| Library / Tipiṭaka / திபிடக • Tipiṭaka / வஜிரபு³த்³தி⁴-டீகா • Vajirabuddhi-ṭīkā |
4. பத³ஸோத⁴ம்மஸிக்கா²பத³வண்ணனா
4. Padasodhammasikkhāpadavaṇṇanā
45-6. ஸப்³ப³மேதங் பத³ஸோ த⁴ம்மோ நாமாதி எத்த² த⁴ம்மோ நாம பு³த்³த⁴பா⁴ஸிதோதி ஏவங் ஸம்ப³ந்தோ⁴. அக்க²ரஸமூஹோதி அஸமத்தபதே³. பச்சேகபு³த்³த⁴பா⁴ஸிதங் பு³த்³த⁴பா⁴ஸிதே ஏவ. அனுபாஸகக³ஹட்டே²ஹி பா⁴ஸிதோ இஸிபா⁴ஸிதாதி³ஸங்க³ஹங் க³ச்ச²தீதி வேதி³தப்³ப³ங். கத்த²சி பொத்த²கே ‘‘தே³வதாபா⁴ஸிதோ’’தி பத³ங் நத்தி², யத்த² அத்தி², ஸா பாளி. கா³தா²ப³ந்தே⁴பி ச ஏஸ நயோதி ஏகமேவ அக்க²ரங் வத்வா டா²னங் லப்³ப⁴தி ஏவ. ‘‘ஏவங் மே ஸுத’’ந்திஆதி³ஸுத்தங் ப⁴ணாபியமானோ ஏகாரங் வத்வா திட்ட²தி சே, அன்வக்க²ரேன பாசித்தியங், அபரிபுண்ணபத³ங் வத்வா டி²தே அனுப்³யஞ்ஜனேன. பதே³ஸு ஏகங் பட²மபத³ங் விருஜ்ஜ²தி சே, அனுபதே³ன பாசித்தியங். அட்ட²கதா²னிஸ்ஸிதோதி அட்ட²கதா²னிஸ்ஸிதவஸேன டி²தோ. புப்³பே³ பகதிபா⁴ஸாய வுத்தங் அட்ட²கத²ங் ஸந்தா⁴ய. பாளினிஸ்ஸிதோதி பாளியங் ஏவாக³தோ. மக்³க³கதா²தீ³னிபி பகரணானி.
45-6.Sabbametaṃpadaso dhammo nāmāti ettha dhammo nāma buddhabhāsitoti evaṃ sambandho. Akkharasamūhoti asamattapade. Paccekabuddhabhāsitaṃ buddhabhāsite eva. Anupāsakagahaṭṭhehi bhāsito isibhāsitādisaṅgahaṃ gacchatīti veditabbaṃ. Katthaci potthake ‘‘devatābhāsito’’ti padaṃ natthi, yattha atthi, sā pāḷi. Gāthābandhepi ca esa nayoti ekameva akkharaṃ vatvā ṭhānaṃ labbhati eva. ‘‘Evaṃ me suta’’ntiādisuttaṃ bhaṇāpiyamāno ekāraṃ vatvā tiṭṭhati ce, anvakkharena pācittiyaṃ, aparipuṇṇapadaṃ vatvā ṭhite anubyañjanena. Padesu ekaṃ paṭhamapadaṃ virujjhati ce, anupadena pācittiyaṃ. Aṭṭhakathānissitoti aṭṭhakathānissitavasena ṭhito. Pubbe pakatibhāsāya vuttaṃ aṭṭhakathaṃ sandhāya. Pāḷinissitoti pāḷiyaṃ evāgato. Maggakathādīnipi pakaraṇāni.
