| Library / Tipiṭaka / д̇ибидага • Tipiṭaka / вимад̇ивинод̣̇аний-дийгаа • Vimativinodanī-ṭīkā |
бад̣̇абхааж̇анийяаван̣н̣анаа
Padabhājanīyavaṇṇanā
92. бунаби ‘‘ааг̇анд̇угаамаа’’д̇и вуд̇д̇ад̇д̇аа жа саб̣б̣ат̇аа мануссзхи анивуд̇т̇абуб̣б̣з абхинавамаабид̇з, ‘‘буна на бависиссаамаа’’д̇и нираалаязхи барижжад̇д̇з жа г̇аамз г̇аамавохаараабхааваа г̇аамаббавзсанаабужчанаад̣̇игижжам̣ над̇т̇ийд̇и взд̣̇ид̇аб̣б̣ам̣. аран̃н̃абарижчзд̣̇ад̣̇ассанад̇т̇анд̇и г̇аамаг̇аамуубажаарзсу д̣̇ассид̇зсу д̇ад̣̇ан̃н̃ам̣ аран̃н̃анд̇и аран̃н̃абарижчзд̣̇о саггаа н̃аад̇унд̇и вуд̇д̇ам̣. маад̇игааяам̣ бана г̇аамаг̇г̇ахан̣знзва г̇аамуубажаароби г̇ахид̇од̇и д̣̇адтаб̣б̣о. инд̣̇акийлзд̇и уммаарз. аран̃н̃асан̇кзбам̣ г̇ажчад̇и д̇ат̇аа абхид̇хаммз вуд̇д̇ад̇д̇аа. асад̇иби инд̣̇акийлз инд̣̇акийладтаанияад̇д̇аа ‘‘взмаж̇жхамзва инд̣̇акийлод̇и вужжад̇ий’’д̇и вуд̇д̇ам̣. яад̇т̇а бана д̣̇ваараб̣аахааби над̇т̇и, д̇ад̇т̇а баагааравзмаж̇жхамзва инд̣̇акийлод̇и г̇ахзд̇аб̣б̣ам̣. лутид̇ваад̇и баваддид̇ваа.
92.Punapi ‘‘āgantukāmā’’ti vuttattā ca sabbathā manussehi anivutthapubbe abhinavamāpite, ‘‘puna na pavisissāmā’’ti nirālayehi pariccatte ca gāme gāmavohārābhāvā gāmappavesanāpucchanādikiccaṃ natthīti veditabbaṃ. Araññaparicchedadassanatthanti gāmagāmūpacāresu dassitesu tadaññaṃ araññanti araññaparicchedo sakkā ñātunti vuttaṃ. Mātikāyaṃ pana gāmaggahaṇeneva gāmūpacāropi gahitoti daṭṭhabbo. Indakhīleti ummāre. Araññasaṅkhepaṃ gacchati tathā abhidhamme vuttattā. Asatipi indakhīle indakhīlaṭṭhāniyattā ‘‘vemajjhameva indakhīloti vuccatī’’ti vuttaṃ. Yattha pana dvārabāhāpi natthi, tattha pākāravemajjhameva indakhīloti gahetabbaṃ. Luṭhitvāti pavaṭṭitvā.
