| Library / Tipiṭaka / তিপিটক • Tipiṭaka / সারত্থদীপনী-টীকা • Sāratthadīpanī-ṭīkā |
পদভাজনীযৰণ্ণনা
Padabhājanīyavaṇṇanā
১৭২. উস্সুক্কৰচনন্তি পুব্বকালকিরিযাৰচনং। অযঞ্হি সমানকত্তুকেসু পুব্বাপরকালকিরিযাৰচনেসু পুব্বকালকিরিযাৰচনস্স নিরুত্তিৰোহারো। সঞ্চিচ্চাতি ইমস্স পদস্স ‘‘জানিত্ৰা সঞ্জানিত্ৰা চেচ্চ অভিৰিতরিত্ৰা’’তি এৰং পুব্বকালকিরিযাৰসেন ব্যঞ্জনানুরূপং কত্ৰা পদভাজনে ৰত্তব্বে তথা অৰত্ৰা ‘‘জানন্তো সঞ্জানন্তো’’তি পুগ্গলাধিট্ঠানং কত্ৰা ‘‘চেচ্চ অভিৰিতরিত্ৰা ৰীতিক্কমো’’তি জীৰিতা ৰোরোপনস্স চ তদত্থৰসেন নিদ্দিট্ঠত্তা ৰুত্তং ‘‘ব্যঞ্জনে আদরং অকত্ৰা’’তি। ‘‘জানন্তো’’তি অৰিসেসেন ৰুত্তেপি ‘‘সঞ্চিচ্চ মনুস্সৰিগ্গহং জীৰিতা ৰোরোপেয্যা’’তি ৰুত্তত্তা পাণৰিসযমেত্থ জাননন্তি আহ ‘‘পাণোতি জানন্তো’’তি, সত্তো অযন্তি জানন্তোতি অত্থো। পাণোতি হি ৰোহারতো সত্তো, পরমত্থতো জীৰিতিন্দ্রিযং ৰুচ্চতি। ‘‘মনুস্সৰিগ্গহোতি জানন্তো’’তি অৰত্ৰা ‘‘পাণোতি জানন্তো’’তি ৰচনং ‘‘মনুস্সো অয’’ন্তি অজানিত্ৰা কেৰলং সত্তসঞ্ঞায ঘাতেন্তস্সপি পারাজিকভাৰদস্সনত্থং ৰুত্তং। তেনেৰ এল়কচতুক্কে (পারা॰ অট্ঠ॰ ২.১৭৪) এল়কসঞ্ঞায মনুস্সপাণং ৰধন্তস্স পারাজিকাপত্তি দস্সিতা। তস্মা ‘‘মনুস্সৰিগ্গহো’’তি অৰত্ৰা ‘‘পাণোতি জানন্তো’’তি অৰিসেসেন ৰুত্তং।
172.Ussukkavacananti pubbakālakiriyāvacanaṃ. Ayañhi samānakattukesu pubbāparakālakiriyāvacanesu pubbakālakiriyāvacanassa niruttivohāro. Sañciccāti imassa padassa ‘‘jānitvā sañjānitvā cecca abhivitaritvā’’ti evaṃ pubbakālakiriyāvasena byañjanānurūpaṃ katvā padabhājane vattabbe tathā avatvā ‘‘jānanto sañjānanto’’ti puggalādhiṭṭhānaṃ katvā ‘‘cecca abhivitaritvā vītikkamo’’ti jīvitā voropanassa ca tadatthavasena niddiṭṭhattā vuttaṃ ‘‘byañjane ādaraṃ akatvā’’ti. ‘‘Jānanto’’ti avisesena vuttepi ‘‘sañcicca manussaviggahaṃ jīvitā voropeyyā’’ti vuttattā pāṇavisayamettha jānananti āha ‘‘pāṇoti jānanto’’ti, satto ayanti jānantoti attho. Pāṇoti hi vohārato satto, paramatthato jīvitindriyaṃ vuccati. ‘‘Manussaviggahoti jānanto’’ti avatvā ‘‘pāṇoti jānanto’’ti vacanaṃ ‘‘manusso aya’’nti ajānitvā kevalaṃ sattasaññāya ghātentassapi pārājikabhāvadassanatthaṃ vuttaṃ. Teneva eḷakacatukke (pārā. aṭṭha. 2.174) eḷakasaññāya manussapāṇaṃ vadhantassa pārājikāpatti dassitā. Tasmā ‘‘manussaviggaho’’ti avatvā ‘‘pāṇoti jānanto’’ti avisesena vuttaṃ.
সঞ্জানন্তোতি এত্থ সহ-সদ্দেন সমানত্থো সং-সদ্দোতি আহ – ‘‘তেনেৰ পাণজাননাকারেন সদ্ধিং জানন্তো’’তি, তেনেৰ পাণজাননাকারেন সদ্ধিং জীৰিতা ৰোরোপেমীতি জানন্তোতি অত্থো। যদিপি একস্সেৰ চিত্তস্স উভযারম্মণভাৰাসম্ভৰতো পাণোতি জাননেন সদ্ধিং জীৰিতা ৰোরোপেমীতি জাননং একক্খণে ন সম্ভৰতি, পাণোতিসঞ্ঞং পন অৰিজহিত্ৰা মারেমীতি জাননং সন্ধায ‘‘তেনেৰ…পে॰… সদ্ধিং জানন্তো’’তি ৰুত্তং। তস্মা সদ্ধিন্তি অৰিজহিত্ৰাতি ৰুত্তং হোতি। কেচি পন ‘‘ঞাতপরিঞ্ঞায দিট্ঠসভাৰেসু ধম্মেসু তীরণপরিঞ্ঞায তিলক্খণং আরোপেত্ৰা ‘রূপং অনিচ্চ’ন্তিআদিনা সভাৰেন সদ্ধিং একক্খণে অনিচ্চাদিলক্খণজাননং ৰিয ‘ইমং পাণং মারেমী’তি অত্তনো কিরিযায সদ্ধিংযেৰ জানাতী’’তি ৰদন্তি। অপরে পন আচরিযা তত্থাপি এৰং ন কথেন্তি।
Sañjānantoti ettha saha-saddena samānattho saṃ-saddoti āha – ‘‘teneva pāṇajānanākārena saddhiṃjānanto’’ti, teneva pāṇajānanākārena saddhiṃ jīvitā voropemīti jānantoti attho. Yadipi ekasseva cittassa ubhayārammaṇabhāvāsambhavato pāṇoti jānanena saddhiṃ jīvitā voropemīti jānanaṃ ekakkhaṇe na sambhavati, pāṇotisaññaṃ pana avijahitvā māremīti jānanaṃ sandhāya ‘‘teneva…pe… saddhiṃ jānanto’’ti vuttaṃ. Tasmā saddhinti avijahitvāti vuttaṃ hoti. Keci pana ‘‘ñātapariññāya diṭṭhasabhāvesu dhammesu tīraṇapariññāya tilakkhaṇaṃ āropetvā ‘rūpaṃ anicca’ntiādinā sabhāvena saddhiṃ ekakkhaṇe aniccādilakkhaṇajānanaṃ viya ‘imaṃ pāṇaṃ māremī’ti attano kiriyāya saddhiṃyeva jānātī’’ti vadanti. Apare pana ācariyā tatthāpi evaṃ na kathenti.
ৰধকচেতনাৰসেন চেতেত্ৰাতি ‘‘ইমং মারেমী’’তি ৰধকচেতনায চিন্তেত্ৰা। পকপ্পেত্ৰাতি ‘‘ৰধামি ন’’ন্তি এৰং চিত্তেন পরিচ্ছিন্দিত্ৰা। অভিৰিতরিত্ৰাতি সন্নিট্ঠানং কত্ৰা। তেনেৰাহ ‘‘নিরাসঙ্কচিত্তং পেসেত্ৰা’’তি। উপক্কমৰসেনাতি সাহত্থিকাদিউপক্কমৰসেন। এৰং পৰত্তস্সাতি এৰং যথাৰুত্তৰিধিনা পৰত্তস্স। কিঞ্চাপি ‘‘সঞ্চিচ্চা’’তি ইমস্স ৰিপ্পকতৰচনত্তা ‘‘জীৰিতা ৰোরোপেয্যা’’তি ইমিনাৰ অপরকালকিরিযাৰচনেন সব্বথা পরিনিট্ঠিতৰীতিক্কমো ৰুত্তো, তথাপি ‘‘সঞ্চিচ্চা’’তি ইমিনা ৰুচ্চমানং অপরিযোসিতৰীতিক্কমম্পি অৰসানং পাপেত্ৰা দস্সেতুং ‘‘ৰীতিক্কমো’’তি পদভাজনং ৰুত্তং। তেনেৰাহ ‘‘অযং সঞ্চিচ্চসদ্দস্স সিখাপ্পত্তো অত্থোতি ৰুত্তং হোতী’’তি।
Vadhakacetanāvasena cetetvāti ‘‘imaṃ māremī’’ti vadhakacetanāya cintetvā. Pakappetvāti ‘‘vadhāmi na’’nti evaṃ cittena paricchinditvā. Abhivitaritvāti sanniṭṭhānaṃ katvā. Tenevāha ‘‘nirāsaṅkacittaṃ pesetvā’’ti. Upakkamavasenāti sāhatthikādiupakkamavasena. Evaṃ pavattassāti evaṃ yathāvuttavidhinā pavattassa. Kiñcāpi ‘‘sañciccā’’ti imassa vippakatavacanattā ‘‘jīvitā voropeyyā’’ti imināva aparakālakiriyāvacanena sabbathā pariniṭṭhitavītikkamo vutto, tathāpi ‘‘sañciccā’’ti iminā vuccamānaṃ apariyositavītikkamampi avasānaṃ pāpetvā dassetuṃ ‘‘vītikkamo’’ti padabhājanaṃ vuttaṃ. Tenevāha ‘‘ayaṃ sañciccasaddassa sikhāppatto atthoti vuttaṃ hotī’’ti.
