| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
৪. পদসোধম্মসিক্খাপদং
4. Padasodhammasikkhāpadaṃ
৪৪. চতুত্থে পটিমুখং আদরেন সুণন্তীতি পতিস্সা, ন পতিস্সা অপ্পতিস্সাতি দস্সেন্তো আহ ‘‘অপ্পতিস্সৰা’’তি।
44. Catutthe paṭimukhaṃ ādarena suṇantīti patissā, na patissā appatissāti dassento āha ‘‘appatissavā’’ti.
৪৫. ‘‘পদসো’’তি এত্থ সো-পচ্চযো ৰিচ্ছত্থৰাচকোতি আহ ‘‘পদং পদ’’ন্তি। তত্থাতি তেসু চতুব্বিধেসু। পদং নাম ইধ অত্থজোতকং ৰা ৰিভত্যন্তং ৰা ন হোতি, অথ খো লোকিযেহি লক্খিতো গাথায চতুত্থংসো পাদোৰ অধিপ্পেতোতি আহ ‘‘পদন্তি একো গাথাপাদো’’তি। অনু পচ্ছা ৰুত্তপদত্তা দুতিযপাদো অনুপদং নাম। অনু সদিসং ব্যঞ্জনং অনুব্যঞ্জনন্তি অত্থং দস্সেতি ‘‘অনুব্যঞ্জন’’ন্তিআদিনা। ব্যঞ্জনসদ্দো পদ-পরিযাযো। যংকিঞ্চি পদং অনুব্যঞ্জনং নাম ন হোতি, পুরিমপদেন পন সদিসং পচ্ছিমপদমেৰ অনুব্যঞ্জনং নাম।
45. ‘‘Padaso’’ti ettha so-paccayo vicchatthavācakoti āha ‘‘padaṃ pada’’nti. Tatthāti tesu catubbidhesu. Padaṃ nāma idha atthajotakaṃ vā vibhatyantaṃ vā na hoti, atha kho lokiyehi lakkhito gāthāya catutthaṃso pādova adhippetoti āha ‘‘padanti eko gāthāpādo’’ti. Anu pacchā vuttapadattā dutiyapādo anupadaṃ nāma. Anu sadisaṃ byañjanaṃ anubyañjananti atthaṃ dasseti ‘‘anubyañjana’’ntiādinā. Byañjanasaddo pada-pariyāyo. Yaṃkiñci padaṃ anubyañjanaṃ nāma na hoti, purimapadena pana sadisaṃ pacchimapadameva anubyañjanaṃ nāma.
ৰাচেন্তো হুত্ৰা নিট্ঠাপেতীতি যোজনা। ‘‘একমেকং পদ’’ন্তি পদং ‘‘নিট্ঠাপেতী’’তি পদে কারিতকম্মং। ‘‘থেরেনা’’তি পদং ‘‘ৰুত্তে’’তি পদে কত্তা, ‘‘একতো’’তি পদে সহত্থো। সামণেরো অপাপুণিত্ৰা ভণতীতি সম্বন্ধো। মত্তমেৰাতি এত্থ এৰসদ্দো মত্তসদ্দস্স অৰধারণত্থং দস্সেতি, তেন পকারং পটিক্খিপতি। ‘‘অনিচ্চ’’ন্তি চ ‘‘অনিচ্চা’’তি চ দ্ৰিন্নং পদানং সতিপি লিঙ্গৰিসেসত্তে অনুব্যঞ্জনত্তা আপত্তিমোক্খো নত্থীতি আহ ‘‘অনুব্যঞ্জনগণনায পাচিত্তিযা’’তি।
Vācento hutvā niṭṭhāpetīti yojanā. ‘‘Ekamekaṃ pada’’nti padaṃ ‘‘niṭṭhāpetī’’ti pade kāritakammaṃ. ‘‘Therenā’’ti padaṃ ‘‘vutte’’ti pade kattā, ‘‘ekato’’ti pade sahattho. Sāmaṇero apāpuṇitvā bhaṇatīti sambandho. Mattamevāti ettha evasaddo mattasaddassa avadhāraṇatthaṃ dasseti, tena pakāraṃ paṭikkhipati. ‘‘Anicca’’nti ca ‘‘aniccā’’ti ca dvinnaṃ padānaṃ satipi liṅgavisesatte anubyañjanattā āpattimokkho natthīti āha ‘‘anubyañjanagaṇanāya pācittiyā’’ti.