маж̇жхимасса бурисасса суббабаад̇о ваад̇иаад̣̇и маад̇уг̇аамасса гаагудтаабанавасзна г̇ахзд̇аб̣б̣ам̣, на б̣алад̣̇ассанавасзна ‘‘маад̇уг̇аамо бхааж̇анад̇хованауд̣̇агам̣ чад̣д̣зд̇ий’’д̇и (баараа. адта. 1.92) убари вужжамаанад̇д̇аа, д̇знзва ‘‘лзд̣д̣убаад̇о’’д̇и авад̇ваа суббабаад̇од̇иаад̣̇и вуд̇д̇ам̣. гурунд̣̇адтагат̇ааяам̣ махаабажжарияан̃жа гхаруубажаарова г̇аамод̇и ад̇хиббааязна ‘‘гхаруубажаарз тид̇асса лзд̣д̣убаад̇о г̇аамуубажааро’’д̇и вуд̇д̇ам̣. гад̇абаригкзбод̇и иминаа баригкзбад̇о б̣ахи убажааро на г̇ахзд̇аб̣б̣од̇и д̣̇ассзд̇и. суббамусалабаад̇оби абаригкид̇д̇аг̇зхассзва, со жа яад̇о баход̇и, д̇ад̇т̇зва г̇ахзд̇аб̣б̣о, аббахонадтаанз бана виж̇ж̇амаанадтаанамзва г̇ахзд̇аб̣б̣ам̣. яасса бана гхарасса саманд̇ад̇о баагаараад̣̇ийхи баригкзбо гад̇о ход̇и, д̇ад̇т̇а сова баригкзбо гхаруубажаарод̇и г̇ахзд̇аб̣б̣ам̣.
Majjhimassa purisassa suppapāto vātiādi mātugāmassa kākuṭṭhāpanavasena gahetabbaṃ, na baladassanavasena ‘‘mātugāmo bhājanadhovanaudakaṃ chaḍḍetī’’ti (pārā. aṭṭha. 1.92) upari vuccamānattā, teneva ‘‘leḍḍupāto’’ti avatvā suppapātotiādi vuttaṃ. Kurundaṭṭhakathāyaṃ mahāpaccariyañca gharūpacārova gāmoti adhippāyena ‘‘gharūpacāre ṭhitassa leḍḍupāto gāmūpacāro’’ti vuttaṃ. Kataparikkhepoti iminā parikkhepato bahi upacāro na gahetabboti dasseti. Suppamusalapātopi aparikkhittagehasseva, so ca yato pahoti, tattheva gahetabbo, appahonaṭṭhāne pana vijjamānaṭṭhānameva gahetabbaṃ. Yassa pana gharassa samantato pākārādīhi parikkhepo kato hoti, tattha sova parikkhepo gharūpacāroti gahetabbaṃ.
буб̣б̣з вуд̇д̇анаязнаад̇и баригкид̇д̇аг̇аамз вуд̇д̇анаязна. сан̇гарийяад̇ийд̇и миссийяад̇и. вигаалз г̇аамаббавзсанз ‘‘баригкид̇д̇асса г̇аамасса баригкзбам̣ ад̇иггаманд̇асса аабад̇д̇и баажид̇д̇ияасса. абаригкид̇д̇асса г̇аамасса убажаарам̣ оггаманд̇асса аабад̇д̇и баажид̇д̇ияассаа’’д̇и (баажи. 513) вуд̇д̇ад̇д̇аа г̇аамаг̇аамуубажаараанам̣ асан̇гарад̇аа ижчид̇аб̣б̣аад̇и ааха асан̇гарад̇о жаад̇иаад̣̇и. гзжи банзд̇т̇а баал̣ияам̣ ‘‘абаригкид̇д̇асса г̇аамасса убажаарам̣ оггаманд̇ассаад̇и ид̣̇ам̣ баригкзбаарахадтаанам̣ санд̇хааяа вуд̇д̇ам̣, на д̇ад̇о барам̣ згалзд̣д̣убаад̇абарижчиннам̣ убажаарам̣ . д̇асмаа баригкзбаарахадтаанасан̇каад̇ам̣ г̇аамам̣ оггаманд̇ассзва аабад̇д̇и, на убажаара’’нд̇и вад̣̇анд̇и, д̇ам̣ на г̇ахзд̇аб̣б̣ам̣ ‘‘гхаруубажаарз тид̇асса маж̇жхимасса бурисасса лзд̣д̣убаад̇аб̣бханд̇арам̣ г̇аамо наама. д̇ад̇о ан̃н̃асса лзд̣д̣убаад̇асса аб̣бханд̇арам̣ г̇аамуубажааро наамаа’’д̇и (баараа. адта. 1.92) ид̇хзва