| Library / Tipiṭaka / д̇ибидага • Tipiṭaka / бадисамбхид̣̇аамаг̇г̇а-адтагат̇аа • Paṭisambhidāmagga-aṭṭhakathā |
43. бад̣̇зсавихааран̃аан̣анид̣̇д̣̇зсаван̣н̣анаа
43. Padesavihārañāṇaniddesavaṇṇanā
94. бад̣̇зсавихааран̃аан̣анид̣̇д̣̇зсз язнаагаарзна маад̇игааяа уд̣̇д̣̇идто бад̣̇зсо бажжавзгкид̇аб̣б̣о, д̇ам̣ д̣̇ассзнд̇о мижчаад̣̇идтибажжаяааби взд̣̇аяид̇анд̇иаад̣̇имааха. д̇ад̇т̇а мижчаад̣̇идтибажжаяаад̇и д̣̇идтисамбаяуд̇д̇авзд̣̇анааби ваддад̇и д̣̇идтим̣ убаниссаяам̣ гад̇ваа уббаннаа гусалаагусалавзд̣̇анааби вибаагавзд̣̇анааби. д̇ад̇т̇а мижчаад̣̇идтисамбаяуд̇д̇аа агусалаава ход̇и, д̣̇идтим̣ бана убаниссааяа гусалааби уббаж̇ж̇анд̇и агусалааби. мижчаад̣̇идтигаа хи д̣̇идтим̣ убаниссааяа багкад̣̇ивасзсу яааг̇убхад̇д̇аад̣̇ийни д̣̇знд̇и, анд̇хагудтиаад̣̇ийнам̣ вад̇д̇ам̣ бадтабзнд̇и, жад̇умахаабат̇з саалам̣ гаронд̇и, богкаран̣им̣ кан̣аабзнд̇и, бубпаараамам̣ палаараамам̣ робзнд̇и, над̣̇ийвид̣̇уг̇г̇зсу сзд̇ум̣ ад̇т̇аранд̇и, висамам̣ самам̣ гаронд̇и. ид̇и д̇зсам̣ гусалаа взд̣̇анаа уббаж̇ж̇ад̇и. мижчаад̣̇идтим̣ бана ниссааяа саммаад̣̇идтигз аггосанд̇и барибхаасанд̇и вад̇хаб̣анд̇хаад̣̇ийни гаронд̇и, баан̣ам̣ вад̇хид̇ваа д̣̇звад̇аанам̣ убахаранд̇и. ид̇и нзсам̣ агусалаа взд̣̇анаа уббаж̇ж̇ад̇и. вибаагавзд̣̇анаа бана бхаванд̇араг̇ад̇аанам̣ ход̇и. саа бана мижчаад̣̇идти сахаж̇аад̇ааяа взд̣̇анааяа сахаж̇аад̇аан̃н̃аман̃н̃аниссаяасамбаяуд̇д̇аад̇т̇иавиг̇ад̇абажжаязхи бажжаяо ход̇и, самананд̇аранируд̣̇д̇хаа мижчаад̣̇идти бажжуббаннамижчаад̣̇идтисамбаяуд̇д̇ааяа взд̣̇анааяа ананд̇арасамананд̇аруубаниссаяааасзвананад̇т̇ивиг̇ад̇абажжаязхи бажжаяо ход̇и, мижчаад̣̇идтим̣ г̇арум̣ гад̇ваа абхинанд̣̇анд̇асса лобхасахаг̇ад̇авзд̣̇анааяа аарамман̣ааарамман̣аад̇хибад̇иаарамман̣уубаниссаяабажжаязхи бажжаяо ход̇и, саб̣б̣аагусалзхи мижчаад̣̇идтим̣ аарамман̣амад̇д̇ам̣ гаронд̇асса саб̣б̣аагусалавзд̣̇анааяа мижчаад̣̇идтим̣ бажжавзгканд̇асса вибассанд̇асса гусалааб̣яаагад̇авзд̣̇анааяа аарамман̣абажжаязна бажжаяо ход̇и, мижчаад̣̇идтибажжаязна уббаж̇ж̇амаанаанам̣ гусалаагусалавзд̣̇анаанам̣ бхаванд̇арз вибаагавзд̣̇анаанан̃жа убаниссаяабажжаязна бажжаяо ход̇и.