আদিতো পট্ঠাযাতি পটিসন্ধিৰিঞ্ঞাণেন সদ্ধিং উপ্পন্নকললরূপতো পট্ঠায। সযন্তি এত্থাতি সেয্যা, মাতুকুচ্ছিসঙ্খাতো গব্ভো সেয্যা এতেসন্তি গব্ভসেয্যকা, অণ্ডজা জলাবুজা চ। তেসং গব্ভসেয্যকানং ৰসেন সব্বসুখুমত্তভাৰদস্সনত্থং ‘‘যং মাতুকুচ্ছিস্মি’’ন্তিআদি ৰুত্তং, ন পারাজিকৰত্থুনিযমনত্থং। ওপপাতিকসংসেদজাপি হি মনুস্সা পারাজিকৰত্থুমেৰ। ন চেৰিমং সব্বপঠমং মনুস্সৰিগ্গহং জীৰিতা ৰোরোপেতুং সক্কা। পটিসন্ধিচিত্তেন হি সদ্ধিং তিংস কম্মজরূপানি নিব্বত্তন্তি, তেসু পন ঠিতেসুযেৰ সোল়স ভৰঙ্গচিত্তানি উপ্পজ্জিত্ৰা নিরুজ্ঝন্তি। এতস্মিং অন্তরে গহিতপটিসন্ধিকস্স দারকস্স ৰা মাতুযা ৰা পনস্স অন্তরাযো নত্থি। অযঞ্হি মরণস্স অনোকাসো নাম। একস্মিঞ্হি সোল়সচিত্তক্খণে কালে দারকস্স মরণং নত্থি তদা চুতিচিত্তস্স অসম্ভৰতো, মাতুযাপি তত্তকং কালং অনতিক্কমিত্ৰা তদনন্তরেযেৰ চৰনধম্মায গব্ভগ্গহণস্সেৰ অসম্ভৰতো। চিত্তগ্গহণেনেৰ অৰিনাভাৰতো সেসঅরূপধম্মানম্পি গহিতত্তা রূপকাযুপত্থম্ভিতস্সেৰ চ নামকাযস্স পঞ্চৰোকারে পৰত্তিসব্ভাৰতো ৰুত্তং ‘‘সকলাপি পঞ্চৰোকারপটিসন্ধি দস্সিতা হোতী’’তি। তত্থ সকলাপি পঞ্চৰোকারপটিসন্ধীতি পরিপুণ্ণা অনূনা রূপাদিপঞ্চক্খন্ধানং পটিসন্ধীতি এৰমত্থো গহেতব্বো, ন পন সকলাপি পঞ্চৰোকারভৰে পটিসন্ধীতি। তেনেৰাহ ‘‘তস্মা তঞ্চ পঠমং চিত্তং…পে॰… কললরূপন্তি অযং সব্বপঠমো মনুস্সৰিগ্গহো’’তি। ‘‘তদহুজাতস্স এল়কস্স লোমং জাতিউণ্ণা’’তি কেচি। ‘‘হিমৰন্তপ্পদেসে জাতিমন্তএল়কলোমং জাতিউণ্ণা’’তি অপরে। সুখুমজাতিলোমা এৰ কির কেচি এল়কা হিমৰন্তে ৰিজ্জন্তি। ‘‘গব্ভং ফালেত্ৰা গহিতএল়কলোমং জাতিউণ্ণা’’তি অঞ্ঞে।
Ādito paṭṭhāyāti paṭisandhiviññāṇena saddhiṃ uppannakalalarūpato paṭṭhāya. Sayanti etthāti seyyā, mātukucchisaṅkhāto gabbho seyyā etesanti gabbhaseyyakā, aṇḍajā jalābujā ca. Tesaṃ gabbhaseyyakānaṃ vasena sabbasukhumattabhāvadassanatthaṃ ‘‘yaṃ mātukucchismi’’ntiādi vuttaṃ, na pārājikavatthuniyamanatthaṃ. Opapātikasaṃsedajāpi hi manussā pārājikavatthumeva. Na cevimaṃ sabbapaṭhamaṃ manussaviggahaṃ jīvitā voropetuṃ sakkā. Paṭisandhicittena hi saddhiṃ tiṃsa kammajarūpāni nibbattanti, tesu pana ṭhitesuyeva soḷasa bhavaṅgacittāni uppajjitvā nirujjhanti. Etasmiṃ antare gahitapaṭisandhikassa dārakassa vā mātuyā vā panassa antarāyo natthi. Ayañhi maraṇassa anokāso nāma. Ekasmiñhi soḷasacittakkhaṇe kāle dārakassa maraṇaṃ natthi tadā cuticittassa asambhavato, mātuyāpi tattakaṃ kālaṃ anatikkamitvā tadanantareyeva cavanadhammāya gabbhaggahaṇasseva asambhavato. Cittaggahaṇeneva avinābhāvato sesaarūpadhammānampi gahitattā rūpakāyupatthambhitasseva ca nāmakāyassa pañcavokāre pavattisabbhāvato vuttaṃ ‘‘sakalāpi pañcavokārapaṭisandhi dassitā hotī’’ti. Tattha sakalāpipañcavokārapaṭisandhīti paripuṇṇā anūnā rūpādipañcakkhandhānaṃ paṭisandhīti evamattho gahetabbo, na pana sakalāpi pañcavokārabhave paṭisandhīti. Tenevāha ‘‘tasmā tañca paṭhamaṃ cittaṃ…pe… kalalarūpanti ayaṃ sabbapaṭhamo manussaviggaho’’ti. ‘‘Tadahujātassa eḷakassa lomaṃ jātiuṇṇā’’ti keci. ‘‘Himavantappadese jātimantaeḷakalomaṃ jātiuṇṇā’’ti apare. Sukhumajātilomā eva kira keci eḷakā himavante vijjanti. ‘‘Gabbhaṃ phāletvā gahitaeḷakalomaṃ jātiuṇṇā’’ti aññe.
একেন অংসুনাতি খুদ্দকভাণকানং মতেন ৰুত্তং। তথা হি ‘‘গব্ভসেয্যকসত্তানং পটিসন্ধিক্খণে পঞ্চক্খন্ধা অপচ্ছা অপুরে একতো পাতুভৰন্তি। তস্মিং খণে পাতুভূতা কললসঙ্খাতা রূপসন্ততি পরিত্তা হোতি খুদ্দকমক্খিকায একৰাযামেন পাতব্বমত্তা’’তি ৰত্ৰা পুন ‘‘অতিবহুং এতং, সণ্হসূচিযা তেলে পক্খিপিত্ৰা উক্খিত্তায পগ্ঘরিত্ৰা অগ্গে ঠিতবিন্দুমত্ত’’ন্তি ৰুত্তং। তম্পি পটিক্খিপিত্ৰা ‘‘এককেসে তেলতো উদ্ধরিত্ৰা গহিতে তস্স পগ্ঘরিত্ৰা অগ্গে ঠিতবিন্দুমত্ত’’ন্তি ৰুত্তং। তম্পি পটিক্খিপিত্ৰা ‘‘ইমস্মিং জনপদে মনুস্সানং কেসে অট্ঠধা ফালিতে ততো এককোট্ঠাসপ্পমাণো উত্তরকুরুকানং কেসো, তস্স পসন্নতিলতেলতো উদ্ধটস্স অগ্গে ঠিতবিন্দুমত্ত’’ন্তি ৰুত্তং। তম্পি পটিক্খিপিত্ৰা ‘‘জাতিউণ্ণা নাম সুখুমা, তস্সা একঅংসুনো পসন্নতিলতেলে পক্খিপিত্ৰা উদ্ধটস্স পগ্ঘরিত্ৰা অগ্গে ঠিতবিন্দুমত্ত’’ন্তি (ৰিভ॰ অট্ঠ॰ ২৬) খুদ্দকভাণকেহি ৰুত্তং। সংযুত্তভাণকা পন ‘‘তীহি জাতিউণ্ণংসূহি কতসুত্তগ্গে সণ্ঠিততেলবিন্দুপ্পমাণং কললং হোতী’’তি (সং॰ নি॰ অট্ঠ॰ ১.১.২৩৫) ৰদন্তি। ‘‘অচ্ছ’’ন্তি ৰুত্তমত্থং পরিযাযন্তরেন ৰিভাৰেতি ‘‘ৰিপ্পসন্ন’’ন্তি।
Ekena aṃsunāti khuddakabhāṇakānaṃ matena vuttaṃ. Tathā hi ‘‘gabbhaseyyakasattānaṃ paṭisandhikkhaṇe pañcakkhandhā apacchā apure ekato pātubhavanti. Tasmiṃ khaṇe pātubhūtā kalalasaṅkhātā rūpasantati parittā hoti khuddakamakkhikāya ekavāyāmena pātabbamattā’’ti vatvā puna ‘‘atibahuṃ etaṃ, saṇhasūciyā tele pakkhipitvā ukkhittāya paggharitvā agge ṭhitabindumatta’’nti vuttaṃ. Tampi paṭikkhipitvā ‘‘ekakese telato uddharitvā gahite tassa paggharitvā agge ṭhitabindumatta’’nti vuttaṃ. Tampi paṭikkhipitvā ‘‘imasmiṃ janapade manussānaṃ kese aṭṭhadhā phālite tato ekakoṭṭhāsappamāṇo uttarakurukānaṃ keso, tassa pasannatilatelato uddhaṭassa agge ṭhitabindumatta’’nti vuttaṃ. Tampi paṭikkhipitvā ‘‘jātiuṇṇā nāma sukhumā, tassā ekaaṃsuno pasannatilatele pakkhipitvā uddhaṭassa paggharitvā agge ṭhitabindumatta’’nti (vibha. aṭṭha. 26) khuddakabhāṇakehi vuttaṃ. Saṃyuttabhāṇakā pana ‘‘tīhi jātiuṇṇaṃsūhi katasuttagge saṇṭhitatelabinduppamāṇaṃ kalalaṃ hotī’’ti (saṃ. ni. aṭṭha. 1.1.235) vadanti. ‘‘Accha’’nti vuttamatthaṃ pariyāyantarena vibhāveti ‘‘vippasanna’’nti.
সপ্পিমণ্ডোতি পসন্নসপ্পি। যথাতি ইদং আনেত্ৰা এত্থাপি সম্বন্ধিতব্বং, সপ্পিমণ্ডোপি ৰুত্তবিন্দুপ্পমাণোৰ ইধ অধিপ্পেতো। এৰংৰণ্ণপ্পটিভাগন্তি ৰুত্তপ্পমাণসণ্ঠানপরিচ্ছিন্নং । অথ ৰা এৰংৰণ্ণপ্পটিভাগন্তি এৰংৰণ্ণং এৰংসণ্ঠানঞ্চ। পটিভজনং ৰা পটিভাগো, সদিসতাভজনং সদিসতাপত্তীতি অত্থো। এৰংৰিধো ৰণ্ণপ্পটিভাগো রূপতো সণ্ঠানতো চ সদিসতাপত্তি এতস্সাতি এৰংৰণ্ণপ্পটিভাগং। কললন্তি পৰুচ্চতীতি ভূতুপাদারূপসঙ্খাতো সন্তানৰসেন পৰত্তমানো অত্তভাৰো কললং নামাতি কথীযতি। ৰীসৰস্সসতাযুকস্সাতি নিদস্সনমত্তং ততো ঊনাধিকাযুকমনুস্সানম্পি সব্ভাৰতো।
Sappimaṇḍoti pasannasappi. Yathāti idaṃ ānetvā etthāpi sambandhitabbaṃ, sappimaṇḍopi vuttabinduppamāṇova idha adhippeto. Evaṃvaṇṇappaṭibhāganti vuttappamāṇasaṇṭhānaparicchinnaṃ . Atha vā evaṃvaṇṇappaṭibhāganti evaṃvaṇṇaṃ evaṃsaṇṭhānañca. Paṭibhajanaṃ vā paṭibhāgo, sadisatābhajanaṃ sadisatāpattīti attho. Evaṃvidho vaṇṇappaṭibhāgo rūpato saṇṭhānato ca sadisatāpatti etassāti evaṃvaṇṇappaṭibhāgaṃ. Kalalanti pavuccatīti bhūtupādārūpasaṅkhāto santānavasena pavattamāno attabhāvo kalalaṃ nāmāti kathīyati. Vīsavassasatāyukassāti nidassanamattaṃ tato ūnādhikāyukamanussānampi sabbhāvato.