адтагат̇ааяам̣ вуд̇д̇ад̇д̇аа. вигаалз г̇аамаббавзсанасигкаабад̣̇адтагат̇ааяан̃хи абаригкид̇д̇асса г̇аамасса убажааро ад̣̇иннаад̣̇аанз вуд̇д̇анаязнзва взд̣̇ид̇аб̣б̣од̇и (баажи. адта. 512) аяамзва наяо ад̇ид̣̇исид̇о. д̇знзва маад̇игаадтагат̇ааяамби ‘‘явааяам̣ абаригкид̇д̇асса г̇аамасса убажааро д̣̇ассид̇о, д̇асса васзна вигаалз г̇аамаббавзсанаад̣̇ийсу аабад̇д̇и барижчинд̣̇ид̇аб̣б̣аа’’д̇и (ган̇каа. адта. д̣̇уд̇ияабаарааж̇игаван̣н̣анаа) вуд̇д̇ам̣, д̇асмаа баригкид̇д̇асса г̇аамасса баригкзбам̣ ад̇иггаманд̇асса, абаригкид̇д̇асса г̇аамасса гхаруубажаарад̇о бадтааяа д̣̇уд̇ияалзд̣д̣убаад̇асан̇каад̇ам̣ г̇аамуубажаарам̣ оггаманд̇асса вигаалз г̇аамаббавзсанаабад̇д̇и ход̇и, маад̇игааяан̃жа вигаалз г̇аамам̣ бависзяяаад̇и г̇аамаг̇г̇ахан̣знзва г̇аамуубажаароби г̇ахид̇од̇и взд̣̇ид̇аб̣б̣ам̣. вигаалз г̇аамаббавзсанаад̣̇ийсууд̇и аад̣̇и-сад̣̇д̣̇зна гхарагхаруубажаараад̣̇ийсу тид̇аанам̣ уббанналаабхабхааж̇анаад̣̇им̣ сан̇г̇ан̣хаад̇и.
Pubbe vuttanayenāti parikkhittagāme vuttanayena. Saṅkarīyatīti missīyati. Vikāle gāmappavesane ‘‘parikkhittassa gāmassa parikkhepaṃ atikkamantassa āpatti pācittiyassa. Aparikkhittassa gāmassa upacāraṃ okkamantassa āpatti pācittiyassā’’ti (pāci. 513) vuttattā gāmagāmūpacārānaṃ asaṅkaratā icchitabbāti āha asaṅkarato cātiādi. Keci panettha pāḷiyaṃ ‘‘aparikkhittassa gāmassa upacāraṃ okkamantassāti idaṃ parikkhepārahaṭṭhānaṃ sandhāya vuttaṃ, na tato paraṃ ekaleḍḍupātaparicchinnaṃ upacāraṃ . Tasmā parikkhepārahaṭṭhānasaṅkhātaṃ gāmaṃ okkamantasseva āpatti, na upacāra’’nti vadanti, taṃ na gahetabbaṃ ‘‘gharūpacāre ṭhitassa majjhimassa purisassa leḍḍupātabbhantaraṃ gāmo nāma. Tato aññassa leḍḍupātassa abbhantaraṃ gāmūpacāro nāmā’’ti (pārā. aṭṭha. 1.92) idheva aṭṭhakathāyaṃ vuttattā. Vikāle gāmappavesanasikkhāpadaṭṭhakathāyañhi aparikkhittassa gāmassa upacāro adinnādāne vuttanayeneva veditabboti (pāci. aṭṭha. 512) ayameva nayo atidisito. Teneva mātikāṭṭhakathāyampi ‘‘yvāyaṃ aparikkhittassa gāmassa upacāro dassito, tassa vasena vikāle gāmappavesanādīsu āpatti paricchinditabbā’’ti (kaṅkhā. aṭṭha. dutiyapārājikavaṇṇanā) vuttaṃ, tasmā parikkhittassa gāmassa parikkhepaṃ atikkamantassa, aparikkhittassa gāmassa gharūpacārato paṭṭhāya dutiyaleḍḍupātasaṅkhātaṃ gāmūpacāraṃ okkamantassa vikāle gāmappavesanāpatti hoti, mātikāyañca vikāle gāmaṃ paviseyyāti gāmaggahaṇeneva gāmūpacāropi gahitoti veditabbaṃ. Vikāle gāmappavesanādīsūti ādi-saddena gharagharūpacārādīsu ṭhitānaṃ uppannalābhabhājanādiṃ saṅgaṇhāti.