94. Padesavihārañāṇaniddese yenākārena mātikāya uddiṭṭho padeso paccavekkhitabbo, taṃ dassento micchādiṭṭhipaccayāpi vedayitantiādimāha. Tattha micchādiṭṭhipaccayāti diṭṭhisampayuttavedanāpi vaṭṭati diṭṭhiṃ upanissayaṃ katvā uppannā kusalākusalavedanāpi vipākavedanāpi. Tattha micchādiṭṭhisampayuttā akusalāva hoti, diṭṭhiṃ pana upanissāya kusalāpi uppajjanti akusalāpi. Micchādiṭṭhikā hi diṭṭhiṃ upanissāya pakkhadivasesu yāgubhattādīni denti, andhakuṭṭhiādīnaṃ vattaṃ paṭṭhapenti, catumahāpathe sālaṃ karonti, pokkharaṇiṃ khaṇāpenti, pupphārāmaṃ phalārāmaṃ ropenti, nadīviduggesu setuṃ attharanti, visamaṃ samaṃ karonti. Iti tesaṃ kusalā vedanā uppajjati. Micchādiṭṭhiṃ pana nissāya sammādiṭṭhike akkosanti paribhāsanti vadhabandhādīni karonti, pāṇaṃ vadhitvā devatānaṃ upaharanti. Iti nesaṃ akusalā vedanā uppajjati. Vipākavedanā pana bhavantaragatānaṃ hoti. Sā pana micchādiṭṭhi sahajātāya vedanāya sahajātaaññamaññanissayasampayuttaatthiavigatapaccayehi paccayo hoti, samanantaraniruddhā micchādiṭṭhi paccuppannamicchādiṭṭhisampayuttāya vedanāya anantarasamanantarūpanissayaāsevananatthivigatapaccayehi paccayo hoti, micchādiṭṭhiṃ garuṃ katvā abhinandantassa lobhasahagatavedanāya ārammaṇaārammaṇādhipatiārammaṇūpanissayapaccayehi paccayo hoti, sabbākusalehi micchādiṭṭhiṃ ārammaṇamattaṃ karontassa sabbākusalavedanāya micchādiṭṭhiṃ paccavekkhantassa vipassantassa kusalābyākatavedanāya ārammaṇapaccayena paccayo hoti, micchādiṭṭhipaccayena uppajjamānānaṃ kusalākusalavedanānaṃ bhavantare vipākavedanānañca upanissayapaccayena paccayo hoti.
мижчаад̣̇идтивуубасамабажжаяаад̇и мижчаад̣̇идтивуубасамо наама саммаад̣̇идти, д̇асмаа яам̣ саммаад̣̇идтибажжаяаа взд̣̇аяид̇ам̣ вуд̇д̇ам̣, д̇ад̣̇зва ‘‘мижчаад̣̇идтивуубасамабажжаяаа’’д̇и взд̣̇ид̇аб̣б̣ам̣. гзжи бана ‘‘мижчаад̣̇идтивуубасамо наама вибассанаагкан̣з сод̇аабад̇д̇имаг̇г̇агкан̣з жаа’’д̇и вад̣̇анд̇и.
Micchādiṭṭhivūpasamapaccayāti micchādiṭṭhivūpasamo nāma sammādiṭṭhi, tasmā yaṃ sammādiṭṭhipaccayā vedayitaṃ vuttaṃ, tadeva ‘‘micchādiṭṭhivūpasamapaccayā’’ti veditabbaṃ. Keci pana ‘‘micchādiṭṭhivūpasamo nāma vipassanākkhaṇe sotāpattimaggakkhaṇe cā’’ti vadanti.