কললকালেপীতি পঠমসত্তাহব্ভন্তরে যং সন্ততিৰসেন পৰত্তমানং কললসঙ্খাতং অত্তভাৰং জীৰিতা ৰোরোপেতুং সক্কা, তং সন্ধায ৰদতি। ততো ৰা উদ্ধন্তি দুতিযসত্তাহাদীসু অব্বুদাদিভাৰপ্পত্তং সন্ধায ৰুত্তং। ননু চ উপ্পন্নানং ধম্মানং সরসনিরোধেনেৰ নিরুজ্ঝনতো অন্তরা উপচ্ছেদো ন সক্কা কাতুং, ‘‘তস্মা…পে॰… জীৰিতিন্দ্রিযং উপচ্ছিন্দতি উপরোধেতী’’তি কস্মা ৰুত্তন্তি আহ – ‘‘জীৰিতিন্দ্রিযস্স পৰেণীঘটনং…পে॰… উপরোধেতীতি ৰুচ্চতী’’তি। কথঞ্চাযমত্থো ৰিঞ্ঞাযতীতি আহ ‘‘স্ৰাযমত্থো’’তিআদি।
Kalalakālepīti paṭhamasattāhabbhantare yaṃ santativasena pavattamānaṃ kalalasaṅkhātaṃ attabhāvaṃ jīvitā voropetuṃ sakkā, taṃ sandhāya vadati. Tato vā uddhanti dutiyasattāhādīsu abbudādibhāvappattaṃ sandhāya vuttaṃ. Nanu ca uppannānaṃ dhammānaṃ sarasanirodheneva nirujjhanato antarā upacchedo na sakkā kātuṃ, ‘‘tasmā…pe… jīvitindriyaṃ upacchindati uparodhetī’’ti kasmā vuttanti āha – ‘‘jīvitindriyassa paveṇīghaṭanaṃ…pe… uparodhetīti vuccatī’’ti. Kathañcāyamattho viññāyatīti āha ‘‘svāyamattho’’tiādi.
এত্থাহ (সারত্থ॰ টী॰ ১.৫; ইতিৰু॰ অট্ঠ॰ ৭৪) – খণে খণে নিরুজ্ঝনসভাৰেসু সঙ্খারেসু কো হন্তি, কো ৰা হঞ্ঞতি, যদি চিত্তচেতসিকসন্তানো, সো অরূপতায ন ছেদনভেদনাদিৰসেন ৰিকোপনসমত্থো, নপি ৰিকোপনীযো। অথ রূপসন্তানো, সো অচেতনতায কট্ঠকলিঙ্গরূপমোতি ন তত্থ ছেদনাদিনা পাণাতিপাতো লব্ভতি যথা মতসরীরে। পযোগোপি পাণাতিপাতস্স যথাৰুত্তো পহরণপ্পহারাদিকো অতীতেসু ৰা সঙ্খারেসু ভৰেয্য অনাগতেসু ৰা পচ্চুপ্পন্নেসু ৰা, তত্থ ন তাৰ অতীতানাগতেসু সম্ভৰতি তেসং অভাৰতো, পচ্চুপ্পন্নেসু চ সঙ্খারানং খণিকত্তা সরসেনেৰ নিরুজ্ঝনসভাৰতায ৰিনাসাভিমুখেসু নিপ্পযোজনো পযোগো সিযা, ৰিনাসস্স চ কারণরহিতত্তা ন পহরণপ্পহারাদিপ্পযোগহেতুকং মরণং, নিরীহকতায চ সঙ্খারানং কস্স সো পযোগো, খণিকত্তা ৰধাধিপ্পাযসমকালভিজ্জনকস্স কিরিযাপরিযোসানকআলানৰট্ঠানতো কস্স ৰা পাণাতিপাতকম্মবদ্ধোতি?
Etthāha (sārattha. ṭī. 1.5; itivu. aṭṭha. 74) – khaṇe khaṇe nirujjhanasabhāvesu saṅkhāresu ko hanti, ko vā haññati, yadi cittacetasikasantāno, so arūpatāya na chedanabhedanādivasena vikopanasamattho, napi vikopanīyo. Atha rūpasantāno, so acetanatāya kaṭṭhakaliṅgarūpamoti na tattha chedanādinā pāṇātipāto labbhati yathā matasarīre. Payogopi pāṇātipātassa yathāvutto paharaṇappahārādiko atītesu vā saṅkhāresu bhaveyya anāgatesu vā paccuppannesu vā, tattha na tāva atītānāgatesu sambhavati tesaṃ abhāvato, paccuppannesu ca saṅkhārānaṃ khaṇikattā saraseneva nirujjhanasabhāvatāya vināsābhimukhesu nippayojano payogo siyā, vināsassa ca kāraṇarahitattā na paharaṇappahārādippayogahetukaṃ maraṇaṃ, nirīhakatāya ca saṅkhārānaṃ kassa so payogo, khaṇikattā vadhādhippāyasamakālabhijjanakassa kiriyāpariyosānakaālānavaṭṭhānato kassa vā pāṇātipātakammabaddhoti?
ৰুচ্চতে – ৰধকচেতনাসহিতো সঙ্খারানং পুঞ্জো সত্তসঙ্খাতো হন্তি। তেন পৰত্তিতৰধপ্পযোগনিমিত্তং অপগতুস্মাৰিঞ্ঞাণজীৰিতিন্দ্রিযো মতৰোহারপ্পৰত্তিনিবন্ধনো যথাৰুত্তৰধপ্পযোগাকরণে উপ্পজ্জনারহো রূপারূপধম্মসমূহো হঞ্ঞতি, কেৰলো ৰা চিত্তচেতসিকসন্তানো ৰধপ্পযোগাৰিসযভাৰেপি তস্স পঞ্চৰোকারভৰে রূপসন্তানাধীনৰুত্তিতায রূপসন্তানে পরেন পযোজিতজীৰিতিন্দ্রিযুপচ্ছেদকপযোগৰসেন তন্নিব্বত্তিৰিনিবন্ধকৰিসদিসরূপুপ্পত্তিযা ৰিহতে ৰিচ্ছেদো হোতীতি ন পাণাতিপাতস্স অসম্ভৰো, নপি অহেতুকো পাণাতিপাতো, ন চ পযোগো নিপ্পযোজনো পচ্চুপ্পন্নেসু সঙ্খারেসু কতপ্পযোগৰসেন তদনন্তরং উপ্পজ্জনারহস্স সঙ্খারকলাপস্স তথা অনুপ্পত্তিতো। খণিকানং সঙ্খারানং খণিকমরণস্স ইধ মরণভাৰেন অনধিপ্পেতত্তা সন্ততিমরণস্স চ যথাৰুত্তনযেন সহেতুকভাৰতো ন অহেতুকং মরণং, ন চ কত্তুরহিতো পাণাতিপাতপ্পযোগো নিরীহকেসুপি সঙ্খারেসু সন্নিহিততামত্তেন উপকারকেসু অত্তনো অত্তনো অনুরূপফলুপ্পাদনে নিযতেসু কারণেসু কত্তুৰোহারসিদ্ধিতো যথা ‘‘পদীপো পকাসেতি, নিসাকরো চন্দিমা’’তি। ন চ কেৰলস্স ৰধাধিপ্পাযসহভুনো চিত্তচেতসিককলাপস্স পাণাতিপাতো ইচ্ছিতো সন্তানৰসেন অৰট্ঠিতস্সেৰ পটিজাননতো, সন্তানৰসেন পৰত্তমানানঞ্চ পদীপাদীনং অত্থকিরিযাসিদ্ধি দিস্সতীতি অত্থেৰ পাণাতিপাতেন কম্মুনা বদ্ধো। অযঞ্চ ৰিচারো অদিন্নাদানাদীসুপি যথাসম্ভৰং ৰিভাৰেতব্বো।
Vuccate – vadhakacetanāsahito saṅkhārānaṃ puñjo sattasaṅkhāto hanti. Tena pavattitavadhappayoganimittaṃ apagatusmāviññāṇajīvitindriyo matavohārappavattinibandhano yathāvuttavadhappayogākaraṇe uppajjanāraho rūpārūpadhammasamūho haññati, kevalo vā cittacetasikasantāno vadhappayogāvisayabhāvepi tassa pañcavokārabhave rūpasantānādhīnavuttitāya rūpasantāne parena payojitajīvitindriyupacchedakapayogavasena tannibbattivinibandhakavisadisarūpuppattiyā vihate vicchedo hotīti na pāṇātipātassa asambhavo, napi ahetuko pāṇātipāto, na ca payogo nippayojano paccuppannesu saṅkhāresu katappayogavasena tadanantaraṃ uppajjanārahassa saṅkhārakalāpassa tathā anuppattito. Khaṇikānaṃ saṅkhārānaṃ khaṇikamaraṇassa idha maraṇabhāvena anadhippetattā santatimaraṇassa ca yathāvuttanayena sahetukabhāvato na ahetukaṃ maraṇaṃ, na ca katturahito pāṇātipātappayogo nirīhakesupi saṅkhāresu sannihitatāmattena upakārakesu attano attano anurūpaphaluppādane niyatesu kāraṇesu kattuvohārasiddhito yathā ‘‘padīpo pakāseti, nisākaro candimā’’ti. Na ca kevalassa vadhādhippāyasahabhuno cittacetasikakalāpassa pāṇātipāto icchito santānavasena avaṭṭhitasseva paṭijānanato, santānavasena pavattamānānañca padīpādīnaṃ atthakiriyāsiddhi dissatīti attheva pāṇātipātena kammunā baddho. Ayañca vicāro adinnādānādīsupi yathāsambhavaṃ vibhāvetabbo.