48. உபசாரந்தி த்³வாத³ஸஹத்த²ங். ‘‘ஓபாதேதீதி ஏகதோ ப⁴ணதி ஸமாக³ச்ச²தீ’’தி லிகி²தங். கிஞ்சாபி அபலாலத³மனம்பி ஸீலுபதே³ஸோபி ப⁴க³வதோ காலே உப்பன்னோ, அத² கோ² தேஸு யங் யங் பு³த்³த⁴வசனதோ ஆஹரித்வா வுத்தங், தங் ததே³வ ஆபத்திவத்து² ஹோதீதி விஞ்ஞாபனத்த²ங் மஹாஅட்ட²கதா²யங் ‘‘வத³ந்தீ’’தி வசனேஹி ஸிதி²லங் கதங். பு³த்³த⁴வசனதோ ஆஹரித்வா வுத்தஸ்ஸ ப³ஹுலதாய தப்³ப³ஹுலனயேன தேஸு ஆபத்தி வுத்தா, தஸ்மா மஹாபச்சரியங் தஸ்ஸாதி⁴ப்பாயோ பகாஸிதோதி அத்தோ². ‘‘ஸப்³பே³ஸமேவ வசனந்தி அபரே’’தி வுத்தங். ஸசே ஆசரியோ டி²தோ நிஸின்னானங் பாட²ங் தே³தி, ‘‘ந டி²தோ நிஸின்னஸ்ஸ த⁴ம்மங் தே³ஸெஸ்ஸாமீ’’தி வுத்தாபத்திங் நாபஜ்ஜதீதி ஏகே. தேஸம்பி பாட²தா³னங் த⁴ம்மதே³ஸனதோ ந அஞ்ஞந்தி தங் ந யுத்தங், ச²த்தபாணிகாதீ³னங் பாட²தா³னேன அனாபத்திப்பஸங்க³தோ, ஆபத்திபா⁴வோ ச ஸித்³தோ⁴. வுத்தஞ்ஹேதங் –
48.Upacāranti dvādasahatthaṃ. ‘‘Opātetīti ekato bhaṇati samāgacchatī’’ti likhitaṃ. Kiñcāpi apalāladamanampi sīlupadesopi bhagavato kāle uppanno, atha kho tesu yaṃ yaṃ buddhavacanato āharitvā vuttaṃ, taṃ tadeva āpattivatthu hotīti viññāpanatthaṃ mahāaṭṭhakathāyaṃ ‘‘vadantī’’ti vacanehi sithilaṃ kataṃ. Buddhavacanato āharitvā vuttassa bahulatāya tabbahulanayena tesu āpatti vuttā, tasmā mahāpaccariyaṃ tassādhippāyo pakāsitoti attho. ‘‘Sabbesameva vacananti apare’’ti vuttaṃ. Sace ācariyo ṭhito nisinnānaṃ pāṭhaṃ deti, ‘‘na ṭhito nisinnassa dhammaṃ desessāmī’’ti vuttāpattiṃ nāpajjatīti eke. Tesampi pāṭhadānaṃ dhammadesanato na aññanti taṃ na yuttaṃ, chattapāṇikādīnaṃ pāṭhadānena anāpattippasaṅgato, āpattibhāvo ca siddho. Vuttañhetaṃ –
‘‘உபோ⁴ அத்த²ங் ந ஜானந்தி, உபோ⁴ த⁴ம்மங் ந பஸ்ஸரே;
‘‘Ubho atthaṃ na jānanti, ubho dhammaṃ na passare;
யோ சாயங் மந்தங் வாசேதி, யோ சாத⁴ம்மேனதீ⁴யதீ’’தி. (பாசி॰ 647);
Yo cāyaṃ mantaṃ vāceti, yo cādhammenadhīyatī’’ti. (pāci. 647);
எத்த² அதீ⁴யதீதி அத்தோ², தஸ்மா பாட²தா³னம்பி த⁴ம்மதே³ஸனாவ. ஸேகி²யட்ட²கதா²யங் (பாசி॰ அட்ட²॰ 634) ‘‘த⁴ம்மபரிச்சே²தோ³ பனெத்த² பத³ஸோத⁴ம்மே வுத்தனயேன வேதி³தப்³போ³’’தி வுத்தங் , தஸ்மா அயமேவ த⁴ம்மோ ஸப்³ப³த்த² த⁴ம்மபடிஸங்யுத்தஸிக்கா²பதே³ஸு வேதி³தப்³போ³. யதி³ ஏவங் ஸங்கா²ரபா⁴ஸாதி³வஸேன சித்தத⁴ம்மங் தே³ஸெந்தஸ்ஸ ஸேகி²யவஸேன அனாபத்தி ஸியா, ததோ ச²பகஜாதகவிரோதோ⁴. தத்த² மந்தானங் பா³ஹிரக³ந்த²த்தாதி சே? ந, தத³தி⁴ப்பாயாஜானநதோ. அயஞ்ஹி தத்த² அதி⁴ப்பாயோ ‘‘பா³ஹிரகக³ந்த²ஸங்கா²தம்பி மந்தங் உச்சே ஆஸனே நிஸின்னஸ்ஸ வாசேதுங் மே பி⁴க்க²வே அமனாபங், பகே³வ த⁴ம்மங் தே³ஸேது’’ந்தி. ‘‘ததா³பி மே, பி⁴க்க²வே, அமனாபங் நீசே ஆஸனே நிஸீதி³த்வா உச்சே ஆஸனே நிஸின்னஸ்ஸ மந்தங் வாசேதுங், கிமங்க³ங் பன ஏதரஹி…பே॰… த⁴ம்மங் தே³ஸேது’’ந்தி (பாசி॰ 647) ஹி அயங் பாளி யதா²வுத்தமேவ அதி⁴ப்பாயங் தீ³பேதி, ந அஞ்ஞங். தேனேவ ‘‘மந்தங் வாசேதுங் த⁴ம்மங் தே³ஸேது’’ந்தி வசனபே⁴தோ³ கதோ. அஞ்ஞதா² உப⁴யத்த² ‘‘த⁴ம்மங் தே³ஸேது’’மிச்சேவ வத்தப்³ப³ந்தி.