саммаад̣̇идтибажжаяааби взд̣̇аяид̇анд̇и зд̇т̇ааби саммаад̣̇идтисамбаяуд̇д̇авзд̣̇анааби ваддад̇и саммаад̣̇идтим̣ убаниссаяам̣ гад̇ваа уббаннаа гусалаагусалавзд̣̇анааби вибаагавзд̣̇анааби. д̇ад̇т̇а саммаад̣̇идтисамбаяуд̇д̇аа гусалаава ход̇и, саммаад̣̇идтим̣ бана убаниссааяа б̣уд̣̇д̇хабууж̇аа д̣̇ийбамаалааробанам̣ махаад̇хаммассаванам̣ аббад̇идтид̇з д̣̇исаабхааг̇з жзд̇ияабад̇идтаабананд̇и звамаад̣̇ийни бун̃н̃аани гаронд̇и. ид̇и нзсам̣ гусалаа взд̣̇анаа уббаж̇ж̇ад̇и. саммаад̣̇идтимзва ниссааяа мижчаад̣̇идтигз аггосанд̇и барибхаасанд̇и, ад̇д̇аанам̣ уггам̣санд̇и, барам̣ вамбхзнд̇и. ид̇и нзсам̣ агусалаа взд̣̇анаа уббаж̇ж̇ад̇и. вибаагавзд̣̇анаа бана бхаванд̇араг̇ад̇аанам̣язва ход̇и. саа бана саммаад̣̇идти сахаж̇аад̇ааяа самананд̇аранируд̣̇д̇хааяа бажжуббаннааяа взд̣̇анааяа мижчаад̣̇идтияаа вуд̇д̇абажжаязхзва бажжаяо ход̇и, логигасаммаад̣̇идти бажжавзгкан̣асамбаяуд̇д̇ааяа вибассанаасамбаяуд̇д̇ааяа ниганд̇исамбаяуд̇д̇ааяа жа взд̣̇анааяа аарамман̣абажжаязна бажжаяо ход̇и, мижчаад̣̇идтияаа вуд̇д̇анаязнзва убаниссаяабажжаязна бажжаяо ход̇и, маг̇г̇апаласаммаад̣̇идти бажжавзгкан̣асамбаяуд̇д̇ааяа взд̣̇анааяа аарамман̣ааарамман̣аад̇хибад̇иаарамман̣уубаниссаяабажжаяавасзна бажжаяо ход̇и.
Sammādiṭṭhipaccayāpi vedayitanti etthāpi sammādiṭṭhisampayuttavedanāpi vaṭṭati sammādiṭṭhiṃ upanissayaṃ katvā uppannā kusalākusalavedanāpi vipākavedanāpi. Tattha sammādiṭṭhisampayuttā kusalāva hoti, sammādiṭṭhiṃ pana upanissāya buddhapūjā dīpamālāropanaṃ mahādhammassavanaṃ appatiṭṭhite disābhāge cetiyapatiṭṭhāpananti evamādīni puññāni karonti. Iti nesaṃ kusalā vedanā uppajjati. Sammādiṭṭhimeva nissāya micchādiṭṭhike akkosanti paribhāsanti, attānaṃ ukkaṃsanti, paraṃ vambhenti. Iti nesaṃ akusalā vedanā uppajjati. Vipākavedanā pana bhavantaragatānaṃyeva hoti. Sā pana sammādiṭṭhi sahajātāya samanantaraniruddhāya paccuppannāya vedanāya micchādiṭṭhiyā vuttapaccayeheva paccayo hoti, lokikasammādiṭṭhi paccavekkhaṇasampayuttāya vipassanāsampayuttāya nikantisampayuttāya ca vedanāya ārammaṇapaccayena paccayo hoti, micchādiṭṭhiyā vuttanayeneva upanissayapaccayena paccayo hoti, maggaphalasammādiṭṭhi paccavekkhaṇasampayuttāya vedanāya ārammaṇaārammaṇādhipatiārammaṇūpanissayapaccayavasena paccayo hoti.