ৰোরোপেতুং ন সক্কাতি উপক্কমেন ৰোরোপেতুং ন সক্কা। সত্তট্ঠজৰনৰারমত্তন্তি খুদ্দকভাণকানং মতেন ৰুত্তং। সংযুত্তভাণকা পন ‘‘রূপসন্ততি অরূপসন্ততী’’তি দ্ৰে সন্ততিযো ৰত্ৰা ‘‘উদকং অক্কমিত্ৰা গতস্স যাৰ তীরে অক্কন্তউদকলেখা ন ৰিপ্পসীদতি, অদ্ধানতো আগতস্স যাৰ কাযে উসুমভাৰো ন ৰূপসম্মতি, আতপা আগন্ত্ৰা গব্ভং পৰিট্ঠস্স যাৰ অন্ধকারভাৰো ন ৰিগচ্ছতি, অন্তোগব্ভে কম্মট্ঠানং মনসি করিত্ৰা দিৰা ৰাতপানং ৰিৰরিত্ৰা ওলোকেন্তস্স যাৰ অক্খীনং ফন্দনভাৰো ন ৰূপসম্মতি, অযং রূপসন্ততি নাম। দ্ৰে তযো জৰনৰারা অরূপসন্ততি নামা’’তি ৰত্ৰা ‘‘তদুভযম্পি সন্ততিপচ্চুপ্পন্নং নামা’’তি ৰদন্তি । মজ্ঝিমভাণকা পন ৰদন্তি ‘‘একদ্ৰেসন্ততিৰারপরিযাপন্নং সন্ততিপচ্চুপ্পন্নং। তত্থ অন্ধকারে নিসীদিত্ৰা আলোকট্ঠানং গতস্স ন চ তাৰ আরম্মণং পাকটং হোতি। যাৰ পন তং পাকটং হোতি, এত্থন্তরে পৰত্তা রূপসন্ততি অরূপসন্ততি ৰা একদ্ৰেসন্ততিৰারা নামাতি ৰেদিতব্বা। আলোকট্ঠানে চরিত্ৰা ওৰরকং পৰিট্ঠস্সপি ন তাৰ সহসা রূপং পাকটং হোতি। যাৰ পন তং পাকটং হোতি, এত্থন্তরে পৰত্তা রূপসন্ততি অরূপসন্ততি ৰা একদ্ৰেসন্ততিৰারা ৰেদিতব্বা। দূরে ঠত্ৰা পন রজকানং হত্থৰিকারং ঘণ্টিভেরিআকোটনৰিকারঞ্চ দিস্ৰাপি ন তাৰ সদ্দং সুণাতি। যাৰ পন তং সুণাতি, এতস্মিম্পি অন্তরে একদ্ৰেসন্ততিৰারা ৰেদিতব্বা’’তি। এত্থ চ আলোকট্ঠানতো ওৰরকং পৰিট্ঠস্স পগেৰ তত্থ নিসিন্নস্স যাৰ রূপগতং পাকটং হোতি, তত্থ উপড্ঢৰেলা অৰিভূতপ্পাযা, উপড্ঢৰেলা ৰিভূতপ্পাযা তদুভযং গহেত্ৰা ‘‘দ্ৰেসন্ততিৰারা’’তি ৰুত্তং, তযিদং ন সব্বসাধারণং, একচ্চস্স সীঘম্পি পাকটং হোতীতি ‘‘একদ্ৰেসন্ততিৰারা’’তি একগ্গহণম্পি কতং।
Voropetuṃ na sakkāti upakkamena voropetuṃ na sakkā. Sattaṭṭhajavanavāramattanti khuddakabhāṇakānaṃ matena vuttaṃ. Saṃyuttabhāṇakā pana ‘‘rūpasantati arūpasantatī’’ti dve santatiyo vatvā ‘‘udakaṃ akkamitvā gatassa yāva tīre akkantaudakalekhā na vippasīdati, addhānato āgatassa yāva kāye usumabhāvo na vūpasammati, ātapā āgantvā gabbhaṃ paviṭṭhassa yāva andhakārabhāvo na vigacchati, antogabbhe kammaṭṭhānaṃ manasi karitvā divā vātapānaṃ vivaritvā olokentassa yāva akkhīnaṃ phandanabhāvo na vūpasammati, ayaṃ rūpasantati nāma. Dve tayo javanavārā arūpasantati nāmā’’ti vatvā ‘‘tadubhayampi santatipaccuppannaṃ nāmā’’ti vadanti . Majjhimabhāṇakā pana vadanti ‘‘ekadvesantativārapariyāpannaṃ santatipaccuppannaṃ. Tattha andhakāre nisīditvā ālokaṭṭhānaṃ gatassa na ca tāva ārammaṇaṃ pākaṭaṃ hoti. Yāva pana taṃ pākaṭaṃ hoti, etthantare pavattā rūpasantati arūpasantati vā ekadvesantativārā nāmāti veditabbā. Ālokaṭṭhāne caritvā ovarakaṃ paviṭṭhassapi na tāva sahasā rūpaṃ pākaṭaṃ hoti. Yāva pana taṃ pākaṭaṃ hoti, etthantare pavattā rūpasantati arūpasantati vā ekadvesantativārā veditabbā. Dūre ṭhatvā pana rajakānaṃ hatthavikāraṃ ghaṇṭibheriākoṭanavikārañca disvāpi na tāva saddaṃ suṇāti. Yāva pana taṃ suṇāti, etasmimpi antare ekadvesantativārā veditabbā’’ti. Ettha ca ālokaṭṭhānato ovarakaṃ paviṭṭhassa pageva tattha nisinnassa yāva rūpagataṃ pākaṭaṃ hoti, tattha upaḍḍhavelā avibhūtappāyā, upaḍḍhavelā vibhūtappāyā tadubhayaṃ gahetvā ‘‘dvesantativārā’’ti vuttaṃ, tayidaṃ na sabbasādhāraṇaṃ, ekaccassa sīghampi pākaṭaṃ hotīti ‘‘ekadvesantativārā’’ti ekaggahaṇampi kataṃ.
সভাগসন্ততিৰসেনাতি কুসলাকুসলসোমনস্সুপেক্খাদিনা সভাগসন্ততিৰসেন। ইমিনা অরূপসন্ততি দস্সিতা। সত্তট্ঠজৰনৰারমত্তন্তি চ কামাৰচরজৰনৰসেনেৰ ৰেদিতব্বং, ন ইতরজৰনৰসেন। ন হি তে পরিমিতকালা, অন্তরা পৰত্তভৰঙ্গাদযোপি তদন্তোগধাতি দট্ঠব্বা। যাৰ ৰা উণ্হতো আগন্ত্ৰাতিআদিনা পন রূপসন্ততিং দস্সেতি। অন্ধকারং হোতীতি অন্ধকারং ন ৰিগচ্ছতি। সন্ততিপচ্চুপ্পন্নঞ্চেত্থ অট্ঠকথাসু আগতং, অদ্ধাপচ্চুপ্পন্নং সুত্তে। তথা হি ভদ্দেকরত্তসুত্তে অদ্ধাপচ্চুপ্পন্নং সন্ধায ‘‘যো চাৰুসো মনো, যে চ ধম্মা, উভযমেতং পচ্চুপ্পন্নং, তস্মিং চে পচ্চুপ্পন্নে ছন্দরাগপটিবদ্ধং হোতি ৰিঞ্ঞাণং, ছন্দরাগপটিবদ্ধত্তা ৰিঞ্ঞাণস্স তদভিনন্দতি, তদভিনন্দন্তো পচ্চুপ্পন্নেসু ধম্মেসু সংহীরতী’’তি (ম॰ নি॰ ৩.২৮৪) ৰুত্তং। এত্থ হি মনোতি সসম্পযুত্তং ৰিঞ্ঞাণমাহ। ধম্মাতি আরম্মণধম্মা। মনোতি ৰা মনাযতনং। ধম্মাতি ৰেদনাদযো অরূপক্খন্ধা। উভযমেতং পচ্চুপ্পন্নন্তি অদ্ধাপচ্চুপ্পন্নং এতং উভযং হোতীতি অত্থো। ৰিঞ্ঞাণন্তি নিকন্তিৰিঞ্ঞাণং। তঞ্হি তস্মিং পচ্চুপ্পন্নে ছন্দরাগৰসেন পটিবদ্ধং হোতি। অভিনন্দতীতি তণ্হাদিট্ঠাভিনন্দনাহি অভিনন্দতি । তথাভূতো চ ৰত্থুপরিঞ্ঞায অভাৰতো তেসু পচ্চুপ্পন্নেসু ধম্মেসু সংহীরতি, তণ্হাদিট্ঠীহি আকড্ঢীযতীতি অত্থো। এত্থ চ ‘‘দ্ৰাদসাযতনানি একং পচ্চুপ্পন্ন’’ন্তি আগতত্তা তত্থ পৰত্তো ছন্দরাগো অদ্ধাপচ্চুপ্পন্নারম্মণো, ন খণপচ্চুপ্পন্নারম্মণোতি ৰিঞ্ঞাযতি।
Sabhāgasantativasenāti kusalākusalasomanassupekkhādinā sabhāgasantativasena. Iminā arūpasantati dassitā. Sattaṭṭhajavanavāramattanti ca kāmāvacarajavanavaseneva veditabbaṃ, na itarajavanavasena. Na hi te parimitakālā, antarā pavattabhavaṅgādayopi tadantogadhāti daṭṭhabbā. Yāva vā uṇhato āgantvātiādinā pana rūpasantatiṃ dasseti. Andhakāraṃ hotīti andhakāraṃ na vigacchati. Santatipaccuppannañcettha aṭṭhakathāsu āgataṃ, addhāpaccuppannaṃ sutte. Tathā hi bhaddekarattasutte addhāpaccuppannaṃ sandhāya ‘‘yo cāvuso mano, ye ca dhammā, ubhayametaṃ paccuppannaṃ, tasmiṃ ce paccuppanne chandarāgapaṭibaddhaṃ hoti viññāṇaṃ, chandarāgapaṭibaddhattā viññāṇassa tadabhinandati, tadabhinandanto paccuppannesu dhammesu saṃhīratī’’ti (ma. ni. 3.284) vuttaṃ. Ettha hi manoti sasampayuttaṃ viññāṇamāha. Dhammāti ārammaṇadhammā. Manoti vā manāyatanaṃ. Dhammāti vedanādayo arūpakkhandhā. Ubhayametaṃ paccuppannanti addhāpaccuppannaṃ etaṃ ubhayaṃ hotīti attho. Viññāṇanti nikantiviññāṇaṃ. Tañhi tasmiṃ paccuppanne chandarāgavasena paṭibaddhaṃ hoti. Abhinandatīti taṇhādiṭṭhābhinandanāhi abhinandati . Tathābhūto ca vatthupariññāya abhāvato tesu paccuppannesu dhammesu saṃhīrati, taṇhādiṭṭhīhi ākaḍḍhīyatīti attho. Ettha ca ‘‘dvādasāyatanāni ekaṃ paccuppanna’’nti āgatattā tattha pavatto chandarāgo addhāpaccuppannārammaṇo, na khaṇapaccuppannārammaṇoti viññāyati.
