yadā sakkoti, tadā taṃ jīvitā voropehī’’ti āṇattiyā cirena samiddhiyampi āṇattikkhaṇeyeva pāṇātipāto. Opātakhaṇanādithāvarapayogesu payogakaraṇato pacchā gahitapaṭisandhikassāpi sattassa maraṇe pāṇātipāto ca anāgatārammaṇo upapanno hoti. Yaṃ pana sikkhāpadavibhaṅge ‘‘pañca sikkhāpadāni paccuppannārammaṇāyevā’’ti vuttaṃ, taṃ pāṇātipātādito viratiṃ sandhāya vuttaṃ, na pāṇātipātādinti gahetabbaṃ. Aññacittenāti amāretukāmatācittena. Dutiyappahārena maratīti paṭhamappahāraṃ vinā dutiyeneva maratīti attho. Paṭhamappahārenevāti paṭhamappahārasamuṭṭhāpakacetanākkhaṇeyevāti attho. Kiñcāpi paṭhamappahāro sayameva na sakkoti māretuṃ, dutiyaṃ pana labhitvā sakkonto jīvitavināsahetu hoti, tasmā paṭhamappahāraṃ vinā maraṇassa asiddhattā ‘‘payogo tena ca maraṇa’’nti iminā saṃsandanato paṭhamappahāreneva kammabaddho yutto, na dutiyena tassa aññacittena dinnattā. Yathā cettha, evaṃ aññena puggalena dutiyappahāradānādīsu viya. Yadi pana dutiyappahāradāyakassāpi puggalassa vadhakacetanā atthi, tassāpi attano payogenāpi matattā payogakkhaṇe pāṇātipātoti veditabbaṃ.
கம்மாபத்திப்³யத்திபா⁴வத்த²ந்தி ஆனந்தரியாதி³கம்மவிபா⁴க³ஸ்ஸ பாராஜிகாதி³ஆபத்திவிபா⁴க³ஸ்ஸ ச பாகடபா⁴வத்த²ங். ‘‘ஏளகங் மாரேமீ’’தி விபரீதக்³க³ஹணேபி ‘‘இம’’ந்தி யதா²னிபன்னஸ்ஸேவ பரமத்த²தோ க³ஹிதத்தா யதா²வத்து²கங் கம்மப³த்³தோ⁴ ஹோதியேவாதி ஆஹ இமங் வத்து²ந்திஆதி³. கா⁴தகோ ச ஹோதீதி பாணாதிபாதகம்மேன ப³த்³தோ⁴தி அத்தோ². மாதாதி³கு³ணமஹந்தே ஆரப்³ப⁴ பவத்தவத⁴கசேதனாய மஹாஸாவஜ்ஜதாய வுத்தங் ‘‘இத⁴ பன சேதனா தா³ருணா ஹோதீ’’தி.
Kammāpattibyattibhāvatthanti ānantariyādikammavibhāgassa pārājikādiāpattivibhāgassa ca pākaṭabhāvatthaṃ. ‘‘Eḷakaṃ māremī’’ti viparītaggahaṇepi ‘‘ima’’nti yathānipannasseva paramatthato gahitattā yathāvatthukaṃ kammabaddho hotiyevāti āha imaṃ vatthuntiādi. Ghātako ca hotīti pāṇātipātakammena baddhoti attho. Mātādiguṇamahante ārabbha pavattavadhakacetanāya mahāsāvajjatāya vuttaṃ ‘‘idha pana cetanā dāruṇā hotī’’ti.
லோஹிதகந்தி லோஹிதமக்கி²தங். கம்மங் கரொந்தேதி யுத்³த⁴கம்மங் கரொந்தே. யதா²தி⁴ப்பாயங் க³தேதி யோத⁴ங் விஜ்ஜி²த்வா பிதரி வித்³தே⁴, யோத⁴ங் பன அவிஜ்ஜி²த்வா கேவலங் பிதரி வித்³தே⁴பி விஸங்கேதோ நத்தி²யேவ பிதரிபி வத⁴கசித்தஸ்ஸ அத்தி²தாய, கேவலங் யோதே⁴ வித்³தே⁴பி ஏஸேவ நயோ. ஆனந்தரியங் பன நத்தீ²தி பிதுவிஸயங் பாணாதிபாதகம்மங் நத்தீ²தி அத்தோ².
Lohitakanti lohitamakkhitaṃ. Kammaṃ karonteti yuddhakammaṃ karonte. Yathādhippāyaṃ gateti yodhaṃ vijjhitvā pitari viddhe, yodhaṃ pana avijjhitvā kevalaṃ pitari viddhepi visaṅketo natthiyeva pitaripi vadhakacittassa atthitāya, kevalaṃ yodhe viddhepi eseva nayo. Ānantariyaṃ pana natthīti pituvisayaṃ pāṇātipātakammaṃ natthīti attho.
ஏவங் விஜ்ஜா²தி ஏவங் பாதே³ஹி பூ⁴மியங் ட²த்வா ஏவங் த⁴னுங் க³ஹெத்வா ஆகட்³டி⁴த்வாதிஆதி³னா விஜ்ஜ²னப்பகாரஸிக்கா²பனமுகே²ன ஆணாபேதீதி அத்தோ². ஏவங் பஹராதி த³ள்ஹங் அஸிங் க³ஹெத்வா ஏவங் பஹர. ஏவங் கா⁴தேஹீதி ஏவங் கம்மகாரணங் கத்வா மாரேஹி. தத்தகா உபி⁴ன்னங் பாணாதிபாதாதி அனுத்³தி³ஸித்வா யேஸங் கேஸஞ்சி மாரணத்தா²ய உபோ⁴ஹி பயோக³ஸ்ஸ கதத்தா வுத்தங். ஸசே ஹி ஆணாபகோ ‘‘ஏவங் வித்³தே⁴ அஸுகோ ஏவங் மரதீ’’தி ஸஞ்ஞாய ‘‘ஏவங் விஜ்ஜா²’’தி ஆணாபேதி, நியமிதஸ்ஸேவ மரணே ஆணாபகஸ்ஸ கம்மப³த்³தோ⁴தி வத³ந்தி. ஸசே ஆணத்தோ ‘‘அஸுக’’ந்தி நியமெத்வா உத்³தி³ஸ்ஸ ஸரங் கி²பதி, ஆணாபகோ அனியமெத்வா ஆணாபேதி, ஆணாபகஸ்ஸ யேஸங் கேஸஞ்சி மரணேபி கம்மப³த்³தோ⁴, ஆணத்தஸ்ஸ பன நியமிதமரணேயேவாதி வேதி³தப்³ப³ங். மஜ்ஜே²தி ஹத்தி²னோ பிட்டி²னோ மஜ்ஜே². ஏதேனாதி அதி⁴ட்ட²ஹித்வா ஆணாபேதீதிஆதி³பாளிவசனேன. தத்தா²தி ஆணத்திகபயோகே³.
Evaṃ vijjhāti evaṃ pādehi bhūmiyaṃ ṭhatvā evaṃ dhanuṃ gahetvā ākaḍḍhitvātiādinā vijjhanappakārasikkhāpanamukhena āṇāpetīti attho. Evaṃ paharāti daḷhaṃ asiṃ gahetvā evaṃ pahara. Evaṃ ghātehīti evaṃ kammakāraṇaṃ katvā mārehi. Tattakā ubhinnaṃ pāṇātipātāti anuddisitvā yesaṃ kesañci māraṇatthāya ubhohi payogassa katattā vuttaṃ. Sace hi āṇāpako ‘‘evaṃ viddhe asuko evaṃ maratī’’ti saññāya ‘‘evaṃ vijjhā’’ti āṇāpeti, niyamitasseva maraṇe āṇāpakassa kammabaddhoti vadanti. Sace āṇatto ‘‘asuka’’nti niyametvā uddissa saraṃ khipati, āṇāpako aniyametvā āṇāpeti, āṇāpakassa yesaṃ kesañci maraṇepi kammabaddho, āṇattassa pana niyamitamaraṇeyevāti veditabbaṃ. Majjheti hatthino piṭṭhino majjhe. Etenāti adhiṭṭhahitvā āṇāpetītiādipāḷivacanena. Tatthāti āṇattikapayoge.