нигкамид̇ваа б̣ахи инд̣̇акийлаад̇и инд̣̇акийлад̇о б̣ахи нигкамид̇ваа тид̇ам̣ яам̣ таанам̣ саб̣б̣амзд̇ам̣ аран̃н̃анд̇и яож̇анаа. аажарияад̇хану наама багад̇ихад̇т̇зна нававид̣̇ад̇т̇ибамаан̣ам̣, ж̇ияааяа бана ааробид̇ааяа сад̇д̇адтавид̣̇ад̇т̇имад̇д̇анд̇и вад̣̇анд̇и.
Nikkhamitvā bahi indakhīlāti indakhīlato bahi nikkhamitvā ṭhitaṃ yaṃ ṭhānaṃ sabbametaṃ araññanti yojanā. Ācariyadhanu nāma pakatihatthena navavidatthipamāṇaṃ, jiyāya pana āropitāya sattaṭṭhavidatthimattanti vadanti.
габбияанд̇и ануруубавасзна вуд̇д̇ам̣ агаббияассааби аббадиг̇г̇ахид̇асса барибхог̇з баажид̇д̇ияад̇д̇аа. барижжааг̇аад̣̇имхи агад̇з ‘‘ид̣̇ам̣ маяхам̣ санд̇ага’’нд̇и вад̇т̇усааминаа авид̣̇ид̇амби бариг̇г̇ахид̇амзва б̣аалуммад̇д̇аад̣̇ийнам̣ санд̇агам̣ вияа, д̇аад̣̇исам̣ авахаранд̇оби н̃аад̇агаад̣̇ийхи бажчаа н̃ад̇ваа вад̇т̇усааминаа жа ануб̣анд̇хид̇аб̣б̣ад̇о баарааж̇игова ход̇и. яасса васзна бурисо т̇зно ход̇и, д̇ам̣ т̇зяяанд̇и ааха ‘‘авахаран̣ажид̇д̇ассзд̇ам̣ ад̇хиважана’’нд̇и. бабан̃жасан̇каад̇и д̇ан̣хаамаанад̣̇идтисан̇каад̇аа бабан̃жагодтаасаа. зго жид̇д̇агодтаасод̇и таанаажааванабаяог̇асамудтаабаго зго жид̇д̇агодтаасод̇и ад̇т̇о.
Kappiyanti anurūpavasena vuttaṃ akappiyassāpi appaṭiggahitassa paribhoge pācittiyattā. Pariccāgādimhi akate ‘‘idaṃ mayhaṃ santaka’’nti vatthusāminā aviditampi pariggahitameva bālummattādīnaṃ santakaṃ viya, tādisaṃ avaharantopi ñātakādīhi pacchā ñatvā vatthusāminā ca anubandhitabbato pārājikova hoti. Yassa vasena puriso theno hoti, taṃ theyyanti āha ‘‘avaharaṇacittassetaṃ adhivacana’’nti. Papañcasaṅkhāti taṇhāmānadiṭṭhisaṅkhātā papañcakoṭṭhāsā. Eko cittakoṭṭhāsoti ṭhānācāvanapayogasamuṭṭhāpako eko cittakoṭṭhāsoti attho.
