| Library / Tipiṭaka / তিপিটক • Tipiṭaka / অপদান-অট্ঠকথা • Apadāna-aṭṭhakathā |
২. পদসঞ্ঞকত্থেরঅপদানৰণ্ণনা
2. Padasaññakattheraapadānavaṇṇanā
অক্কন্তঞ্চ পদং দিস্ৰাতিআদিকং আযস্মতো পদসঞ্ঞকত্থেরস্স অপদানং। অযম্পি পুরিমবুদ্ধেসু কতাধিকারো উপ্পন্নুপ্পন্নভৰে ৰিৰট্টূপনিস্সযানি পুঞ্ঞানি উপচিনন্তো তিস্সস্স ভগৰতো কালে একস্মিং সদ্ধাসম্পন্নে উপাসকগেহে নিব্বত্তো ৰিঞ্ঞুতং পত্তো রতনত্তযে পসন্নো ভগৰতা তস্স অনুকম্পায দস্সিতং পদচেতিযং দিস্ৰা পসন্নো লোমহট্ঠজাতো ৰন্দনপূজনাদিবহুমানমকাসি। সো তেনেৰ সুখেত্তে সুকতেন পুঞ্ঞেন ততো চুতো সগ্গে নিব্বত্তো তত্থ দিব্বসুখমনুভৰিত্ৰা অপরভাগে মনুস্সেসু জাতো মনুস্সসম্পত্তিং সব্বমনুভৰিত্ৰা ইমস্মিং বুদ্ধুপ্পাদে ৰিভৰসম্পন্নকুলে নিব্বত্তো ৰুদ্ধিমন্ৰায সদ্ধাজাতো পব্বজিত্ৰা নচিরস্সেৰ অরহা অহোসি, পুরাকতপুঞ্ঞনামেন পদসঞ্ঞকত্থেরোতি পাকটো।
Akkantañca padaṃ disvātiādikaṃ āyasmato padasaññakattherassa apadānaṃ. Ayampi purimabuddhesu katādhikāro uppannuppannabhave vivaṭṭūpanissayāni puññāni upacinanto tissassa bhagavato kāle ekasmiṃ saddhāsampanne upāsakagehe nibbatto viññutaṃ patto ratanattaye pasanno bhagavatā tassa anukampāya dassitaṃ padacetiyaṃ disvā pasanno lomahaṭṭhajāto vandanapūjanādibahumānamakāsi. So teneva sukhette sukatena puññena tato cuto sagge nibbatto tattha dibbasukhamanubhavitvā aparabhāge manussesu jāto manussasampattiṃ sabbamanubhavitvā imasmiṃ buddhuppāde vibhavasampannakule nibbatto vuddhimanvāya saddhājāto pabbajitvā nacirasseva arahā ahosi, purākatapuññanāmena padasaññakattheroti pākaṭo.
৫. সো একদিৰসং অত্তনো পুব্বকম্মং সরিত্ৰা পুব্বচরিতাপদানং পকাসেন্তো অক্কন্তঞ্চ পদং দিস্ৰাতিআদিমাহ। তত্থ অক্কন্তন্তি অক্কমিতং দস্সিতং। সব্ববুদ্ধানং সব্বদা চতুরঙ্গুলোপরিযেৰ গমনং, অযং পন তস্স সদ্ধাসম্পন্নতং ঞত্ৰা ‘‘এসো ইমং পস্সতূ’’তি পদচেতিযং দস্সেসি, তস্মা সো তস্মিং পসীদিত্ৰা ৰন্দনপূজনাদিসক্কারমকাসীতি অত্থো। সেসং সব্বত্থ উত্তানত্থমেৰাতি।
5. So ekadivasaṃ attano pubbakammaṃ saritvā pubbacaritāpadānaṃ pakāsento akkantañca padaṃ disvātiādimāha. Tattha akkantanti akkamitaṃ dassitaṃ. Sabbabuddhānaṃ sabbadā caturaṅgulopariyeva gamanaṃ, ayaṃ pana tassa saddhāsampannataṃ ñatvā ‘‘eso imaṃ passatū’’ti padacetiyaṃ dassesi, tasmā so tasmiṃ pasīditvā vandanapūjanādisakkāramakāsīti attho. Sesaṃ sabbattha uttānatthamevāti.
পদসঞ্ঞকত্থেরঅপদানৰণ্ণনা সমত্তা।
Padasaññakattheraapadānavaṇṇanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / অপদানপাল়ি • Apadānapāḷi / ২. পদসঞ্ঞকত্থেরঅপদানং • 2. Padasaññakattheraapadānaṃ