கிஞ்சாபி கிரியாவிஸேஸோ அட்ட²கதா²ஸு அனாக³தோ, பாளியங் பன ‘‘ஏவங் விஜ்ஜ², ஏவங் பஹர, ஏவங் கா⁴தேஹீ’’தி (பாரா॰ 174) கிரியாவிஸேஸஸ்ஸ பராமட்ட²த்தா ஆசரியபரம்பரா ஆக³தங் கிரியாவிஸேஸம்பி பாளிஸங்ஸந்த³னதோ க³ஹெத்வா த³ஸ்ஸெந்தோ அபரோ நயோதிஆதி³மாஹ. விஜ்ஜ²னந்தி உஸுஸத்திஆதீ³ஹி விஜ்ஜ²னங். சே²த³னந்தி அஸிஆதீ³ஹி ஹத்த²பாதா³தி³ச்சே²த³னங். பே⁴த³னந்தி முக்³க³ராதீ³ஹி ஸீஸாதி³பே⁴த³னங் த்³விதா⁴கரணங். ஸங்க²முண்ட³கந்தி ஸீஸகடாஹே சம்மங் ஸஹ கேஸேஹி உப்பாடெத்வா தூ²லஸக்க²ராஹி ஸீஸகடாஹங் க⁴ங்ஸித்வா ஸங்க²வண்ணகரணவஸேன ஸங்க²முண்ட³கம்மகரணங். ஏவமாதீ³தி ஆதி³-ஸத்³தே³ன பி³ளங்க³தா²லிகாதி³ங் ஸங்க³ண்ஹாதி. உரே பஹரித்வா பிட்டி²யங் பஹரித்வா கீ³வாயங் பஹரித்வாதிஆதி³னா ஸரீராவயவப்பதே³ஸேஸு பஹரணவிஜ்ஜ²னாதி³னியமோபி கிரியாவிஸேஸேயேவ ஸங்க³ய்ஹதி அட்ட²கதா²ஸு ஸங்க²முண்ட³காதி³ஸரீரப்பதே³ஸவிஸயாயபி கா⁴தனாய தத்த² பவேஸிதத்தா, யங் பன ஸாரத்த²தீ³பனியங் (ஸாரத்த²॰ டீ॰ பாராஜிககண்ட³ 2.174 பயோக³கதா²வண்ணனா) புரதோ பஹரித்வா மாரேஹீதிஆதி³கஸ்ஸ அட்ட²கதா²பாட²ஸ்ஸ ‘‘புரிமபஸ்ஸாதீ³னம்பி வத்து²ஸபா⁴க³தோ வத்து²க்³க³ஹணேனேவ க³ஹணந்தி ஆஹ புரதோ பஹரித்வாதிஆதீ³’’தி ஏவமதி⁴ப்பாயகத²னங், தங் ஸங்க²முண்ட³காதி³கஸ்ஸ ஸரீரப்பதே³ஸே கம்மகாரணாகரணஸ்ஸ அட்ட²கதா²ய கிரியாவிஸேஸவிஸயே வுத்தத்தா ந யுஜ்ஜதி. யதா²ணத்தங் முஞ்சித்வா புக்³க³லந்தரமாரணமேவ ஹி வத்து²விஸங்வாதோ³, ந பஹரிதுங் ஆணத்தங் ஸரீரப்பதே³ஸவிஸங்வாத³னங், தேனாஹ ‘‘வத்து²ங் விஸங் வாதெ³த்வா…பே॰… ததோ அஞ்ஞங் மாரேதி. புரதோ பஹரித்வா மாரேஹீதி வா…பே॰… நத்தி² கம்மப³த்³தோ⁴’’தி, இத³ங் பன யதா²ணத்தவத்து²ஸ்மிம்பி கிரியாவிஸேஸவிஸங்கேதேன கம்மப³த்³தா⁴பா⁴வங் த³ஸ்ஸேதுங் வுத்தந்தி பஞ்ஞாயதி. தேன ‘‘வத்து²ங் அவிஸங்வாதெ³த்வா மாரெந்தீ’’தி எத்தகமேவ அவத்வா ‘‘யதா²ணத்தியா’’தி கிரியாவிஸேஸனியமோபி த³ஸ்ஸிதோ, இதரதா² யதா²ணத்தியாதி வசனஸ்ஸ நிரத்த²கதாபத்திதோ. வத்து²னித்³தே³ஸே ச ‘‘வத்தூ²தி மாரேதப்³போ³ ஸத்தோ’’தி (பாரா॰ அட்ட²॰ 2.174) எத்தகமேவ வுத்தங், ந பன ‘‘யதா²ணத்தஸ்ஸ பஹரிதப்³ப³ஸரீரப்பதே³ஸோபீ’’தி வுத்தங். தஸ்மா புரதோ பஹரணாதி³பி கிரியாவிஸேஸே ஏவ ஸங்க³ய்ஹதீதி அம்ஹாகங் க²ந்தி, வீமங்ஸித்வா க³ஹேதப்³ப³ங். வத்து²விஸேஸேனாதி மாதுஆதி³மதஸத்தவிஸேஸேன. கம்மவிஸேஸோதி ஆனந்தரியாதி³கம்மவிஸேஸோ. ஆபத்திவிஸேஸோதி பாராஜிகாதி³ஆபத்திவிஸேஸோ.
Kiñcāpi kiriyāviseso aṭṭhakathāsu anāgato, pāḷiyaṃ pana ‘‘evaṃ vijjha, evaṃ pahara, evaṃ ghātehī’’ti (pārā. 174) kiriyāvisesassa parāmaṭṭhattā ācariyaparamparā āgataṃ kiriyāvisesampi pāḷisaṃsandanato gahetvā dassento aparo nayotiādimāha. Vijjhananti ususattiādīhi vijjhanaṃ. Chedananti asiādīhi hatthapādādicchedanaṃ. Bhedananti muggarādīhi sīsādibhedanaṃ dvidhākaraṇaṃ. Saṅkhamuṇḍakanti sīsakaṭāhe cammaṃ saha kesehi uppāṭetvā thūlasakkharāhi sīsakaṭāhaṃ ghaṃsitvā saṅkhavaṇṇakaraṇavasena saṅkhamuṇḍakammakaraṇaṃ. Evamādīti ādi-saddena biḷaṅgathālikādiṃ saṅgaṇhāti. Ure paharitvā piṭṭhiyaṃ paharitvā gīvāyaṃ paharitvātiādinā sarīrāvayavappadesesu paharaṇavijjhanādiniyamopi kiriyāviseseyeva saṅgayhati aṭṭhakathāsu saṅkhamuṇḍakādisarīrappadesavisayāyapi ghātanāya tattha pavesitattā, yaṃ pana sāratthadīpaniyaṃ (sārattha. ṭī. pārājikakaṇḍa 2.174 payogakathāvaṇṇanā) purato paharitvā mārehītiādikassa aṭṭhakathāpāṭhassa ‘‘purimapassādīnampi vatthusabhāgato vatthuggahaṇeneva gahaṇanti āha purato paharitvātiādī’’ti evamadhippāyakathanaṃ, taṃ saṅkhamuṇḍakādikassa sarīrappadese kammakāraṇākaraṇassa aṭṭhakathāya kiriyāvisesavisaye vuttattā na yujjati. Yathāṇattaṃ muñcitvā puggalantaramāraṇameva hi vatthuvisaṃvādo, na paharituṃ āṇattaṃ sarīrappadesavisaṃvādanaṃ, tenāha ‘‘vatthuṃ visaṃ vādetvā…pe… tato aññaṃ māreti. Purato paharitvā mārehīti vā…pe… natthi kammabaddho’’ti, idaṃ pana yathāṇattavatthusmimpi kiriyāvisesavisaṅketena kammabaddhābhāvaṃ dassetuṃ vuttanti paññāyati. Tena ‘‘vatthuṃ avisaṃvādetvā mārentī’’ti ettakameva avatvā ‘‘yathāṇattiyā’’ti kiriyāvisesaniyamopi dassito, itarathā yathāṇattiyāti vacanassa niratthakatāpattito. Vatthuniddese ca ‘‘vatthūti māretabbo satto’’ti (pārā. aṭṭha. 2.174) ettakameva vuttaṃ, na pana ‘‘yathāṇattassa paharitabbasarīrappadesopī’’ti vuttaṃ. Tasmā purato paharaṇādipi kiriyāvisese eva saṅgayhatīti amhākaṃ khanti, vīmaṃsitvā gahetabbaṃ. Vatthuvisesenāti mātuādimatasattavisesena. Kammavisesoti ānantariyādikammaviseso. Āpattivisesoti pārājikādiāpattiviseso.
