| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
4. பத³ஸோத⁴ம்மஸிக்கா²பத³ங்
4. Padasodhammasikkhāpadaṃ
44. சதுத்தே² படிமுக²ங் ஆத³ரேன ஸுணந்தீதி பதிஸ்ஸா, ந பதிஸ்ஸா அப்பதிஸ்ஸாதி த³ஸ்ஸெந்தோ ஆஹ ‘‘அப்பதிஸ்ஸவா’’தி.
44. Catutthe paṭimukhaṃ ādarena suṇantīti patissā, na patissā appatissāti dassento āha ‘‘appatissavā’’ti.
45. ‘‘பத³ஸோ’’தி எத்த² ஸோ-பச்சயோ விச்ச²த்த²வாசகோதி ஆஹ ‘‘பத³ங் பத³’’ந்தி. தத்தா²தி தேஸு சதுப்³பி³தே⁴ஸு. பத³ங் நாம இத⁴ அத்த²ஜோதகங் வா விப⁴த்யந்தங் வா ந ஹோதி, அத² கோ² லோகியேஹி லக்கி²தோ கா³தா²ய சதுத்த²ங்ஸோ பாதோ³வ அதி⁴ப்பேதோதி ஆஹ ‘‘பத³ந்தி ஏகோ கா³தா²பாதோ³’’தி. அனு பச்சா² வுத்தபத³த்தா து³தியபாதோ³ அனுபத³ங் நாம. அனு ஸதி³ஸங் ப்³யஞ்ஜனங் அனுப்³யஞ்ஜனந்தி அத்த²ங் த³ஸ்ஸேதி ‘‘அனுப்³யஞ்ஜன’’ந்திஆதி³னா. ப்³யஞ்ஜனஸத்³தோ³ பத³-பரியாயோ. யங்கிஞ்சி பத³ங் அனுப்³யஞ்ஜனங் நாம ந ஹோதி, புரிமபதே³ன பன ஸதி³ஸங் பச்சி²மபத³மேவ அனுப்³யஞ்ஜனங் நாம.
45. ‘‘Padaso’’ti ettha so-paccayo vicchatthavācakoti āha ‘‘padaṃ pada’’nti. Tatthāti tesu catubbidhesu. Padaṃ nāma idha atthajotakaṃ vā vibhatyantaṃ vā na hoti, atha kho lokiyehi lakkhito gāthāya catutthaṃso pādova adhippetoti āha ‘‘padanti eko gāthāpādo’’ti. Anu pacchā vuttapadattā dutiyapādo anupadaṃ nāma. Anu sadisaṃ byañjanaṃ anubyañjananti atthaṃ dasseti ‘‘anubyañjana’’ntiādinā. Byañjanasaddo pada-pariyāyo. Yaṃkiñci padaṃ anubyañjanaṃ nāma na hoti, purimapadena pana sadisaṃ pacchimapadameva anubyañjanaṃ nāma.
வாசெந்தோ ஹுத்வா நிட்டா²பேதீதி யோஜனா. ‘‘ஏகமேகங் பத³’’ந்தி பத³ங் ‘‘நிட்டா²பேதீ’’தி பதே³ காரிதகம்மங். ‘‘தே²ரேனா’’தி பத³ங் ‘‘வுத்தே’’தி பதே³ கத்தா, ‘‘ஏகதோ’’தி பதே³ ஸஹத்தோ². ஸாமணேரோ அபாபுணித்வா ப⁴ணதீதி ஸம்ப³ந்தோ⁴. மத்தமேவாதி எத்த² ஏவஸத்³தோ³ மத்தஸத்³த³ஸ்ஸ அவதா⁴ரணத்த²ங் த³ஸ்ஸேதி, தேன பகாரங் படிக்கி²பதி. ‘‘அனிச்ச’’ந்தி ச ‘‘அனிச்சா’’தி ச த்³வின்னங் பதா³னங் ஸதிபி லிங்க³விஸேஸத்தே அனுப்³யஞ்ஜனத்தா ஆபத்திமொக்கோ² நத்தீ²தி ஆஹ ‘‘அனுப்³யஞ்ஜனக³ணனாய பாசித்தியா’’தி.
Vācento hutvā niṭṭhāpetīti yojanā. ‘‘Ekamekaṃ pada’’nti padaṃ ‘‘niṭṭhāpetī’’ti pade kāritakammaṃ. ‘‘Therenā’’ti padaṃ ‘‘vutte’’ti pade kattā, ‘‘ekato’’ti pade sahattho. Sāmaṇero apāpuṇitvā bhaṇatīti sambandho. Mattamevāti ettha evasaddo mattasaddassa avadhāraṇatthaṃ dasseti, tena pakāraṃ paṭikkhipati. ‘‘Anicca’’nti ca ‘‘aniccā’’ti ca dvinnaṃ padānaṃ satipi liṅgavisesatte anubyañjanattā āpattimokkho natthīti āha ‘‘anubyañjanagaṇanāya pācittiyā’’ti.
ப்³ரஹ்மஜாலாதீ³னீதி எத்த² ஆதி³ஸத்³தே³ன ஸாமஞ்ஞப²லஸுத்தாதீ³னி தீ³க⁴ஸுத்தானி (தீ³॰ நி॰ 1.150 ஆத³யோ) ஸங்க³ஹிதானி. சஸத்³தே³ன ஓக⁴தரணஸுத்தாதீ³னி ஸங்யுத்தஸுத்தானி (ஸங்॰ நி॰ 1.1) ச சித்தபரியாதா³னஸுத்தாதீ³னி அங்கு³த்தரஸுத்தானி (அ॰ நி॰ 1.2 ஆத³யோ) ச ஸங்க³ஹிதானி. ஸோதி தே³வதாபா⁴ஸிதோ வேதி³தப்³போ³தி யோஜனா.
