| Library / Tipiṭaka / திபிடக • Tipiṭaka / மஹாவிப⁴ங்க³-அட்ட²கதா² • Mahāvibhaṅga-aṭṭhakathā |
4. பத³ஸோத⁴ம்மஸிக்கா²பத³வண்ணனா
4. Padasodhammasikkhāpadavaṇṇanā
44. சதுத்த²ஸிக்கா²பதே³ – அப்பதிஸ்ஸாதி அப்பதிஸ்ஸவா. உபாஸகாதி வுத்தே வசனம்பி ந ஸோதுகாமா; அனாத³ராதி அத்தோ². அப்பதிஸ்ஸயா வா அனீசவுத்தினோதி அத்தோ². அஸபா⁴க³வுத்திகாதி விஸபா⁴க³ஜீவிகா, யதா² பி⁴க்கூ²ஸு வத்திதப்³ப³ங்; ஏவங் அப்பவத்தவுத்தினோதி அத்தோ².
44. Catutthasikkhāpade – appatissāti appatissavā. Upāsakāti vutte vacanampi na sotukāmā; anādarāti attho. Appatissayā vā anīcavuttinoti attho. Asabhāgavuttikāti visabhāgajīvikā, yathā bhikkhūsu vattitabbaṃ; evaṃ appavattavuttinoti attho.
45. பத³ஸோ த⁴ம்மங் வாசெய்யாதி ஏகதோ பத³ங் பத³ங் த⁴ம்மங் வாசெய்ய; கொட்டா²ஸங் கொட்டா²ஸங் வாசெய்யாதி அத்தோ². யஸ்மா பன தங் கொட்டா²ஸனாமகங் பத³ங் சதுப்³பி³த⁴ங் ஹோதி, தஸ்மா தங் த³ஸ்ஸேதுங் ‘‘பத³ங் அனுபத³ங் அன்வக்க²ரங் அனுப்³யஞ்ஜன’’ந்தி பத³பா⁴ஜனங் வுத்தங். தத்த² பத³ந்தி ஏகோ கா³தா²பாதோ³ அதி⁴ப்பேதோ. அனுபத³ந்தி து³தியபாதோ³. அன்வக்க²ரந்தி ஏகேகமக்க²ரங். அனுப்³யஞ்ஜனந்தி புரிமப்³யஞ்ஜனேன ஸதி³ஸங் பச்சா²ப்³யஞ்ஜனங். யங் கிஞ்சி வா ஏகமக்க²ரங் அன்வக்க²ரங், அக்க²ரஸமூஹோ அனுப்³யஞ்ஜனங், அக்க²ரானுப்³யஞ்ஜனஸமூஹோ பத³ங். பட²மபத³ங் பத³மேவ, து³தியங் அனுபத³ந்தி ஏவமெத்த² நானாகரணங் வேதி³தப்³ப³ங்.
45.Padaso dhammaṃ vāceyyāti ekato padaṃ padaṃ dhammaṃ vāceyya; koṭṭhāsaṃ koṭṭhāsaṃ vāceyyāti attho. Yasmā pana taṃ koṭṭhāsanāmakaṃ padaṃ catubbidhaṃ hoti, tasmā taṃ dassetuṃ ‘‘padaṃ anupadaṃ anvakkharaṃ anubyañjana’’nti padabhājanaṃ vuttaṃ. Tattha padanti eko gāthāpādo adhippeto. Anupadanti dutiyapādo. Anvakkharanti ekekamakkharaṃ. Anubyañjananti purimabyañjanena sadisaṃ pacchābyañjanaṃ. Yaṃ kiñci vā ekamakkharaṃ anvakkharaṃ, akkharasamūho anubyañjanaṃ, akkharānubyañjanasamūho padaṃ. Paṭhamapadaṃ padameva, dutiyaṃ anupadanti evamettha nānākaraṇaṃ veditabbaṃ.