саммаад̣̇идтивуубасамабажжаяааби взд̣̇аяид̇анд̇и саммаад̣̇идтивуубасамо наама мижчаад̣̇идти, д̇асмаа яам̣ мижчаад̣̇идтибажжаяаа взд̣̇аяид̇ам̣ вуд̇д̇ам̣, д̇ад̣̇зва ‘‘саммаад̣̇идтивуубасамабажжаяаа’’д̇и взд̣̇ид̇аб̣б̣ам̣. мижчаасан̇габбабажжаяаа мижчаасан̇габбавуубасамабажжаяаад̇иаад̣̇ийсуби зсзва наяо. яасса яасса хи ‘‘вуубасамабажжаяаа’’д̇и вужжад̇и, д̇асса д̇асса бадибагкад̇хаммабажжаяаава д̇ам̣ д̇ам̣ взд̣̇аяид̇ам̣ ад̇хиббзд̇ам̣. мижчаан̃аан̣аад̣̇ийсу бана мижчаан̃аан̣ам̣ наама баабагирияаасу убааяажинд̇аа. ат̇а ваа мижчаан̃аан̣ам̣ мижчаабажжавзгкан̣ан̃аан̣ам̣. саммаан̃аан̣ам̣ наама вибассанаасаммаад̣̇идтим̣ логуд̇д̇арасаммаад̣̇идтин̃жа табзд̇ваа авасзсагусалааб̣яаагад̇ам̣ н̃аан̣ам̣. мижчаавимуд̇д̇и наама баабаад̇химуд̇д̇ид̇аа. ат̇а ваа аяаат̇аававимуд̇д̇и анияяаанигавимуд̇д̇и авимуд̇д̇ассзва сад̇о вимуд̇д̇исан̃н̃ийд̇и. саммаавимуд̇д̇и наама галяаан̣аад̇химуд̇д̇ид̇аа палавимуд̇д̇и жа. саммаад̣̇идтиаад̣̇аяо хздтаа вуд̇д̇ад̇т̇ааязва.
Sammādiṭṭhivūpasamapaccayāpivedayitanti sammādiṭṭhivūpasamo nāma micchādiṭṭhi, tasmā yaṃ micchādiṭṭhipaccayā vedayitaṃ vuttaṃ, tadeva ‘‘sammādiṭṭhivūpasamapaccayā’’ti veditabbaṃ. Micchāsaṅkappapaccayā micchāsaṅkappavūpasamapaccayātiādīsupi eseva nayo. Yassa yassa hi ‘‘vūpasamapaccayā’’ti vuccati, tassa tassa paṭipakkhadhammapaccayāva taṃ taṃ vedayitaṃ adhippetaṃ. Micchāñāṇādīsu pana micchāñāṇaṃ nāma pāpakiriyāsu upāyacintā. Atha vā micchāñāṇaṃ micchāpaccavekkhaṇañāṇaṃ. Sammāñāṇaṃ nāma vipassanāsammādiṭṭhiṃ lokuttarasammādiṭṭhiñca ṭhapetvā avasesakusalābyākataṃ ñāṇaṃ. Micchāvimutti nāma pāpādhimuttitā. Atha vā ayāthāvavimutti aniyyānikavimutti avimuttasseva sato vimuttisaññīti. Sammāvimutti nāma kalyāṇādhimuttitā phalavimutti ca. Sammādiṭṭhiādayo heṭṭhā vuttatthāyeva.
