| Library / Tipiṭaka / තිපිටක • Tipiṭaka / අපදාන-අට්‌ඨකථා • Apadāna-aṭṭhakathā |
2. පදසඤ්‌ඤකත්‌ථෙරඅපදානවණ්‌ණනා
2. Padasaññakattheraapadānavaṇṇanā
අක්‌කන්‌තඤ්‌ච පදං දිස්‌වාතිආදිකං ආයස්‌මතො පදසඤ්‌ඤකත්‌ථෙරස්‌ස අපදානං. අයම්‌පි පුරිමබුද්‌ධෙසු කතාධිකාරො උප්‌පන්‌නුප්‌පන්‌නභවෙ විවට්‌ටූපනිස්‌සයානි පුඤ්‌ඤානි උපචිනන්‌තො තිස්‌සස්‌ස භගවතො කාලෙ එකස්‌මිං සද්‌ධාසම්‌පන්‌නෙ උපාසකගෙහෙ නිබ්‌බත්‌තො විඤ්‌ඤුතං පත්‌තො රතනත්‌තයෙ පසන්‌නො භගවතා තස්‌ස අනුකම්‌පාය දස්‌සිතං පදචෙතියං දිස්‌වා පසන්‌නො ලොමහට්‌ඨජාතො වන්‌දනපූජනාදිබහුමානමකාසි. සො තෙනෙව සුඛෙත්‌තෙ සුකතෙන පුඤ්‌ඤෙන තතො චුතො සග්‌ගෙ නිබ්‌බත්‌තො තත්‌ථ දිබ්‌බසුඛමනුභවිත්‌වා අපරභාගෙ මනුස්‌සෙසු ජාතො මනුස්‌සසම්‌පත්‌තිං සබ්‌බමනුභවිත්‌වා ඉමස්‌මිං බුද්‌ධුප්‌පාදෙ විභවසම්‌පන්‌නකුලෙ නිබ්‌බත්‌තො වුද්‌ධිමන්‌වාය සද්‌ධාජාතො පබ්‌බජිත්‌වා නචිරස්‌සෙව අරහා අහොසි, පුරාකතපුඤ්‌ඤනාමෙන පදසඤ්‌ඤකත්‌ථෙරොති පාකටො.
Akkantañca padaṃ disvātiādikaṃ āyasmato padasaññakattherassa apadānaṃ. Ayampi purimabuddhesu katādhikāro uppannuppannabhave vivaṭṭūpanissayāni puññāni upacinanto tissassa bhagavato kāle ekasmiṃ saddhāsampanne upāsakagehe nibbatto viññutaṃ patto ratanattaye pasanno bhagavatā tassa anukampāya dassitaṃ padacetiyaṃ disvā pasanno lomahaṭṭhajāto vandanapūjanādibahumānamakāsi. So teneva sukhette sukatena puññena tato cuto sagge nibbatto tattha dibbasukhamanubhavitvā aparabhāge manussesu jāto manussasampattiṃ sabbamanubhavitvā imasmiṃ buddhuppāde vibhavasampannakule nibbatto vuddhimanvāya saddhājāto pabbajitvā nacirasseva arahā ahosi, purākatapuññanāmena padasaññakattheroti pākaṭo.
5. සො එකදිවසං අත්‌තනො පුබ්‌බකම්‌මං සරිත්‌වා පුබ්‌බචරිතාපදානං පකාසෙන්‌තො අක්‌කන්‌තඤ්‌ච පදං දිස්‌වාතිආදිමාහ. තත්‌ථ අක්‌කන්‌තන්‌ති අක්‌කමිතං දස්‌සිතං. සබ්‌බබුද්‌ධානං සබ්‌බදා චතුරඞ්‌ගුලොපරියෙව ගමනං, අයං පන තස්‌ස සද්‌ධාසම්‌පන්‌නතං ඤත්‌වා ‘‘එසො ඉමං පස්‌සතූ’’ති පදචෙතියං දස්‌සෙසි, තස්‌මා සො තස්‌මිං පසීදිත්‌වා වන්‌දනපූජනාදිසක්‌කාරමකාසීති අත්‌ථො. සෙසං සබ්‌බත්‌ථ උත්‌තානත්‌ථමෙවාති.
5. So ekadivasaṃ attano pubbakammaṃ saritvā pubbacaritāpadānaṃ pakāsento akkantañca padaṃ disvātiādimāha. Tattha akkantanti akkamitaṃ dassitaṃ. Sabbabuddhānaṃ sabbadā caturaṅgulopariyeva gamanaṃ, ayaṃ pana tassa saddhāsampannataṃ ñatvā ‘‘eso imaṃ passatū’’ti padacetiyaṃ dassesi, tasmā so tasmiṃ pasīditvā vandanapūjanādisakkāramakāsīti attho. Sesaṃ sabbattha uttānatthamevāti.
පදසඤ්‌ඤකත්‌ථෙරඅපදානවණ්‌ණනා සමත්‌තා.
Padasaññakattheraapadānavaṇṇanā samattā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / ඛුද්‌දකනිකාය • Khuddakanikāya / අපදානපාළි • Apadānapāḷi / 2. පදසඤ්‌ඤකත්‌ථෙරඅපදානං • 2. Padasaññakattheraapadānaṃ