யதா³ கதா³சி புப்³ப³ண்ஹேதி ஆணத்ததி³வஸதோ அஞ்ஞஸ்ஸபி யஸ்ஸ கஸ்ஸசி தி³வஸஸ்ஸ புப்³ப³ண்ஹே. ஏதங் கா³மே டி²தந்தி கா³மோ புக்³க³லனியமனத்த²ங் வுத்தோ, ந ஓகாஸனியமனத்த²ங், தஸ்மா ‘‘யத்த² கத்த²சி மாரேதி, நத்தி² விஸங்கேதோ’’தி வுத்தங், ஏதேன காலோகாஸஆவுத⁴இஅயாபத²கிரியாவிஸேஸானங் நியமிச்சா²ய அஸதி யேன கேனசி பகாரேன மரணமேவ இச்ச²ந்தஸ்ஸ ஆணாபகஸ்ஸ முகா²ருள்ஹவஸேன வுத்தஸ்ஸ தே³ஸகாலாதி³னியமஸ்ஸ விஸங்கேதேபி கம்மப³த்³தோ⁴யேவாதி ஞாபிதங் ஹோதி. யோ பன சித்தேன யத்த² கத்த²சி யதா³ கதா³சி யேன கேனசி பகாரேன மரணமேவ இச்ச²ந்தோபி காலாதி³விஸங்கேதேன அகுஸலதோ சோத³னதோ வா முச்சிதுகாமோ லேஸேன காலாதி³னியமங் கரோதி, தஸ்ஸ மனுஸ்ஸவிக்³க³ஹபாராஜிகதோ பரியாயேன அமுச்சனதோ காலாதி³விஸங்கேதேபி கம்மப³த்³தோ⁴வாதி க³ஹெத்வா விசாரணதோ க³ஹேதப்³ப³ங், கேசி பனேதங் ந இச்ச²ந்தி, வீமங்ஸிதப்³ப³ங். துண்டே³னாதி அக்³க³கோடியா. த²ருனாதி க²க்³க³முட்டி²னா. ஏதங் க³ச்ச²ந்தந்தி க³மனேன புக்³க³லோவ நியமிதோ, ந இரியாபதோ², தேனாஹ ‘‘நத்தி² விஸங்கேத’’ந்தி.
Yadā kadāci pubbaṇheti āṇattadivasato aññassapi yassa kassaci divasassa pubbaṇhe. Etaṃ gāme ṭhitanti gāmo puggalaniyamanatthaṃ vutto, na okāsaniyamanatthaṃ, tasmā ‘‘yattha katthaci māreti, natthi visaṅketo’’ti vuttaṃ, etena kālokāsaāvudhaiayāpathakiriyāvisesānaṃ niyamicchāya asati yena kenaci pakārena maraṇameva icchantassa āṇāpakassa mukhāruḷhavasena vuttassa desakālādiniyamassa visaṅketepi kammabaddhoyevāti ñāpitaṃ hoti. Yo pana cittena yattha katthaci yadā kadāci yena kenaci pakārena maraṇameva icchantopi kālādivisaṅketena akusalato codanato vā muccitukāmo lesena kālādiniyamaṃ karoti, tassa manussaviggahapārājikato pariyāyena amuccanato kālādivisaṅketepi kammabaddhovāti gahetvā vicāraṇato gahetabbaṃ, keci panetaṃ na icchanti, vīmaṃsitabbaṃ. Tuṇḍenāti aggakoṭiyā. Tharunāti khaggamuṭṭhinā. Etaṃ gacchantanti gamanena puggalova niyamito, na iriyāpatho, tenāha ‘‘natthi visaṅketa’’nti.
‘‘தீ³க⁴ங் மாரேஹீ’’தி வுத்தேபி தீ³க⁴ஸண்டா²னானங் ப³ஹுபா⁴வதோ ‘‘இத்த²ன்னாமங் ஏவரூபஞ்ச தீ³க⁴’’ந்தி அஞ்ஞேஸங் அஸாதா⁴ரணலக்க²ணேன அனித்³தி³ட்ட²த்தா ‘‘அனியமெத்வா ஆணாபேதீ’’தி வுத்தங், தேனேவாஹ ‘‘யங் கிஞ்சி தாதி³ஸங் மாரேமீ’’தி. எத்த² ச சித்தேன ப³ஹூஸு தீ³க⁴ஸண்டா²னேஸு ஏகங் நியமெத்வா வுத்தேபி வாசாய அனியமிதத்தா அஞ்ஞஸ்மிங் தாதி³ஸே மாரிதே நத்தி² விஸங்கேதோதி வத³ந்தி. அத்தானங் முஞ்சித்வா பரபாணிம்ஹி பாணஸஞ்ஞிதாலக்க²ணஸ்ஸ அங்க³ஸ்ஸ அபா⁴வதோ நேவத்தி² பாணாதிபாதோதி ஆஹ ‘‘ஆணாபகோ முச்சதீ’’தி. அத்தானங் உத்³தி³ஸ்ஸ ‘‘அஸுகட்டா²னே நிஸின்ன’’ந்தி ஓகாஸனியமே தஸ்மிங் பதே³ஸே நிஸின்னஸ்ஸ யஸ்ஸ கஸ்ஸசி ஜீவிதிந்த்³ரியங் ஆரப்³ப⁴ வத⁴கசித்தங் உப்பஜ்ஜதீதி வுத்தங் ‘‘நேவ வத⁴கோ முச்சதி ந ஆணாபகோ’’தி. ஓகாஸஞ்ஹி நியமெத்வா நித்³தி³ஸந்தோ தஸ்மிங் ஓகாஸே நிஸின்னங் மாரேதுகாமோ ஹோதி, ஸயங் பன ததா³ தத்த² நத்தி², தஸ்மா ஓகாஸேன ஸஹ தத்த² நிஸின்னஸ்ஸேவ ஜீவிதிந்த்³ரியங் ஆரம்மணங் ஹோதி, ந அத்தனோதி க³ஹேதப்³ப³ங். ஸசே பன ஸயங் தத்தே²வ நிஸீதி³த்வா அத்தனோ நிஸின்னட்டா²னமேவ நியமெத்வா ‘‘மாரேஹீ’’தி வுத்தேபி அஞ்ஞோ தத்த² நிஸின்னோ மாரியதி, தஸ்ஸாபி அத்தனோபி ஜீவிதங் ஆரப்³ப⁴ வத⁴கசேதனா பவத்ததி, பரஸ்மிங் தத்த² மாரிதே ஆணாபகஸ்ஸ கம்மப³த்³தோ⁴தி க³ஹேதப்³ப³ங். ஏவரூபே டா²னே சித்தப்பவத்தினியமோ பு³த்³த⁴விஸயோ, ந அஞ்ஞேஸங் விஸயோதி ஆஹ ‘‘தஸ்மா எத்த² ந அனாத³ரியங் காதப்³ப³’’ந்தி.
