| Library / Tipiṭaka / திபிடக • Tipiṭaka / நெத்திப்பகரண-அட்ட²கதா² • Nettippakaraṇa-aṭṭhakathā |
4. பத³ட்டா²னஹாரவிப⁴ங்க³வண்ணனா
4. Padaṭṭhānahāravibhaṅgavaṇṇanā
22. தத்த² கதமோ பத³ட்டா²னோ ஹாரோதிஆதி³ பத³ட்டா²னஹாரவிப⁴ங்கோ³. தத்த² யஸ்மா ‘‘இத³ங் இமஸ்ஸ பத³ட்டா²னங், இத³ங் இமஸ்ஸ பத³ட்டா²ன’’ந்தி தேஸங் தேஸங் த⁴ம்மானங் பத³ட்டா²னபூ⁴தத⁴ம்மவிபா⁴வனலக்க²ணோ பத³ட்டா²னோ ஹாரோ, தஸ்மா பவத்தியா மூலபூ⁴தங் அவிஜ்ஜங் ஆதி³ங் கத்வா ஸபா⁴வத⁴ம்மானங் பத³ட்டா²னங் ஆஸன்னகாரணங் நித்³தா⁴ரெந்தோ அவிஜ்ஜாய ஸபா⁴வங் நித்³தி³ஸதி ‘‘ஸப்³ப³த⁴ம்மயாதா²வஅஸம்படிவேத⁴லக்க²ணா அவிஜ்ஜா’’தி. தஸ்ஸத்தோ² – ஸப்³பே³ஸங் த⁴ம்மானங் அவிபரீதஸபா⁴வோ ந ஸம்படிவிஜ்ஜீ²யதி ஏதேனாதி ஸப்³ப³த⁴ம்மயாதா²வஅஸம்படிவேதோ⁴. ஸோ லக்க²ணங் ஏதிஸ்ஸாதி ஸா ததா² வுத்தா. ஏதேன த⁴ம்மஸபா⁴வப்படிச்சா²த³னலக்க²ணா அவிஜ்ஜாதி வுத்தங் ஹோதி. அத² வா ஸம்மா படிவேதோ⁴ ஸம்படிவேதோ⁴. தஸ்ஸ படிபக்கோ² அஸம்படிவேதோ⁴. கத்த² பன ஸோ ஸம்படிவேத⁴ஸ்ஸ படிபக்கோ²தி ஆஹ – ‘‘ஸப்³ப³…பே॰… லக்க²ணா’’தி. யஸ்மா பன அஸுபே⁴ ஸுப⁴ந்திஆதி³விபல்லாஸே ஸதி தத்த² ஸம்மோஹோ உபரூபரி ஜாயதியேவ ந ஹாயதி, தஸ்மா ‘‘தஸ்ஸா விபல்லாஸா பத³ட்டா²ன’’ந்தி வுத்தங்.
22.Tattha katamo padaṭṭhāno hārotiādi padaṭṭhānahāravibhaṅgo. Tattha yasmā ‘‘idaṃ imassa padaṭṭhānaṃ, idaṃ imassa padaṭṭhāna’’nti tesaṃ tesaṃ dhammānaṃ padaṭṭhānabhūtadhammavibhāvanalakkhaṇo padaṭṭhāno hāro, tasmā pavattiyā mūlabhūtaṃ avijjaṃ ādiṃ katvā sabhāvadhammānaṃ padaṭṭhānaṃ āsannakāraṇaṃ niddhārento avijjāya sabhāvaṃ niddisati ‘‘sabbadhammayāthāvaasampaṭivedhalakkhaṇā avijjā’’ti. Tassattho – sabbesaṃ dhammānaṃ aviparītasabhāvo na sampaṭivijjhīyati etenāti sabbadhammayāthāvaasampaṭivedho. So lakkhaṇaṃ etissāti sā tathā vuttā. Etena dhammasabhāvappaṭicchādanalakkhaṇā avijjāti vuttaṃ hoti. Atha vā sammā paṭivedho sampaṭivedho. Tassa paṭipakkho asampaṭivedho. Kattha pana so sampaṭivedhassa paṭipakkhoti āha – ‘‘sabba…pe… lakkhaṇā’’ti. Yasmā pana asubhe subhantiādivipallāse sati tattha sammoho uparūpari jāyatiyeva na hāyati, tasmā ‘‘tassā vipallāsā padaṭṭhāna’’nti vuttaṃ.