ব্রহ্মজালাদীনীতি এত্থ আদিসদ্দেন সামঞ্ঞফলসুত্তাদীনি দীঘসুত্তানি (দী॰ নি॰ ১.১৫০ আদযো) সঙ্গহিতানি। চসদ্দেন ওঘতরণসুত্তাদীনি সংযুত্তসুত্তানি (সং॰ নি॰ ১.১) চ চিত্তপরিযাদানসুত্তাদীনি অঙ্গুত্তরসুত্তানি (অ॰ নি॰ ১.২ আদযো) চ সঙ্গহিতানি। সোতি দেৰতাভাসিতো ৰেদিতব্বোতি যোজনা।
Brahmajālādīnīti ettha ādisaddena sāmaññaphalasuttādīni dīghasuttāni (dī. ni. 1.150 ādayo) saṅgahitāni. Casaddena oghataraṇasuttādīni saṃyuttasuttāni (saṃ. ni. 1.1) ca cittapariyādānasuttādīni aṅguttarasuttāni (a. ni. 1.2 ādayo) ca saṅgahitāni. Soti devatābhāsito veditabboti yojanā.
কিঞ্চাপি ৰদতীতি সম্বন্ধো। এত্থ চ কিঞ্চাপিসদ্দো গরহত্থৰাচকো, পনসদ্দো অনুগ্গহত্থৰাচকো। মেণ্ডকমিলিন্দপঞ্হেসূতি মেণ্ডকপঞ্হে চ মিলিন্দপঞ্হে চ। যন্তি সুত্তং ৰুত্তন্তি সম্বন্ধো। আরম্মণকথা বুদ্ধিককথা দণ্ডককথা ঞাণৰত্থুকথাতি যোজেতব্বং পেয্যালৰসেন ৰুত্তত্তা। ইমাযো পকরণানি নামাতি ৰদন্তি। মহাপচ্চরিযাদীসু ৰত্ৰা পরিগ্গহিতোতি যোজনা। যন্তি সুত্তং।
Kiñcāpi vadatīti sambandho. Ettha ca kiñcāpisaddo garahatthavācako, panasaddo anuggahatthavācako. Meṇḍakamilindapañhesūti meṇḍakapañhe ca milindapañhe ca. Yanti suttaṃ vuttanti sambandho. Ārammaṇakathā buddhikakathā daṇḍakakathā ñāṇavatthukathāti yojetabbaṃ peyyālavasena vuttattā. Imāyo pakaraṇāni nāmāti vadanti. Mahāpaccariyādīsu vatvā pariggahitoti yojanā. Yanti suttaṃ.
৪৮. তত্রাতি ‘‘একতো উদ্দিসাপেন্তো’’তি ৰচনে। উদ্দিসাপেন্তীতি আচরিযং দেসাপেন্তি বহুকত্তারমপেক্খিয বহুৰচনৰসেন ৰুত্তং। তেহীতি উপসম্পন্নানুপসম্পন্নেহি। দ্ৰেপীতি উপসম্পন্নো চ অনুপসম্পন্নো চ।
48.Tatrāti ‘‘ekato uddisāpento’’ti vacane. Uddisāpentīti ācariyaṃ desāpenti bahukattāramapekkhiya bahuvacanavasena vuttaṃ. Tehīti upasampannānupasampannehi. Dvepīti upasampanno ca anupasampanno ca.
উপচারন্তি দ্ৰাদসহত্থূপচারং। যেসন্তি ভিক্খূনং। পলাযনকগন্থন্তি পরিৰজ্জেত্ৰা গচ্ছন্তং পকরণং। সামণেরো গণ্হাতীতি যোজনা।
Upacāranti dvādasahatthūpacāraṃ. Yesanti bhikkhūnaṃ. Palāyanakaganthanti parivajjetvā gacchantaṃ pakaraṇaṃ. Sāmaṇero gaṇhātīti yojanā.
ওপাতেতীতি অৰপাতেতি, গল়িতাপেতীতি অত্থো। সুত্তেপীতি ৰেয্যাকরণসুত্তেপি। তন্তি যেভুয্যেন পগুণগন্থং। পরিসঙ্কমানন্তি সারজ্জমানং। যং পন ৰচনং ৰুত্তন্তি সম্বন্ধো। কিরিযসমুট্ঠানত্তাতি ইমস্স সিক্খাপদস্স কিরিযসমুট্ঠানত্তাতি। চতুত্থং।
Opātetīti avapāteti, gaḷitāpetīti attho. Suttepīti veyyākaraṇasuttepi. Tanti yebhuyyena paguṇaganthaṃ. Parisaṅkamānanti sārajjamānaṃ. Yaṃ pana vacanaṃ vuttanti sambandho. Kiriyasamuṭṭhānattāti imassa sikkhāpadassa kiriyasamuṭṭhānattāti. Catutthaṃ.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ১. মুসাৰাদৰগ্গো • 1. Musāvādavaggo
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰিভঙ্গ-অট্ঠকথা • Mahāvibhaṅga-aṭṭhakathā / ৪. পদসোধম্মসিক্খাপদৰণ্ণনা • 4. Padasodhammasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ৪. পদসোধম্মসিক্খাপদৰণ্ণনা • 4. Padasodhammasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ৪. পদসোধম্মসিক্খাপদৰণ্ণনা • 4. Padasodhammasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ৪. পদসোধম্মসিক্খাপদৰণ্ণনা • 4. Padasodhammasikkhāpadavaṇṇanā