абхияог̇авасзнаад̇и аддагаран̣авасзна. савин̃н̃аан̣агзнзваад̇и ид̣̇ам̣ савин̃н̃аан̣агаанан̃н̃зва аавзн̣игавинижчаяам̣ санд̇хааяа вуд̇д̇ам̣. баан̣о абад̣̇анд̇иаад̣̇ийсу хи ‘‘бад̣̇асаа нзссаамий’’д̇и батамам̣ баад̣̇ам̣ сан̇гаамзд̇и, аабад̇д̇и т̇уллажжаяассаад̇иаад̣̇инаа баал̣ияам̣ (баараа. 111), бхигку д̣̇аасам̣ д̣̇исваа сукад̣̇угкам̣ бужчид̇ваа ваа абужчид̇ваа ваа ‘‘г̇ажча, балааяид̇ваа сукам̣ ж̇ийваа’’д̇и вад̣̇ад̇и, со жз балааяад̇и, д̣̇уд̇ияабад̣̇аваарз баарааж̇иганд̇иаад̣̇инаа (баараа. адта. 1.114) адтагат̇ааяан̃жа яо савин̃н̃аан̣агаанан̃н̃зва аавзн̣иго винижчаяо вуд̇д̇о, со аараамаад̣̇иавин̃н̃аан̣агзсу на лаб̣бхад̇ийд̇и д̇аад̣̇исам̣ санд̇хааяа ‘‘савин̃н̃аан̣агзнзваа’’д̇и вуд̇д̇ам̣. яо бана винижчаяо аараамаад̣̇иавин̃н̃аан̣агзсу лаб̣бхад̇и, со яасмаа савин̃н̃аан̣агзсу алаб̣бханаго наама над̇т̇и, д̇асмаа вуд̇д̇ам̣ ‘‘наанаабхан̣д̣авасзна савин̃н̃аан̣агаавин̃н̃аан̣агамиссагзнаа’’д̇и. савин̃н̃аан̣агзна жа авин̃н̃аан̣агзна жаад̇и ад̇т̇о. яасмаа жзд̇т̇а авин̃н̃аан̣агзнзва аад̣̇ияанаад̣̇ийни чаби бад̣̇аани на саггаа яож̇зд̇ум̣ ирияаабат̇авигобанасса савин̃н̃аан̣агавасзнзва яож̇зд̇аб̣б̣ад̇о, д̇асмаа ‘‘авин̃н̃аан̣агзнзваа’’д̇и д̇ад̇ияам̣ багаарам̣ на вуд̇д̇анд̇и д̣̇адтаб̣б̣ам̣.
Abhiyogavasenāti aṭṭakaraṇavasena. Saviññāṇakenevāti idaṃ saviññāṇakānaññeva āveṇikavinicchayaṃ sandhāya vuttaṃ. Pāṇo apadantiādīsu hi ‘‘padasā nessāmī’’ti paṭhamaṃ pādaṃ saṅkāmeti, āpatti thullaccayassātiādinā pāḷiyaṃ (pārā. 111), bhikkhu dāsaṃ disvā sukhadukkhaṃ pucchitvā vā apucchitvā vā ‘‘gaccha, palāyitvā sukhaṃ jīvā’’ti vadati, so ce palāyati, dutiyapadavāre pārājikantiādinā (pārā. aṭṭha. 1.114) aṭṭhakathāyañca yo saviññāṇakānaññeva āveṇiko vinicchayo vutto, so ārāmādiaviññāṇakesu na labbhatīti tādisaṃ sandhāya ‘‘saviññāṇakenevā’’ti vuttaṃ. Yo pana vinicchayo ārāmādiaviññāṇakesu labbhati, so yasmā saviññāṇakesu alabbhanako nāma natthi, tasmā vuttaṃ ‘‘nānābhaṇḍavasena saviññāṇakāviññāṇakamissakenā’’ti. Saviññāṇakena ca aviññāṇakena cāti attho. Yasmā cettha aviññāṇakeneva ādiyanādīni chapi padāni na sakkā yojetuṃ iriyāpathavikopanassa saviññāṇakavaseneva yojetabbato, tasmā ‘‘aviññāṇakenevā’’ti tatiyaṃ pakāraṃ na vuttanti daṭṭhabbaṃ.