பியரூபங் ஸாதரூபந்தி பியாயிதப்³ப³ஜாதியங் இட்ட²ஜாதியஞ்ச பத³ட்டா²னங். ‘‘யங் லோகே பியரூபங் ஸாதரூபங் எத்தே²ஸா தண்ஹா உப்பஜ்ஜமானா உப்பஜ்ஜதீ’’தி (தீ³॰ நி॰ 2.400; ம॰ நி॰ 1.133; விப⁴॰ 203) ஹி வுத்தங். அதி³ன்னாதா³னந்தி அதி³ன்னாதா³னசேதனா. ஸா ஹி ஏகவாரங் உப்பன்னாபி அனாதீ³னவத³ஸ்ஸிதாய லோப⁴ஸ்ஸ உப்பத்திகாரணங் ஹோதீதி தஸ்ஸ பத³ட்டா²னங் வுத்தங். தோ³ஸஸ்ஸ பாணாதிபாதோ பத³ட்டா²னங், மோஹஸ்ஸ மிச்சா²படிபதா³ பத³ட்டா²னந்தி எத்தா²பி இமினாவ நயேன அத்தோ² வேதி³தப்³போ³. வண்ணஸண்டா²னப்³யஞ்ஜனக்³க³ஹணலக்க²ணாதி நிமித்தானுப்³யஞ்ஜனக்³க³ஹணலக்க²ணா. ஸுக²ஸஞ்ஞாய ப²ஸ்ஸஸ்ஸ உபக³மனலக்க²ணதா ப²ஸ்ஸபச்சயதாவ வுத்தா. ‘‘பு²ட்டோ² ஸஞ்ஜானாதீ’’தி (ஸங்॰ நி॰ 4.93) ஹி வுத்தங் . அஸ்ஸாதோ³தி தண்ஹா. ஸங்க²தலக்க²ணானி உப்பாத³வயஞ்ஞத²த்தானி. யேபு⁴ய்யேன நிச்சக்³க³ஹணங் விஞ்ஞாணாதீ⁴னந்தி நிச்சஸஞ்ஞாய விஞ்ஞாணபத³ட்டா²னதா வுத்தா. ததா² ஹி ஸோ பி⁴க்கு² தங்யேவ விஞ்ஞாணங் ஸந்தா⁴வதி ஸங்ஸரதீதி விஞ்ஞாணவிஸயமேவ அத்தனோ நிச்சக்³கா³ஹங் பவேதே³ஸி. பஞ்சன்னங் க²ந்தா⁴னங் யதி³ அனிச்சதா து³க்க²தா ச ஸுதி³ட்டா², அத்தஸஞ்ஞா ஸுக²ஸஞ்ஞா அனவகாஸாதி ஆஹ – ‘‘அனிச்சஸஞ்ஞாது³க்க²ஸஞ்ஞாஅஸமனுபஸ்ஸனலக்க²ணா அத்தஸஞ்ஞா’’தி. ‘‘யத³னிச்சங் தங் து³க்க²ங், யங் து³க்க²ங் தத³னத்தா’’தி (ஸங்॰ நி॰ 3.15) ஹி வுத்தங்.
