| Library / Tipiṭaka / തിപിടക • Tipiṭaka / അങ്ഗുത്തരനികായ • Aṅguttaranikāya |
൨. പധാനസുത്തം
2. Padhānasuttaṃ
൨. ‘‘ദ്വേമാനി, ഭിക്ഖവേ, പധാനാനി ദുരഭിസമ്ഭവാനി ലോകസ്മിം. കതമാനി ദ്വേ? യഞ്ച ഗിഹീനം അഗാരം അജ്ഝാവസതം ചീവരപിണ്ഡപാതസേനാസനഗിലാനപച്ചയഭേസജ്ജപരിക്ഖാരാനുപ്പദാനത്ഥം പധാനം, യഞ്ച അഗാരസ്മാ അനഗാരിയം പബ്ബജിതാനം സബ്ബൂപധിപടിനിസ്സഗ്ഗത്ഥം പധാനം. ഇമാനി ഖോ, ഭിക്ഖവേ, ദ്വേ പധാനാനി ദുരഭിസമ്ഭവാനി ലോകസ്മിം.
2. ‘‘Dvemāni, bhikkhave, padhānāni durabhisambhavāni lokasmiṃ. Katamāni dve? Yañca gihīnaṃ agāraṃ ajjhāvasataṃ cīvarapiṇḍapātasenāsanagilānapaccayabhesajjaparikkhārānuppadānatthaṃ padhānaṃ, yañca agārasmā anagāriyaṃ pabbajitānaṃ sabbūpadhipaṭinissaggatthaṃ padhānaṃ. Imāni kho, bhikkhave, dve padhānāni durabhisambhavāni lokasmiṃ.
‘‘ഏതദഗ്ഗം, ഭിക്ഖവേ, ഇമേസം ദ്വിന്നം പധാനാനം യദിദം സബ്ബൂപധിപടിനിസ്സഗ്ഗത്ഥം പധാനം. തസ്മാതിഹ, ഭിക്ഖവേ, ഏവം സിക്ഖിതബ്ബം – ‘സബ്ബൂപധിപടിനിസ്സഗ്ഗത്ഥം പധാനം പദഹിസ്സാമാ’തി. ഏവഞ്ഹി വോ, ഭിക്ഖവേ, സിക്ഖിതബ്ബ’’ന്തി. ദുതിയം.
‘‘Etadaggaṃ, bhikkhave, imesaṃ dvinnaṃ padhānānaṃ yadidaṃ sabbūpadhipaṭinissaggatthaṃ padhānaṃ. Tasmātiha, bhikkhave, evaṃ sikkhitabbaṃ – ‘sabbūpadhipaṭinissaggatthaṃ padhānaṃ padahissāmā’ti. Evañhi vo, bhikkhave, sikkhitabba’’nti. Dutiyaṃ.
Related texts:
അട്ഠകഥാ • Aṭṭhakathā / സുത്തപിടക (അട്ഠകഥാ) • Suttapiṭaka (aṭṭhakathā) / അങ്ഗുത്തരനികായ (അട്ഠകഥാ) • Aṅguttaranikāya (aṭṭhakathā) / ൨. പധാനസുത്തവണ്ണനാ • 2. Padhānasuttavaṇṇanā
ടീകാ • Tīkā / സുത്തപിടക (ടീകാ) • Suttapiṭaka (ṭīkā) / അങ്ഗുത്തരനികായ (ടീകാ) • Aṅguttaranikāya (ṭīkā) / ൨. പധാനസുത്തവണ്ണനാ • 2. Padhānasuttavaṇṇanā
