| Library / Tipiṭaka / திபிடக • Tipiṭaka / கங்கா²விதரணீ-அபி⁴னவ-டீகா • Kaṅkhāvitaraṇī-abhinava-ṭīkā |
4. பத³ஸோத⁴ம்மஸிக்கா²பத³வண்ணனா
4. Padasodhammasikkhāpadavaṇṇanā
பத³ஸோ த⁴ம்மங் வாசெய்யாதி ஏகதோ பத³ங் பத³ங் த⁴ம்மங் வாசெய்ய, கொட்டா²ஸங் கொட்டா²ஸங் வாசெய்யாதி அத்தோ². யஸ்மா ந கேவலங் திஸ்ஸோ ஸங்கீ³தியோ ஆருள்ஹத⁴ம்மங்யேவ பத³ஸோ வாசெந்தஸ்ஸ ஆபத்தி, தஸ்மா ‘‘ஸங்கீ³தித்தயங் அனாருள்ஹம்பீ’’திஆதி³ வுத்தங். ஆதி³-ஸத்³தே³ன (பாசி॰ அட்ட²॰ 45) ஸீலூபதே³ஸ து⁴தங்க³பஞ்ஹஆரம்மணகதா² பு³த்³தி⁴கத³ண்ட³கஞ்ஞாணவத்து²அஸுப⁴கதா²தீ³னங் க³ஹணங். மெண்ட³கமிலிந்த³பஞ்ஹேஸு தே²ரஸ்ஸ ஸகப்படிபா⁴னே அனாபத்தி. யங் ரஞ்ஞோ ஸஞ்ஞாபனத்த²ங் ஆஹரித்வா வுத்தங், தத்த² ஆபத்தி. வண்ணபிடகஅங்கு³லிமாலபிடகரட்ட²பாலக³ஜ்ஜிதஆளவகக³ஜ்ஜிதகூ³ள்ஹமக்³க³கூ³ள்ஹவெஸ்ஸந்தரகூ³ள்ஹவினயவேத³ல்லபிடகாதீ³னி பன அபு³த்³த⁴வசனானியேவ.
Padaso dhammaṃ vāceyyāti ekato padaṃ padaṃ dhammaṃ vāceyya, koṭṭhāsaṃ koṭṭhāsaṃ vāceyyāti attho. Yasmā na kevalaṃ tisso saṅgītiyo āruḷhadhammaṃyeva padaso vācentassa āpatti, tasmā ‘‘saṅgītittayaṃ anāruḷhampī’’tiādi vuttaṃ. Ādi-saddena (pāci. aṭṭha. 45) sīlūpadesa dhutaṅgapañhaārammaṇakathā buddhikadaṇḍakaññāṇavatthuasubhakathādīnaṃ gahaṇaṃ. Meṇḍakamilindapañhesu therassa sakappaṭibhāne anāpatti. Yaṃ rañño saññāpanatthaṃ āharitvā vuttaṃ, tattha āpatti. Vaṇṇapiṭakaaṅgulimālapiṭakaraṭṭhapālagajjitaāḷavakagajjitagūḷhamaggagūḷhavessantaragūḷhavinayavedallapiṭakādīni pana abuddhavacanāniyeva.