Ettha adhīyatīti attho, tasmā pāṭhadānampi dhammadesanāva. Sekhiyaṭṭhakathāyaṃ (pāci. aṭṭha. 634) ‘‘dhammaparicchedo panettha padasodhamme vuttanayena veditabbo’’ti vuttaṃ , tasmā ayameva dhammo sabbattha dhammapaṭisaṃyuttasikkhāpadesu veditabbo. Yadi evaṃ saṅkhārabhāsādivasena cittadhammaṃ desentassa sekhiyavasena anāpatti siyā, tato chapakajātakavirodho. Tattha mantānaṃ bāhiraganthattāti ce? Na, tadadhippāyājānanato. Ayañhi tattha adhippāyo ‘‘bāhirakaganthasaṅkhātampi mantaṃ ucce āsane nisinnassa vācetuṃ me bhikkhave amanāpaṃ, pageva dhammaṃ desetu’’nti. ‘‘Tadāpi me, bhikkhave, amanāpaṃ nīce āsane nisīditvā ucce āsane nisinnassa mantaṃ vācetuṃ, kimaṅgaṃ pana etarahi…pe… dhammaṃ desetu’’nti (pāci. 647) hi ayaṃ pāḷi yathāvuttameva adhippāyaṃ dīpeti, na aññaṃ. Teneva ‘‘mantaṃ vācetuṃ dhammaṃ desetu’’nti vacanabhedo kato. Aññathā ubhayattha ‘‘dhammaṃ desetu’’micceva vattabbanti.
மயா ஸத்³தி⁴ங் மா வதா³திஆதி³ம்ஹி பன அனுக³ண்டி²பதே³ ஏவங் வுத்தோ ‘‘ஸசே பி⁴க்கு² ஸாமணேரேன ஸத்³தி⁴ங் வத்துகாமோ, ததா² ஸாமணேரோபி பி⁴க்கு²னா ஸத்³தி⁴ங் வத்துகாமோ ஸஹஸா ஓபாதேதி, ‘யேபு⁴ய்யேன பகு³ணங் க³ந்த²ங் ப⁴ணந்தங் ஓபாதேதீ’’திஆதீ³ஸு விய அனாபத்தி, ந ஹி எத்தாவதா பி⁴க்கு² ஸாமணேரஸ்ஸ உத்³தி³ஸதி நாம ஹோதி. யஸ்மா மஹாஅட்ட²கதா²யங் நத்தி², தஸ்மாபி யுத்தமேவேதங். ஸசே தத்த² விசாரெத்வா படிக்கி²த்தங் ஸியா ஆபத்தி, கிரியாகிரியஞ்ச நாபஜ்ஜதி. கஸ்மா? யஸ்மா சித்தேன ஏகதோ வத்துகாமோ, அத² கோ² நங் ‘ஏகதோ மா வதா³’தி படிக்கி²பித்வாபி ஏகதோ வத³ந்தோ ஆபஜ்ஜதி. அவத்துகாமஸ்ஸ ஸஹஸா விரஜ்ஜி²த்வா ஏகதோ வத³ந்தஸ்ஸ அனாபத்தி, தேன வுத்தங் ‘மயா ஸத்³தி⁴ங் மா வதா³தி வுத்தோ யதி³ வத³தி, அனாபத்தீ’தி. ததா²பி ஆசரியானங் மதிமனுவத்தந்தேன ஏவரூபேஸு டா²னேஸு யதா²வுத்தனயேனேவ படிபஜ்ஜிதப்³ப³ங். கஸ்மா? யஸ்மா மஹாஅட்ட²கதா²யங் நத்தி², நத்தி²பா⁴வதோயேவ ஆபத்தி. ஸசே தத்த² அனாபத்திஅவசனங் ந ஸம்ப⁴வதி அயமட்டா²னத்தா’’தி.
