| Library / Tipiṭaka / තිපිටක • Tipiṭaka / අපදාන-අට්‌ඨකථා • Apadāna-aṭṭhakathā |
4. පදපූජකත්‌ථෙරඅපදානවණ්‌ණනා
4. Padapūjakattheraapadānavaṇṇanā
සිද්‌ධත්‌ථස්‌ස භගවතොතිආදිකං ආයස්‌මතො පදපූජකත්‌ථෙරස්‌ස අපදානං. අයම්‌පි පුරිමබුද්‌ධෙසු කතාධිකාරො සිද්‌ධත්‌ථස්‌ස භගවතො කාලෙ කුලගෙහෙ නිබ්‌බත්‌තො වුද්‌ධිමන්‌වාය සත්‌ථරි පසන්‌නො සුමනපුප්‌ඵෙන පාදමූලෙ පූජෙසි. සො තෙන පුඤ්‌ඤෙන දෙවමනුස්‌සෙසු සංසරන්‌තො සක්‌කසම්‌පත්‌තිං අනුභවිත්‌වා ඉමස්‌මිං බුද්‌ධුප්‌පාදෙ එකස්‌මිං කුලගෙහෙ නිබ්‌බත්‌තො වුද්‌ධිමන්‌වාය සත්‌ථරි පසීදිත්‌වා පබ්‌බජිතො විපස්‌සනං වඩ්‌ඪෙත්‌වා අරහත්‌තඵලෙ පතිට්‌ඨාසි.
Siddhatthassabhagavatotiādikaṃ āyasmato padapūjakattherassa apadānaṃ. Ayampi purimabuddhesu katādhikāro siddhatthassa bhagavato kāle kulagehe nibbatto vuddhimanvāya satthari pasanno sumanapupphena pādamūle pūjesi. So tena puññena devamanussesu saṃsaranto sakkasampattiṃ anubhavitvā imasmiṃ buddhuppāde ekasmiṃ kulagehe nibbatto vuddhimanvāya satthari pasīditvā pabbajito vipassanaṃ vaḍḍhetvā arahattaphale patiṭṭhāsi.
19. සො අපරභාගෙ අත්‌තනො පුබ්‌බකම්‌මං සරිත්‌වා සොමනස්‌සජාතො පුබ්‌බචරිතාපදානං පකාසෙන්‌තො සිද්‌ධත්‌ථස්‌ස භගවතොතිආදිමාහ. ජාතිපුප්‌ඵමදාසහන්‌ති ජාතිසුමනපුප්‌ඵං අදාසිං අහන්‌ති වත්‌තබ්‌බෙ ගාථාබන්‌ධසුඛත්‌ථං සුමනසද්‌දස්‌ස ලොපං කත්‌වා වුත්‌තං. තත්‌ථ ජාතියා නිබ්‌බත්‌තො විකසමානොයෙව සුමනං ජනානං සොමනස්‌සං කරොතීති සුමනං, පුප්‌ඵනට්‌ඨෙන විකසනට්‌ඨෙන පුප්‌ඵං, සුමනඤ්‌ච තං පුප්‌ඵඤ්‌චාති සුමනපුප්‌ඵං, තානි සුමනපුප්‌ඵානි සිද්‌ධත්‌ථස්‌ස භගවතො අහං පූජෙසින්‌ති අත්‌ථො. සෙසං සබ්‌බත්‌ථ උත්‌තානමෙවාති.
19. So aparabhāge attano pubbakammaṃ saritvā somanassajāto pubbacaritāpadānaṃ pakāsento siddhatthassa bhagavatotiādimāha. Jātipupphamadāsahanti jātisumanapupphaṃ adāsiṃ ahanti vattabbe gāthābandhasukhatthaṃ sumanasaddassa lopaṃ katvā vuttaṃ. Tattha jātiyā nibbatto vikasamānoyeva sumanaṃ janānaṃ somanassaṃ karotīti sumanaṃ, pupphanaṭṭhena vikasanaṭṭhena pupphaṃ, sumanañca taṃ pupphañcāti sumanapupphaṃ, tāni sumanapupphāni siddhatthassa bhagavato ahaṃ pūjesinti attho. Sesaṃ sabbattha uttānamevāti.
පදපූජකත්‌ථෙරඅපදානවණ්‌ණනා සමත්‌තා.
Padapūjakattheraapadānavaṇṇanā samattā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / ඛුද්‌දකනිකාය • Khuddakanikāya / අපදානපාළි • Apadānapāḷi / 4. පදපූජකත්‌ථෙරඅපදානං • 4. Padapūjakattheraapadānaṃ