யஸ்மா பன தங் பத³ங் சதுப்³பி³த⁴ங் ஹோதி, தஸ்மா தங் த³ஸ்ஸேதுங் ‘‘பதா³னுபத³அன்வக்க²ரானுப்³யஞ்ஜனேஸூ’’தி வுத்தங். தத்த² பத³ந்தி ஏகோ கா³தா²பாதோ³ அதி⁴ப்பேதோ. அனுபத³ந்தி து³தியபாதோ³. அன்வக்க²ரந்தி ஏகேகங் அக்க²ரங். அனுப்³யஞ்ஜனந்தி புரிமப்³யஞ்ஜனேன ஸதி³ஸங் பச்சா²ப்³யஞ்ஜனங். யங் கிஞ்சி வா ஏகங் அக்க²ரங் அன்வக்க²ரங். அக்க²ரஸமூஹோ அனுப்³யஞ்ஜனங். அக்க²ரானுப்³யஞ்ஜனஸமூஹோ பத³ங். பட²மங் பத³ங் பத³மேவ, து³தியங் அனுபத³ந்தி ஏவமெத்த² நானாகரணங் வேதி³தப்³ப³ங். ஏதேஸு பதா³தீ³ஸு யங் கஞ்சி கொட்டா²ஸங் பி⁴க்கு²ஞ்ச பி⁴க்கு²னிஞ்ச ட²பெத்வா அவஸேஸபுக்³க³லேஹி ஸத்³தி⁴ங் ஏகதோ ப⁴ணந்தஸ்ஸ பதா³தி³க³ணனாய பாசித்தியந்தி ஸம்ப³ந்தோ⁴.
Yasmā pana taṃ padaṃ catubbidhaṃ hoti, tasmā taṃ dassetuṃ ‘‘padānupadaanvakkharānubyañjanesū’’ti vuttaṃ. Tattha padanti eko gāthāpādo adhippeto. Anupadanti dutiyapādo. Anvakkharanti ekekaṃ akkharaṃ. Anubyañjananti purimabyañjanena sadisaṃ pacchābyañjanaṃ. Yaṃ kiñci vā ekaṃ akkharaṃ anvakkharaṃ. Akkharasamūho anubyañjanaṃ. Akkharānubyañjanasamūho padaṃ. Paṭhamaṃ padaṃ padameva, dutiyaṃ anupadanti evamettha nānākaraṇaṃ veditabbaṃ. Etesu padādīsu yaṃ kañci koṭṭhāsaṃ bhikkhuñca bhikkhuniñca ṭhapetvā avasesapuggalehi saddhiṃ ekato bhaṇantassa padādigaṇanāya pācittiyanti sambandho.
எத்த² கா³தா²ப³ந்தே⁴ஸு (பாசி॰ அட்ட²॰ 45) தாவ ‘‘மனோபுப்³ப³ங்க³மா த⁴ம்மா’’தி (த⁴॰ ப॰ 1, 2) ஏகமேகங் பத³ங் ஸாமணேரேன ஸத்³தி⁴ங் ஏகதோ ஆரபி⁴த்வா ஏகதோயேவ நிட்டா²பெந்தஸ்ஸ பத³க³ணனாய பாசித்தியங். தே²ரேன ‘‘மனோபுப்³ப³ங்க³மா த⁴ம்மா’’தி வுத்தே தங் பத³ங் அபாபுணித்வா ‘‘மனோஸெட்டா² மனோமயா’’தி வசனகாலே பத்தேன ஸாமணேரேன ஏகதோ ப⁴ணந்தஸ்ஸ அனுபத³க³ணனாய. ‘‘ரூபங் அனிச்ச’’ந்திஆதி³ (ம॰ நி॰ 1.353, 356) வசனகாலே தேன ஸத்³தி⁴ங் ‘‘ரூ’’ காரமத்தமேவ வாசெந்தஸ்ஸ அன்வக்க²ரக³ணனாய. ஏஸ நயோ கா³தா²ப³ந்தே⁴பி. ‘‘ரூபங், பி⁴க்க²வே, அனிச்சங், வேத³னா அனிச்சா’’தி (ம॰ நி॰ 1.353, 356) இமங் ஸுத்தங் வாசயமானோ தே²ரேன ‘‘ரூபங் அனிச்ச’’ந்தி வுச்சமானே ஸாமணேரோ ஸீக⁴பஞ்ஞதாய ‘‘வேத³னா அனிச்சா’’தி இமங் அனிச்சபத³ங் தே²ரஸ்ஸ ‘‘ரூபங் அனிச்ச’’ந்தி ஏதேன அனிச்சபதே³ன ஸத்³தி⁴ங் ஏகதோ ப⁴ணந்தோ வாசங் நிச்சா²ரேதி, ஏவங் வாசெந்தஸ்ஸ அனுப்³யஞ்ஜனக³ணனாய பாசித்தியந்தி வேதி³தப்³ப³ங்.
