| Library / Tipiṭaka / திபிடக • Tipiṭaka / ஜாதக-அட்ட²கதா² • Jātaka-aṭṭhakathā |
[247] 7. பாத³ஞ்ஜலிஜாதகவண்ணனா
[247] 7. Pādañjalijātakavaṇṇanā
அத்³தா⁴ பாத³ஞ்ஜலீ ஸப்³பே³தி இத³ங் ஸத்தா² ஜேதவனே விஹரந்தோ லாளுதா³யீதே²ரங் ஆரப்³ப⁴ கதே²ஸி. ஏகஸ்மிஞ்ஹி தி³வஸே த்³வே அக்³க³ஸாவகா பஞ்ஹங் வினிச்சி²னந்தி, பி⁴க்கூ² பஞ்ஹங் ஸுணந்தா தே²ரே பஸங்ஸந்தி. லாளுதா³யீதே²ரோ பன பரிஸந்தரே நிஸின்னோ ‘‘ஏதே அம்ஹேஹி ஸமங் கிங் ஜானந்தீ’’தி ஒட்ட²ங் ப⁴ஞ்ஜி. தங் தி³ஸ்வா தே²ரா உட்டா²ய பக்கமிங்ஸு, பரிஸா பி⁴ஜ்ஜி. த⁴ம்மஸபா⁴யங் பி⁴க்கூ² கத²ங் ஸமுட்டா²பேஸுங் – ‘‘ஆவுஸோ லாளுதா³யீ, த்³வே அக்³க³ஸாவகே க³ரஹித்வா ஒட்ட²ங் ப⁴ஞ்ஜீ’’தி. தங் ஸுத்வா ஸத்தா² ‘‘ந, பி⁴க்க²வே, இதா³னேவ, புப்³பே³பி லாளுதா³யீ ட²பெத்வா ஒட்ட²ப⁴ஞ்ஜனங் ததோ உத்தரி அஞ்ஞங் ந ஜானாதீ’’தி வத்வா அதீதங் ஆஹரி.
Addhā pādañjalī sabbeti idaṃ satthā jetavane viharanto lāḷudāyītheraṃ ārabbha kathesi. Ekasmiñhi divase dve aggasāvakā pañhaṃ vinicchinanti, bhikkhū pañhaṃ suṇantā there pasaṃsanti. Lāḷudāyīthero pana parisantare nisinno ‘‘ete amhehi samaṃ kiṃ jānantī’’ti oṭṭhaṃ bhañji. Taṃ disvā therā uṭṭhāya pakkamiṃsu, parisā bhijji. Dhammasabhāyaṃ bhikkhū kathaṃ samuṭṭhāpesuṃ – ‘‘āvuso lāḷudāyī, dve aggasāvake garahitvā oṭṭhaṃ bhañjī’’ti. Taṃ sutvā satthā ‘‘na, bhikkhave, idāneva, pubbepi lāḷudāyī ṭhapetvā oṭṭhabhañjanaṃ tato uttari aññaṃ na jānātī’’ti vatvā atītaṃ āhari.
அதீதே பா³ராணஸியங் ப்³ரஹ்மத³த்தே ரஜ்ஜங் காரெந்தே போ³தி⁴ஸத்தோ தஸ்ஸ அத்த²த⁴ம்மானுஸாஸகோ அமச்சோ அஹோஸி. ரஞ்ஞோ பாத³ஞ்ஜலீ நாம புத்தோ லாலோ த³ந்த⁴பரிஸக்கனோ அஹோஸி. அபரபா⁴கே³ ராஜா காலமகாஸி. அமச்சா ரஞ்ஞோ மதகிச்சானி கத்வா ‘‘தங் ரஜ்ஜே அபி⁴ஸிஞ்சிஸ்ஸாமா’’தி மந்தயமானா ராஜபுத்தங் பாத³ஞ்ஜலிங் ஆஹங்ஸு. போ³தி⁴ஸத்தோ பன ‘‘அயங் குமாரோ லாலோ த³ந்த⁴பரிஸக்கனோ, பரிக்³க³ஹெத்வா நங் அபி⁴ஸிஞ்சிஸ்ஸாமா’’தி ஆஹ. அமச்சா வினிச்ச²யங் ஸஜ்ஜெத்வா குமாரங் ஸமீபே நிஸீதா³பெத்வா அட்³ட³ங் வினிச்சி²னந்தா ந ஸம்மா வினிச்சி²னிங்ஸு. தே அஸ்ஸாமிகங் ஸாமிகங் கத்வா குமாரங் புச்சி²ங்ஸு – ‘‘கீதி³ஸங், குமார, ஸுட்டு² அட்³ட³ங் வினிச்சி²னிம்ஹா’’தி. ஸோ ஒட்ட²ங் ப⁴ஞ்ஜி. போ³தி⁴ஸத்தோ ‘‘பண்டி³தோ வத மஞ்ஞே குமாரோ, அஸம்மாவினிச்சி²தபா⁴வோ தேன ஞாதோ ப⁴விஸ்ஸதீ’’தி மஞ்ஞமானோ பட²மங் கா³த²மாஹ –
Atīte bārāṇasiyaṃ brahmadatte rajjaṃ kārente bodhisatto tassa atthadhammānusāsako amacco ahosi. Rañño pādañjalī nāma putto lālo dandhaparisakkano ahosi. Aparabhāge rājā kālamakāsi. Amaccā rañño matakiccāni katvā ‘‘taṃ rajje abhisiñcissāmā’’ti mantayamānā rājaputtaṃ pādañjaliṃ āhaṃsu. Bodhisatto pana ‘‘ayaṃ kumāro lālo dandhaparisakkano, pariggahetvā naṃ abhisiñcissāmā’’ti āha. Amaccā vinicchayaṃ sajjetvā kumāraṃ samīpe nisīdāpetvā aḍḍaṃ vinicchinantā na sammā vinicchiniṃsu. Te assāmikaṃ sāmikaṃ katvā kumāraṃ pucchiṃsu – ‘‘kīdisaṃ, kumāra, suṭṭhu aḍḍaṃ vinicchinimhā’’ti. So oṭṭhaṃ bhañji. Bodhisatto ‘‘paṇḍito vata maññe kumāro, asammāvinicchitabhāvo tena ñāto bhavissatī’’ti maññamāno paṭhamaṃ gāthamāha –
194.