‘‘Dīghaṃ mārehī’’ti vuttepi dīghasaṇṭhānānaṃ bahubhāvato ‘‘itthannāmaṃ evarūpañca dīgha’’nti aññesaṃ asādhāraṇalakkhaṇena aniddiṭṭhattā ‘‘aniyametvā āṇāpetī’’ti vuttaṃ, tenevāha ‘‘yaṃ kiñci tādisaṃ māremī’’ti. Ettha ca cittena bahūsu dīghasaṇṭhānesu ekaṃ niyametvā vuttepi vācāya aniyamitattā aññasmiṃ tādise mārite natthi visaṅketoti vadanti. Attānaṃ muñcitvā parapāṇimhi pāṇasaññitālakkhaṇassa aṅgassa abhāvato nevatthi pāṇātipātoti āha ‘‘āṇāpako muccatī’’ti. Attānaṃ uddissa ‘‘asukaṭṭhāne nisinna’’nti okāsaniyame tasmiṃ padese nisinnassa yassa kassaci jīvitindriyaṃ ārabbha vadhakacittaṃ uppajjatīti vuttaṃ ‘‘neva vadhako muccati na āṇāpako’’ti. Okāsañhi niyametvā niddisanto tasmiṃ okāse nisinnaṃ māretukāmo hoti, sayaṃ pana tadā tattha natthi, tasmā okāsena saha tattha nisinnasseva jīvitindriyaṃ ārammaṇaṃ hoti, na attanoti gahetabbaṃ. Sace pana sayaṃ tattheva nisīditvā attano nisinnaṭṭhānameva niyametvā ‘‘mārehī’’ti vuttepi añño tattha nisinno māriyati, tassāpi attanopi jīvitaṃ ārabbha vadhakacetanā pavattati, parasmiṃ tattha mārite āṇāpakassa kammabaddhoti gahetabbaṃ. Evarūpe ṭhāne cittappavattiniyamo buddhavisayo, na aññesaṃ visayoti āha ‘‘tasmā ettha na anādariyaṃ kātabba’’nti.
ஏவங் ஆணாபெந்தஸ்ஸ ஆசரியஸ்ஸ தாவ து³க்கடந்தி ஸசே ஆணத்திகோ யதா²தி⁴ப்பாயங் ந க³ச்ச²தி, ஆசரியஸ்ஸ ஆணத்திக்க²ணே து³க்கடங். ஸசே பன ஸோ யதா²தி⁴ப்பாயங் க³ச்ச²தி, யங் பரதோ து²ல்லச்சயங் வுத்தங், ஆணத்திக்க²ணே ததே³வ ஹோதி. அத² ஸோ அவஸ்ஸங் கா⁴தேதி, யங் பரதோ ‘‘ஆபத்தி ஸப்³பே³ஸங் பாராஜிகஸ்ஸா’’தி (பாரா॰ 174) வுத்தங், ததோ இமஸ்ஸ ஆணத்திக்க²ணேயேவ பாராஜிகங் ஹோதி, ந து³க்கடது²ல்லச்சயானீதி க³ஹேதப்³ப³ங். தேஸம்பி து³க்கடந்தி பு³த்³த⁴ரக்கி²தாதீ³னம்பி ஆரோசனபச்சயா து³க்கடங், இத³ஞ்ச யதா²ணத்திவஸேன ஸங்க⁴ரக்கி²தஸ்ஸ ஜீவிதா வோரோபனே அஸதி யுஜ்ஜதி, வோரோபனே ஸதி தேஸம்பி ஆரோசனக்க²ணேயேவ பாராஜிகங். படிக்³க³ஹிதமத்தேதி இத³ங் அவஸ்ஸங் படிக்³க³ஹணஸபா⁴வதீ³பனத்த²ங் வுத்தங், ந படிக்³க³ஹிதக்க²ணேயேவ து²ல்லச்சயந்தி த³ஸ்ஸனத்த²ங். ஸசே ஹி ஸோ அவஸ்ஸங் படிக்³க³ஹெஸ்ஸதி, கம்மங் பன ந நிப்பா²தெ³ஸ்ஸதி, ததா³ ஆசரியஸ்ஸ ஆணத்திக்க²ணேயேவ து²ல்லச்சயங் ஹோதீதி த³ட்ட²ப்³ப³ங்.
Evaṃāṇāpentassa ācariyassa tāva dukkaṭanti sace āṇattiko yathādhippāyaṃ na gacchati, ācariyassa āṇattikkhaṇe dukkaṭaṃ. Sace pana so yathādhippāyaṃ gacchati, yaṃ parato thullaccayaṃ vuttaṃ, āṇattikkhaṇe tadeva hoti. Atha so avassaṃ ghāteti, yaṃ parato ‘‘āpatti sabbesaṃ pārājikassā’’ti (pārā. 174) vuttaṃ, tato imassa āṇattikkhaṇeyeva pārājikaṃ hoti, na dukkaṭathullaccayānīti gahetabbaṃ. Tesampi dukkaṭanti buddharakkhitādīnampi ārocanapaccayā dukkaṭaṃ, idañca yathāṇattivasena saṅgharakkhitassa jīvitā voropane asati yujjati, voropane sati tesampi ārocanakkhaṇeyeva pārājikaṃ. Paṭiggahitamatteti idaṃ avassaṃ paṭiggahaṇasabhāvadīpanatthaṃ vuttaṃ, na paṭiggahitakkhaṇeyeva thullaccayanti dassanatthaṃ. Sace hi so avassaṃ paṭiggahessati, kammaṃ pana na nipphādessati, tadā ācariyassa āṇattikkhaṇeyeva thullaccayaṃ hotīti daṭṭhabbaṃ.
மூலட்ட²ஸ்ஸேவ து³க்கடந்தி இத³ங் மஹாஅட்ட²கதா²யங் ஆக³தனயத³ஸ்ஸனமத்தங், ந பனேதங் அத்தனா அதி⁴ப்பேதங், தேனாஹ ஏவங் ஸந்தேதிஆதி³, ஏவங் மஹாஅட்ட²கதா²யங் வுத்தனயேன அத்தே² ஸதீதி அத்தோ². படிக்³க³ஹணே ஆபத்தியேவ ந ஸியாதி வத⁴கஸ்ஸ ‘‘ஸாது⁴ ஸுட்டூ²’’தி மரணபடிக்³க³ஹணே து³க்கடாபத்தி நேவ ஸியா, ஏவங் அனோளாரிகவிஸயேபி தாவ து³க்கடங், கிமங்க³ங் பன மரணபடிக்³க³ஹணேதி த³ஸ்ஸனத்த²ங் ஸஞ்சரித்தபடிக்³க³ஹணாதி³ நித³ஸ்ஸிதங். ‘‘அஹோ வத இத்த²ன்னாமோ ஹதோ அஸ்ஸா’’தி ஏவங் மரணாபி⁴னந்த³னத³ஸ்ஸனத்த²ங் ஸஞ்சரித்தபடிக்³க³ஹணாதி³பி⁴னந்த³னே து³க்கடே ஸதி பகே³வ ‘‘அஹங் தங் மாரெஸ்ஸாமீ’’தி மரணபடிக்³க³ஹணேதி அதி⁴ப்பாயோ. படிக்³க³ண்ஹந்தஸ்ஸேவேதங் து³க்கடந்தி அவதா⁴ரணேன ஸங்க⁴ரக்கி²தஸ்ஸ படிக்³க³ஹணபச்சயா மூலட்ட²ஸ்ஸ நத்தே²வ ஆபத்தீதி த³ஸ்ஸேதி, விஸங்கேதத்தா பட²மங் ஆணத்தது³க்கடமேவஸ்ஸ ஹோதி. கேசி பன ‘‘மூலட்ட²ஸ்ஸாபி து³க்கடமேவா’’தி வத³ந்தி, தங் ந யுத்தங் ஏகேன பயோகே³ன த்³வின்னங் து³க்கடானங் அஸம்ப⁴வா. புரிமனயேதி ஸமனந்தராதீதே அவிஸக்கியதூ³தனித்³தே³ஸே. ஏதந்தி து³க்கடங். ஓகாஸாபா⁴வேனாதி மூலட்ட²ஸ்ஸ து²ல்லச்சயஸ்ஸ வுச்சமானத்தா படிக்³க³ண்ஹந்தஸ்ஸ து³க்கடங் ந வுத்தங் ஓகாஸாபா⁴வேன, ந பன ஆபத்திஅபா⁴வதோதி அதி⁴ப்பாயோ.