Piyarūpaṃ sātarūpanti piyāyitabbajātiyaṃ iṭṭhajātiyañca padaṭṭhānaṃ. ‘‘Yaṃ loke piyarūpaṃ sātarūpaṃ etthesā taṇhā uppajjamānā uppajjatī’’ti (dī. ni. 2.400; ma. ni. 1.133; vibha. 203) hi vuttaṃ. Adinnādānanti adinnādānacetanā. Sā hi ekavāraṃ uppannāpi anādīnavadassitāya lobhassa uppattikāraṇaṃ hotīti tassa padaṭṭhānaṃ vuttaṃ. Dosassa pāṇātipāto padaṭṭhānaṃ, mohassa micchāpaṭipadā padaṭṭhānanti etthāpi imināva nayena attho veditabbo. Vaṇṇasaṇṭhānabyañjanaggahaṇalakkhaṇāti nimittānubyañjanaggahaṇalakkhaṇā. Sukhasaññāya phassassa upagamanalakkhaṇatā phassapaccayatāva vuttā. ‘‘Phuṭṭho sañjānātī’’ti (saṃ. ni. 4.93) hi vuttaṃ . Assādoti taṇhā. Saṅkhatalakkhaṇāni uppādavayaññathattāni. Yebhuyyena niccaggahaṇaṃ viññāṇādhīnanti niccasaññāya viññāṇapadaṭṭhānatā vuttā. Tathā hi so bhikkhu taṃyeva viññāṇaṃ sandhāvati saṃsaratīti viññāṇavisayameva attano niccaggāhaṃ pavedesi. Pañcannaṃ khandhānaṃ yadi aniccatā dukkhatā ca sudiṭṭhā, attasaññā sukhasaññā anavakāsāti āha – ‘‘aniccasaññādukkhasaññāasamanupassanalakkhaṇā attasaññā’’ti. ‘‘Yadaniccaṃ taṃ dukkhaṃ, yaṃ dukkhaṃ tadanattā’’ti (saṃ. ni. 3.15) hi vuttaṃ.
யேபு⁴ய்யேன அத்தாபி⁴னிவேஸோ அரூபத⁴ம்மேஸூதி ஆஹ – ‘‘தஸ்ஸா நாமகாயோ பத³ட்டா²ன’’ந்தி. ஸப்³ப³ங் நெய்யந்தி சத்தாரி ஸச்சானி சதுஸச்சவினிமுத்தஸ்ஸ ஞெய்யஸ்ஸ அபா⁴வதோ. சித்தவிக்கே²பபடிஸங்ஹரணங் உத்³த⁴ச்சவிக்க²ம்ப⁴னங். அஸுபா⁴தி அஸுபா⁴னுபஸ்ஸனா, படிபா⁴க³னிமித்தபூ⁴தா அஸுபா⁴ ஏவ வா, தண்ஹாபடிபக்க²த்தா ஸமத²ஸ்ஸ அஸுபா⁴ பத³ட்டா²னந்தி வுத்தங். அபி⁴ஜ்ஜா²ய தனுகரணதோ அதி³ன்னாதா³னாவேரமணீ அலோப⁴ஸ்ஸ பத³ட்டா²னந்தி வுத்தா. ததா² ப்³யாபாத³ஸ்ஸ தனுகரணதோ பாணாதிபாதாவேரமணீ அதோ³ஸஸ்ஸ பத³ட்டா²னந்தி வுத்தா. வத்து²அவிப்படிபத்தி விஸயஸபா⁴வபடிவேதோ⁴, ஸம்மாபடிபத்தி ஸீலஸமாதி⁴ஸம்பதா³னங் நிப்³பி³தா³ஞாணேன அனபி⁴ரதிஞாணமேவ வா ததா² பவத்தங். ஸப்³பா³பி வேத³னா து³க்க²து³க்க²தாதி³பா⁴வதோ து³க்க²ந்தி கத்வா வுத்தங் – ‘‘து³க்க²ஸஞ்ஞாய வேத³னா பத³ட்டா²ன’’ந்தி. த⁴ம்மஸஞ்ஞாதி த⁴ம்மமத்தந்தி ஸஞ்ஞா.
Yebhuyyena attābhiniveso arūpadhammesūti āha – ‘‘tassā nāmakāyo padaṭṭhāna’’nti. Sabbaṃ neyyanti cattāri saccāni catusaccavinimuttassa ñeyyassa abhāvato. Cittavikkhepapaṭisaṃharaṇaṃ uddhaccavikkhambhanaṃ. Asubhāti asubhānupassanā, paṭibhāganimittabhūtā asubhā eva vā, taṇhāpaṭipakkhattā samathassa asubhā padaṭṭhānanti vuttaṃ. Abhijjhāya tanukaraṇato adinnādānāveramaṇī alobhassa padaṭṭhānanti vuttā. Tathā byāpādassa tanukaraṇato pāṇātipātāveramaṇī adosassa padaṭṭhānanti vuttā. Vatthuavippaṭipatti visayasabhāvapaṭivedho, sammāpaṭipatti sīlasamādhisampadānaṃ nibbidāñāṇena anabhiratiñāṇameva vā tathā pavattaṃ. Sabbāpi vedanā dukkhadukkhatādibhāvato dukkhanti katvā vuttaṃ – ‘‘dukkhasaññāya vedanā padaṭṭhāna’’nti. Dhammasaññāti dhammamattanti saññā.
