| Library / Tipiṭaka / তিপিটক • Tipiṭaka / ৰজিরবুদ্ধি-টীকা • Vajirabuddhi-ṭīkā |
পদভাজনীযৰণ্ণনা
Padabhājanīyavaṇṇanā
৩০৩. সহ পরিদণ্ডেন ৰত্তমানাতি অত্থো। ছন্দৰাসিনী নাম ‘‘পিযা পিযং ৰসেতী’’তি পাল়ি, পুরিসং ৰাসেতীতি অধিপ্পাযো। ‘‘পিযো পিযং ৰাসেতী’’তি অট্ঠকথা।
303. Saha paridaṇḍena vattamānāti attho. Chandavāsinī nāma ‘‘piyā piyaṃ vasetī’’ti pāḷi, purisaṃ vāsetīti adhippāyo. ‘‘Piyo piyaṃ vāsetī’’ti aṭṭhakathā.
তং কিরিযং সম্পাদেস্সতীতি অৰস্সং আরোচেন্তিযা চে আরোচেতীতি অত্থো। দ্ৰিন্নং মাতাপিতূনং চে আরোচেতি, সঙ্ঘাদিসেসোতি ৰিনযৰিনিচ্ছযে ‘‘ৰত্থু ওলোকেতব্ব’’ন্তি ৰুত্তং। ৰত্থুম্হি চ ‘‘উদাযিত্থেরো গণিকায আরোচেসী’’তি ৰুত্তং। তং ‘‘মাতাদীনম্পি ৰদতো ৰিসঙ্কেতো নত্থী’’তি অট্ঠকথাৰচনতো নিপ্পযোজনং। তং পনেতন্তি আচরিযস্স ৰচনং। মাতুরক্খিতং ব্রূহীতি পেসিতস্স গন্ত্ৰা মাতাপিতুরক্খিতং ৰদতো তস্স তস্সা মাতুরক্খিতভাৰেপি সতি ৰিসঙ্কেতমেৰ, কস্মা? ‘‘পিতুরক্খিতাদীসু অঞ্ঞতরং ৰদন্তস্স ৰিসঙ্কেত’’ন্তি ৰুত্তত্তা ইতরথা আদি-সদ্দো নিরত্থকো সিযা। একং দসকং ইতরেন দসকেন যোজেত্ৰা পুব্বে সুক্কৰিস্সট্ঠিযং ৰুত্তনযত্তা মাতুরক্খিতায মাতা অত্তনো ধীতুসন্তিকং পহিণতীতি গহেতব্বং।
Taṃ kiriyaṃ sampādessatīti avassaṃ ārocentiyā ce ārocetīti attho. Dvinnaṃ mātāpitūnaṃ ce āroceti, saṅghādisesoti vinayavinicchaye ‘‘vatthu oloketabba’’nti vuttaṃ. Vatthumhi ca ‘‘udāyitthero gaṇikāya ārocesī’’ti vuttaṃ. Taṃ ‘‘mātādīnampi vadato visaṅketo natthī’’ti aṭṭhakathāvacanato nippayojanaṃ. Taṃ panetanti ācariyassa vacanaṃ. Māturakkhitaṃ brūhīti pesitassa gantvā mātāpiturakkhitaṃ vadato tassa tassā māturakkhitabhāvepi sati visaṅketameva, kasmā? ‘‘Piturakkhitādīsu aññataraṃ vadantassa visaṅketa’’nti vuttattā itarathā ādi-saddo niratthako siyā. Ekaṃ dasakaṃ itarena dasakena yojetvā pubbe sukkavissaṭṭhiyaṃ vuttanayattā māturakkhitāya mātā attano dhītusantikaṃ pahiṇatīti gahetabbaṃ.
৩৩৮. অনভিনন্দিত্ৰাতি ৰচনমত্তমেৰ, যদিপি অভিনন্দতি, যাৰ সাসনং নারোচেতি, তাৰ ‘‘ৰীমংসিতো’’তি ন ৰুচ্চতি। সাসনারোচনকালেতি আণাপকস্স সাসনৰচনক্খণে। ততিযপদে ৰুত্তনযেনাতি একঙ্গসম্পত্তিযা দুক্কটন্তি অত্থো। ৰত্থুগণনায সঙ্ঘাদিসেসোতি উভযৰত্থুগণনায কির।
338.Anabhinanditvāti vacanamattameva, yadipi abhinandati, yāva sāsanaṃ nāroceti, tāva ‘‘vīmaṃsito’’ti na vuccati. Sāsanārocanakāleti āṇāpakassa sāsanavacanakkhaṇe. Tatiyapade vuttanayenāti ekaṅgasampattiyā dukkaṭanti attho. Vatthugaṇanāya saṅghādisesoti ubhayavatthugaṇanāya kira.
৩৩৯. চতুত্থে অনাপত্তীতি এত্থ পন ‘‘পটিগ্গণ্হাতি ন ৰীমংসতি ন পচ্চাহরতি, অনাপত্তীতি এত্থ ৰিয ‘গচ্ছন্তো ন সম্পাদেতি, আগচ্ছন্তো ৰিসংৰাদেতী’তি অনাপত্তিপাল়িযাপি ভৰিতব্বন্তি দস্সনত্থং ৰুত্ত’’ন্তি ৰদন্তি, একচ্চেসু পোত্থকেসু ‘‘অত্থী’’তিপি।
339.Catutthe anāpattīti ettha pana ‘‘paṭiggaṇhāti na vīmaṃsati na paccāharati, anāpattīti ettha viya ‘gacchanto na sampādeti, āgacchanto visaṃvādetī’ti anāpattipāḷiyāpi bhavitabbanti dassanatthaṃ vutta’’nti vadanti, ekaccesu potthakesu ‘‘atthī’’tipi.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ৫. সঞ্চরিত্তসিক্খাপদং • 5. Sañcarittasikkhāpadaṃ
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰিভঙ্গ-অট্ঠকথা • Mahāvibhaṅga-aṭṭhakathā / ৫. সঞ্চরিত্তসিক্খাপদৰণ্ণনা • 5. Sañcarittasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ৫. সঞ্চরিত্তসিক্খাপদৰণ্ণনা • 5. Sañcarittasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ৫. সঞ্চরিত্তসিক্খাপদৰণ্ণনা • 5. Sañcarittasikkhāpadavaṇṇanā