чанд̣̇абажжаяаабийд̇иаад̣̇ийсу бана чанд̣̇о наама лобхо, чанд̣̇абажжаяаа адталобхасахаг̇ад̇ажид̇д̇асамбаяуд̇д̇авзд̣̇анаа взд̣̇ид̇аб̣б̣аа. чанд̣̇авуубасамабажжаяаа батамаж̇жхаанавзд̣̇анаава. вид̇аггабажжаяаа батамаж̇жхаанавзд̣̇анаа. вид̇аггавуубасамабажжаяаа д̣̇уд̇ияаж̇жхаанавзд̣̇анаа. сан̃н̃аабажжаяаа табзд̇ваа батамаж̇жхаанам̣ сзсаа ча самаабад̇д̇ивзд̣̇анаа. сан̃н̃аавуубасамабажжаяаа нзвасан̃н̃аанаасан̃н̃ааяад̇анавзд̣̇анаа.
Chandapaccayāpītiādīsu pana chando nāma lobho, chandapaccayā aṭṭhalobhasahagatacittasampayuttavedanā veditabbā. Chandavūpasamapaccayā paṭhamajjhānavedanāva. Vitakkapaccayā paṭhamajjhānavedanā. Vitakkavūpasamapaccayā dutiyajjhānavedanā. Saññāpaccayā ṭhapetvā paṭhamajjhānaṃ sesā cha samāpattivedanā. Saññāvūpasamapaccayā nevasaññānāsaññāyatanavedanā.
чанд̣̇о жа авуубасанд̇о ход̇ийд̇иаад̣̇ийсу сажз чанд̣̇авид̇аггасан̃н̃аа авуубасанд̇аа хонд̇ийд̇и ад̇т̇о. д̇аббажжаяаад̇и со чанд̣̇авид̇аггасан̃н̃аанам̣ авуубасамо зва бажжаяо д̇аббажжаяо, д̇асмаа д̇аббажжаяаа. чанд̣̇авид̇аггасан̃н̃ааавуубасамабажжаяаа взд̣̇анаа ход̇ийд̇и ад̇т̇о. саа адталобхасахаг̇ад̇ажид̇д̇асамбаяуд̇д̇авзд̣̇анаа ход̇и. сажз чанд̣̇о вуубасанд̇о вид̇аггасан̃н̃аа авуубасанд̇аа. д̇аббажжаяаад̇и со чанд̣̇асса вуубасамо вид̇аггасан̃н̃аанам̣ авуубасамо зва бажжаяо д̇аббажжаяо, д̇асмаа д̇аббажжаяаа. саа батамаж̇жхаанавзд̣̇анаава. сажз чанд̣̇авид̇аггаа вуубасанд̇аа сан̃н̃аа авуубасанд̇аа. д̇аббажжаяаад̇и со чанд̣̇авид̇аггаанам̣ вуубасамо сан̃н̃ааяа авуубасамо зва бажжаяо д̇аббажжаяо, д̇асмаа д̇аббажжаяаа. саа д̣̇уд̇ияаж̇жхаанавзд̣̇анаава. сажз чанд̣̇авид̇аггасан̃н̃аа вуубасанд̇аа. д̇аббажжаяаад̇и со чанд̣̇авид̇аггасан̃н̃аанам̣ вуубасамо зва бажжаяо д̇аббажжаяо, д̇асмаа д̇аббажжаяаа. саа нзвасан̃н̃аанаасан̃н̃ааяад̇анавзд̣̇анаава. гзжи бана ‘‘чанд̣̇о наама аббанам̣ баабун̣иссаамийд̇и буб̣б̣абхааг̇з д̇хаммажчанд̣̇о, аббанааббад̇д̇асса со чанд̣̇о вуубасанд̇о ход̇и. батамаж̇жхаанз вид̇агго ход̇и, д̣̇уд̇ияаж̇жхаанаббад̇д̇асса вид̇агго вуубасанд̇о ход̇и. сад̇д̇асу самаабад̇д̇ийсу сан̃н̃аа ход̇и, нзвасан̃н̃аанаасан̃н̃ааяад̇анам̣ самаабаннасса жа нирод̇хам̣ самаабаннасса жа сан̃н̃аа вуубасанд̇аа ход̇ий’’д̇и звам̣ ван̣н̣аяанд̇и. ид̇ха бана нирод̇хасамаабад̇д̇и на яуж̇ж̇ад̇и. аббад̇д̇асса бад̇д̇ияаад̇и арахад̇д̇апаласса бад̇д̇ад̇т̇ааяа. ад̇т̇и ааяаванд̇и ад̇т̇и вийрияам̣. ааяааванд̇иби баато. д̇асмимби таанз ануббад̇д̇зд̇и д̇асса вийрияаарамбхасса васзна д̇асмим̣ арахад̇д̇апаласса гааран̣з арияамаг̇г̇з ануббад̇д̇з . д̇аббажжаяааби взд̣̇аяид̇анд̇и арахад̇д̇асса таанабажжаяаа взд̣̇аяид̇ам̣. зд̇зна жад̇умаг̇г̇асахаж̇аад̇аа ниб̣б̣ад̇д̇ид̇алогуд̇д̇аравзд̣̇анаа г̇ахид̇аа. гзжи бана ‘‘ааяаванд̇и бадибад̇д̇и. д̇асмимби таанз ануббад̇д̇зд̇и д̇ассаа бхуумияаа бад̇д̇ияаа’’д̇и ван̣н̣аяанд̇и.