Mayāsaddhiṃ mā vadātiādimhi pana anugaṇṭhipade evaṃ vutto ‘‘sace bhikkhu sāmaṇerena saddhiṃ vattukāmo, tathā sāmaṇeropi bhikkhunā saddhiṃ vattukāmo sahasā opāteti, ‘yebhuyyena paguṇaṃ ganthaṃ bhaṇantaṃ opātetī’’tiādīsu viya anāpatti, na hi ettāvatā bhikkhu sāmaṇerassa uddisati nāma hoti. Yasmā mahāaṭṭhakathāyaṃ natthi, tasmāpi yuttamevetaṃ. Sace tattha vicāretvā paṭikkhittaṃ siyā āpatti, kiriyākiriyañca nāpajjati. Kasmā? Yasmā cittena ekato vattukāmo, atha kho naṃ ‘ekato mā vadā’ti paṭikkhipitvāpi ekato vadanto āpajjati. Avattukāmassa sahasā virajjhitvā ekato vadantassa anāpatti, tena vuttaṃ ‘mayā saddhiṃ mā vadāti vutto yadi vadati, anāpattī’ti. Tathāpi ācariyānaṃ matimanuvattantena evarūpesu ṭhānesu yathāvuttanayeneva paṭipajjitabbaṃ. Kasmā? Yasmā mahāaṭṭhakathāyaṃ natthi, natthibhāvatoyeva āpatti. Sace tattha anāpattiavacanaṃ na sambhavati ayamaṭṭhānattā’’ti.
தத்ராயங் விசாரணா – ‘‘மயா ஸத்³தி⁴ங் மா வதா³’’தி வுத்தோ யதி³ வத³தி, பி⁴க்கு²னோ அனாபத்தீதி யுத்தமேதங் பி⁴க்கு²னோ வத்துகாமதாயாபா⁴வதோ, பா⁴வேபி ஸஜ்ஜா²யகரணாதீ³ஸு தீஸு அனாபத்திதோ ச. அத² ஸாமணேரேன ப்³யத்ததாய ‘‘மயா ஸத்³தி⁴ங் மா வதா³’’தி வுத்தோ பி⁴க்கு² அப்³யத்ததாய வத³தி, ஆபத்தி ஏவ வத்துகாமதாஸப்³பா⁴வதோ. ஸஹஸா சே வத³தி, அனாபத்தி தத³பா⁴வதோ. ஸசே பி⁴க்கு² ஏவங் ‘‘மயா ஸத்³தி⁴ங் மா வதா³’’தி வத்வா தேன ஸத்³தி⁴ங் ஸயங் வத³தி, ஆபத்தி ஏவ. ந ஹி ஏதங் ஸிக்கா²பத³ங் கிரியாகிரியங். யதி³ ஏதங் ஸிக்கா²பத³ங் கிரியாகிரியங் ப⁴வெய்ய, யுத்தங். தத்த² அனாபத்தீதி அதி⁴ப்பாயோ. மஹாபச்சரியங் இமினாவ அதி⁴ப்பாயேன ‘‘மயா ஸத்³தி⁴ங் மா வதா³’’தி வுத்தங் ஸியா. ந ஹி ஸாமணேரஸ்ஸ கிரியா இத⁴ பமாணந்தி, இமஸ்மிங் பன அதி⁴ப்பாயே வுத்தே அதியுத்தங்வாதி அத்தோ². அக்க²ரத்தோ² ப்³யஞ்ஜனத்தோ². கிஞ்சாபி ‘‘யஞ்ச பத³ங் யஞ்ச அனுபத³ங் யஞ்ச அன்வக்க²ரங் யஞ்ச அனுப்³யஞ்ஜனங், ஸப்³ப³மேதங் பத³ஸோத⁴ம்மோ நாமா’’தி வுத்தங், ததா²பி ‘‘பதே³ன வாசேதி, பதே³ பதே³ ஆபத்தி பாசித்தியஸ்ஸ, அக்க²ராய வாசேதி, அக்க²ரக்க²ராய ஆபத்தி பாசித்தியஸ்ஸா’’தி இத³மேவ த்³வயங் யோஜிதங், தங் கஸ்மாதி சே? பதே³ன அனுபத³அனுப்³யஞ்ஜனானங் ஸங்க³ஹிதத்தா. வுத்தஞ்ஹேதங் ‘‘அனுபத³ந்தி து³தியபாதோ³. அனுப்³யஞ்ஜனந்தி புரிமப்³யஞ்ஜனேன ஸதி³ஸங் பச்சா²ப்³யஞ்ஜன’’ந்தி (பாசி॰ அட்ட²॰ 45), தஸ்மா அனுபதே³கதே³ஸமத்தமேவ அனுப்³யஞ்ஜனந்தி ஸித்³த⁴ங். ‘‘அக்க²ரானுப்³யஞ்ஜனஸமூஹோ பத³’’ந்தி ச வுத்தத்தா பத³மத்தமேவ வத்தப்³ப³ங் தேன அனுபதா³தி³த்தயக்³க³ஹணதோதி சே? ந வத்தப்³ப³ங் வசனவிஸேஸதோ. பதே³ன வாசெந்தோ ஹி பதே³ வா அனுபதே³ வா அனுப்³யஞ்ஜனே வா ஆபத்திங் ஆபஜ்ஜதி. ந அக்க²ரேன. அக்க²ரேன வாசெந்தோ பன பதா³தீ³ஸு அஞ்ஞதரஸ்மிங் ஆபஜ்ஜதி. ந ஹி ‘‘வரோ வரஞ்ஞூ வரதோ³ வராஹரோ’’திஆதி³ம்ஹி பட²மங் வ-காரங் வாசெந்தோ து³தியாதி³வ-காரே ஓபாதேதி, பட²மங் ரோ-காரங் வாசெந்தோ து³தியரோ-காரே ஓபாதேதி, பட²மங் ர-காரங் வாசெந்தோ து³தியர-காரே ஓபாதேதி, ஆபத்தி பாசித்தியஸ்ஸாதி ஸம்ப⁴வதி. அனுப்³யஞ்ஜனானுலோமதோ ஸம்ப⁴வதி ஏவாதி சே? ந, ‘‘பதே³ பதே³ ஆபத்தி பாசித்தியஸ்ஸா’’தி இமினா விருத்³த⁴த்தா. இத³ஞ்ஹி வசனங் ஏகஸ்மிங் பதே³ ஏகா ஆபத்தீதி தீ³பேதி. ‘‘ரூபங் அனிச்சந்தி வுச்சமானோ ரூதி ஓபாதேதீ’’தி வசனதோ ஸகலங் பாத³ங் வாசெந்தஸ்ஸ பட²மஅக்க²ரமத்தே ஏகதோ வுத்தே ஆபத்தீதி ஸித்³த⁴ந்தி சே? ந, ‘‘அக்க²ரக்க²ராய ஆபத்தி பாசித்தியஸ்ஸா’’தி இமினா விருத்³த⁴த்தா, தஸ்மா ரூதி ஓபாதேதீதி வத்துங் அஸம்ப⁴வதோ ரூ-காரஸ்ஸ யதா²வுத்தத⁴ம்மபரியாபன்னபா⁴வஸித்³தி⁴தோ தங் அவத்வா கேவலங் அக்க²ராய வாசெந்தஸ்ஸ யதா²வுத்தத⁴ம்மபரியாபன்னஅக்க²ரபா⁴வத³ஸ்ஸனத்த²ங் ‘‘ரூபங் அனிச்சந்தி வுச்சமானோ’’தி வுத்தங், வசனஸிலிட்ட²தாவஸேன வா அனுப்³யஞ்ஜனே வேத³னாவசனங் வியாதி வேதி³தப்³ப³ங்.