இதா³னி பத³ங் நாம ஏகதோ பட்ட²பெத்வா ஏகதோ ஓஸாபெந்தீதி கா³தா²ப³ந்த⁴ங் த⁴ம்மங் வாசெந்தோ ‘‘மனோபுப்³ப³ங்க³மா த⁴ம்மா’’தி ஏகமேகங் பத³ங் ஸாமணேரேன ஸத்³தி⁴ங் ஏகதோ ஆரபி⁴த்வா ஏகதோயேவ நிட்டா²பேதி. ஏவங் வாசெந்தஸ்ஸ பத³க³ணனாய பாசித்தியா வேதி³தப்³பா³. அனுபத³ங் நாம பாடேக்கங் பட்ட²பெத்வா ஏகதோ ஓஸாபெந்தீதி தே²ரேன ‘‘மனோபுப்³ப³ங்க³மா த⁴ம்மா’’தி வுத்தே ஸாமணேரோ தங் பத³ங் அபாபுணித்வா ‘‘மனோஸெட்டா² மனோமயா’’தி து³தியபத³ங் ஏகதோ ப⁴ணதி, இமே பாடேக்கங் பட்ட²பெத்வா ஏகதோ ஓஸாபெந்தி நாம. ஏவங் வாசெந்தஸ்ஸாபி அனுபத³க³ணனாய பாசித்தியா. அன்வக்க²ரங் நாம ரூபங் அனிச்சந்தி வுச்சமானோ ‘‘ரூ’’தி ஓபாதேதீதி ‘‘ரூபங் அனிச்சந்தி ப⁴ண ஸாமணேரா’’தி வுச்சமானோ ரூகாரமத்தமேவ ஏகதோ வத்வா திட்ட²தி. ஏவங் வாசெந்தஸ்ஸாபி அன்வக்க²ரக³ணனாய பாசித்தியா. கா³தா²ப³ந்தே⁴பி ச ஏஸ நயோ லப்³ப⁴தியேவ. அனுப்³யஞ்ஜனங் நாம ரூபங் அனிச்சந்தி வுச்சமானோ வேத³னா அனிச்சாதி ஸத்³த³ங் நிச்சா²ரேதீதி ‘‘ரூபங், பி⁴க்க²வே, அனிச்சங், வேத³னா அனிச்சா’’தி இமங் ஸுத்தங் வாசயமானோ தே²ரேன ‘‘ரூபங் அனிச்ச’’ந்தி வுச்சமானோ ஸாமணேரோ ஸீக⁴பஞ்ஞதாய ‘‘வேத³னா அனிச்சா’’தி இமங் அனிச்சபத³ங் தே²ரஸ்ஸ ‘‘ரூபங் அனிச்ச’’ந்தி ஏதேன அனிச்சபதே³ன ஸத்³தி⁴ங் ஏகதோ ப⁴ணந்தோ வாசங் நிச்சா²ரேதி. ஏவங் வாசெந்தஸ்ஸாபி அனுப்³யஞ்ஜனக³ணனாய பாசித்தியா. அயங் பனெத்த² ஸங்கே²போ – இமேஸு பதா³தீ³ஸு யங் யங் ஏகதோ ப⁴ணதி தேன தேன ஆபத்திங் ஆபஜ்ஜதீதி.
Idāni padaṃ nāma ekato paṭṭhapetvā ekato osāpentīti gāthābandhaṃ dhammaṃ vācento ‘‘manopubbaṅgamā dhammā’’ti ekamekaṃ padaṃ sāmaṇerena saddhiṃ ekato ārabhitvā ekatoyeva niṭṭhāpeti. Evaṃ vācentassa padagaṇanāya pācittiyā veditabbā. Anupadaṃ nāma pāṭekkaṃ paṭṭhapetvā ekato osāpentīti therena ‘‘manopubbaṅgamā dhammā’’ti vutte sāmaṇero taṃ padaṃ apāpuṇitvā ‘‘manoseṭṭhā manomayā’’ti dutiyapadaṃ ekato bhaṇati, ime pāṭekkaṃ paṭṭhapetvā ekato osāpenti nāma. Evaṃ vācentassāpi anupadagaṇanāya pācittiyā. Anvakkharaṃ nāma rūpaṃ aniccantivuccamāno ‘‘rū’’ti opātetīti ‘‘rūpaṃ aniccanti bhaṇa sāmaṇerā’’ti vuccamāno rūkāramattameva ekato vatvā tiṭṭhati. Evaṃ vācentassāpi anvakkharagaṇanāya pācittiyā. Gāthābandhepi ca esa nayo labbhatiyeva. Anubyañjanaṃ nāma rūpaṃ aniccanti vuccamāno vedanā aniccāti saddaṃ nicchāretīti ‘‘rūpaṃ, bhikkhave, aniccaṃ, vedanā aniccā’’ti imaṃ suttaṃ vācayamāno therena ‘‘rūpaṃ anicca’’nti vuccamāno sāmaṇero sīghapaññatāya ‘‘vedanā aniccā’’ti imaṃ aniccapadaṃ therassa ‘‘rūpaṃ anicca’’nti etena aniccapadena saddhiṃ ekato bhaṇanto vācaṃ nicchāreti. Evaṃ vācentassāpi anubyañjanagaṇanāya pācittiyā. Ayaṃ panettha saṅkhepo – imesu padādīsu yaṃ yaṃ ekato bhaṇati tena tena āpattiṃ āpajjatīti.