ஸத்தானங் காயே அவீதராக³தா பஞ்சன்னங் அஜ்ஜ²த்திகாயதனானங் வஸேன ஹோதீதி ஆஹ – ‘‘பஞ்சிந்த்³ரியானி ரூபீனி ரூபராக³ஸ்ஸ பத³ட்டா²ன’’ந்தி. காயோ ஹி இத⁴ ரூபந்தி அதி⁴ப்பேதோ. விஸேஸதோ ஜா²னநிஸ்ஸயபூ⁴தே மனாயதனே ச நிகந்தி ஹோதீதி ஆஹ – ‘‘ச²ட்டா²யதனங் ப⁴வராக³ஸ்ஸ பத³ட்டா²ன’’ந்தி. ஏதி³ஸங் மா ரூபங் நிப்³ப³த்தது, மா ஏதி³ஸீ வேத³னாதி ஏவங் பவத்தா ரூபாதி³அபி⁴னந்த³னா நிப்³ப³த்தப⁴வானுபஸ்ஸிதா. ஞாணத³ஸ்ஸனஸ்ஸாதி கம்மஸ்ஸகதஞ்ஞாணத³ஸ்ஸனஸ்ஸ. யோனிஸோமனஸிகாரவதோ ஹி புப்³பே³னிவாஸானுஸ்ஸதி கம்மஸ்ஸகதஞ்ஞாணஸ்ஸ காரணங் ஹோதி, ந அயோனிஸோ உம்முஜ்ஜந்தஸ்ஸ. இமஸ்ஸ ச அத்த²ஸ்ஸ விபா⁴வனத்த²ங் மஹானாரத³கஸ்ஸபஜாதகங் (ஜா॰ 2.22.1153 ஆத³யோ), ப்³ரஹ்மஜாலே (தீ³॰ நி॰ 1.38 ஆத³யோ) ஏகச்சஸஸ்ஸதவாதோ³ ச உதா³ஹரிதப்³போ³. ‘‘ஓகப்பனலக்க²ணா’’திஆதி³னா ஸத்³தா⁴பஸாதா³னங் விஸேஸங் த³ஸ்ஸேதி. ஸோ பன ஸத்³தா⁴யயேவ அவத்தா²விஸேஸோ த³ட்ட²ப்³போ³. தத்த² ஓகப்பனங் ஸத்³த³ஹனவஸேன ஆரம்மணஸ்ஸ ஓகா³ஹணங் நிச்ச²யோ. அனாவிலதா அஸ்ஸத்³தி⁴யாபக³மேன சித்தஸ்ஸ அகாலுஸ்ஸியதா. அபி⁴பத்தி²யனா ஸத்³த³ஹனமேவ. அவேச்சபஸாதோ³ பஞ்ஞாஸஹிதோ ஆயதனக³தோ அபி⁴ப்பஸாதோ³. அபிலாபனங் அஸம்மோஸோ நிமுஜ்ஜித்வா விய ஆரம்மணஸ்ஸ ஓகா³ஹணங் வா, எத்த² ச ஸத்³தா⁴தீ³னங் பஸாத³ஸத்³தா⁴ஸம்மப்பதா⁴னஸதிபட்டா²னஜா²னங்கா³னி யதா²க்கமங் பத³ட்டா²னந்தி வத³ந்தேன அவத்தா²விஸேஸவஸேன பத³ட்டா²னபா⁴வோ வுத்தோதி த³ட்ட²ப்³ப³ங். ஸதிஸமாதீ⁴னங் வா காயாத³யோ ஸதிபட்டா²னாதி. விதக்காத³யோ ச ஜா²னானீதி பத³ட்டா²னபா⁴வேன வுத்தா.
