| Library / Tipiṭaka / တိပိဋက • Tipiṭaka / အပဒာန-အဋ္ဌကထာ • Apadāna-aṭṭhakathā |
၂. ပဒသညကတ္ထေရအပဒာနဝဏ္ဏနာ
2. Padasaññakattheraapadānavaṇṇanā
အက္ကန္တဉ္စ ပဒံ ဒိသ္ဝာတိအာဒိကံ အာယသ္မတော ပဒသညကတ္ထေရသ္သ အပဒာနံ။ အယမ္ပိ ပုရိမဗုဒ္ဓေသု ကတာဓိကာရော ဥပ္ပန္နုပ္ပန္နဘဝေ ဝိဝဋ္ဋူပနိသ္သယာနိ ပုညာနိ ဥပစိနန္တော တိသ္သသ္သ ဘဂဝတော ကာလေ ဧကသ္မိံ သဒ္ဓာသမ္ပန္နေ ဥပာသကဂေဟေ နိဗ္ဗတ္တော ဝိညုတံ ပတ္တော ရတနတ္တယေ ပသန္နော ဘဂဝတာ တသ္သ အနုကမ္ပာယ ဒသ္သိတံ ပဒစေတိယံ ဒိသ္ဝာ ပသန္နော လောမဟဋ္ဌဇာတော ဝန္ဒနပူဇနာဒိဗဟုမာနမကာသိ။ သော တေနေဝ သုခေတ္တေ သုကတေန ပုညေန တတော စုတော သဂ္ဂေ နိဗ္ဗတ္တော တတ္ထ ဒိဗ္ဗသုခမနုဘဝိတ္ဝာ အပရဘာဂေ မနုသ္သေသု ဇာတော မနုသ္သသမ္ပတ္တိံ သဗ္ဗမနုဘဝိတ္ဝာ ဣမသ္မိံ ဗုဒ္ဓုပ္ပာဒေ ဝိဘဝသမ္ပန္နကုလေ နိဗ္ဗတ္တော ဝုဒ္ဓိမန္ဝာယ သဒ္ဓာဇာတော ပဗ္ဗဇိတ္ဝာ နစိရသ္သေဝ အရဟာ အဟောသိ, ပုရာကတပုညနာမေန ပဒသညကတ္ထေရောတိ ပာကဋော။
Akkantañca padaṃ disvātiādikaṃ āyasmato padasaññakattherassa apadānaṃ. Ayampi purimabuddhesu katādhikāro uppannuppannabhave vivaṭṭūpanissayāni puññāni upacinanto tissassa bhagavato kāle ekasmiṃ saddhāsampanne upāsakagehe nibbatto viññutaṃ patto ratanattaye pasanno bhagavatā tassa anukampāya dassitaṃ padacetiyaṃ disvā pasanno lomahaṭṭhajāto vandanapūjanādibahumānamakāsi. So teneva sukhette sukatena puññena tato cuto sagge nibbatto tattha dibbasukhamanubhavitvā aparabhāge manussesu jāto manussasampattiṃ sabbamanubhavitvā imasmiṃ buddhuppāde vibhavasampannakule nibbatto vuddhimanvāya saddhājāto pabbajitvā nacirasseva arahā ahosi, purākatapuññanāmena padasaññakattheroti pākaṭo.
၅. သော ဧကဒိဝသံ အတ္တနော ပုဗ္ဗကမ္မံ သရိတ္ဝာ ပုဗ္ဗစရိတာပဒာနံ ပကာသေန္တော အက္ကန္တဉ္စ ပဒံ ဒိသ္ဝာတိအာဒိမာဟ။ တတ္ထ အက္ကန္တန္တိ အက္ကမိတံ ဒသ္သိတံ။ သဗ္ဗဗုဒ္ဓာနံ သဗ္ဗဒာ စတုရင္ဂုလောပရိယေဝ ဂမနံ, အယံ ပန တသ္သ သဒ္ဓာသမ္ပန္နတံ ဉတ္ဝာ ‘‘ဧသော ဣမံ ပသ္သတူ’’တိ ပဒစေတိယံ ဒသ္သေသိ, တသ္မာ သော တသ္မိံ ပသီဒိတ္ဝာ ဝန္ဒနပူဇနာဒိသက္ကာရမကာသီတိ အတ္ထော။ သေသံ သဗ္ဗတ္ထ ဥတ္တာနတ္ထမေဝာတိ။
5. So ekadivasaṃ attano pubbakammaṃ saritvā pubbacaritāpadānaṃ pakāsento akkantañca padaṃ disvātiādimāha. Tattha akkantanti akkamitaṃ dassitaṃ. Sabbabuddhānaṃ sabbadā caturaṅgulopariyeva gamanaṃ, ayaṃ pana tassa saddhāsampannataṃ ñatvā ‘‘eso imaṃ passatū’’ti padacetiyaṃ dassesi, tasmā so tasmiṃ pasīditvā vandanapūjanādisakkāramakāsīti attho. Sesaṃ sabbattha uttānatthamevāti.
ပဒသညကတ္ထေရအပဒာနဝဏ္ဏနာ သမတ္တာ။
Padasaññakattheraapadānavaṇṇanā samattā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / ခုဒ္ဒကနိကာယ • Khuddakanikāya / အပဒာနပာဠိ • Apadānapāḷi / ၂. ပဒသညကတ္ထေရအပဒာနံ • 2. Padasaññakattheraapadānaṃ
