| Library / Tipiṭaka / တိပိဋက • Tipiṭaka / ပဋိသမ္ဘိဒာမဂ္ဂပာဠိ • Paṭisambhidāmaggapāḷi |
၄၃. ပဒေသဝိဟာရဉာဏနိဒ္ဒေသော
43. Padesavihārañāṇaniddeso
၉၄. ကထံ သမောဒဟနေ ပညာ ပဒေသဝိဟာရေ ဉာဏံ? မိစ္ဆာဒိဋ္ဌိပစ္စယာပိ ဝေဒယိတံ, မိစ္ဆာဒိဋ္ဌိဝူပသမပစ္စယာပိ ဝေဒယိတံ။ သမ္မာဒိဋ္ဌိပစ္စယာပိ ဝေဒယိတံ, သမ္မာဒိဋ္ဌိဝူပသမပစ္စယာပိ ဝေဒယိတံ။ မိစ္ဆာသင္ကပ္ပပစ္စယာပိ ဝေဒယိတံ, မိစ္ဆာသင္ကပ္ပဝူပသမပစ္စယာပိ ဝေဒယိတံ။ သမ္မာသင္ကပ္ပပစ္စယာပိ ဝေဒယိတံ, သမ္မာသင္ကပ္ပဝူပသမပစ္စယာပိ ဝေဒယိတံ။ပေ.။ မိစ္ဆာဝိမုတ္တိပစ္စယာပိ ဝေဒယိတံ, မိစ္ဆာဝိမုတ္တိဝူပသမပစ္စယာပိ ဝေဒယိတံ။ သမ္မာဝိမုတ္တိပစ္စယာပိ ဝေဒယိတံ, သမ္မာဝိမုတ္တိဝူပသမပစ္စယာပိ ဝေဒယိတံ။ ဆန္ဒပစ္စယာပိ ဝေဒယိတံ, ဆန္ဒဝူပသမပစ္စယာပိ ဝေဒယိတံ။ ဝိတက္ကပစ္စယာပိ ဝေဒယိတံ, ဝိတက္ကဝူပသမပစ္စယာပိ ဝေဒယိတံ။ သညာပစ္စယာပိ ဝေဒယိတံ, သညာဝူပသမပစ္စယာပိ ဝေဒယိတံ။
94. Kathaṃ samodahane paññā padesavihāre ñāṇaṃ? Micchādiṭṭhipaccayāpi vedayitaṃ, micchādiṭṭhivūpasamapaccayāpi vedayitaṃ. Sammādiṭṭhipaccayāpi vedayitaṃ, sammādiṭṭhivūpasamapaccayāpi vedayitaṃ. Micchāsaṅkappapaccayāpi vedayitaṃ, micchāsaṅkappavūpasamapaccayāpi vedayitaṃ. Sammāsaṅkappapaccayāpi vedayitaṃ, sammāsaṅkappavūpasamapaccayāpi vedayitaṃ…pe… micchāvimuttipaccayāpi vedayitaṃ, micchāvimuttivūpasamapaccayāpi vedayitaṃ. Sammāvimuttipaccayāpi vedayitaṃ, sammāvimuttivūpasamapaccayāpi vedayitaṃ. Chandapaccayāpi vedayitaṃ, chandavūpasamapaccayāpi vedayitaṃ. Vitakkapaccayāpi vedayitaṃ, vitakkavūpasamapaccayāpi vedayitaṃ. Saññāpaccayāpi vedayitaṃ, saññāvūpasamapaccayāpi vedayitaṃ.
ဆန္ဒော စ အဝူပသန္တော ဟောတိ, ဝိတက္ကော စ အဝူပသန္တော ဟောတိ, သညာ စ အဝူပသန္တာ ဟောတိ, တပ္ပစ္စယာပိ ဝေဒယိတံ။ ဆန္ဒော စ ဝူပသန္တော ဟောတိ, ဝိတက္ကော စ အဝူပသန္တော ဟောတိ, သညာ စ အဝူပသန္တာ ဟောတိ, တပ္ပစ္စယာပိ ဝေဒယိတံ။ ဆန္ဒော စ ဝူပသန္တော ဟောတိ, ဝိတက္ကော စ ဝူပသန္တော ဟောတိ, သညာ စ အဝူပသန္တာ ဟောတိ, တပ္ပစ္စယာပိ ဝေဒယိတံ။ ဆန္ဒော စ ဝူပသန္တော ဟောတိ, ဝိတက္ကော စ ဝူပသန္တော ဟောတိ, သညာ စ ဝူပသန္တာ ဟောတိ, တပ္ပစ္စယာပိ ဝေဒယိတံ။ အပ္ပတ္တသ္သ ပတ္တိယာ အတ္ထိ အာသဝံ, တသ္မိမ္ပိ ဌာနေ အနုပ္ပတ္တေ တပ္ပစ္စယာပိ ဝေဒယိတံ။ တံ ဉာတဋ္ဌေန ဉာဏံ, ပဇာနနဋ္ဌေန ပညာ။ တေန ဝုစ္စတိ – ‘‘သမောဒဟနေ ပညာ ပဒေသဝိဟာရေ ဉာဏံ’’။
Chando ca avūpasanto hoti, vitakko ca avūpasanto hoti, saññā ca avūpasantā hoti, tappaccayāpi vedayitaṃ. Chando ca vūpasanto hoti, vitakko ca avūpasanto hoti, saññā ca avūpasantā hoti, tappaccayāpi vedayitaṃ. Chando ca vūpasanto hoti, vitakko ca vūpasanto hoti, saññā ca avūpasantā hoti, tappaccayāpi vedayitaṃ. Chando ca vūpasanto hoti, vitakko ca vūpasanto hoti, saññā ca vūpasantā hoti, tappaccayāpi vedayitaṃ. Appattassa pattiyā atthi āsavaṃ, tasmimpi ṭhāne anuppatte tappaccayāpi vedayitaṃ. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘samodahane paññā padesavihāre ñāṇaṃ’’.
ပဒေသဝိဟာရဉာဏနိဒ္ဒေသော တေစတ္တာလီသမော။
Padesavihārañāṇaniddeso tecattālīsamo.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / ခုဒ္ဒကနိကာယ (အဋ္ဌကထာ) • Khuddakanikāya (aṭṭhakathā) / ပဋိသမ္ဘိဒာမဂ္ဂ-အဋ္ဌကထာ • Paṭisambhidāmagga-aṭṭhakathā / ၄၃. ပဒေသဝိဟာရဉာဏနိဒ္ဒေသဝဏ္ဏနာ • 43. Padesavihārañāṇaniddesavaṇṇanā