Sattānaṃ kāye avītarāgatā pañcannaṃ ajjhattikāyatanānaṃ vasena hotīti āha – ‘‘pañcindriyāni rūpīni rūparāgassa padaṭṭhāna’’nti. Kāyo hi idha rūpanti adhippeto. Visesato jhānanissayabhūte manāyatane ca nikanti hotīti āha – ‘‘chaṭṭhāyatanaṃ bhavarāgassa padaṭṭhāna’’nti. Edisaṃ mā rūpaṃ nibbattatu, mā edisī vedanāti evaṃ pavattā rūpādiabhinandanā nibbattabhavānupassitā. Ñāṇadassanassāti kammassakataññāṇadassanassa. Yonisomanasikāravato hi pubbenivāsānussati kammassakataññāṇassa kāraṇaṃ hoti, na ayoniso ummujjantassa. Imassa ca atthassa vibhāvanatthaṃ mahānāradakassapajātakaṃ (jā. 2.22.1153 ādayo), brahmajāle (dī. ni. 1.38 ādayo) ekaccasassatavādo ca udāharitabbo. ‘‘Okappanalakkhaṇā’’tiādinā saddhāpasādānaṃ visesaṃ dasseti. So pana saddhāyayeva avatthāviseso daṭṭhabbo. Tattha okappanaṃ saddahanavasena ārammaṇassa ogāhaṇaṃ nicchayo. Anāvilatā assaddhiyāpagamena cittassa akālussiyatā. Abhipatthiyanā saddahanameva. Aveccapasādo paññāsahito āyatanagato abhippasādo. Apilāpanaṃ asammoso nimujjitvā viya ārammaṇassa ogāhaṇaṃ vā, ettha ca saddhādīnaṃ pasādasaddhāsammappadhānasatipaṭṭhānajhānaṅgāni yathākkamaṃ padaṭṭhānanti vadantena avatthāvisesavasena padaṭṭhānabhāvo vuttoti daṭṭhabbaṃ. Satisamādhīnaṃ vā kāyādayo satipaṭṭhānāti. Vitakkādayo ca jhānānīti padaṭṭhānabhāvena vuttā.
அஸ்ஸாத³மனஸிகாரோ ஸங்யோஜனீயேஸு த⁴ம்மேஸு அஸ்ஸாதா³னுபஸ்ஸிதா. புனப்³ப⁴வவிரோஹணாதி புனப்³ப⁴வாய விரோஹணா, புனப்³ப⁴வனிப்³ப³த்தனாரஹதா விபாகத⁴ம்மதாதி அத்தோ². ஓபபச்சயிகனிப்³ப³த்திலக்க²ணந்தி உபபத்திப⁴வபா⁴வேன நிப்³ப³த்தனஸபா⁴வங். நாமகாயரூபகாயஸங்கா⁴தலக்க²ணந்தி அரூபரூபகாயானங் ஸமூஹியபா⁴வங். இந்த்³ரியவவத்தா²னந்தி சக்கா²தீ³னங் ச²ன்னங் இந்த்³ரியானங் வவத்தி²தபா⁴வோ. ஓபபச்சயிகந்தி உபபத்திக்க²ந்த⁴னிப்³ப³த்தகங். உபதீ⁴தி அத்தபா⁴வோ. அத்தனோ பியஸ்ஸ மரணங் சிந்தெந்தஸ்ஸ பா³லஸ்ஸ யேபு⁴ய்யேன ஸோகோ உப்பஜ்ஜதீதி மரணங் ஸோகஸ்ஸ பத³ட்டா²னந்தி வுத்தங். உஸ்ஸுக்கங் சேதஸோ ஸந்தாபோ. ஓத³ஹனந்தி அவத³ஹனங். அத்தனோ நிஸ்ஸயஸ்ஸ ஸந்தபனமேவ ப⁴வஸ்ஸாதி வுத்தங் ப⁴வங் த³ஸ்ஸேதுங் ‘‘இமானீ’’திஆதி³ வுத்தங். தத்த² ப⁴வஸ்ஸ அங்கா³னி ப⁴வஸங்கா²தானி ச அங்கா³னி ப⁴வங்கா³னி. தேஸு கிலேஸா ப⁴வஸ்ஸ அங்கா³னி. கம்மவிபாகவட்டங் ப⁴வஸங்கா²தானி அங்கா³னி. ஸமக்³கா³னீதி ஸப்³பா³னி. க²ந்தா⁴யதனாதீ³னங் அபராபருப்பத்திஸங்ஸரணங் ஸங்ஸாரோ. தஸ்ஸ புரிமபுரிமஜாதினிப்ப²ன்னங் கிலேஸாதி³வட்டங் காரணந்தி ஆஹ – ‘‘ப⁴வோ ஸங்ஸாரஸ்ஸ பத³ட்டா²ன’’ந்தி. ஸம்பாபகஹேதுபா⁴வங் ஸந்தா⁴ய ‘‘மக்³கோ³ நிரோத⁴ஸ்ஸ பத³ட்டா²ன’’ந்தி வுத்தங்.
