| Library / Tipiṭaka / তিপিটক • Tipiṭaka / নেত্তিৰিভাৰিনী • Nettivibhāvinī |
৪. পদট্ঠানহারসম্পাতৰিভাৰনা
4. Padaṭṭhānahārasampātavibhāvanā
৬৬. যেন যেন যুত্তিহারসম্পাতেন সুত্তপ্পদেসত্থানং যুত্তিভাৰো আচরিযেন ৰিভাৰিতো, অম্হেহি চ ঞাতো, সো যুত্তিহারসম্পাতো পরিপুণ্ণো, ‘‘কতমো পদট্ঠানহারসম্পাতো’’তি পুচ্ছিতব্বত্তা ‘‘তত্থ কতমো পদট্ঠানো হারসম্পাতো’’তি পুচ্ছতি।
66. Yena yena yuttihārasampātena suttappadesatthānaṃ yuttibhāvo ācariyena vibhāvito, amhehi ca ñāto, so yuttihārasampāto paripuṇṇo, ‘‘katamo padaṭṭhānahārasampāto’’ti pucchitabbattā ‘‘tattha katamo padaṭṭhāno hārasampāto’’ti pucchati.
পুচ্ছিত্ৰা যস্মিং সুত্তপ্পদেসে ৰুত্তানি পদট্ঠানানি নীহরিতানি, তং সুত্তপ্পদেসং নীহরিতুং ‘‘তস্মা রক্খিতচিত্তস্স, সম্মাসঙ্কপ্পগোচরোতি গাথা’’তি ৰুত্তা। গাথাত্থো ৰুত্তোৰ। ‘‘কতমে গাথাত্থা কতমেসং ধম্মানং পদট্ঠানানী’’তি পুচ্ছিতব্বত্তা ‘‘তস্মা রক্খিতচিত্তস্সা’’তিআদি ৰুত্তং। ‘‘তস্মা রক্খিতচিত্তস্সা’’তি সুত্তপ্পদেসস্স অত্থভূতা ইন্দ্রিযেসু গুত্তদ্ৰারতা তিণ্ণং সুচরিতানং পদট্ঠানং নাম সুচরিতপারিপূরিযা আসন্নকারণত্তা। ‘‘সম্মাসঙ্কপ্পগোচরো’’তি সুত্তপ্পদেসস্স অত্থভূতা নেক্খম্মসঙ্কপ্পাদযো সম্মাসঙ্কপ্পা সমথস্স পদট্ঠানং নাম কামচ্ছন্দআদিনীৰরণৰিক্খম্ভনস্স আসন্নকারণত্তা। ‘‘সম্মাদিট্ঠিপুরেক্খারো’’তি সুত্তপ্পদেসস্স অত্থভূতা কম্মস্সকতাসম্মাদিট্ঠি চ সপ্পচ্চযনামরূপদস্সনসম্মাদিট্ঠি চ ৰিপস্সনায পদট্ঠানং নাম অনিচ্চানুপস্সনাদীনং ৰিসেসকারণত্তা। ‘‘ঞত্ৰান উদযব্বয’’ন্তি সুত্তপ্পদেসস্স অত্থভূতা উদযব্বযানুপস্সনাপঞ্ঞা দস্সনভূমিযা পদট্ঠানং নাম পঠমমগ্গাধিগমস্স আসন্নকারণত্তা। ‘‘থিনমিদ্ধাভিভূ ভিক্খূ’’তি সুত্তপ্পদেসস্স অত্থভূতং থিনমিদ্ধাভিভৰনং ৰীরিযস্স পদট্ঠানং নাম আসন্নকারণত্তা। ‘‘সব্বা দুগ্গতিযো জহে’’তি সুত্তপ্পদেসস্স অত্থভূতা পহাতব্বজহনভাৰনায অরিযমগ্গভাৰনায পদট্ঠানং নাম পহাতব্বপ্পহানেন অরিযমগ্গভাৰনাপারিপূরিসম্ভৰতো।
Pucchitvā yasmiṃ suttappadese vuttāni padaṭṭhānāni nīharitāni, taṃ suttappadesaṃ nīharituṃ ‘‘tasmā rakkhitacittassa, sammāsaṅkappagocaroti gāthā’’ti vuttā. Gāthāttho vuttova. ‘‘Katame gāthātthā katamesaṃ dhammānaṃ padaṭṭhānānī’’ti pucchitabbattā ‘‘tasmā rakkhitacittassā’’tiādi vuttaṃ. ‘‘Tasmā rakkhitacittassā’’ti suttappadesassa atthabhūtā indriyesu guttadvāratā tiṇṇaṃ sucaritānaṃ padaṭṭhānaṃ nāma sucaritapāripūriyā āsannakāraṇattā. ‘‘Sammāsaṅkappagocaro’’ti