| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
4. பத³ஸோத⁴ம்மஸிக்கா²பத³வண்ணனா
4. Padasodhammasikkhāpadavaṇṇanā
45. சதுத்தே² புரிமப்³யஞ்ஜனேன ஸதி³ஸந்தி ‘‘ரூபங் அனிச்ச’’ந்தி எத்த² அனிச்ச-ஸத்³தே³ன ஸதி³ஸங் ‘‘வேத³னா அனிச்சா’’தி எத்த² அனிச்ச-ஸத்³த³ங் வத³தி. அக்க²ரஸமூஹோதி அவிப⁴த்திகோ வுத்தோ. பத³ந்தி விப⁴த்திஅந்தங் வுத்தங்.
45. Catutthe purimabyañjanena sadisanti ‘‘rūpaṃ anicca’’nti ettha anicca-saddena sadisaṃ ‘‘vedanā aniccā’’ti ettha anicca-saddaṃ vadati. Akkharasamūhoti avibhattiko vutto. Padanti vibhattiantaṃ vuttaṃ.
ஏகங் பத³ந்தி கா³தா²பத³மேவ ஸந்தா⁴ய வத³தி. பத³க³ணனாயாதி கா³தா²பத³க³ணனாய. அபாபுணித்வாதி ஸத்³தி⁴ங் அகதெ²த்வா. ஏதேன கா³தா²ய பச்சி²மபாதே³ வுச்சமானே ஸாமணேரோ பட²மபாதா³தி³ங் வத³தி, ஆபத்தியேவ, தஸ்மிங் நிஸ்ஸத்³தே³ ஏவ இதரேன வத்தப்³ப³ந்தி த³ஸ்ஸேதி.
Ekaṃ padanti gāthāpadameva sandhāya vadati. Padagaṇanāyāti gāthāpadagaṇanāya. Apāpuṇitvāti saddhiṃ akathetvā. Etena gāthāya pacchimapāde vuccamāne sāmaṇero paṭhamapādādiṃ vadati, āpattiyeva, tasmiṃ nissadde eva itarena vattabbanti dasseti.
அட்ட²கதா²னிஸ்ஸிதோதி ஸங்கீ³தித்தயாருள்ஹங் போராணட்ட²கத²ங் ஸந்தா⁴ய வத³தி. இதா³னிபி ‘‘யதா²பி தீ³பிகோ நாம, நிலீயித்வா க³ண்ஹதே மிகே³’’தி (மி॰ ப॰ 6.1.5; விஸுத்³தி⁴॰ 1.217; தீ³॰ நி॰ அட்ட²॰ 2.374; ம॰ நி॰ அட்ட²॰ 1.107; பாரா॰ அட்ட²॰ 2.165; படி॰ ம॰ அட்ட²॰ 2.1.163) ஏவமாதி³கங் அட்ட²கதா²வசனங் அத்தே²வ, பு³த்³த⁴கோ⁴ஸாசரியாதீ³ஹி போராணட்ட²கதா²னயேன வுத்தம்பி இத⁴ ஸங்க³ஹேதப்³ப³ந்தி வத³ந்தி. பாளினிஸ்ஸிதோதி உதா³னவக்³க³ஸங்க³ஹாதி³கோ. விவட்டூபனிஸ்ஸிதந்தி நிப்³பா³னநிஸ்ஸிதங். தே²ரஸ்ஸாதி நாக³ஸேனத்தே²ரஸ்ஸ. மக்³க³கதா²தீ³னி பகரணானி.
Aṭṭhakathānissitoti saṅgītittayāruḷhaṃ porāṇaṭṭhakathaṃ sandhāya vadati. Idānipi ‘‘yathāpi dīpiko nāma, nilīyitvā gaṇhate mige’’ti (mi. pa. 6.1.5; visuddhi. 1.217; dī. ni. aṭṭha. 2.374; ma. ni. aṭṭha. 1.107; pārā. aṭṭha. 2.165; paṭi. ma. aṭṭha. 2.1.163) evamādikaṃ aṭṭhakathāvacanaṃ attheva, buddhaghosācariyādīhi porāṇaṭṭhakathānayena vuttampi idha saṅgahetabbanti vadanti. Pāḷinissitoti udānavaggasaṅgahādiko. Vivaṭṭūpanissitanti nibbānanissitaṃ. Therassāti nāgasenattherassa. Maggakathādīni pakaraṇāni.
46. பாளியங் அக்க²ராயாதிஆதி³ லிங்க³விபல்லாஸேன வுத்தங், அக்க²ரேனாதிஆதி³னா அத்தோ² க³ஹேதப்³போ³.
46. Pāḷiyaṃ akkharāyātiādi liṅgavipallāsena vuttaṃ, akkharenātiādinā attho gahetabbo.
48. உபசாரங் முஞ்சித்வாதி பரிஸாய த்³வாத³ஸஹத்த²ங் முஞ்சித்வா ஏகதோ டி²தஸ்ஸ வா நிஸின்னஸ்ஸ வா அனுபஸம்பன்னஸ்ஸ அகதெ²த்வா அஞ்ஞே உத்³தி³ஸ்ஸ ப⁴ணந்தஸ்ஸாபி அனாபத்தி. ஸசே பன தூ³ரே நிஸின்னம்பி உத்³தி³ஸ்ஸ ப⁴ணதி, ஆபத்தி ஏவ. ஓபாதேதீதி ஸத்³தி⁴ங் கதே²தி. அனுபஸம்பன்னதா, வுத்தலக்க²ணத⁴ம்மங் பத³ஸோ வாசனதா, ஏகதோ ப⁴ணனஞ்சாதி இமானெத்த² தீணி அங்கா³னி.
48.Upacāraṃmuñcitvāti parisāya dvādasahatthaṃ muñcitvā ekato ṭhitassa vā nisinnassa vā anupasampannassa akathetvā aññe uddissa bhaṇantassāpi anāpatti. Sace pana dūre nisinnampi uddissa bhaṇati, āpatti eva. Opātetīti saddhiṃ katheti. Anupasampannatā, vuttalakkhaṇadhammaṃ padaso vācanatā, ekato bhaṇanañcāti imānettha tīṇi aṅgāni.
பத³ஸோத⁴ம்மஸிக்கா²பத³வண்ணனா நிட்டி²தா.
Padasodhammasikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 1. முஸாவாத³வக்³கோ³ • 1. Musāvādavaggo
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 4. பத³ஸோத⁴ம்மஸிக்கா²பத³வண்ணனா • 4. Padasodhammasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 4. பத³ஸோத⁴ம்மஸிக்கா²பத³வண்ணனா • 4. Padasodhammasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 4. பத³ஸோத⁴ம்மஸிக்கா²பத³வண்ணனா • 4. Padasodhammasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 4. பத³ஸோத⁴ம்மஸிக்கா²பத³ங் • 4. Padasodhammasikkhāpadaṃ