Mūlaṭṭhasseva dukkaṭanti idaṃ mahāaṭṭhakathāyaṃ āgatanayadassanamattaṃ, na panetaṃ attanā adhippetaṃ, tenāha evaṃ santetiādi, evaṃ mahāaṭṭhakathāyaṃ vuttanayena atthe satīti attho. Paṭiggahaṇe āpattiyeva na siyāti vadhakassa ‘‘sādhu suṭṭhū’’ti maraṇapaṭiggahaṇe dukkaṭāpatti neva siyā, evaṃ anoḷārikavisayepi tāva dukkaṭaṃ, kimaṅgaṃ pana maraṇapaṭiggahaṇeti dassanatthaṃ sañcarittapaṭiggahaṇādi nidassitaṃ. ‘‘Aho vata itthannāmo hato assā’’ti evaṃ maraṇābhinandanadassanatthaṃ sañcarittapaṭiggahaṇādibhinandane dukkaṭe sati pageva ‘‘ahaṃ taṃ māressāmī’’ti maraṇapaṭiggahaṇeti adhippāyo. Paṭiggaṇhantassevetaṃ dukkaṭanti avadhāraṇena saṅgharakkhitassa paṭiggahaṇapaccayā mūlaṭṭhassa nattheva āpattīti dasseti, visaṅketattā paṭhamaṃ āṇattadukkaṭamevassa hoti. Keci pana ‘‘mūlaṭṭhassāpi dukkaṭamevā’’ti vadanti, taṃ na yuttaṃ ekena payogena dvinnaṃ dukkaṭānaṃ asambhavā. Purimanayeti samanantarātīte avisakkiyadūtaniddese. Etanti dukkaṭaṃ. Okāsābhāvenāti mūlaṭṭhassa thullaccayassa vuccamānattā paṭiggaṇhantassa dukkaṭaṃ na vuttaṃ okāsābhāvena, na pana āpattiabhāvatoti adhippāyo.
175. ஸயங் ஸங்க⁴த்தே²ரத்தா ‘‘உபட்டா²னகாலே’’தி வுத்தங். வாசாய வாசாய து³க்கடந்தி ‘‘யோ கோசி மம வசனங் ஸுத்வா இமங் மாரேதூ’’தி இமினா அதி⁴ப்பாயேன அவத்வா கேவலங் மரணாபி⁴னந்த³னவஸேனேவ வுத்தத்தா சோராபி நாம தங் ந ஹனந்தீதிஆதி³வாசாயபி து³க்கடமேவ வுத்தங். த்³வின்னங் உத்³தி³ஸ்ஸாதி த்³வே உத்³தி³ஸ்ஸ, த்³வின்னங் வா மரணங் உத்³தி³ஸ்ஸ. உபோ⁴ உத்³தி³ஸ்ஸ மரணங் ஸங்வண்ணெந்தஸ்ஸ பயோக³ஸமுட்டா²பிகாய சேதனாய ஏகத்தேபி ‘‘த்³வே பாணாதிபாதா’’தி வத்தப்³ப³தாஸங்கா²தங் ப³லவபா⁴வங் ஆபஜ்ஜித்வா படிஸந்தி⁴பவத்தீஸு மஹாவிபாகத்தா ‘‘அகுஸலராஸீ’’தி வுத்தங், ப³ஹூ உத்³தி³ஸ்ஸ மரணஸங்வண்ணனேபி ஏஸேவ நயோ. தத்தகா பாணாதிபாதாதி யத்தகா ஸங்வண்ணனங் ஸுத்வா மரிஸ்ஸந்தி, தத்தகானம்பி வத்தமானங் அனாக³தஞ்ச ஜீவிதிந்த்³ரியங் ஸப்³ப³ங் ஆலம்பி³த்வாவ சேதனாய பவத்தனதோ தத்தகா பாணாதிபாதா ஹொந்தி, தத்தகாஹி சேதனாஹி தா³தப்³ப³ங் பவத்திவிபாகங் ஏகாவ ஸா சேதனா தா³துங் ஸக்கோதீதி அத்தோ², படிஸந்தி⁴விபாகங் பன ஸயஞ்ச புப்³பா³பரசேதனா ச ஏகேகமேவ தா³துங் ஸக்கோதீதி க³ஹேதப்³ப³ங்.
175. Sayaṃ saṅghattherattā ‘‘upaṭṭhānakāle’’ti vuttaṃ. Vācāya vācāya dukkaṭanti ‘‘yo koci mama vacanaṃ sutvā imaṃ māretū’’ti iminā adhippāyena avatvā kevalaṃ maraṇābhinandanavaseneva vuttattā corāpi nāma taṃ na hanantītiādivācāyapi dukkaṭameva vuttaṃ. Dvinnaṃ uddissāti dve uddissa, dvinnaṃ vā maraṇaṃ uddissa. Ubho uddissa maraṇaṃ saṃvaṇṇentassa payogasamuṭṭhāpikāya cetanāya ekattepi ‘‘dve pāṇātipātā’’ti vattabbatāsaṅkhātaṃ balavabhāvaṃ āpajjitvā paṭisandhipavattīsu mahāvipākattā ‘‘akusalarāsī’’ti vuttaṃ, bahū uddissa maraṇasaṃvaṇṇanepi eseva nayo. Tattakā pāṇātipātāti yattakā saṃvaṇṇanaṃ sutvā marissanti, tattakānampi vattamānaṃ anāgatañca jīvitindriyaṃ sabbaṃ ālambitvāva cetanāya pavattanato tattakā pāṇātipātā honti, tattakāhi cetanāhi dātabbaṃ pavattivipākaṃ ekāva sā cetanā dātuṃ sakkotīti attho, paṭisandhivipākaṃ pana sayañca pubbāparacetanā ca ekekameva dātuṃ sakkotīti gahetabbaṃ.
176. யேஸங் ஹத்த²தோதி யேஸங் ஞாதகபவாரிதாதீ³னங் ஹத்த²தோ, இத³ஞ்ச பி⁴க்கு²னோ ரூபியமூலஸ்ஸ அபா⁴வங் ஸந்தா⁴ய வுத்தங், அத்தனோவ த⁴னஞ்சே, ஸயமேவ மூலங் க³ஹெத்வா முஞ்சதி, மூலங் பன அக்³க³ஹெத்வாபி பொத்த²கஸ்ஸ பொத்த²கஸாமினோ ஸந்தகத்தாபாத³னமேவெத்த² பமாணந்தி க³ஹேதப்³ப³ங். லேகா²த³ஸ்ஸனகோதூஹலகாதி ஸுந்த³ரக்க²ரங் தி³ஸ்வா வா ‘‘கீதி³ஸங் நு கோ² பொத்த²க’’ந்தி வா ஓலோகேதுகாமா.
176.Yesaṃ hatthatoti yesaṃ ñātakapavāritādīnaṃ hatthato, idañca bhikkhuno rūpiyamūlassa abhāvaṃ sandhāya vuttaṃ, attanova dhanañce, sayameva mūlaṃ gahetvā muñcati, mūlaṃ pana aggahetvāpi potthakassa potthakasāmino santakattāpādanamevettha pamāṇanti gahetabbaṃ. Lekhādassanakotūhalakāti sundarakkharaṃ disvā vā ‘‘kīdisaṃ nu kho potthaka’’nti vā oloketukāmā.
