| Library / Tipiṭaka / তিপিটক • Tipiṭaka / পটিসম্ভিদামগ্গপাল়ি • Paṭisambhidāmaggapāḷi |
৪৩. পদেসৰিহারঞাণনিদ্দেসো
43. Padesavihārañāṇaniddeso
৯৪. কথং সমোদহনে পঞ্ঞা পদেসৰিহারে ঞাণং? মিচ্ছাদিট্ঠিপচ্চযাপি ৰেদযিতং, মিচ্ছাদিট্ঠিৰূপসমপচ্চযাপি ৰেদযিতং। সম্মাদিট্ঠিপচ্চযাপি ৰেদযিতং, সম্মাদিট্ঠিৰূপসমপচ্চযাপি ৰেদযিতং। মিচ্ছাসঙ্কপ্পপচ্চযাপি ৰেদযিতং, মিচ্ছাসঙ্কপ্পৰূপসমপচ্চযাপি ৰেদযিতং। সম্মাসঙ্কপ্পপচ্চযাপি ৰেদযিতং, সম্মাসঙ্কপ্পৰূপসমপচ্চযাপি ৰেদযিতং…পে॰… মিচ্ছাৰিমুত্তিপচ্চযাপি ৰেদযিতং, মিচ্ছাৰিমুত্তিৰূপসমপচ্চযাপি ৰেদযিতং। সম্মাৰিমুত্তিপচ্চযাপি ৰেদযিতং, সম্মাৰিমুত্তিৰূপসমপচ্চযাপি ৰেদযিতং। ছন্দপচ্চযাপি ৰেদযিতং, ছন্দৰূপসমপচ্চযাপি ৰেদযিতং। ৰিতক্কপচ্চযাপি ৰেদযিতং, ৰিতক্কৰূপসমপচ্চযাপি ৰেদযিতং। সঞ্ঞাপচ্চযাপি ৰেদযিতং, সঞ্ঞাৰূপসমপচ্চযাপি ৰেদযিতং।
94. Kathaṃ samodahane paññā padesavihāre ñāṇaṃ? Micchādiṭṭhipaccayāpi vedayitaṃ, micchādiṭṭhivūpasamapaccayāpi vedayitaṃ. Sammādiṭṭhipaccayāpi vedayitaṃ, sammādiṭṭhivūpasamapaccayāpi vedayitaṃ. Micchāsaṅkappapaccayāpi vedayitaṃ, micchāsaṅkappavūpasamapaccayāpi vedayitaṃ. Sammāsaṅkappapaccayāpi vedayitaṃ, sammāsaṅkappavūpasamapaccayāpi vedayitaṃ…pe… micchāvimuttipaccayāpi vedayitaṃ, micchāvimuttivūpasamapaccayāpi vedayitaṃ. Sammāvimuttipaccayāpi vedayitaṃ, sammāvimuttivūpasamapaccayāpi vedayitaṃ. Chandapaccayāpi vedayitaṃ, chandavūpasamapaccayāpi vedayitaṃ. Vitakkapaccayāpi vedayitaṃ, vitakkavūpasamapaccayāpi vedayitaṃ. Saññāpaccayāpi vedayitaṃ, saññāvūpasamapaccayāpi vedayitaṃ.
ছন্দো চ অৰূপসন্তো হোতি, ৰিতক্কো চ অৰূপসন্তো হোতি, সঞ্ঞা চ অৰূপসন্তা হোতি, তপ্পচ্চযাপি ৰেদযিতং। ছন্দো চ ৰূপসন্তো হোতি, ৰিতক্কো চ অৰূপসন্তো হোতি, সঞ্ঞা চ অৰূপসন্তা হোতি, তপ্পচ্চযাপি ৰেদযিতং। ছন্দো চ ৰূপসন্তো হোতি, ৰিতক্কো চ ৰূপসন্তো হোতি, সঞ্ঞা চ অৰূপসন্তা হোতি, তপ্পচ্চযাপি ৰেদযিতং। ছন্দো চ ৰূপসন্তো হোতি, ৰিতক্কো চ ৰূপসন্তো হোতি, সঞ্ঞা চ ৰূপসন্তা হোতি, তপ্পচ্চযাপি ৰেদযিতং। অপ্পত্তস্স পত্তিযা অত্থি আসৰং, তস্মিম্পি ঠানে অনুপ্পত্তে তপ্পচ্চযাপি ৰেদযিতং। তং ঞাতট্ঠেন ঞাণং, পজাননট্ঠেন পঞ্ঞা। তেন ৰুচ্চতি – ‘‘সমোদহনে পঞ্ঞা পদেসৰিহারে ঞাণং’’।
Chando ca avūpasanto hoti, vitakko ca avūpasanto hoti, saññā ca avūpasantā hoti, tappaccayāpi vedayitaṃ. Chando ca vūpasanto hoti, vitakko ca avūpasanto hoti, saññā ca avūpasantā hoti, tappaccayāpi vedayitaṃ. Chando ca vūpasanto hoti, vitakko ca vūpasanto hoti, saññā ca avūpasantā hoti, tappaccayāpi vedayitaṃ. Chando ca vūpasanto hoti, vitakko ca vūpasanto hoti, saññā ca vūpasantā hoti, tappaccayāpi vedayitaṃ. Appattassa pattiyā atthi āsavaṃ, tasmimpi ṭhāne anuppatte tappaccayāpi vedayitaṃ. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘samodahane paññā padesavihāre ñāṇaṃ’’.
পদেসৰিহারঞাণনিদ্দেসো তেচত্তালীসমো।
Padesavihārañāṇaniddeso tecattālīsamo.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / পটিসম্ভিদামগ্গ-অট্ঠকথা • Paṭisambhidāmagga-aṭṭhakathā / ৪৩. পদেসৰিহারঞাণনিদ্দেসৰণ্ণনা • 43. Padesavihārañāṇaniddesavaṇṇanā