সত্তোতি খন্ধসন্তানো। তত্থ হি সত্তপঞ্ঞত্তি। জীৰিতিন্দ্রিযন্তি রূপারূপজীৰিতিন্দ্রিযং। রূপজীৰিতিন্দ্রিযে হি ৰিকোপিতে ইতরম্পি তংসম্বন্ধতায ৰিনস্সতীতি। তং ৰুত্তপ্পকারমেৰাতি তং জীৰিতিন্দ্রিযাতিপাতনৰিধানং হেট্ঠা ৰুত্তপ্পকারমেৰ। সরসেনেৰ পতনসভাৰস্স অন্তরা এৰ অতীৰ পাতনং অতিপাতো, সণিকং পতিতুং অদত্ৰা সীঘপাতনন্তি অত্থো। অতিক্কম্ম ৰা সত্থাদীহি অভিভৰিত্ৰা পাতনং অতিপাতো, পাণস্স অতিপাতো পাণাতিপাতো। যায চেতনায পৰত্তমানস্স জীৰিতিন্দ্রিযস্স নিস্সযভূতেসু মহাভূতেসু উপক্কমকরণহেতু তংমহাভূতপচ্চযা উপ্পজ্জনমহাভূতা নুপ্পজ্জিস্সন্তি, সা তাদিসপ্পযোগসমুট্ঠাপিকা ৰধকচেতনা পাণাতিপাতো। তেনাহ ‘‘যায চেতনাযা’’তিআদি।
Sattoti khandhasantāno. Tattha hi sattapaññatti. Jīvitindriyanti rūpārūpajīvitindriyaṃ. Rūpajīvitindriye hi vikopite itarampi taṃsambandhatāya vinassatīti. Taṃ vuttappakāramevāti taṃ jīvitindriyātipātanavidhānaṃ heṭṭhā vuttappakārameva. Saraseneva patanasabhāvassa antarā eva atīva pātanaṃ atipāto, saṇikaṃ patituṃ adatvā sīghapātananti attho. Atikkamma vā satthādīhi abhibhavitvā pātanaṃ atipāto, pāṇassa atipāto pāṇātipāto. Yāya cetanāya pavattamānassa jīvitindriyassa nissayabhūtesu mahābhūtesu upakkamakaraṇahetu taṃmahābhūtapaccayā uppajjanamahābhūtā nuppajjissanti, sā tādisappayogasamuṭṭhāpikā vadhakacetanā pāṇātipāto. Tenāha ‘‘yāya cetanāyā’’tiādi.
পহরণন্তি কাযৰিঞ্ঞত্তিসহিতায ৰধকচেতনায অধিপ্পেতত্থসাধনং। আণাপনন্তি ৰচীৰিঞ্ঞত্তিসহিতায ৰধকচেতনায অধিপ্পেতত্থসাধনং। তেনেৰ ‘‘সাৰেতুকামো ন সাৰেতী’’তিআদি ৰুত্তং। উপনিক্খিপনন্তি অসিআদীনং তস্স উপনিক্খিপনং।
Paharaṇanti kāyaviññattisahitāya vadhakacetanāya adhippetatthasādhanaṃ. Āṇāpananti vacīviññattisahitāya vadhakacetanāya adhippetatthasādhanaṃ. Teneva ‘‘sāvetukāmo na sāvetī’’tiādi vuttaṃ. Upanikkhipananti asiādīnaṃ tassa upanikkhipanaṃ.
অট্ঠকথাসু ৰুত্তমত্থং সঙ্খিপিত্ৰা দস্সেন্তো ‘‘সঙ্খেপতো’’তিআদিমাহ। তত্থ ৰিজ্জাপরিজপ্পনন্তি মন্তপরিজপ্পনং। ইদানি অট্ঠকথাসু ৰিত্থারিতমত্থং দস্সেন্তো আহ ‘‘অট্ঠকথাসু পনা’’তিআদি। তত্থ আথব্বণিকাতি আথব্বণৰেদৰেদিনো। আথব্বণং পযোজেন্তীতি আথব্বণৰেদৰিহিতং মন্তং তত্থ ৰুত্তৰিধিনা পযোজেন্তি। আথব্বণিকা হি সত্তাহং অলোণকং ভুঞ্জিত্ৰা দব্বে অত্থরিত্ৰা পথৰিযং সযমানা তপং চরিত্ৰা সত্তমে দিৰসে সুসানভূমিং সজ্জেত্ৰা সত্তমে পদে ঠত্ৰা হত্থং ৰট্টেত্ৰা ৰট্টেত্ৰা মুখেন ৰিজ্জং পরিজপ্পন্তি, অথ নেসং কম্মং সমিজ্ঝতি। পটিসেনাযাতি ইদং হেট্ঠা উপরি ৰা পদদ্ৰযেন সম্বন্ধমুপগচ্ছতি। ঈতিং উপ্পাদেন্তীতি ডংসিত্ৰা মারণত্থায ৰিচ্ছিকাদীনং ৰিস্সজ্জনৰসেন পীল়ং উপ্পাদেন্তি । এতীতি ঈতি। উপদ্দৰন্তি ততো অধিকতরপীল়ং। পজ্জরকন্তি ৰিসমজ্জরং। সূচিকন্তি অঙ্গপচ্চঙ্গানি সূচীহি ৰিয ৰিজ্ঝিত্ৰা পৰত্তমানং সূলং। ৰিসূচিকন্তি সসূলং আমাতিসারং। পক্খন্দিযন্তি রত্তাতিসারং। ৰিজ্জং পরিৰত্তেত্ৰাতি গন্ধারৰিজ্জাদিকং অত্তনো ৰিজ্জং কতুপচারং পরিজপ্পিত্ৰা মন্তপঠনক্কমেন পঠিত্ৰা। তেহীতি তেহি ৰত্থূহি।
Aṭṭhakathāsu vuttamatthaṃ saṅkhipitvā dassento ‘‘saṅkhepato’’tiādimāha. Tattha vijjāparijappananti mantaparijappanaṃ. Idāni aṭṭhakathāsu vitthāritamatthaṃ dassento āha ‘‘aṭṭhakathāsu panā’’tiādi. Tattha āthabbaṇikāti āthabbaṇavedavedino. Āthabbaṇaṃ payojentīti āthabbaṇavedavihitaṃ mantaṃ tattha vuttavidhinā payojenti. Āthabbaṇikā hi sattāhaṃ aloṇakaṃ bhuñjitvā dabbe attharitvā pathaviyaṃ sayamānā tapaṃ caritvā sattame divase susānabhūmiṃ sajjetvā sattame pade ṭhatvā hatthaṃ vaṭṭetvā vaṭṭetvā mukhena vijjaṃ parijappanti, atha nesaṃ kammaṃ samijjhati. Paṭisenāyāti idaṃ heṭṭhā upari vā padadvayena sambandhamupagacchati. Ītiṃuppādentīti ḍaṃsitvā māraṇatthāya vicchikādīnaṃ vissajjanavasena pīḷaṃ uppādenti . Etīti īti. Upaddavanti tato adhikatarapīḷaṃ. Pajjarakanti visamajjaraṃ. Sūcikanti aṅgapaccaṅgāni sūcīhi viya vijjhitvā pavattamānaṃ sūlaṃ. Visūcikanti sasūlaṃ āmātisāraṃ. Pakkhandiyanti rattātisāraṃ. Vijjaṃ parivattetvāti gandhāravijjādikaṃ attano vijjaṃ katupacāraṃ parijappitvā mantapaṭhanakkamena paṭhitvā. Tehīti tehi vatthūhi.
পযোজনন্তি পৰত্তমানং। দিস্ৰাতিআদি দিট্ঠৰিসাদীনং যথাক্কমেন ৰুত্তং। দ্ৰত্তিব্যামসতপ্পমাণনাগুদ্ধরণেতি দ্ৰত্তিব্যামসতপ্পমাণে মহাকাযে নিম্মিনিত্ৰা ঠিতানং নাগানং উদ্ধরণে। কুম্ভণ্ডানন্তি কুম্ভণ্ডদেৰানং। তে কির দেৰা মহোদরা হোন্তি, রহস্সঙ্গম্পি চ নেসং কুম্ভো ৰিয মহন্তং হোতি, তস্মা ‘‘কুম্ভণ্ডা’’তি ৰুচ্চন্তি। ৰেস্সৰণস্স যক্খাধিপতিভাৰেপি নযনাৰুধেন কুম্ভণ্ডানং মরণস্স ইধ ৰুত্তত্তা তেসুপি তস্স আণাপৰত্তি ৰেদিতব্বা।
Payojananti pavattamānaṃ. Disvātiādi diṭṭhavisādīnaṃ yathākkamena vuttaṃ. Dvattibyāmasatappamāṇanāguddharaṇeti dvattibyāmasatappamāṇe mahākāye nimminitvā ṭhitānaṃ nāgānaṃ uddharaṇe. Kumbhaṇḍānanti kumbhaṇḍadevānaṃ. Te kira devā mahodarā honti, rahassaṅgampi ca nesaṃ kumbho viya mahantaṃ hoti, tasmā ‘‘kumbhaṇḍā’’ti vuccanti. Vessavaṇassa yakkhādhipatibhāvepi nayanāvudhena kumbhaṇḍānaṃ maraṇassa idha vuttattā tesupi tassa āṇāpavatti veditabbā.