பாணாதிபாதஸ்ஸ பயோக³த்தாதி ஸரீரதோ பாணவியோஜனஸ்ஸ நிட்டா²பகபயோக³த்தா. ஓபாதக²ணனத்த²ங் பன குதா³லாதி³அத்தா²ய அயோபீ³ஜஸமுட்டா²பனத்த²ங் அகப்பியபத²விங் வா குதா³லத³ண்டா³தீ³னங் அத்தா²ய பூ⁴தகா³மங் விகோபெந்தஸ்ஸ பாசித்தியமேவ. பாணாதிபாதபயோக³த்தாபா⁴வா அதி³ன்னாதா³னபுப்³ப³பயஓகே³ விய து³தியபரியேஸனாதீ³ஸுபி எத்த² து³க்கடட்டா²னே து³க்கடங், முஸாவாதா³தி³பாசித்தியட்டா²னே பாசித்தியமேவாதி க³ஹேதப்³ப³ங். பமாணேதி அத்தனா ஸல்லக்கி²தே பமாணே. தச்செ²த்வாதி உன்னதப்பதே³ஸங் தச்செ²த்வா. பங்ஸுபச்சி²ந்தி ஸப்³ப³ந்திமங் பங்ஸுபச்சி²ங். எத்தகங் அலந்தி நிட்டா²பேதுகாமதாய ஸப்³ப³ந்திமபயஓக³ஸாதி⁴கா சேதனா ஸன்னிட்டா²பகசேதனா, மஹாஅட்ட²கதா²யங் ‘‘ஏகஸ்மிங் தி³வஸே அவூபஸந்தேனேவ பயோகே³ன க²ணித்வா நிட்டா²பெந்தங் ஸந்தா⁴ய ஸப்³ப³ந்திமா ஸன்னிட்டா²பகசேதனா வுத்தா, இதராஸு பன அட்ட²கதா²ஸு ‘‘இமஸ்மிங் பதித்வா மரந்தூ’’தி அதி⁴ப்பாயேன ஏகஸ்மிங் தி³வஸே கிஞ்சி க²ணித்வா அபரஸ்மிம்பி தி³வஸே ததோ கிஞ்சி கிஞ்சி க²ணித்வா நிட்டா²பெந்தங் ஸந்தா⁴ய வுத்தந்தி ஏவங் அட்ட²கதா²னங் அஞ்ஞமஞ்ஞவிரோதோ⁴ ஞாதப்³போ³. அத்தனோ த⁴ம்மதாயாதி அஜானித்வா, பக்க²லித்வா வா. அரஹந்தாபி ஸங்க³ஹங் க³ச்ச²ந்தீதி அஞ்ஞேஹி பாதியமானானங் அமரிதுகாமானம்பி அரஹந்தானங் மரணங் ஸம்ப⁴வதீதி வுத்தங். புரிமனயேதி ‘‘மரிதுகாமா இத⁴ மரிஸ்ஸந்தீ’’தி வுத்தனயே. விஸங்கேதோதி மரிதுகாமானங் மாரேதுகாமானஞ்ச உத்³தி³ஸ்ஸ க²தத்தா அமரிதுகாமானங் மரணே கம்மப³த்³தோ⁴ நத்தீ²தி அத்தோ².
Pāṇātipātassa payogattāti sarīrato pāṇaviyojanassa niṭṭhāpakapayogattā. Opātakhaṇanatthaṃ pana kudālādiatthāya ayobījasamuṭṭhāpanatthaṃ akappiyapathaviṃ vā kudāladaṇḍādīnaṃ atthāya bhūtagāmaṃ vikopentassa pācittiyameva. Pāṇātipātapayogattābhāvā adinnādānapubbapayaoge viya dutiyapariyesanādīsupi ettha dukkaṭaṭṭhāne dukkaṭaṃ, musāvādādipācittiyaṭṭhāne pācittiyamevāti gahetabbaṃ. Pamāṇeti attanā sallakkhite pamāṇe. Tacchetvāti unnatappadesaṃ tacchetvā. Paṃsupacchinti sabbantimaṃ paṃsupacchiṃ. Ettakaṃ alanti niṭṭhāpetukāmatāya sabbantimapayaogasādhikā cetanā sanniṭṭhāpakacetanā, mahāaṭṭhakathāyaṃ ‘‘ekasmiṃ divase avūpasanteneva payogena khaṇitvā niṭṭhāpentaṃ sandhāya sabbantimā sanniṭṭhāpakacetanā vuttā, itarāsu pana aṭṭhakathāsu ‘‘imasmiṃ patitvā marantū’’ti adhippāyena ekasmiṃ divase kiñci khaṇitvā aparasmimpi divase tato kiñci kiñci khaṇitvā niṭṭhāpentaṃ sandhāya vuttanti evaṃ aṭṭhakathānaṃ aññamaññavirodho ñātabbo. Attano dhammatāyāti ajānitvā, pakkhalitvā vā. Arahantāpi saṅgahaṃ gacchantīti aññehi pātiyamānānaṃ amaritukāmānampi arahantānaṃ maraṇaṃ sambhavatīti vuttaṃ. Purimanayeti ‘‘maritukāmā idha marissantī’’ti vuttanaye. Visaṅketoti maritukāmānaṃ māretukāmānañca uddissa khatattā amaritukāmānaṃ maraṇe kammabaddho natthīti attho.
தத்த² பதிதங் ப³ஹி நீஹரித்வாதி இத³ங் தத்த² பதனபச்சயா மரணஸ்ஸ பவத்தத்தா வுத்தங். ஆவாடே பதித்வா தோ²கங் சிராயித்வா க³ச்ச²ந்தங் க³ஹெத்வா மாரிதே தத்த² பதிதரோகே³ன பீளிதஸ்ஸ க³ச்ச²தோ பக்க²லித்வா பாஸாணாதீ³ஸு பதனேனாபி மரணேபி ஓபாதக²ணகோ ந முச்சதீதி வேதி³தப்³ப³ங். அமரிதுகாமா வாதி அதி⁴ப்பாயஸ்ஸ ஸம்ப⁴வதோ ஓபபாதிகே உத்தரிதுங் அஸக்குணித்வா மதேபி பாராஜிகங் வுத்தங். ‘‘நிப்³ப³த்தித்வா’’தி வுத்தத்தா பதனங் ந தி³ஸ்ஸதீதி சே? தத்த²ஸ்ஸ நிப்³ப³த்தியேவ பதனந்தி நத்தி² விரோதோ⁴. யஸ்மா மாதுயா பதித்வா பரிவத்திதலிங்கா³ய மதாய ஸோ மாதுகா⁴தகோ ஹோதி, ந கேவலங் மனுஸ்ஸபுரிஸகா⁴தகோ, தஸ்மா பதிதஸ்ஸேவ வஸேன ஆபத்தீதி அதி⁴ப்பாயேன ‘‘பதனரூபங் பமாண’’ந்தி வுத்தங், இத³ங் பன அகாரணங் ‘‘லிங்கே³ பரிவத்தேபி ஏகஸந்தானத்தஸ்ஸ அவிக³தத்தா. மனுஸ்ஸபூ⁴தங் மாதரங் வா பிதரங் வா அபி பரிவத்தலிங்க³ங் ஜீவிதா வோரோபெந்தஸ்ஸ கம்மங் ஆனந்தரிய’’ந்தி ஹி அட்ட²கதா²யங் வுத்தங். யேன பன ஸபா⁴வேன ஸத்தா ஜாயந்தி, தேனேவ மரந்தி, ஸோவ தேஸங் ரூபந்தரக்³க³ஹணேபி ஸபா⁴வோதி ‘‘மரணரூபமேவ பமாணங், தஸ்மா பாசித்திய’’ந்தி வுத்தோ. பச்சி²மோ வாதோ³ பமாணங், ஏவங் ஸந்தே பாளியங் ‘‘யக்கோ² வா பேதோ வா திரச்சா²னக³தமனுஸ்ஸவிக்³க³ஹோ வா தஸ்மிங் பததி, ஆபத்தி து³க்கடஸ்ஸ. பதிதே து³க்கா² வேத³னா உப்பஜ்ஜதி, ஆபத்தி து³க்கடஸ்ஸ. மரதி, ஆபத்தி து²ல்லச்சயஸ்ஸா’’தி கஸ்மா வுத்தந்தி சே? நாயங் தோ³ஸோ. ‘‘யக்கோ² வா பேதோ வா’’தி ஹி பட²மங் ஸகரூபங் த³ஸ்ஸெத்வா ரூபந்தரங் க³ஹெத்வாபி டி²தேயேவ யக்க²பேதே த³ஸ்ஸேதுங் ‘‘திரச்சா²னக³தமனுஸ்ஸவிக்³க³ஹோ வா’’தி வுத்தங். தஸ்மா திரச்சா²னக³தவிக்³க³ஹோ மனுஸ்ஸவிக்³க³ஹோ வா யக்கோ² வா பேதோ வாதி ஏவமெத்த² யோஜனா காதப்³பா³. கேசி பன ‘‘மனுஸ்ஸவிக்³க³ஹேன டி²ததிரச்சா²னக³தானங் ஆவேணிகங் கத்வா து²ல்லச்சயங் வுத்தங் விய தி³ஸ்ஸதீ’’தி வத³ந்தி, தங் ந யுத்தங் திரச்சா²னோ வா மனுஸ்ஸவிக்³க³ஹோதி வத்தப்³ப³தோ, அட்ட²கதா²ஸு ச இமஸ்ஸ விஸேஸஸ்ஸ அவுத்தத்தா. யக்க²பேதரூபேன மதேபி ஏஸேவ நயோதி இமினா மரணரூபஸ்ஸேவ பமாணத்தா து²ல்லச்சயங் அதிதி³ஸதி.