பு³த்³த⁴பா⁴ஸிதோதி ஸகலங் வினயபிடகங் அபி⁴த⁴ம்மபிடகங் த⁴ம்மபத³ங் சரியாபிடகங் உதா³னங் இதிவுத்தகங் ஜாதகங் ஸுத்தனிபாதோ விமானவத்து² பேதவத்து² ப்³ரஹ்மஜாலாதீ³னி ச ஸுத்தானி. ஸாவகபா⁴ஸிதோதி சதுபரிஸபரியாபன்னேஹி ஸாவகேஹி பா⁴ஸிதோ அனங்க³ணஸம்மாதி³ட்டி²அனுமானஸுத்தசுளவேத³ல்லமஹாவேத³ல்லாதி³கோ. இஸிபா⁴ஸிதோதி பா³ஹிரபரிப்³பா³ஜகேஹி பா⁴ஸிதோ ஸகலோ பரிப்³பா³ஜகவக்³கோ³, பா³வரியஸ்ஸ அந்தேவாஸிகானங் ஸோளஸன்னங் ப்³ராஹ்மணானங் புச்சா²தி ஏவமாதி³. தே³வதாபா⁴ஸிதோதி தே³வதாஹி பா⁴ஸிதோ; ஸோ தே³வதாஸங்யுத்ததே³வபுத்தஸங்யுத்தமாரஸங்யுத்தப்³ரஹ்மஸங்யுத்தஸக்கஸங்யுத்தாதி³வஸேன வேதி³தப்³போ³.
Buddhabhāsitoti sakalaṃ vinayapiṭakaṃ abhidhammapiṭakaṃ dhammapadaṃ cariyāpiṭakaṃ udānaṃ itivuttakaṃ jātakaṃ suttanipāto vimānavatthu petavatthu brahmajālādīni ca suttāni. Sāvakabhāsitoti catuparisapariyāpannehi sāvakehi bhāsito anaṅgaṇasammādiṭṭhianumānasuttacuḷavedallamahāvedallādiko. Isibhāsitoti bāhiraparibbājakehi bhāsito sakalo paribbājakavaggo, bāvariyassa antevāsikānaṃ soḷasannaṃ brāhmaṇānaṃ pucchāti evamādi. Devatābhāsitoti devatāhi bhāsito; so devatāsaṃyuttadevaputtasaṃyuttamārasaṃyuttabrahmasaṃyuttasakkasaṃyuttādivasena veditabbo.