Ettha gāthābandhesu (pāci. aṭṭha. 45) tāva ‘‘manopubbaṅgamā dhammā’’ti (dha. pa. 1, 2) ekamekaṃ padaṃ sāmaṇerena saddhiṃ ekato ārabhitvā ekatoyeva niṭṭhāpentassa padagaṇanāya pācittiyaṃ. Therena ‘‘manopubbaṅgamā dhammā’’ti vutte taṃ padaṃ apāpuṇitvā ‘‘manoseṭṭhā manomayā’’ti vacanakāle pattena sāmaṇerena ekato bhaṇantassa anupadagaṇanāya. ‘‘Rūpaṃ anicca’’ntiādi (ma. ni. 1.353, 356) vacanakāle tena saddhiṃ ‘‘rū’’ kāramattameva vācentassa anvakkharagaṇanāya. Esa nayo gāthābandhepi. ‘‘Rūpaṃ, bhikkhave, aniccaṃ, vedanā aniccā’’ti (ma. ni. 1.353, 356) imaṃ suttaṃ vācayamāno therena ‘‘rūpaṃ anicca’’nti vuccamāne sāmaṇero sīghapaññatāya ‘‘vedanā aniccā’’ti imaṃ aniccapadaṃ therassa ‘‘rūpaṃ anicca’’nti etena aniccapadena saddhiṃ ekato bhaṇanto vācaṃ nicchāreti, evaṃ vācentassa anubyañjanagaṇanāya pācittiyanti veditabbaṃ.
திகபாசித்தியந்தி அனுபஸம்பன்னே அனுபஸம்பன்னஸஞ்ஞிவேமதிகஉபஸம்பன்னஸஞ்ஞீனங் வஸேன தீணி பாசித்தியானி. அனுபஸம்பன்னேன ஸத்³தி⁴ங் ஏகதோ உத்³தே³ஸக்³க³ஹணே ஏகதோ ப⁴ணந்தஸ்ஸ அனாபத்தீதி ஸம்ப³ந்தோ⁴. ஏஸ நயோ ‘‘ஸஜ்ஜா²யகரணே, தஸ்ஸ ஸந்திகே உத்³தே³ஸக்³க³ஹணே’’தி எத்தா²பி. தத்ராயங் வினிச்ச²யோ – உபஸம்பன்னோ ச அனுபஸம்பன்னோ ச நிஸீதி³த்வா உத்³தி³ஸாபெந்தி. ஆசரியோ ‘‘நிஸின்னானங் ப⁴ணாமீ’’தி தேஹி ஸத்³தி⁴ங் ஏகதோ வத³தி, ஆசரியஸ்ஸேவ ஆபத்தி. அனுபஸம்பன்னேன ஸத்³தி⁴ங் க³ண்ஹந்தஸ்ஸ அனாபத்தி. த்³வேபி டி²தா க³ண்ஹந்தி, ஏஸேவ நயோ. த³ஹரபி⁴க்கு² நிஸின்னோ, ஸாமணேரோ டி²தோ, ‘‘நிஸின்னஸ்ஸ ப⁴ணாமீ’’தி ப⁴ணதோ அனாபத்தி. ஸசே த³ஹரோ திட்ட²தி, இதரோ நிஸீத³தி, ‘‘டி²தஸ்ஸ ப⁴ணாமீ’’தி ப⁴ணதோபி அனாபத்தி. ஸசே ப³ஹூனங் பி⁴க்கூ²னங் அந்தரே ஏகோ ஸாமணேரோ நிஸின்னோ ஹோதி, தஸ்மிங் நிஸின்னே பத³ஸோ த⁴ம்மங் வாசெந்தஸ்ஸ அசித்தகா ஆபத்தி. ஸசே ஸாமணேரோ உபசாரங் முஞ்சித்வா டி²தோ வா நிஸின்னோ வா ஹோதி, யேஸங் வாசேதி, தேஸு அபரியாபன்னத்தா ஏகேன தி³ஸாபா⁴கே³ன பலாயனகக³ந்த²ங் நாம க³ண்ஹாதீதி ஸங்க²ங் க³ச்ச²தி, தஸ்மா அனாபத்தி.