Assādamanasikāro saṃyojanīyesu dhammesu assādānupassitā. Punabbhavavirohaṇāti punabbhavāya virohaṇā, punabbhavanibbattanārahatā vipākadhammatāti attho. Opapaccayikanibbattilakkhaṇanti upapattibhavabhāvena nibbattanasabhāvaṃ. Nāmakāyarūpakāyasaṅghātalakkhaṇanti arūparūpakāyānaṃ samūhiyabhāvaṃ. Indriyavavatthānanti cakkhādīnaṃ channaṃ indriyānaṃ vavatthitabhāvo. Opapaccayikanti upapattikkhandhanibbattakaṃ. Upadhīti attabhāvo. Attano piyassa maraṇaṃ cintentassa bālassa yebhuyyena soko uppajjatīti maraṇaṃ sokassa padaṭṭhānanti vuttaṃ. Ussukkaṃ cetaso santāpo. Odahananti avadahanaṃ. Attano nissayassa santapanameva bhavassāti vuttaṃ bhavaṃ dassetuṃ ‘‘imānī’’tiādi vuttaṃ. Tattha bhavassa aṅgāni bhavasaṅkhātāni ca aṅgāni bhavaṅgāni. Tesu kilesā bhavassa aṅgāni. Kammavipākavaṭṭaṃ bhavasaṅkhātāni aṅgāni. Samaggānīti sabbāni. Khandhāyatanādīnaṃ aparāparuppattisaṃsaraṇaṃ saṃsāro. Tassa purimapurimajātinipphannaṃ kilesādivaṭṭaṃ kāraṇanti āha – ‘‘bhavo saṃsārassa padaṭṭhāna’’nti. Sampāpakahetubhāvaṃ sandhāya ‘‘maggo nirodhassa padaṭṭhāna’’nti vuttaṃ.
கம்மட்டா²னோகா³ஹகஸ்ஸ ஓதரணட்டா²னதாய ப³ஹுஸ்ஸுதோ தித்த²ங் நாம, தஸ்ஸ ஸம்மாபயிருபாஸனா தித்த²ஞ்ஞுதா. த⁴ம்மூபஸஞ்ஹிதங் பாமோஜ்ஜங் பீதங் நாம, ஸப்பாயத⁴ம்மஸ்ஸவனேன தங் உப்பாதெ³த்வா கம்மட்டா²னஸ்ஸ ப்³ரூஹனா பீதஞ்ஞுதா, பா⁴வனாய தோ²கம்பி லயாபத்தியா உத்³த⁴ங்பத்தியா ச ஜானநா பத்தஞ்ஞுதா. அத்தனோ பஞ்சஹி பதா⁴னியங்கே³ஹி ஸமன்னாக³தஸ்ஸ ஜானநா அத்தஞ்ஞுதா, தேஸு புரிமானங் புரிமானங் பச்சி²மஸ்ஸ பச்சி²மஸ்ஸ பத³ட்டா²னபா⁴வோ ஸுவிஞ்ஞெய்யோ ஏவ. கதபுஞ்ஞஸ்ஸேவ பதிரூபதே³ஸவாஸோ ஸம்ப⁴வதி , ந இதரஸ்ஸாதி ‘‘புப்³பே³கதபுஞ்ஞதா பதிரூபதே³ஸவாஸஸ்ஸ பத³ட்டா²ன’’ந்தி வுத்தங். யதா²பூ⁴தஞாணத³ஸ்ஸனங் ஸஹ அதி⁴ட்டா²னேன தருணவிபஸ்ஸனா. நிப்³பி³தா³தி ப³லவவிபஸ்ஸனா. விராகோ³தி மக்³கோ³. விமுத்தீதி ப²லங். ஏவந்தி யதி³த³ங் ‘‘தஸ்ஸா விபல்லாஸா பத³ட்டா²ன’’ந்திஆதி³னா அவிஜ்ஜாதீ³னங் பத³ட்டா²னங் த³ஸ்ஸிதங், இமினா நயேன அதா²பி யோ கோசி உபனிஸ்ஸயோ ப³லவபச்சயோதி யோ கோசி அவஸேஸபச்சயோ, ஸப்³போ³ ஸோ பத³ட்டா²னங் காரணந்தி வேதி³தப்³ப³ங். ‘‘ஏவங் யா காசி உபனிஸா யோக³தோ ச பச்சயதோ சா’’திபி பட²ந்தி. தத்த² உபனிஸாதி காரணங், யோக³தோதி யுத்திதோ, பச்சயதோதி பச்சயபா⁴வமத்ததோதி அத்தோ² வேதி³தப்³போ³. யங் பனெத்த² அத்த²தோ ந விப⁴த்தங், தங் ஸுவிஞ்ஞெய்யமேவ.