suttappadesassa atthabhūtā nekkhammasaṅkappādayo sammāsaṅkappā samathassa padaṭṭhānaṃ nāma kāmacchandaādinīvaraṇavikkhambhanassa āsannakāraṇattā. ‘‘Sammādiṭṭhipurekkhāro’’ti suttappadesassa atthabhūtā kammassakatāsammādiṭṭhi ca sappaccayanāmarūpadassanasammādiṭṭhi ca vipassanāya padaṭṭhānaṃ nāma aniccānupassanādīnaṃ visesakāraṇattā. ‘‘Ñatvāna udayabbaya’’nti suttappadesassa atthabhūtā udayabbayānupassanāpaññā dassanabhūmiyā padaṭṭhānaṃ nāma paṭhamamaggādhigamassa āsannakāraṇattā. ‘‘Thinamiddhābhibhū bhikkhū’’ti suttappadesassa atthabhūtaṃ thinamiddhābhibhavanaṃ vīriyassa padaṭṭhānaṃ nāma āsannakāraṇattā. ‘‘Sabbā duggatiyo jahe’’ti suttappadesassa atthabhūtā pahātabbajahanabhāvanāya ariyamaggabhāvanāya padaṭṭhānaṃ nāma pahātabbappahānena ariyamaggabhāvanāpāripūrisambhavato.
‘‘এত্তকোৰ পদট্ঠানহারসম্পাতো পরিপুণ্ণো’’তি ৰত্তব্বত্তা ‘‘নিযুত্তো পদট্ঠানো হারসম্পাতো’’তি ৰুত্তং। যেন যেন সংৰণ্ণনাৰিসেসভূতেন পদট্ঠানহারসম্পাতভূতেন সুত্তপ্পদেসত্থানি পদট্ঠানানি নীহরিতানি, সো সো সংৰণ্ণনাৰিসেসভূতো পদট্ঠানহারসম্পাতো নিযুত্তো যথারহং নিদ্ধারেত্ৰা যুজ্জিতব্বোতি অত্থো গহেতব্বোতি।
‘‘Ettakova padaṭṭhānahārasampāto paripuṇṇo’’ti vattabbattā ‘‘niyutto padaṭṭhāno hārasampāto’’ti vuttaṃ. Yena yena saṃvaṇṇanāvisesabhūtena padaṭṭhānahārasampātabhūtena suttappadesatthāni padaṭṭhānāni nīharitāni, so so saṃvaṇṇanāvisesabhūto padaṭṭhānahārasampāto niyutto yathārahaṃ niddhāretvā yujjitabboti attho gahetabboti.
ইতি পদট্ঠানহারসম্পাতে সত্তিবলানুরূপা রচিতা
Iti padaṭṭhānahārasampāte sattibalānurūpā racitā
ৰিভাৰনা নিট্ঠিতা।
Vibhāvanā niṭṭhitā.
পণ্ডিতেহি পন…পে॰… গহেতব্বোতি।
Paṇḍitehi pana…pe… gahetabboti.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / নেত্তিপ্পকরণপাল়ি • Nettippakaraṇapāḷi / ৪. পদট্ঠানহারসম্পাতো • 4. Padaṭṭhānahārasampāto
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / নেত্তিপ্পকরণ-অট্ঠকথা • Nettippakaraṇa-aṭṭhakathā / ৪. পদট্ঠানহারসম্পাতৰণ্ণনা • 4. Padaṭṭhānahārasampātavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / খুদ্দকনিকায (টীকা) • Khuddakanikāya (ṭīkā) / নেত্তিপ্পকরণ-টীকা • Nettippakaraṇa-ṭīkā / ৪. পদট্ঠানহারসম্পাতাদিৰণ্ণনা • 4. Padaṭṭhānahārasampātādivaṇṇanā