அத்தூ²பஸஞ்ஹிதோதி அட்ட²கதா²னிஸ்ஸிதோ. த⁴ம்மூபஸஞ்ஹிதோதி பாளினிஸ்ஸிதோ; உப⁴யேனாபி விவட்டூபனிஸ்ஸிதமேவ வத³தி. கிஞ்சாபி விவட்டூபனிஸ்ஸிதங் வத³தி, திஸ்ஸோ ஸங்கீ³தியோ ஆருள்ஹத⁴ம்மங்யேவ பன பத³ஸோ வாசெந்தஸ்ஸ ஆபத்தி . விவட்டூபனிஸ்ஸிதேபி நானாபா⁴ஸாவஸேன கா³தா²ஸிலோகப³ந்தா⁴தீ³ஹி அபி⁴ஸங்க²தே அனாபத்தி. திஸ்ஸோ ஸங்கீ³தியோ அனாருள்ஹேபி குலும்ப³ஸுத்தங் ராஜோவாத³ஸுத்தங் திக்கி²ந்த்³ரியங் சதுபரிவட்டங் நந்தோ³பனந்த³ந்தி ஈதி³ஸே ஆபத்தியேவ. அபலாலத³மனம்பி வுத்தங், மஹாபச்சரியம்பன படிஸித்³த⁴ங். மெண்ட³கமிலிந்த³பஞ்ஹேஸு தே²ரஸ்ஸ ஸகபடிபா⁴னே அனாபத்தி, யங் ரஞ்ஞோ ஸஞ்ஞாபனத்த²ங் ஆஹரித்வா வுத்தங், தத்த² ஆபத்தி. வண்ணபிடகஅங்கு³லிமாலபிடகரட்ட²பாலக³அஜதஆளவகக³ஜ்ஜிதகு³ள்ஹமக்³க³கு³ள்ஹவெஸ்ஸந்தரகு³ள்ஹவினயவேத³ல்லபிடகானி பன அபு³த்³த⁴வசனானியேவாதி வுத்தங். ஸீலூபதே³ஸோ நாம த⁴ம்மஸேனாபதினா வுத்தோதி வத³ந்தி, தஸ்மிங் ஆபத்தியேவ. அஞ்ஞானிபி மக்³க³கதா²ஆரம்மணகதா²பு³த்³தி⁴கத³ண்ட³க ஞாணவத்து²அஸுப⁴கதா²தீ³னி அத்தி², தேஸு ஸத்ததிங்ஸ போ³தி⁴பக்கி²யத⁴ம்மா விப⁴த்தா, து⁴தங்க³பஞ்ஹே படிபதா³ விப⁴த்தா; தஸ்மா தேஸு ஆபத்தீதி வுத்தங். மஹாபச்சரியாதீ³ஸு பன ஸங்கீ³திங் அனாருள்ஹேஸு ராஜோவாத³திக்கி²ந்த்³ரியசதுபரிவட்டனந்தோ³பனந்த³குலும்ப³ஸுத்தேஸுயேவ ஆபத்தீதி வத்வா அவஸேஸேஸு யங் பு³த்³த⁴வசனதோ ஆஹரித்வா வுத்தங், ததே³வ ஆபத்திவத்து² ஹோதி, ந இதரந்தி அயமத்தோ² பரிக்³க³ஹிதோ.
Atthūpasañhitoti aṭṭhakathānissito. Dhammūpasañhitoti pāḷinissito; ubhayenāpi vivaṭṭūpanissitameva vadati. Kiñcāpi vivaṭṭūpanissitaṃ vadati, tisso saṅgītiyo āruḷhadhammaṃyeva pana padaso vācentassa āpatti . Vivaṭṭūpanissitepi nānābhāsāvasena gāthāsilokabandhādīhi abhisaṅkhate anāpatti. Tisso saṅgītiyo anāruḷhepi kulumbasuttaṃ rājovādasuttaṃ tikkhindriyaṃ catuparivaṭṭaṃ nandopanandanti īdise āpattiyeva. Apalāladamanampi vuttaṃ, mahāpaccariyampana paṭisiddhaṃ. Meṇḍakamilindapañhesu therassa sakapaṭibhāne anāpatti, yaṃ rañño saññāpanatthaṃ āharitvā vuttaṃ, tattha āpatti. Vaṇṇapiṭakaaṅgulimālapiṭakaraṭṭhapālagaajataāḷavakagajjitaguḷhamaggaguḷhavessantaraguḷhavinayavedallapiṭakāni pana abuddhavacanāniyevāti vuttaṃ. Sīlūpadeso nāma dhammasenāpatinā vuttoti vadanti, tasmiṃ āpattiyeva. Aññānipi maggakathāārammaṇakathābuddhikadaṇḍaka ñāṇavatthuasubhakathādīni atthi, tesu sattatiṃsa bodhipakkhiyadhammā vibhattā, dhutaṅgapañhe paṭipadā vibhattā; tasmā tesu āpattīti vuttaṃ. Mahāpaccariyādīsu pana saṅgītiṃ anāruḷhesu rājovādatikkhindriyacatuparivaṭṭanandopanandakulumbasuttesuyeva āpattīti vatvā avasesesu yaṃ buddhavacanato āharitvā vuttaṃ, tadeva āpattivatthu hoti, na itaranti ayamattho pariggahito.
48. ஏகதோ உத்³தி³ஸாபெந்தோதி அனுபஸம்பன்னேன ஸத்³தி⁴ங் ஏகதோ உத்³தே³ஸங் க³ண்ஹந்தோபி ஏகதோ வத³தி அனாபத்தீதி அத்தோ².
