| Library / Tipiṭaka / তিপিটক • Tipiṭaka / অপদানপাল়ি • Apadānapāḷi |
৪. পদপূজকত্থেরঅপদানং
4. Padapūjakattheraapadānaṃ
১৯.
19.
‘‘সিদ্ধত্থস্স ভগৰতো, জাতিপুপ্ফমদাসহং।
‘‘Siddhatthassa bhagavato, jātipupphamadāsahaṃ;
পাদেসু সত্ত পুপ্ফানি, হাসেনোকিরিতানি মে॥
Pādesu satta pupphāni, hāsenokiritāni me.
২০.
20.
‘‘তেন কম্মেনহং অজ্জ, অভিভোমি নরামরে।
‘‘Tena kammenahaṃ ajja, abhibhomi narāmare;
ধারেমি অন্তিমং দেহং, সম্মাসম্বুদ্ধসাসনে॥
Dhāremi antimaṃ dehaṃ, sammāsambuddhasāsane.
২১.
21.
‘‘চতুন্নৰুতিতো কপ্পে, যং পুপ্ফমভিরোপযিং।
‘‘Catunnavutito kappe, yaṃ pupphamabhiropayiṃ;
দুগ্গতিং নাভিজানামি, পুপ্ফপূজাযিদং ফলং॥
Duggatiṃ nābhijānāmi, pupphapūjāyidaṃ phalaṃ.
২২.
22.
‘‘সমন্তগন্ধনামাসুং, তেরস চক্কৰত্তিনো।
‘‘Samantagandhanāmāsuṃ, terasa cakkavattino;
ইতো পঞ্চমকে কপ্পে, চাতুরন্তা জনাধিপা॥
Ito pañcamake kappe, cāturantā janādhipā.
২৩.
23.
‘‘পটিসম্ভিদা চতস্সো…পে॰… কতং বুদ্ধস্স সাসনং’’॥
‘‘Paṭisambhidā catasso…pe… kataṃ buddhassa sāsanaṃ’’.
ইত্থং সুদং আযস্মা পদপূজকো থেরো ইমা গাথাযো অভাসিত্থাতি।
Itthaṃ sudaṃ āyasmā padapūjako thero imā gāthāyo abhāsitthāti.
পদপূজকত্থেরস্সাপদানং চতুত্থং।
Padapūjakattherassāpadānaṃ catutthaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / অপদান-অট্ঠকথা • Apadāna-aṭṭhakathā / ৫. মুট্ঠিপুপ্ফিযত্থেরঅপদানৰণ্ণনা • 5. Muṭṭhipupphiyattheraapadānavaṇṇanā