Tatthapatitaṃ bahi nīharitvāti idaṃ tattha patanapaccayā maraṇassa pavattattā vuttaṃ. Āvāṭe patitvā thokaṃ cirāyitvā gacchantaṃ gahetvā mārite tattha patitarogena pīḷitassa gacchato pakkhalitvā pāsāṇādīsu patanenāpi maraṇepi opātakhaṇako na muccatīti veditabbaṃ. Amaritukāmā vāti adhippāyassa sambhavato opapātike uttarituṃ asakkuṇitvā matepi pārājikaṃ vuttaṃ. ‘‘Nibbattitvā’’ti vuttattā patanaṃ na dissatīti ce? Tatthassa nibbattiyeva patananti natthi virodho. Yasmā mātuyā patitvā parivattitaliṅgāya matāya so mātughātako hoti, na kevalaṃ manussapurisaghātako, tasmā patitasseva vasena āpattīti adhippāyena ‘‘patanarūpaṃ pamāṇa’’nti vuttaṃ, idaṃ pana akāraṇaṃ ‘‘liṅge parivattepi ekasantānattassa avigatattā. Manussabhūtaṃ mātaraṃ vā pitaraṃ vā api parivattaliṅgaṃ jīvitā voropentassa kammaṃ ānantariya’’nti hi aṭṭhakathāyaṃ vuttaṃ. Yena pana sabhāvena sattā jāyanti, teneva maranti, sova tesaṃ rūpantaraggahaṇepi sabhāvoti ‘‘maraṇarūpameva pamāṇaṃ, tasmā pācittiya’’nti vutto. Pacchimo vādo pamāṇaṃ, evaṃ sante pāḷiyaṃ ‘‘yakkho vā peto vā tiracchānagatamanussaviggaho vā tasmiṃ patati, āpatti dukkaṭassa. Patite dukkhā vedanā uppajjati, āpatti dukkaṭassa. Marati, āpatti thullaccayassā’’ti kasmā vuttanti ce? Nāyaṃ doso. ‘‘Yakkho vā peto vā’’ti hi paṭhamaṃ sakarūpaṃ dassetvā rūpantaraṃ gahetvāpi ṭhiteyeva yakkhapete dassetuṃ ‘‘tiracchānagatamanussaviggaho vā’’ti vuttaṃ. Tasmā tiracchānagataviggaho manussaviggaho vā yakkho vā peto vāti evamettha yojanā kātabbā. Keci pana ‘‘manussaviggahena ṭhitatiracchānagatānaṃ āveṇikaṃ katvā thullaccayaṃ vuttaṃ viya dissatī’’ti vadanti, taṃ na yuttaṃ tiracchāno vā manussaviggahoti vattabbato, aṭṭhakathāsu ca imassa visesassa avuttattā. Yakkhapetarūpena matepi eseva nayoti iminā maraṇarūpasseva pamāṇattā thullaccayaṃ atidisati.
முதா⁴தி அமூலேன. ஸோ நித்³தோ³ஸோதி தேன தத்த² கதபயோக³ஸ்ஸ அபா⁴வதோ, யதி³ பன ஸோபி தத்த² கிஞ்சி கரோதி, ந முச்சதி ஏவாதி த³ஸ்ஸெந்தோ ஏவங் பதிதாதிஆதி³மாஹ. தத்த² ஏவந்தி ஏவங் மயா கதேதி அத்தோ² . ந நஸ்ஸிஸ்ஸந்தீதி அத³ஸ்ஸனங் ந க³மிஸ்ஸந்தி, ந பலாயிஸ்ஸந்தீதி அதி⁴ப்பாயோ. ஸுஉத்³த⁴ரா வா ப⁴விஸ்ஸந்தீதி இத³ங் க³ம்பீ⁴ரஸ்ஸ ஓபாதஸ்ஸ பூரணே பயோஜனத³ஸ்ஸனங். உத்தானே கதே ஓபாதே ஸீக⁴ங் அம்ஹேஹி க³ஹெத்வா மாரேதுங் ஸுஉத்³த⁴ரா ப⁴விஸ்ஸந்தீதி அதி⁴ப்பாயோ. விப்படிஸாரே உப்பன்னேதி மூலட்ட²ங் ஸந்தா⁴ய வுத்தங். யதி³ பன பச்சி²மோபி லபி⁴த்வா தத்த² வுத்தப்பகாரங் கிஞ்சி கத்வா புன விப்படிஸாரே உப்பன்னே ஏவங் கரோதி, தஸ்ஸாபி ஏஸேவ நயோ. ஜாதபத²வீ ஜாதாதி ஈதி³ஸே புன அஞ்ஞேன ஓபாதே க²தே ததா³ முச்சதீதி த³ஸ்ஸனத்த²ங் வுத்தங், ஜாதபத²வீஸதி³ஸங் கத்வா புன ஸுட்டு² கொட்டெத்வா த³ள்ஹதரங் பூரிதேபி முச்சதியேவாதி க³ஹேதப்³ப³ங்.
Mudhāti amūlena. So niddosoti tena tattha katapayogassa abhāvato, yadi pana sopi tattha kiñci karoti, na muccati evāti dassento evaṃ patitātiādimāha. Tattha evanti evaṃ mayā kateti attho . Na nassissantīti adassanaṃ na gamissanti, na palāyissantīti adhippāyo. Suuddharā vā bhavissantīti idaṃ gambhīrassa opātassa pūraṇe payojanadassanaṃ. Uttāne kate opāte sīghaṃ amhehi gahetvā māretuṃ suuddharā bhavissantīti adhippāyo. Vippaṭisāre uppanneti mūlaṭṭhaṃ sandhāya vuttaṃ. Yadi pana pacchimopi labhitvā tattha vuttappakāraṃ kiñci katvā puna vippaṭisāre uppanne evaṃ karoti, tassāpi eseva nayo. Jātapathavī jātāti īdise puna aññena opāte khate tadā muccatīti dassanatthaṃ vuttaṃ, jātapathavīsadisaṃ katvā puna suṭṭhu koṭṭetvā daḷhataraṃ pūritepi muccatiyevāti gahetabbaṃ.
த²த்³த⁴தரந்தி தி²ரகரணத்த²ங் அபராபராய பாஸயட்டி²யா ஸத்³தி⁴ங் ப³ந்தி⁴த்வா வா தமேவ வா ஸிதி²லபூ⁴தபாஸங் த²த்³த⁴தரங் ப³ந்தி⁴த்வா ட²பேதி. கா²ணுகந்தி பாஸயட்டி²ப³ந்த⁴னகா²ணுகங். தத்த²ஜாதகயட்டி²ங் சி²ந்தி³த்வா முச்சதீதி இத³ங் அரஞ்ஞே யதா²டி²தமேவ த³ண்ட³ங் மூலே அச்சி²ந்தி³த்வா பாஸப³ந்த⁴னயொக்³க³ங் கத்வா ட²பிதத்தா தத்த² அஞ்ஞோபி கோசி பாஸங் ப³ந்தெ⁴ய்ய, மூலட்டோ² ந முச்சதி, தங் பன மூலேபி சி²ந்தி³த்வா க²ண்டா³க²ண்ட³ங் கத்வா முச்சதீதி த³ஸ்ஸனத்த²ங் வுத்தங். ரஜ்ஜுகேதி வாகேஹி ஏகவாரங் வட்டிதரஜ்ஜுகே. ஸயங் வட்டிதந்தி தனுகவட்டிதங் தி³கு³ணதிகு³ணதாபாத³னேன அத்தனா வட்டிதங். உப்³ப³ட்டெத்வாதி பாகதிகங் கத்வா. கோ³பெந்தோபீதி ஹீரங் ஹீரங் கத்வா கோ³பெந்தோபி.