Tatrāyaṃ vicāraṇā – ‘‘mayā saddhiṃ mā vadā’’ti vutto yadi vadati, bhikkhuno anāpattīti yuttametaṃ bhikkhuno vattukāmatāyābhāvato, bhāvepi sajjhāyakaraṇādīsu tīsu anāpattito ca. Atha sāmaṇerena byattatāya ‘‘mayā saddhiṃ mā vadā’’ti vutto bhikkhu abyattatāya vadati, āpatti eva vattukāmatāsabbhāvato. Sahasā ce vadati, anāpatti tadabhāvato. Sace bhikkhu evaṃ ‘‘mayā saddhiṃ mā vadā’’ti vatvā tena saddhiṃ sayaṃ vadati, āpatti eva. Na hi etaṃ sikkhāpadaṃ kiriyākiriyaṃ. Yadi etaṃ sikkhāpadaṃ kiriyākiriyaṃ bhaveyya, yuttaṃ. Tattha anāpattīti adhippāyo. Mahāpaccariyaṃ imināva adhippāyena ‘‘mayā saddhiṃ mā vadā’’ti vuttaṃ siyā. Na hi sāmaṇerassa kiriyā idha pamāṇanti, imasmiṃ pana adhippāye vutte atiyuttaṃvāti attho. Akkharattho byañjanattho. Kiñcāpi ‘‘yañca padaṃ yañca anupadaṃ yañca anvakkharaṃ yañca anubyañjanaṃ, sabbametaṃ padasodhammo nāmā’’ti vuttaṃ, tathāpi ‘‘padena vāceti, pade pade āpatti pācittiyassa, akkharāya vāceti, akkharakkharāya āpatti pācittiyassā’’ti idameva dvayaṃ yojitaṃ, taṃ kasmāti ce? Padena anupadaanubyañjanānaṃ saṅgahitattā. Vuttañhetaṃ ‘‘anupadanti dutiyapādo. Anubyañjananti purimabyañjanena sadisaṃ pacchābyañjana’’nti (pāci. aṭṭha. 45), tasmā anupadekadesamattameva anubyañjananti siddhaṃ. ‘‘Akkharānubyañjanasamūho pada’’nti ca vuttattā padamattameva vattabbaṃ tena anupadādittayaggahaṇatoti ce? Na vattabbaṃ vacanavisesato. Padena vācento hi pade vā anupade vā anubyañjane vā āpattiṃ āpajjati. Na akkharena. Akkharena vācento pana padādīsu aññatarasmiṃ āpajjati. Na hi ‘‘varo varaññū varado varāharo’’tiādimhi paṭhamaṃ va-kāraṃ vācento dutiyādiva-kāre opāteti, paṭhamaṃ ro-kāraṃ vācento dutiyaro-kāre opāteti, paṭhamaṃ ra-kāraṃ vācento dutiyara-kāre opāteti, āpatti pācittiyassāti sambhavati. Anubyañjanānulomato sambhavati evāti ce? Na, ‘‘pade pade āpatti pācittiyassā’’ti iminā viruddhattā. Idañhi vacanaṃ ekasmiṃ pade ekā āpattīti dīpeti. ‘‘Rūpaṃ aniccanti vuccamāno rūti opātetī’’ti vacanato sakalaṃ pādaṃ vācentassa paṭhamaakkharamatte ekato vutte āpattīti siddhanti ce? Na, ‘‘akkharakkharāya āpatti pācittiyassā’’ti iminā viruddhattā, tasmā rūti opātetīti vattuṃ asambhavato rū-kārassa yathāvuttadhammapariyāpannabhāvasiddhito taṃ avatvā kevalaṃ akkharāya vācentassa yathāvuttadhammapariyāpannaakkharabhāvadassanatthaṃ ‘‘rūpaṃ aniccanti vuccamāno’’ti vuttaṃ, vacanasiliṭṭhatāvasena vā anubyañjane vedanāvacanaṃ viyāti veditabbaṃ.
பத³ஸோத⁴ம்மஸிக்கா²பத³வண்ணனா நிட்டி²தா.
Padasodhammasikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 1. முஸாவாத³வக்³கோ³ • 1. Musāvādavaggo
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 4. பத³ஸோத⁴ம்மஸிக்கா²பத³வண்ணனா • 4. Padasodhammasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 4. பத³ஸோத⁴ம்மஸிக்கா²பத³வண்ணனா • 4. Padasodhammasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 4. பத³ஸோத⁴ம்மஸிக்கா²பத³வண்ணனா • 4. Padasodhammasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 4. பத³ஸோத⁴ம்மஸிக்கா²பத³ங் • 4. Padasodhammasikkhāpadaṃ