Brahmajālādīnīti ettha ādisaddena sāmaññaphalasuttādīni dīghasuttāni (dī. ni. 1.150 ādayo) saṅgahitāni. Casaddena oghataraṇasuttādīni saṃyuttasuttāni (saṃ. ni. 1.1) ca cittapariyādānasuttādīni aṅguttarasuttāni (a. ni. 1.2 ādayo) ca saṅgahitāni. Soti devatābhāsito veditabboti yojanā.
கிஞ்சாபி வத³தீதி ஸம்ப³ந்தோ⁴. எத்த² ச கிஞ்சாபிஸத்³தோ³ க³ரஹத்த²வாசகோ, பனஸத்³தோ³ அனுக்³க³ஹத்த²வாசகோ. மெண்ட³கமிலிந்த³பஞ்ஹேஸூதி மெண்ட³கபஞ்ஹே ச மிலிந்த³பஞ்ஹே ச. யந்தி ஸுத்தங் வுத்தந்தி ஸம்ப³ந்தோ⁴. ஆரம்மணகதா² பு³த்³தி⁴ககதா² த³ண்ட³ககதா² ஞாணவத்து²கதா²தி யோஜேதப்³ப³ங் பெய்யாலவஸேன வுத்தத்தா. இமாயோ பகரணானி நாமாதி வத³ந்தி. மஹாபச்சரியாதீ³ஸு வத்வா பரிக்³க³ஹிதோதி யோஜனா. யந்தி ஸுத்தங்.
Kiñcāpi vadatīti sambandho. Ettha ca kiñcāpisaddo garahatthavācako, panasaddo anuggahatthavācako. Meṇḍakamilindapañhesūti meṇḍakapañhe ca milindapañhe ca. Yanti suttaṃ vuttanti sambandho. Ārammaṇakathā buddhikakathā daṇḍakakathā ñāṇavatthukathāti yojetabbaṃ peyyālavasena vuttattā. Imāyo pakaraṇāni nāmāti vadanti. Mahāpaccariyādīsu vatvā pariggahitoti yojanā. Yanti suttaṃ.
48. தத்ராதி ‘‘ஏகதோ உத்³தி³ஸாபெந்தோ’’தி வசனே. உத்³தி³ஸாபெந்தீதி ஆசரியங் தே³ஸாபெந்தி ப³ஹுகத்தாரமபெக்கி²ய ப³ஹுவசனவஸேன வுத்தங். தேஹீதி உபஸம்பன்னானுபஸம்பன்னேஹி. த்³வேபீதி உபஸம்பன்னோ ச அனுபஸம்பன்னோ ச.
48.Tatrāti ‘‘ekato uddisāpento’’ti vacane. Uddisāpentīti ācariyaṃ desāpenti bahukattāramapekkhiya bahuvacanavasena vuttaṃ. Tehīti upasampannānupasampannehi. Dvepīti upasampanno ca anupasampanno ca.
உபசாரந்தி த்³வாத³ஸஹத்தூ²பசாரங். யேஸந்தி பி⁴க்கூ²னங். பலாயனகக³ந்த²ந்தி பரிவஜ்ஜெத்வா க³ச்ச²ந்தங் பகரணங். ஸாமணேரோ க³ண்ஹாதீதி யோஜனா.
Upacāranti dvādasahatthūpacāraṃ. Yesanti bhikkhūnaṃ. Palāyanakaganthanti parivajjetvā gacchantaṃ pakaraṇaṃ. Sāmaṇero gaṇhātīti yojanā.
ஓபாதேதீதி அவபாதேதி, க³ளிதாபேதீதி அத்தோ². ஸுத்தேபீதி வெய்யாகரணஸுத்தேபி. தந்தி யேபு⁴ய்யேன பகு³ணக³ந்த²ங். பரிஸங்கமானந்தி ஸாரஜ்ஜமானங். யங் பன வசனங் வுத்தந்தி ஸம்ப³ந்தோ⁴. கிரியஸமுட்டா²னத்தாதி இமஸ்ஸ ஸிக்கா²பத³ஸ்ஸ கிரியஸமுட்டா²னத்தாதி. சதுத்த²ங்.
Opātetīti avapāteti, gaḷitāpetīti attho. Suttepīti veyyākaraṇasuttepi. Tanti yebhuyyena paguṇaganthaṃ. Parisaṅkamānanti sārajjamānaṃ. Yaṃ pana vacanaṃ vuttanti sambandho. Kiriyasamuṭṭhānattāti imassa sikkhāpadassa kiriyasamuṭṭhānattāti. Catutthaṃ.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 1. முஸாவாத³வக்³கோ³ • 1. Musāvādavaggo
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 4. பத³ஸோத⁴ம்மஸிக்கா²பத³வண்ணனா • 4. Padasodhammasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 4. பத³ஸோத⁴ம்மஸிக்கா²பத³வண்ணனா • 4. Padasodhammasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 4. பத³ஸோத⁴ம்மஸிக்கா²பத³வண்ணனா • 4. Padasodhammasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 4. பத³ஸோத⁴ம்மஸிக்கா²பத³வண்ணனா • 4. Padasodhammasikkhāpadavaṇṇanā