কেচীতি মহাসঙ্ঘিকা। ‘‘অহো ৰত যং তং কুচ্ছিগতং গব্ভং ন সোত্থিনা অভিনিক্খমেয্যা’’তি পাঠো সুন্দরতরো। ‘‘অহো ৰতাযং ত’’ন্তিপি পাঠো। ‘‘অযং ইত্থী তং কুচ্ছিগতং গব্ভং ন সোত্থিনা অভিনিক্খামেয্যা’’তি ৰত্তব্বং। কুলুম্বস্সাতি গব্ভস্স কুলস্সেৰ ৰা, কুটুম্বস্সাতি ৰুত্তং হোতি। ভাৰনামযিদ্ধিযাতি অধিট্ঠানিদ্ধিং সন্ধায ৰদন্তি। ঘটভেদনং ৰিয ইদ্ধিৰিনাসো, অগ্গিনিব্বাপনং ৰিয পরূপঘাতোতি উপমাসংসন্দনং। তং তেসং ইচ্ছামত্তমেৰাতি এত্থাযং ৰিচারণা – তুম্হে ইদ্ধিযা পরূপঘাতং ৰদেথ, ইদ্ধি নাম চেসা অধিট্ঠানিদ্ধি ৰিকুব্বনিদ্ধি মনোমযিদ্ধি ঞাণৰিপ্ফারিদ্ধি সমাধিৰিপ্ফারিদ্ধি অরিযিদ্ধি কম্মৰিপাকজিদ্ধি পুঞ্ঞৰতোইদ্ধি ৰিজ্জামযিদ্ধি তত্থ তত্থ সম্মাপযোগপচ্চযা ইজ্ঝনট্ঠেন ইদ্ধীতি দসৰিধা। তত্থ কতরং ইদ্ধিং ৰদেথাতি? ভাৰনামযন্তি। কিং পন ভাৰনামযিদ্ধিযা পরূপঘাতকম্মং হোতীতি? আম একৰারং হোতি। যথা হি আদিত্তঘরস্স উপরি উদকভরিতে ঘটে খিত্তে ঘটোপি ভিজ্জতি, অগ্গিপি নিব্বাযতি, এৰমেৰ ভাৰনামযিদ্ধিযা একৰারং পরূপঘাতকম্মং হোতি, ততো পট্ঠায পন সা নস্সতীতি। অথ নে ‘‘ভাৰনামযিদ্ধিযা নেৰ একৰারং, ন দ্ৰে ৰারে পরূপঘাতকম্মং হোতী’’তি ৰত্ৰা সঞ্ঞত্তিং আগচ্ছন্তা পুচ্ছিতব্বা ‘‘ভাৰনামযিদ্ধি কিং কুসলা, অকুসলা, অব্যাকতা, সুখায ৰেদনায সম্পযুত্তা, দুক্খায , অদুক্খমসুখায, সৰিতক্কসৰিচারা, অৰিতক্কৰিচারমত্তা, অৰিতক্কঅৰিচারা, কামাৰচরা, রূপাৰচরা, অরূপাৰচরা’’তি।
Kecīti mahāsaṅghikā. ‘‘Aho vata yaṃ taṃ kucchigataṃ gabbhaṃ na sotthinā abhinikkhameyyā’’ti pāṭho sundarataro. ‘‘Aho vatāyaṃ ta’’ntipi pāṭho. ‘‘Ayaṃ itthī taṃ kucchigataṃ gabbhaṃ na sotthinā abhinikkhāmeyyā’’ti vattabbaṃ. Kulumbassāti gabbhassa kulasseva vā, kuṭumbassāti vuttaṃ hoti. Bhāvanāmayiddhiyāti adhiṭṭhāniddhiṃ sandhāya vadanti. Ghaṭabhedanaṃ viya iddhivināso, agginibbāpanaṃ viya parūpaghātoti upamāsaṃsandanaṃ. Taṃ tesaṃ icchāmattamevāti etthāyaṃ vicāraṇā – tumhe iddhiyā parūpaghātaṃ vadetha, iddhi nāma cesā adhiṭṭhāniddhi vikubbaniddhi manomayiddhi ñāṇavipphāriddhi samādhivipphāriddhi ariyiddhi kammavipākajiddhi puññavatoiddhi vijjāmayiddhi tattha tattha sammāpayogapaccayā ijjhanaṭṭhena iddhīti dasavidhā. Tattha kataraṃ iddhiṃ vadethāti? Bhāvanāmayanti. Kiṃ pana bhāvanāmayiddhiyā parūpaghātakammaṃ hotīti? Āma ekavāraṃ hoti. Yathā hi ādittagharassa upari udakabharite ghaṭe khitte ghaṭopi bhijjati, aggipi nibbāyati, evameva bhāvanāmayiddhiyā ekavāraṃ parūpaghātakammaṃ hoti, tato paṭṭhāya pana sā nassatīti. Atha ne ‘‘bhāvanāmayiddhiyā neva ekavāraṃ, na dve vāre parūpaghātakammaṃ hotī’’ti vatvā saññattiṃ āgacchantā pucchitabbā ‘‘bhāvanāmayiddhi kiṃ kusalā, akusalā, abyākatā, sukhāya vedanāya sampayuttā, dukkhāya , adukkhamasukhāya, savitakkasavicārā, avitakkavicāramattā, avitakkaavicārā, kāmāvacarā, rūpāvacarā, arūpāvacarā’’ti.
ইমং পন পঞ্হং যে জানন্তি, তে এৰং ৰক্খন্তি ‘‘ভাৰনামযিদ্ধি কুসলা ৰা হোতি অব্যাকতা ৰা, অদুক্খমসুখৰেদনীযা এৰ, অৰিতক্কঅৰিচারা এৰ, রূপাৰচরা এৰা’’তি। তে ৰত্তব্বা ‘‘পাণাতিপাতচেতনা কুসলাকুসলাদীসু কতরং কোট্ঠাসং ভজতী’’তি। জানন্তা ৰক্খন্তি ‘‘পাণাতিপাতচেতনা অকুসলাৰ, দুক্খৰেদনীযাৰ, সৰিতক্কসৰিচারাৰ, কামাৰচরা এৰা’’তি। এৰং সন্তে ‘‘তুম্হাকং কথা নেৰ কুসলত্তিকেন সমেতি, ন ৰেদনাত্তিকেন, ন ৰিতক্কত্তিকেন, ন পরিত্তত্তিকেনা’’তি। কিং পন এৰং মহন্তং সুত্তং নিরত্থকন্তি? নো নিরত্থকং, তুম্হে পনস্স অত্থং ন জানাথ। ইদ্ধিমা চেতোৰসিপ্পত্তোতি এত্থ হি ন ভাৰনামযিদ্ধি অধিপ্পেতা, আথব্বণিদ্ধি পন অধিপ্পেতা। সা হি এত্থ লব্ভমানা লব্ভতীতি।
Imaṃ pana pañhaṃ ye jānanti, te evaṃ vakkhanti ‘‘bhāvanāmayiddhi kusalā vā hoti abyākatā vā, adukkhamasukhavedanīyā eva, avitakkaavicārā eva, rūpāvacarā evā’’ti. Te vattabbā ‘‘pāṇātipātacetanā kusalākusalādīsu kataraṃ koṭṭhāsaṃ bhajatī’’ti. Jānantā vakkhanti ‘‘pāṇātipātacetanā akusalāva, dukkhavedanīyāva, savitakkasavicārāva, kāmāvacarā evā’’ti. Evaṃ sante ‘‘tumhākaṃ kathā neva kusalattikena sameti, na vedanāttikena, na vitakkattikena, na parittattikenā’’ti. Kiṃ pana evaṃ mahantaṃ suttaṃ niratthakanti? No niratthakaṃ, tumhe panassa atthaṃ na jānātha. Iddhimā cetovasippattoti ettha hi na bhāvanāmayiddhi adhippetā, āthabbaṇiddhi pana adhippetā. Sā hi ettha labbhamānā labbhatīti.
হরিতব্বং উপনিক্খিপিতব্বন্তি হারং, হারমেৰ হারকন্তি আহ ‘‘অথ ৰা’’তিআদি। জীৰিতহরণকং উপনিক্খিপিতব্বং ৰা সত্থং সত্থহারকন্তি ৰিকপ্পদ্ৰযেনাহ। ‘‘হারকসত্থ’’ন্তি চ ৰত্তব্বে সত্থহারকন্তি ৰিসেসনস্স পরনিপাতং কত্ৰা ৰুত্তং। যথা লভতি, তথা করেয্যাতি অধিপ্পাযত্থমাহ। উপনিক্খিপেয্যাতি ‘‘পরিযেসেয্যা’’তি ইমস্স সিখাপ্পত্তমত্থং দস্সেতি। ইতরথাতি ‘‘পরিযেসেয্যা’’তি ইমস্স উপনিক্খিপেয্যাতি এৰমত্থং অগ্গহেত্ৰা যদি পরিযেসনমত্তমেৰ অধিপ্পেতং সিযাতি অত্থো। পরিযিট্ঠমত্তেনাতি পরিযেসিতমত্তেন। ‘‘সত্থহারকং ৰাস্স পরিযেসেয্যা’’তি ইমিনা ৰুচ্চমানস্স অত্থস্স ব্যঞ্জনানুরূপতো পরিপুণ্ণং কত্ৰা অৰুত্তত্তা আহ ‘‘ব্যঞ্জনং অনাদিযিত্ৰা’’তি। সসতি হিংসতীতি সত্থং, সসন্তি হিংসন্তি তেনাতি ৰা সত্থন্তি লগুল়পাসাণাদীনম্পি সত্থসঙ্গহিতত্তা আহ – ‘‘যং এত্থ থাৰরপ্পযোগসঙ্গহিতং সত্থং, তদেৰ দস্সেতু’’ন্তি।
Haritabbaṃ upanikkhipitabbanti hāraṃ, hārameva hārakanti āha ‘‘atha vā’’tiādi. Jīvitaharaṇakaṃ upanikkhipitabbaṃ vā satthaṃ satthahārakanti vikappadvayenāha. ‘‘Hārakasattha’’nti ca vattabbe satthahārakanti visesanassa paranipātaṃ katvā vuttaṃ. Yathā labhati, tathā kareyyāti adhippāyatthamāha. Upanikkhipeyyāti ‘‘pariyeseyyā’’ti imassa sikhāppattamatthaṃ dasseti. Itarathāti ‘‘pariyeseyyā’’ti imassa upanikkhipeyyāti evamatthaṃ aggahetvā yadi pariyesanamattameva adhippetaṃ siyāti attho. Pariyiṭṭhamattenāti pariyesitamattena. ‘‘Satthahārakaṃ vāssa pariyeseyyā’’ti iminā vuccamānassa atthassa byañjanānurūpato paripuṇṇaṃ katvā avuttattā āha ‘‘byañjanaṃ anādiyitvā’’ti. Sasati hiṃsatīti satthaṃ, sasanti hiṃsanti tenāti vā satthanti laguḷapāsāṇādīnampi satthasaṅgahitattā āha – ‘‘yaṃ ettha thāvarappayogasaṅgahitaṃ satthaṃ, tadeva dassetu’’nti.
ৰুত্তাৰসেসন্তি ৰুত্তঅসিআদীহি অৰসিট্ঠং। লগুল়ন্তি মুগ্গরস্সেতং অধিৰচনং। সত্থসঙ্গহোতি মাতিকাযং ‘‘সত্থহারক’’ন্তি এত্থ ৰুত্তসত্থসঙ্গহো। যস্মা…পে॰… তস্মা দ্ৰিধা ভিন্দিত্ৰা পদভাজনং ৰুত্তন্তি ঈদিসং হেট্ঠা ৰুত্তৰিভঙ্গনযভেদদস্সনন্তি ৰেদিতব্বং। নরকে ৰা পপতাতিআদীতি এত্থ আদি-সদ্দেন ‘‘পপাতে ৰা পপতা’’তি পরতো ৰুত্তং অৰুত্তঞ্চ ‘‘রুক্খতো ৰা পপতা’’তিআদি সব্বং মরণূপাযং সঙ্গণ্হাতি। তেনেৰাহ ‘‘ন হি সক্কা সব্বং সরূপেনেৰ ৰত্তু’’ন্তি। পরতো ৰুত্তনযত্তাতি পরতো নিগমনৰসেন ৰুত্তস্স দুতিযপদস্স পদভাজনে ৰুত্তনযত্তা। অত্থতো ৰুত্তমেৰাতি মরণূপাযস্স বহুৰিধতানিদস্সনত্থং, ততো একদেসে দস্সিতে সব্বং ৰুত্তমেৰ হোতীতি অধিপ্পাযো। ন হি সক্কা…পে॰… ৰত্তুন্তি ‘‘রুক্খতো ৰা পপতা’’তিআদিনা সরূপতো সব্বং মরণূপাযং পরিযোসানং পাপেত্ৰা ন সক্কা ৰত্তুন্তি অত্থো।
Vuttāvasesanti vuttaasiādīhi avasiṭṭhaṃ. Laguḷanti muggarassetaṃ adhivacanaṃ. Satthasaṅgahoti mātikāyaṃ ‘‘satthahāraka’’nti ettha vuttasatthasaṅgaho. Yasmā…pe… tasmā dvidhā bhinditvā padabhājanaṃ vuttanti īdisaṃ heṭṭhā vuttavibhaṅganayabhedadassananti veditabbaṃ. Narake vā papatātiādīti ettha ādi-saddena ‘‘papāte vā papatā’’ti parato vuttaṃ avuttañca ‘‘rukkhato vā papatā’’tiādi sabbaṃ maraṇūpāyaṃ saṅgaṇhāti. Tenevāha ‘‘na hi sakkā sabbaṃ sarūpeneva vattu’’nti. Parato vuttanayattāti parato nigamanavasena vuttassa dutiyapadassa padabhājane vuttanayattā. Atthato vuttamevāti maraṇūpāyassa bahuvidhatānidassanatthaṃ, tato ekadese dassite sabbaṃ vuttameva hotīti adhippāyo. Na hi sakkā…pe… vattunti ‘‘rukkhato vā papatā’’tiādinā sarūpato sabbaṃ maraṇūpāyaṃ pariyosānaṃ pāpetvā na sakkā vattunti attho.