Kammaṭṭhānogāhakassa otaraṇaṭṭhānatāya bahussuto titthaṃ nāma, tassa sammāpayirupāsanā titthaññutā. Dhammūpasañhitaṃ pāmojjaṃ pītaṃ nāma, sappāyadhammassavanena taṃ uppādetvā kammaṭṭhānassa brūhanā pītaññutā, bhāvanāya thokampi layāpattiyā uddhaṃpattiyā ca jānanā pattaññutā. Attano pañcahi padhāniyaṅgehi samannāgatassa jānanā attaññutā, tesu purimānaṃ purimānaṃ pacchimassa pacchimassa padaṭṭhānabhāvo suviññeyyo eva. Katapuññasseva patirūpadesavāso sambhavati , na itarassāti ‘‘pubbekatapuññatā patirūpadesavāsassa padaṭṭhāna’’nti vuttaṃ. Yathābhūtañāṇadassanaṃ saha adhiṭṭhānena taruṇavipassanā. Nibbidāti balavavipassanā. Virāgoti maggo. Vimuttīti phalaṃ. Evanti yadidaṃ ‘‘tassā vipallāsā padaṭṭhāna’’ntiādinā avijjādīnaṃ padaṭṭhānaṃ dassitaṃ, iminā nayena athāpi yo koci upanissayo balavapaccayoti yo koci avasesapaccayo, sabbo so padaṭṭhānaṃ kāraṇanti veditabbaṃ. ‘‘Evaṃ yā kāci upanisā yogato ca paccayato cā’’tipi paṭhanti. Tattha upanisāti kāraṇaṃ, yogatoti yuttito, paccayatoti paccayabhāvamattatoti attho veditabbo. Yaṃ panettha atthato na vibhattaṃ, taṃ suviññeyyameva.
பத³ட்டா²னஹாரவிப⁴ங்க³வண்ணனா நிட்டி²தா.
Padaṭṭhānahāravibhaṅgavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / நெத்திப்பகரணபாளி • Nettippakaraṇapāḷi / 4. பத³ட்டா²னஹாரவிப⁴ங்கோ³ • 4. Padaṭṭhānahāravibhaṅgo
டீகா • Tīkā / ஸுத்தபிடக (டீகா) • Suttapiṭaka (ṭīkā) / கு²த்³த³கனிகாய (டீகா) • Khuddakanikāya (ṭīkā) / நெத்திப்பகரண-டீகா • Nettippakaraṇa-ṭīkā / 4. பத³ட்டா²னஹாரவிப⁴ங்க³வண்ணனா • 4. Padaṭṭhānahāravibhaṅgavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / கு²த்³த³கனிகாய (டீகா) • Khuddakanikāya (ṭīkā) / நெத்திவிபா⁴வினீ • Nettivibhāvinī / 4. பத³ட்டா²னஹாரவிப⁴ங்க³விபா⁴வனா • 4. Padaṭṭhānahāravibhaṅgavibhāvanā