Tikapācittiyanti anupasampanne anupasampannasaññivematikaupasampannasaññīnaṃ vasena tīṇi pācittiyāni. Anupasampannena saddhiṃ ekato uddesaggahaṇe ekato bhaṇantassa anāpattīti sambandho. Esa nayo ‘‘sajjhāyakaraṇe, tassa santike uddesaggahaṇe’’ti etthāpi. Tatrāyaṃ vinicchayo – upasampanno ca anupasampanno ca nisīditvā uddisāpenti. Ācariyo ‘‘nisinnānaṃ bhaṇāmī’’ti tehi saddhiṃ ekato vadati, ācariyasseva āpatti. Anupasampannena saddhiṃ gaṇhantassa anāpatti. Dvepi ṭhitā gaṇhanti, eseva nayo. Daharabhikkhu nisinno, sāmaṇero ṭhito, ‘‘nisinnassa bhaṇāmī’’ti bhaṇato anāpatti. Sace daharo tiṭṭhati, itaro nisīdati, ‘‘ṭhitassa bhaṇāmī’’ti bhaṇatopi anāpatti. Sace bahūnaṃ bhikkhūnaṃ antare eko sāmaṇero nisinno hoti, tasmiṃ nisinne padaso dhammaṃ vācentassa acittakā āpatti. Sace sāmaṇero upacāraṃ muñcitvā ṭhito vā nisinno vā hoti, yesaṃ vāceti, tesu apariyāpannattā ekena disābhāgena palāyanakaganthaṃ nāma gaṇhātīti saṅkhaṃ gacchati, tasmā anāpatti.
ஸஜ்ஜா²யகரணேதி அனுபஸம்பன்னேன ஸத்³தி⁴ங் ஏகதோ ஸஜ்ஜா²யகரணே. தஸ்ஸ ஸந்திகே உத்³தே³ஸக்³க³ஹணேதி அனுபஸம்பன்னஸ்ஸ ஸந்திகே உத்³தே³ஸக்³க³ஹணே. யேபு⁴ய்யேன பகு³ணக³ந்த²ங் ப⁴ணந்தஸ்ஸாதி ஸசே ஏககா³தா²ய ஏகோ பாதோ³ நாக³ச்ச²தி, அவஸேஸா ஆக³ச்ச²ந்தி, அயங் யேபு⁴ய்யேன பகு³ணக³ந்தோ² நாம. ஏதேன நயேன ஸுத்தேபி வேதி³தப்³போ³, தங் ப⁴ணந்தஸ்ஸ. ஓஸாரெந்தஸ்ஸ சாதி பரிஸாமஜ்ஜே² ஸுத்தங் உச்சாரெந்தஸ்ஸ ச.
Sajjhāyakaraṇeti anupasampannena saddhiṃ ekato sajjhāyakaraṇe. Tassa santike uddesaggahaṇeti anupasampannassa santike uddesaggahaṇe. Yebhuyyena paguṇaganthaṃ bhaṇantassāti sace ekagāthāya eko pādo nāgacchati, avasesā āgacchanti, ayaṃ yebhuyyena paguṇagantho nāma. Etena nayena suttepi veditabbo, taṃ bhaṇantassa. Osārentassa cāti parisāmajjhe suttaṃ uccārentassa ca.
பத³ஸோத⁴ம்மஸிக்கா²பத³வண்ணனா நிட்டி²தா.
Padasodhammasikkhāpadavaṇṇanā niṭṭhitā.