Thaddhataranti thirakaraṇatthaṃ aparāparāya pāsayaṭṭhiyā saddhiṃ bandhitvā vā tameva vā sithilabhūtapāsaṃ thaddhataraṃ bandhitvā ṭhapeti. Khāṇukanti pāsayaṭṭhibandhanakhāṇukaṃ. Tatthajātakayaṭṭhiṃ chinditvā muccatīti idaṃ araññe yathāṭhitameva daṇḍaṃ mūle acchinditvā pāsabandhanayoggaṃ katvā ṭhapitattā tattha aññopi koci pāsaṃ bandheyya, mūlaṭṭho na muccati, taṃ pana mūlepi chinditvā khaṇḍākhaṇḍaṃ katvā muccatīti dassanatthaṃ vuttaṃ. Rajjuketi vākehi ekavāraṃ vaṭṭitarajjuke. Sayaṃ vaṭṭitanti tanukavaṭṭitaṃ diguṇatiguṇatāpādanena attanā vaṭṭitaṃ. Ubbaṭṭetvāti pākatikaṃ katvā. Gopentopīti hīraṃ hīraṃ katvā gopentopi.
177. ஆலம்ப³னருக்கோ² வாதி தத்த²ஜாதகங் ஸந்தா⁴ய வுத்தங். தத³த்த²மேவ கத்வாதி மாரணத்த²மேவ அயோபீ³ஜஸமுட்டா²பனாதி³னா வாஸிஆதி³ங் ஸத்த²ங் காரெத்வா. பாகதிகந்தி அஞ்ஞேஹி கதங் பகதிஸத்த²மேவ லபி⁴த்வா மூலட்டே²ன ட²பிதங் ஹோதீதி அத்தோ². முச்சதீதி மூலட்டோ² முச்சதி. விஸமண்ட³லந்தி மஞ்சபீடா²தீ³ஸு ஆலித்தங் விஸமண்ட³லங்.
177.Ālambanarukkho vāti tatthajātakaṃ sandhāya vuttaṃ. Tadatthameva katvāti māraṇatthameva ayobījasamuṭṭhāpanādinā vāsiādiṃ satthaṃ kāretvā. Pākatikanti aññehi kataṃ pakatisatthameva labhitvā mūlaṭṭhena ṭhapitaṃ hotīti attho. Muccatīti mūlaṭṭho muccati. Visamaṇḍalanti mañcapīṭhādīsu ālittaṃ visamaṇḍalaṃ.
வத்வா அஸிங் உபனிக்கி²பதீதி எத்த² முகே²ன அவத்வா மனஸாவ சிந்தெத்வா உபனிக்கி²பனேபி ஏஸேவ நயோ. புரிமனயேனாதி யேஸங் ஹத்த²தோ மூலங் க³ஹிதந்திஆதி³னா. விஸபா⁴க³ரோகோ³ நாம குட்டா²தி³விரூபபா⁴வதோ, க³ண்ட³பீளகாதி³ வா ஜீவிதப்பவத்தியா பச்சனீகத்தா.
Vatvā asiṃ upanikkhipatīti ettha mukhena avatvā manasāva cintetvā upanikkhipanepi eseva nayo. Purimanayenāti yesaṃ hatthato mūlaṃ gahitantiādinā. Visabhāgarogo nāma kuṭṭhādivirūpabhāvato, gaṇḍapīḷakādi vā jīvitappavattiyā paccanīkattā.
178. மனாபியேபி ஏஸேவ நயோதி ஏதேன மனாபியங் ரூபங் உபஸங்ஹரதீதி எத்த² யங் வா மனாபரூபங், தஸ்ஸ ஸமீபே ட²பேதி, அத்தனா வா மனாபியேன ரூபேன ஸமன்னாக³தோ திட்ட²தீதிஆதி³ யோஜேதப்³ப³ந்தி த³ஸ்ஸேதி. அலங்கரித்வா உபஸங்ஹரதீதி ‘‘அலாப⁴கேன ஸுஸ்ஸித்வா மரதூ’’தி இமினா அதி⁴ப்பாயேன உபஸங்ஹரதி, தேனேவ ‘‘ஸசே உத்தஸித்வா மரதி, விஸங்கேதோ’’தி வுத்தங். அலாப⁴கேன ஸுஸ்ஸித்வா மரதீதி எத்த² பாராஜிகோதி பாட²ஸேஸோ த³ட்ட²ப்³போ³. மஹாகச்சு² நாம வல்லிப²லவிஸேஸோ, யஸ்ஸ மஜ்ஜாரபாத³ஸ்ஸேவ ஸண்டா²னங் து³க்க²ஸம்ப²ஸ்ஸானி ஸுகு²மலோமானி ச ஹொந்தி. ஹங்ஸபுப்ப²ந்தி ஹங்ஸாதீ³னங் பக்க²லோமங் ஸந்தா⁴ய வத³ந்தி. அத்தனோ த⁴ம்மதாய மரதி, அனாபத்தீதி பாராஜிகங் ஸந்தா⁴ய வுத்தங் து³க்கடா ந முச்சனதோ.
178.Manāpiyepi eseva nayoti etena manāpiyaṃ rūpaṃ upasaṃharatīti ettha yaṃ vā manāparūpaṃ, tassa samīpe ṭhapeti, attanā vā manāpiyena rūpena samannāgato tiṭṭhatītiādi yojetabbanti dasseti. Alaṅkaritvā upasaṃharatīti ‘‘alābhakena sussitvā maratū’’ti iminā adhippāyena upasaṃharati, teneva ‘‘sace uttasitvā marati, visaṅketo’’ti vuttaṃ. Alābhakena sussitvā maratīti ettha pārājikoti pāṭhaseso daṭṭhabbo. Mahākacchu nāma valliphalaviseso, yassa majjārapādasseva saṇṭhānaṃ dukkhasamphassāni sukhumalomāni ca honti. Haṃsapupphanti haṃsādīnaṃ pakkhalomaṃ sandhāya vadanti. Attano dhammatāya marati, anāpattīti pārājikaṃ sandhāya vuttaṃ dukkaṭā na muccanato.
179. அஸஞ்சிச்சாதி இத³ங் மரணஸங்வத்தனிகஉபக்கமஸ்ஸ அஸல்லக்க²ணங் ஸந்தா⁴ய வுத்தந்தி ஆஹ இமினா உபக்கமேனாதிஆதி³. அஜானந்தஸ்ஸாதி இத³ங் பன மரணஸங்வத்தனிகவிஸாதி³உபக்கமகரணஸ்ஸ அஜானநங் ஸந்தா⁴ய வுத்தந்தி ஆஹ இமினா அயங் மரிஸ்ஸதீதிஆதி³. ந மரணாதி⁴ப்பாயஸ்ஸாதி இத³ங் து³க்கு²ப்பாத³கங் உபக்கமந்தி ஜானந்தஸ்ஸாபி மரணாதி⁴ப்பாயஸ்ஸ அபா⁴வங் ஸந்தா⁴ய வுத்தந்தி ஆஹ மரணங் அனிச்ச²ந்தஸ்ஸாதிஆதி³. அனுப்பப³ந்தா⁴பா⁴வாதி தோ³மனஸ்ஸவீதீ²னங் நிரந்தரப்பவத்திஅபா⁴வா.
179. Asañciccāti idaṃ maraṇasaṃvattanikaupakkamassa asallakkhaṇaṃ sandhāya vuttanti āha iminā upakkamenātiādi. Ajānantassāti idaṃ pana maraṇasaṃvattanikavisādiupakkamakaraṇassa ajānanaṃ sandhāya vuttanti āha iminā ayaṃ marissatītiādi. Na maraṇādhippāyassāti idaṃ dukkhuppādakaṃ upakkamanti jānantassāpi maraṇādhippāyassa abhāvaṃ sandhāya vuttanti āha maraṇaṃ anicchantassātiādi. Anuppabandhābhāvāti domanassavīthīnaṃ nirantarappavattiabhāvā.
பத³பா⁴ஜனீயவண்ணனானயோ நிட்டி²தோ.
Padabhājanīyavaṇṇanānayo niṭṭhito.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 3. ததியபாராஜிகங் • 3. Tatiyapārājikaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 3. ததியபாராஜிகங் • 3. Tatiyapārājikaṃ
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā
பத³பா⁴ஜனீயவண்ணனா • Padabhājanīyavaṇṇanā
தூ³தகதா²வண்ணனா • Dūtakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / பத³பா⁴ஜனீயவண்ணனா • Padabhājanīyavaṇṇanā