48.Ekato uddisāpentoti anupasampannena saddhiṃ ekato uddesaṃ gaṇhantopi ekato vadati anāpattīti attho.
தத்ராயங் வினிச்ச²யோ – உபஸம்பன்னோ ச அனுபஸம்பன்னோ ச நிஸீதி³த்வா உத்³தி³ஸாபெந்தி. ஆசரியோ நிஸின்னானங் ப⁴ணாமீதி தேஹி ஸத்³தி⁴ங் ஏகதோ வத³தி, ஆசரியஸ்ஸ ஆபத்தி. அனுபஸம்பன்னேன ஸத்³தி⁴ங் க³ண்ஹந்தஸ்ஸ அனாபத்தி. த்³வேபி டி²தா க³ண்ஹந்தி, ஏஸேவ நயோ. த³ஹரபி⁴க்கு² நிஸின்னோ, ஸாமணேரோ டி²தோ, நிஸின்னஸ்ஸ ப⁴ணாமீதி ப⁴ணதோ அனாபத்தி. ஸசே த³ஹரோ திட்ட²தி, இதரோ நிஸீத³தி, டி²தஸ்ஸ ப⁴ணாமீதி ப⁴ணதோபி அனாபத்தி. ஸசே ப³ஹூனங் பி⁴க்கூ²னங் அந்தரே ஏகோ ஸாமணேரோ நிஸின்னோ ஹோதி, தஸ்மிங் நிஸின்னே பத³ஸோ த⁴ம்மங் வாசெந்தஸ்ஸ ஆசரியஸ்ஸ அசித்தகாபத்தி. ஸசே ஸாமணேரோ உபசாரங் முஞ்சித்வா டி²தோ வா நிஸின்னோ வா ஹோதி, யேஸங் வாசேதி, தேஸு அபரியாபன்னத்தா ஏகேன தி³ஸாபா⁴கே³ன பலாயனகக³ந்த²ங் நாம க³ண்ஹாதீதி ஸங்க்²யங் க³ச்ச²தி, தஸ்மா அனாபத்தி. ஏகதோ ஸஜ்ஜா²யங் கரொந்தோபி அனுபஸம்பன்னேன ஸத்³தி⁴ங் உபஸம்பன்னோ ஏகதோ ஸஜ்ஜா²யங் கரொந்தோ தேன ஸத்³தி⁴ங்யேவ ப⁴ணதி, அனாபத்தி. அனுபஸம்பன்னஸ்ஸ ஸந்திகே உத்³தே³ஸங் க³ண்ஹந்தஸ்ஸபி தேன ஸத்³தி⁴ங் ஏகதோ ப⁴ணந்தஸ்ஸ அனாபத்தி. அயம்பி ஹி ஏகதோ ஸஜ்ஜா²யங் கரோதிச்சேவ ஸங்க்²யங் க³ச்ச²தி.
Tatrāyaṃ vinicchayo – upasampanno ca anupasampanno ca nisīditvā uddisāpenti. Ācariyo nisinnānaṃ bhaṇāmīti tehi saddhiṃ ekato vadati, ācariyassa āpatti. Anupasampannena saddhiṃ gaṇhantassa anāpatti. Dvepi ṭhitā gaṇhanti, eseva nayo. Daharabhikkhu nisinno, sāmaṇero ṭhito, nisinnassa bhaṇāmīti bhaṇato anāpatti. Sace daharo tiṭṭhati, itaro nisīdati, ṭhitassa bhaṇāmīti bhaṇatopi anāpatti. Sace bahūnaṃ bhikkhūnaṃ antare eko sāmaṇero nisinno hoti, tasmiṃ nisinne padaso dhammaṃ vācentassa ācariyassa acittakāpatti. Sace sāmaṇero upacāraṃ muñcitvā ṭhito vā nisinno vā hoti, yesaṃ vāceti, tesu apariyāpannattā ekena disābhāgena palāyanakaganthaṃ nāma gaṇhātīti saṅkhyaṃ gacchati, tasmā anāpatti. Ekato sajjhāyaṃ karontopi anupasampannena saddhiṃ upasampanno ekato sajjhāyaṃ karonto tena saddhiṃyeva bhaṇati, anāpatti. Anupasampannassa santike uddesaṃ gaṇhantassapi tena saddhiṃ ekato bhaṇantassa anāpatti. Ayampi hi ekato sajjhāyaṃ karoticceva saṅkhyaṃ gacchati.