মতং তে জীৰিতা সেয্যোতি এত্থ ৰুত্তমরণং যস্মা ইতি-সদ্দো নিদস্সেতি, তস্মা তত্থ ৰুত্তমরণং ইতি-সদ্দস্স অত্থোতি তম্পি গহেত্ৰা অত্থং দস্সেন্তো আহ – ‘‘মরণচিত্তো মরণমনোতি অত্থো’’তি। চিত্তস্স অত্থদীপনত্থং ৰুত্তোতি চিত্ত-সদ্দস্স ৰিচিত্তাদিঅনেকত্থৰিসযত্তা নাযং চিত্ত-সদ্দো ইধ অঞ্ঞস্মিং অত্থে ৰত্তমানো দট্ঠব্বো, অপি তু ৰিঞ্ঞাণস্মিংযেৰ ৰত্তমানো ৰেদিতব্বোতি তস্স অত্থস্স নিযমনত্থং ৰুত্তো। ইমিনা পুনরুত্তিদোসস্সপি ইধ অনৰকাসোতি দস্সেতি। ন তাৰ অত্থো ৰুত্তোতি ‘‘ইতি চিত্তমনো’’তি উদ্ধরিত্ৰাপি ইতি-সদ্দনিদস্সিতস্স মরণস্স অপরামট্ঠভাৰতো ৰুত্তং। তাৰ-সদ্দেন পন পরতো ‘‘চিত্তসঙ্কপ্পো’’তি ইমস্স পদভাজনে ‘‘মরণসঞ্ঞী’’তিআদিনা ইতিসদ্দত্থস্স ৰক্খমানতং ৰিভাৰেতি। তত্থ হি ইতি-সদ্দনিদস্সিতং মরণসঙ্খাতমত্থং গহেত্ৰা ‘‘মরণসঞ্ঞী মরণচেতনো মরণাধিপ্পাযো’’তি ৰুত্তং। তেনেৰাহ – ‘‘চিত্তসঙ্কপ্পোতি ইমস্মিং পদে অধিকারৰসেন ইতিসদ্দো আহরিতব্বো’’তি। কস্মা আহরিতব্বোতি আহ ‘‘ইদঞ্হী’’তিআদি। কথং পনেতং ৰিঞ্ঞাযতীতি আহ ‘‘তথা হিস্সা’’তিআদি। অস্সাতি ইতি-সদ্দস্স। তমেৰ অত্থন্তি মরণসঙ্খাতমত্থং। ‘‘মরণসঞ্ঞী’’তিআদীসু হি মরণং ইতি-সদ্দস্স অত্থো, ‘‘সঞ্ঞী’’তিআদি সঙ্কপ্পসদ্দস্স। চিত্তসদ্দস্স পনেত্থ ৰিচিত্তৰচনতা সঙ্কপ্পসদ্দস্স সঞ্ঞাচেতনাধিপ্পাযৰসেন তিধা অত্থং দস্সেন্তেন ৰিভাৰিতাতি দট্ঠব্বং। তেনেৰাহ – ‘‘চিত্তো নানপ্পকারকো সঙ্কপ্পো’’তিআদি। অধিপ্পাযসদ্দেন কিমেত্থ ৰুত্তন্তি আহ – ‘‘অধিপ্পাযোতি ৰিতক্কো ৰেদিতব্বো’’তি। ন ইদং ৰিতক্কস্স নামন্তি ইদং পন ন কেৰলং ৰিতক্কস্সেৰ নামন্তি দস্সেতুং ৰুত্তং। পাকটত্তা ওল়ারিকত্তা চ উচ্চাকারতা ৰেদিতব্বা, অপাকটত্তা অনোল়ারিকত্তা চ অৰচাকারতা।
Mataṃte jīvitā seyyoti ettha vuttamaraṇaṃ yasmā iti-saddo nidasseti, tasmā tattha vuttamaraṇaṃ iti-saddassa atthoti tampi gahetvā atthaṃ dassento āha – ‘‘maraṇacitto maraṇamanoti attho’’ti. Cittassa atthadīpanatthaṃ vuttoti citta-saddassa vicittādianekatthavisayattā nāyaṃ citta-saddo idha aññasmiṃ atthe vattamāno daṭṭhabbo, api tu viññāṇasmiṃyeva vattamāno veditabboti tassa atthassa niyamanatthaṃ vutto. Iminā punaruttidosassapi idha anavakāsoti dasseti. Na tāva attho vuttoti ‘‘iti cittamano’’ti uddharitvāpi iti-saddanidassitassa maraṇassa aparāmaṭṭhabhāvato vuttaṃ. Tāva-saddena pana parato ‘‘cittasaṅkappo’’ti imassa padabhājane ‘‘maraṇasaññī’’tiādinā itisaddatthassa vakkhamānataṃ vibhāveti. Tattha hi iti-saddanidassitaṃ maraṇasaṅkhātamatthaṃ gahetvā ‘‘maraṇasaññī maraṇacetano maraṇādhippāyo’’ti vuttaṃ. Tenevāha – ‘‘cittasaṅkappoti imasmiṃ pade adhikāravasena itisaddo āharitabbo’’ti. Kasmā āharitabboti āha ‘‘idañhī’’tiādi. Kathaṃ panetaṃ viññāyatīti āha ‘‘tathā hissā’’tiādi. Assāti iti-saddassa. Tameva atthanti maraṇasaṅkhātamatthaṃ. ‘‘Maraṇasaññī’’tiādīsu hi maraṇaṃ iti-saddassa attho, ‘‘saññī’’tiādi saṅkappasaddassa. Cittasaddassa panettha vicittavacanatā saṅkappasaddassa saññācetanādhippāyavasena tidhā atthaṃ dassentena vibhāvitāti daṭṭhabbaṃ. Tenevāha – ‘‘citto nānappakārako saṅkappo’’tiādi. Adhippāyasaddena kimettha vuttanti āha – ‘‘adhippāyoti vitakko veditabbo’’ti. Na idaṃ vitakkassa nāmanti idaṃ pana na kevalaṃ vitakkasseva nāmanti dassetuṃ vuttaṃ. Pākaṭattā oḷārikattā ca uccākāratā veditabbā, apākaṭattā anoḷārikattā ca avacākāratā.
১৭৪. কাযেকদেসেপি কায-সদ্দো ৰত্ততীতি আহ ‘‘হত্থেন ৰা’’তিআদি। পহরণেনাতি সত্থেন। সত্থঞ্হি পহরন্তি এতেনাতি পহরণন্তি ৰুচ্চতি। কম্মুনা বজ্ঝতীতি পাণাতিপাতকম্মুনা বজ্ঝতি, পাণাতিপাতকম্মস্স সিদ্ধন্তি ৰুত্তং হোতি। যো কোচি মরতূতি এত্থ যস্স কস্সচি একস্সেৰ জীৰিতিন্দ্রিযৰিসযা ৰধকচেতনা পৰত্ততি, ন পহারপচ্চযা মরন্তস্সেৰ জীৰিতিন্দ্রিযৰিসযা, নাপি সমূহস্সাতি ৰেদিতব্বা। উভযথাপীতি উদ্দেসানুদ্দেসানং ৰসেন। ৰধকচিত্তং পচ্চুপ্পন্নারম্মণম্পি জীৰিতিন্দ্রিযং পবন্ধৰিচ্ছেদনৰসেন আরম্মণং কত্ৰা পৰত্ততীতি আহ ‘‘পচ্ছা ৰা তেনেৰ রোগেনা’’তিআদি। যেন হি পবন্ধো ৰিচ্ছিজ্জতি, তাদিসং পযোগং নিব্বত্তেন্তং তদা ৰধকচিত্তং পৰত্তন্তং পহরিতমত্তেযেৰ কম্মুনা বজ্ঝতি। মনুস্সঅরহন্তস্স চ পুথুজ্জনকালেযেৰ সত্থপ্পহারে ৰা ৰিসে ৰা দিন্নেপি যদি সো অরহত্তং পত্ৰা তেনেৰ মরতি, অরহন্তঘাতকো হোতিযেৰ। যং পন পুথুজ্জনকালে দিন্নং দানং অরহত্তং পত্ৰা পরিভুঞ্জতি, পুথুজ্জনস্সেৰ তং দিন্নং হোতি।
174. Kāyekadesepi kāya-saddo vattatīti āha ‘‘hatthena vā’’tiādi. Paharaṇenāti satthena. Satthañhi paharanti etenāti paharaṇanti vuccati. Kammunā bajjhatīti pāṇātipātakammunā bajjhati, pāṇātipātakammassa siddhanti vuttaṃ hoti. Yo koci maratūti ettha yassa kassaci ekasseva jīvitindriyavisayā vadhakacetanā pavattati, na pahārapaccayā marantasseva jīvitindriyavisayā, nāpi samūhassāti veditabbā. Ubhayathāpīti uddesānuddesānaṃ vasena. Vadhakacittaṃ paccuppannārammaṇampi jīvitindriyaṃ pabandhavicchedanavasena ārammaṇaṃ katvā pavattatīti āha ‘‘pacchā vā teneva rogenā’’tiādi. Yena hi pabandho vicchijjati, tādisaṃ payogaṃ nibbattentaṃ tadā vadhakacittaṃ pavattantaṃ paharitamatteyeva kammunā bajjhati. Manussaarahantassa ca puthujjanakāleyeva satthappahāre vā vise vā dinnepi yadi so arahattaṃ patvā teneva marati, arahantaghātako hotiyeva. Yaṃ pana puthujjanakāle dinnaṃ dānaṃ arahattaṃ patvā paribhuñjati, puthujjanasseva taṃ dinnaṃ hoti.