аарааманд̇и ид̣̇ам̣ убалагкан̣амад̇д̇ам̣ д̣̇аасаад̣̇исавин̃н̃аан̣агассааби ид̇ха сан̇г̇ахзд̇аб̣б̣ад̇о, наанаабхан̣д̣авасзна хзд̇т̇а яож̇анаа д̣̇ассияад̇и. баригаббид̇адтаананд̇и баригаббид̇огаасам̣. сун̇гагхаад̇анд̇и зд̇т̇а маг̇г̇ам̣ г̇ажчанд̇зхи сад̇т̇игзхи ад̇д̇анаа нийяамаанабхан̣д̣ад̇о ран̃н̃о д̣̇аад̇аб̣б̣абхааг̇о сун̇го наама, со зд̇т̇а хан̃н̃ад̇и ад̣̇ад̇ваа г̇ажчанд̇зхи авахарийяад̇и, д̇ам̣ ваа ханд̇и зд̇т̇а рааж̇абурисаа ад̣̇ад̣̇анд̇аанам̣ санд̇агам̣ б̣алаггаарзнаад̇и сун̇гагхаад̇о, ‘‘зд̇т̇а бавидтзхи сун̇го д̣̇аад̇аб̣б̣о’’д̇и ругкабаб̣б̣ад̇аад̣̇исан̃н̃аан̣зна нияамид̇аббад̣̇зсассзд̇ам̣ ад̇хиважанам̣.
Ārāmanti idaṃ upalakkhaṇamattaṃ dāsādisaviññāṇakassāpi idha saṅgahetabbato, nānābhaṇḍavasena hettha yojanā dassiyati. Parikappitaṭṭhānanti parikappitokāsaṃ. Suṅkaghātanti ettha maggaṃ gacchantehi satthikehi attanā nīyamānabhaṇḍato rañño dātabbabhāgo suṅko nāma, so ettha haññati adatvā gacchantehi avaharīyati, taṃ vā hanti ettha rājapurisā adadantānaṃ santakaṃ balakkārenāti suṅkaghāto, ‘‘ettha paviṭṭhehi suṅko dātabbo’’ti rukkhapabbatādisaññāṇena niyamitappadesassetaṃ adhivacanaṃ.
Related texts:
д̇ибидага (муула) • Tipiṭaka (Mūla) / винаяабидага • Vinayapiṭaka / махаавибхан̇г̇а • Mahāvibhaṅga / 2. д̣̇уд̇ияабаарааж̇игам̣ • 2. Dutiyapārājikaṃ
адтагат̇аа • Aṭṭhakathā / винаяабидага (адтагат̇аа) • Vinayapiṭaka (aṭṭhakathā) / махаавибхан̇г̇а-адтагат̇аа • Mahāvibhaṅga-aṭṭhakathā / 2. д̣̇уд̇ияабаарааж̇игам̣ • 2. Dutiyapārājikaṃ
дийгаа • Tīkā / винаяабидага (дийгаа) • Vinayapiṭaka (ṭīkā) / саарад̇т̇ад̣̇ийбаний-дийгаа • Sāratthadīpanī-ṭīkā / бад̣̇абхааж̇анийяаван̣н̣анаа • Padabhājanīyavaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / важ̇ираб̣уд̣̇д̇хи-дийгаа • Vajirabuddhi-ṭīkā / бад̣̇абхааж̇анийяаван̣н̣анаа • Padabhājanīyavaṇṇanā