Chando ca avūpasanto hotītiādīsu sace chandavitakkasaññā avūpasantā hontīti attho. Tappaccayāti so chandavitakkasaññānaṃ avūpasamo eva paccayo tappaccayo, tasmā tappaccayā. Chandavitakkasaññāavūpasamapaccayā vedanā hotīti attho. Sā aṭṭhalobhasahagatacittasampayuttavedanā hoti. Sace chando vūpasanto vitakkasaññā avūpasantā. Tappaccayāti so chandassa vūpasamo vitakkasaññānaṃ avūpasamo eva paccayo tappaccayo, tasmā tappaccayā. Sā paṭhamajjhānavedanāva. Sace chandavitakkā vūpasantā saññā avūpasantā. Tappaccayāti so chandavitakkānaṃ vūpasamo saññāya avūpasamo eva paccayo tappaccayo, tasmā tappaccayā. Sā dutiyajjhānavedanāva. Sace chandavitakkasaññā vūpasantā. Tappaccayāti so chandavitakkasaññānaṃ vūpasamo eva paccayo tappaccayo, tasmā tappaccayā. Sā nevasaññānāsaññāyatanavedanāva. Keci pana ‘‘chando nāma appanaṃ pāpuṇissāmīti pubbabhāge dhammacchando, appanāppattassa so chando vūpasanto hoti. Paṭhamajjhāne vitakko hoti, dutiyajjhānappattassa vitakko vūpasanto hoti. Sattasu samāpattīsu saññā hoti, nevasaññānāsaññāyatanaṃ samāpannassa ca nirodhaṃ samāpannassa ca saññā vūpasantā hotī’’ti evaṃ vaṇṇayanti. Idha pana nirodhasamāpatti na yujjati. Appattassapattiyāti arahattaphalassa pattatthāya. Atthi āyavanti atthi vīriyaṃ. Āyāvantipi pāṭho. Tasmimpi ṭhāne anuppatteti tassa vīriyārambhassa vasena tasmiṃ arahattaphalassa kāraṇe ariyamagge anuppatte . Tappaccayāpi vedayitanti arahattassa ṭhānapaccayā vedayitaṃ. Etena catumaggasahajātā nibbattitalokuttaravedanā gahitā. Keci pana ‘‘āyavanti paṭipatti. Tasmimpi ṭhāne anuppatteti tassā bhūmiyā pattiyā’’ti vaṇṇayanti.
бад̣̇зсавихааран̃аан̣анид̣̇д̣̇зсаван̣н̣анаа нидтид̇аа.
Padesavihārañāṇaniddesavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / бадисамбхид̣̇аамаг̇г̇абаал̣и • Paṭisambhidāmaggapāḷi / 43. бад̣̇зсавихааран̃аан̣анид̣̇д̣̇зсо • 43. Padesavihārañāṇaniddeso