ননু চ যথা অরহত্তং পত্ৰা পরিভুত্তম্পি পুথুজ্জনকালে দিন্নং পুথুজ্জনদানমেৰ হোতি, এৰং মরণাধিপ্পাযেন পুথুজ্জনকালে পহারে দিন্নে অরহত্তং পত্ৰা তেনেৰ পহারেন মতে কস্মা অরহন্তঘাতকোযেৰ হোতি, ন পুথুজ্জনঘাতকোতি? ৰিসেসসব্ভাৰতো। দানঞ্হি দেয্যধম্মস্স পরিচ্চাগমত্তেন হোতি। তথা হি দানচেতনা চজিতব্বং ৰত্থুং আরম্মণং কত্ৰা চজনমত্তমেৰ হোতি, অঞ্ঞসন্তককরণংৰ তস্স চজনং, তস্মা যস্স তং সন্তকং কতং, তস্সেৰ তং দিন্নং হোতি, ন এৰং ৰধো। সো হি পাণো পাণসঞ্ঞিতা ৰধকচেতনা উপক্কমো তেন মরণন্তি ইমেসং পঞ্চন্নং অঙ্গানং পারিপূরিযাৰ হোতি, ন অপারিপূরিযা। তস্মা অরহত্তং পত্তস্সেৰ মরণন্তি অরহন্তঘাতকোযেৰ হোতি, ন পুথুজ্জনঘাতকো। যস্মা পন ‘‘ইমং মারেমী’’তি যং সন্তানং আরব্ভ মারণিচ্ছা, তস্স পুথুজ্জনখীণাসৰভাৰেন পযোগমরণক্খণানং ৰসেন সতিপি সন্তানভেদে অভেদোযেৰ, যদা চ অত্থসিদ্ধি, তদা খীণাসৰভাৰো, তস্মা অরহন্তঘাতকোযেৰ হোতীতি নিট্ঠমেত্থ গন্তব্বং।
Nanu ca yathā arahattaṃ patvā paribhuttampi puthujjanakāle dinnaṃ puthujjanadānameva hoti, evaṃ maraṇādhippāyena puthujjanakāle pahāre dinne arahattaṃ patvā teneva pahārena mate kasmā arahantaghātakoyeva hoti, na puthujjanaghātakoti? Visesasabbhāvato. Dānañhi deyyadhammassa pariccāgamattena hoti. Tathā hi dānacetanā cajitabbaṃ vatthuṃ ārammaṇaṃ katvā cajanamattameva hoti, aññasantakakaraṇaṃva tassa cajanaṃ, tasmā yassa taṃ santakaṃ kataṃ, tasseva taṃ dinnaṃ hoti, na evaṃ vadho. So hi pāṇo pāṇasaññitā vadhakacetanā upakkamo tena maraṇanti imesaṃ pañcannaṃ aṅgānaṃ pāripūriyāva hoti, na apāripūriyā. Tasmā arahattaṃ pattasseva maraṇanti arahantaghātakoyeva hoti, na puthujjanaghātako. Yasmā pana ‘‘imaṃ māremī’’ti yaṃ santānaṃ ārabbha māraṇicchā, tassa puthujjanakhīṇāsavabhāvena payogamaraṇakkhaṇānaṃ vasena satipi santānabhede abhedoyeva, yadā ca atthasiddhi, tadā khīṇāsavabhāvo, tasmā arahantaghātakoyeva hotīti niṭṭhamettha gantabbaṃ.
অঞ্ঞচিত্তেনাতি অৰধাধিপ্পাযেন অমারেতুকামতাচিত্তেন। নত্থি পাণাতিপাতোতি অমারেতুকামতাচিত্তেন পহটত্তা। কিঞ্চাপি পঠমপ্পহারো ন সযমেৰ সক্কোতি মারেতুং, দুতিযং পন লভিত্ৰা সক্কোন্তো জীৰিতৰিনাসনহেতু হোতি, তস্মা ‘‘পযোগো তেন চ মরণ’’ন্তি ইমিনা সংসন্দনতো পঠমপ্পহারেনেৰ কম্মবদ্ধো যুত্তো, ন দুতিযেন তস্স অঞ্ঞচিত্তেন দিন্নত্তা। তেন ৰুত্তং ‘‘উভযেহি মতেপি পঠমপ্পহারেনেৰ কম্মুনা বদ্ধো’’তি।
Aññacittenāti avadhādhippāyena amāretukāmatācittena. Natthi pāṇātipātoti amāretukāmatācittena pahaṭattā. Kiñcāpi paṭhamappahāro na sayameva sakkoti māretuṃ, dutiyaṃ pana labhitvā sakkonto jīvitavināsanahetu hoti, tasmā ‘‘payogo tena ca maraṇa’’nti iminā saṃsandanato paṭhamappahāreneva kammabaddho yutto, na dutiyena tassa aññacittena dinnattā. Tena vuttaṃ ‘‘ubhayehi matepi paṭhamappahāreneva kammunā baddho’’ti.
কম্মাপত্তিব্যত্তিভাৰত্থন্তি আনন্তরিযাদিকম্মৰিভাগস্স পারাজিকাদিআপত্তিৰিভাগস্স চ ৰিভাৰনত্থং। ‘‘এল়কং মারেমী’’তি পৰত্তচেতনায পুব্বভাগত্তা ‘‘ইমং মারেমী’’তি সন্নিট্ঠাপকচেতনায তদা সন্নিহিতত্তা যথাৰত্থুকং কম্মবদ্ধো হোতিযেৰাতি আহ ‘‘ইমং ৰত্থুং মারেমীতি চেতনায অত্থিভাৰতো’’তিআদি। সব্বত্থ হি পুরিমং অভিসন্ধিচিত্তং অপ্পমাণং তেন অত্থসিদ্ধিযা অভাৰতো, ৰধকচিত্তং পন তদারম্মণঞ্চ জীৰিতিন্দ্রিযং অনন্তরিযাদিভাৰে পমাণন্তি দট্ঠব্বং। ঘাতকো চ হোতীতি পাণঘাতকো হোতি, পাণাতিপাতকম্মুনাৰ বদ্ধো হোতীতি অত্থো। পুব্বে ৰুত্তনযেনেৰ ৰেদিতব্বন্তি যথাক্কমং পারাজিকথুল্লচ্চযপাচিত্তিযানি ৰেদিতব্বানি। ‘‘মাতাপিতুঅরহন্তানং অঞ্ঞতরং মারেমী’’তি গুণমহন্তেসু পৰত্তপুব্বভাগচেতনায দারুণভাৰতো তথাৰিধপুব্বভাগচেতনাপরিৰারা সন্নিট্ঠাপকচেতনা দারুণাৰ হোতীতি আহ – ‘‘ইধ পন চেতনা দারুণা হোতী’’তি। ইমিনা চ ‘‘এল়কং মারেস্সামী’’তি মাতাপিতুআদীনং মারণেপি পুব্বভাগচেতনায অদারুণত্তা অঞ্ঞথা পৰত্তআনন্তরিযকম্মতো এৰং পৰত্তানন্তরিযস্স নাতিদারুণতা ৰুত্তাৰ হোতীতি দট্ঠব্বা।
Kammāpattibyattibhāvatthanti ānantariyādikammavibhāgassa pārājikādiāpattivibhāgassa ca vibhāvanatthaṃ. ‘‘Eḷakaṃ māremī’’ti pavattacetanāya pubbabhāgattā ‘‘imaṃ māremī’’ti sanniṭṭhāpakacetanāya tadā sannihitattā yathāvatthukaṃ kammabaddho hotiyevāti āha ‘‘imaṃ vatthuṃ māremīti cetanāya atthibhāvato’’tiādi. Sabbattha hi purimaṃ abhisandhicittaṃ appamāṇaṃ tena atthasiddhiyā abhāvato, vadhakacittaṃ pana tadārammaṇañca jīvitindriyaṃ anantariyādibhāve pamāṇanti daṭṭhabbaṃ. Ghātako ca hotīti pāṇaghātako hoti, pāṇātipātakammunāva baddho hotīti attho. Pubbe vuttanayeneva veditabbanti yathākkamaṃ pārājikathullaccayapācittiyāni veditabbāni. ‘‘Mātāpituarahantānaṃ aññataraṃ māremī’’ti guṇamahantesu pavattapubbabhāgacetanāya dāruṇabhāvato tathāvidhapubbabhāgacetanāparivārā sanniṭṭhāpakacetanā dāruṇāva hotīti āha – ‘‘idha pana cetanā dāruṇā hotī’’ti. Iminā ca ‘‘eḷakaṃ māressāmī’’ti mātāpituādīnaṃ māraṇepi pubbabhāgacetanāya adāruṇattā aññathā pavattaānantariyakammato evaṃ pavattānantariyassa nātidāruṇatā vuttāva hotīti daṭṭhabbā.
লোহিতকন্তি লোহিতমক্খিতং। কম্মং করোন্তেতি যুদ্ধকম্মং করোন্তে। যথাধিপ্পাযং গতেতি যোধং ৰিজ্ঝিত্ৰা পিতরি ৰিদ্ধে। ইদঞ্চ যথাধিপ্পাযং তেন তথাৰিদ্ধভাৰদস্সনত্থং ৰুত্তং। অযথাধিপ্পাযং পন উজুকমেৰ গন্ত্ৰা পিতরি ৰিদ্ধেপি মরণাধিপ্পাযেন অত্তনাৰ কতপ্পযোগত্তা নেৰত্থি ৰিসঙ্কেতোতি ৰদন্তি। আনন্তরিযং পন নত্থীতি পিতরং উদ্দিস্স কতপ্পযোগাভাৰতো।
Lohitakanti lohitamakkhitaṃ. Kammaṃ karonteti yuddhakammaṃ karonte. Yathādhippāyaṃ gateti yodhaṃ vijjhitvā pitari viddhe. Idañca yathādhippāyaṃ tena tathāviddhabhāvadassanatthaṃ vuttaṃ. Ayathādhippāyaṃ pana ujukameva gantvā pitari viddhepi maraṇādhippāyena attanāva katappayogattā nevatthi visaṅketoti vadanti. Ānantariyaṃ pana natthīti pitaraṃ uddissa katappayogābhāvato.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ৩. ততিযপারাজিকং • 3. Tatiyapārājikaṃ
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰিভঙ্গ-অট্ঠকথা • Mahāvibhaṅga-aṭṭhakathā / ৩. ততিযপারাজিকং • 3. Tatiyapārājikaṃ
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / পদভাজনীযৰণ্ণনা • Padabhājanīyavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / পদভাজনীযৰণ্ণনা • Padabhājanīyavaṇṇanā