194.
‘‘அத்³தா⁴ பாத³ஞ்ஜலீ ஸப்³பே³, பஞ்ஞாய அதிரோசதி;
‘‘Addhā pādañjalī sabbe, paññāya atirocati;
ததா² ஹி ஒட்ட²ங் ப⁴ஞ்ஜதி, உத்தரிங் நூன பஸ்ஸதீ’’தி.
Tathā hi oṭṭhaṃ bhañjati, uttariṃ nūna passatī’’ti.
தஸ்ஸத்தோ² – ஏகங்ஸேன பாத³ஞ்ஜலிகுமாரோ ஸப்³பே³ அம்ஹே பஞ்ஞாய அதிரோசதி. ததா² ஹி ஒட்ட²ங் ப⁴ஞ்ஜதி, நூன உத்தரிங் அஞ்ஞங் காரணங் பஸ்ஸதீதி.
Tassattho – ekaṃsena pādañjalikumāro sabbe amhe paññāya atirocati. Tathā hi oṭṭhaṃ bhañjati, nūna uttariṃ aññaṃ kāraṇaṃ passatīti.
தே அபரஸ்மிம்பி தி³வஸே வினிச்ச²யங் ஸஜ்ஜெத்வா அஞ்ஞங் அட்³ட³ங் ஸுட்டு² வினிச்சி²னித்வா ‘‘கீதி³ஸங், தே³வ, ஸுட்டு² வினிச்சி²னித’’ந்தி புச்சி²ங்ஸு. ஸோ புனபி ஒட்ட²மேவ ப⁴ஞ்ஜி. அத²ஸ்ஸ அந்த⁴பா³லபா⁴வங் ஞத்வா போ³தி⁴ஸத்தோ து³தியங் கா³த²மாஹ –
Te aparasmimpi divase vinicchayaṃ sajjetvā aññaṃ aḍḍaṃ suṭṭhu vinicchinitvā ‘‘kīdisaṃ, deva, suṭṭhu vinicchinita’’nti pucchiṃsu. So punapi oṭṭhameva bhañji. Athassa andhabālabhāvaṃ ñatvā bodhisatto dutiyaṃ gāthamāha –
195.
195.
‘‘நாயங் த⁴ம்மங் அத⁴ம்மங் வா, அத்தா²னத்த²ஞ்ச பு³ஜ்ஜ²தி;
‘‘Nāyaṃ dhammaṃ adhammaṃ vā, atthānatthañca bujjhati;
அஞ்ஞத்ர ஒட்ட²னிப்³போ⁴கா³, நாயங் ஜானாதி கிஞ்சன’’ந்தி.
Aññatra oṭṭhanibbhogā, nāyaṃ jānāti kiñcana’’nti.
அமச்சா பாத³ஞ்ஜலிகுமாரஸ்ஸ லாலபா⁴வங் ஞத்வா போ³தி⁴ஸத்தங் ரஜ்ஜே அபி⁴ஸிஞ்சிங்ஸு.
Amaccā pādañjalikumārassa lālabhāvaṃ ñatvā bodhisattaṃ rajje abhisiñciṃsu.
ஸத்தா² இமங் த⁴ம்மதே³ஸனங் ஆஹரித்வா ஜாதகங் ஸமோதா⁴னேஸி – ‘‘ததா³ பாத³ஞ்ஜலீ லாளுதா³யீ அஹோஸி, பண்டி³தாமச்சோ பன அஹமேவ அஹோஸி’’ந்தி.
Satthā imaṃ dhammadesanaṃ āharitvā jātakaṃ samodhānesi – ‘‘tadā pādañjalī lāḷudāyī ahosi, paṇḍitāmacco pana ahameva ahosi’’nti.
பாத³ஞ்ஜலிஜாதகவண்ணனா ஸத்தமா.
Pādañjalijātakavaṇṇanā sattamā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / ஜாதகபாளி • Jātakapāḷi / 247. பாத³ஞ்ஜலீஜாதகங் • 247. Pādañjalījātakaṃ