யேபு⁴ய்யேன பகு³ணங் க³ந்த²ங் ப⁴ணந்தங் ஓபாதேதீதி ஸசே ஏககா³தா²ய ஏகோ பாதோ³ ந ஆக³ச்ச²தி, ஸேஸங் ஆக³ச்ச²தி, அயங் யேபு⁴ய்யேன பகு³ணக³ந்தோ² நாம. ஏதேன நயேன ஸுத்தேபி வேதி³தப்³போ³. தங் ஓபாதெந்தஸ்ஸ ஏவங் ப⁴ணாஹீதி ஏகதோபி ப⁴ணந்தஸ்ஸ அனாபத்தி. ஓஸாரெந்தங் ஓபாதேதீதி ஸுத்தங் உச்சாரெந்தங் பரிஸமஜ்ஜே² பரிஸங்கமானங் ஏவங் வதே³ஹீதி தேன ஸத்³தி⁴ங் ஏகதோபி வத³ந்தஸ்ஸ அனாபத்தி. யங் பன மஹாபச்சரியாதீ³ஸு ‘‘மயா ஸத்³தி⁴ங் மா வதா³’’தி வுத்தோ யதி³ வத³தி, ‘‘அனாபத்தீ’’தி வுத்தங், தங் மஹாஅட்ட²கதா²யங் நத்தி², நத்தி²பா⁴வோயேவ சஸ்ஸ யுத்தோ. கஸ்மா? கிரியஸமுட்டா²னத்தா. இதரதா² ஹி கிரியாகிரியங் ப⁴வெய்ய. ஸேஸங் உத்தானத்த²மேவ.
Yebhuyyena paguṇaṃ ganthaṃ bhaṇantaṃ opātetīti sace ekagāthāya eko pādo na āgacchati, sesaṃ āgacchati, ayaṃ yebhuyyena paguṇagantho nāma. Etena nayena suttepi veditabbo. Taṃ opātentassa evaṃ bhaṇāhīti ekatopi bhaṇantassa anāpatti. Osārentaṃ opātetīti suttaṃ uccārentaṃ parisamajjhe parisaṅkamānaṃ evaṃ vadehīti tena saddhiṃ ekatopi vadantassa anāpatti. Yaṃ pana mahāpaccariyādīsu ‘‘mayā saddhiṃ mā vadā’’ti vutto yadi vadati, ‘‘anāpattī’’ti vuttaṃ, taṃ mahāaṭṭhakathāyaṃ natthi, natthibhāvoyeva cassa yutto. Kasmā? Kiriyasamuṭṭhānattā. Itarathā hi kiriyākiriyaṃ bhaveyya. Sesaṃ uttānatthameva.
பத³ஸோத⁴ம்மஸமுட்டா²னங் – வாசதோ ச வாசாசித்ததோ ச ஸமுட்டா²தி, கிரியங், நோஸஞ்ஞாவிமொக்க²ங், அசித்தகங், பண்ணத்திவஜ்ஜங், வசீகம்மங், திசித்தங், திவேத³னந்தி.
Padasodhammasamuṭṭhānaṃ – vācato ca vācācittato ca samuṭṭhāti, kiriyaṃ, nosaññāvimokkhaṃ, acittakaṃ, paṇṇattivajjaṃ, vacīkammaṃ, ticittaṃ, tivedananti.
பத³ஸோத⁴ம்மஸிக்கா²பத³ங் சதுத்த²ங்.
Padasodhammasikkhāpadaṃ catutthaṃ.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 1. முஸாவாத³வக்³கோ³ • 1. Musāvādavaggo
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 4. பத³ஸோத⁴ம்மஸிக்கா²பத³வண்ணனா • 4. Padasodhammasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 4. பத³ஸோத⁴ம்மஸிக்கா²பத³வண்ணனா • 4. Padasodhammasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 4. பத³ஸோத⁴ம்மஸிக்கா²பத³வண்ணனா • 4. Padasodhammasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 4. பத³ஸோத⁴ம்மஸிக்கா²பத³ங் • 4. Padasodhammasikkhāpadaṃ
