| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
2. பதா⁴னஸுத்தவண்ணனா
2. Padhānasuttavaṇṇanā
2. து³தியே உப⁴தொப்³யூள்ஹஸங்கா³மப்பவேஸனஸதி³ஸந்தி யுத்³த⁴த்தா²ய உப⁴தோராஸிகதசதுரங்கி³னிஸேனாமஜ்ஜ²ப்பவேஸனஸதி³ஸங். தா³னஞ்ச யுத்³த⁴ஞ்ச ஸமானமாஹூதி எத்த² கத²ங் பனீத³முப⁴யங் ஸமானங்? ஜீவிதவினாஸபீ⁴ருகோ ஹி யுஜ்ஜி²துங் ந ஸக்கோதி, போ⁴க³க்க²யபீ⁴ருகோ தா³னங் தா³துங் ந ஸக்கோதி. ‘‘ஜீவிதஞ்ச ரக்கி²ஸ்ஸாமி, யுஜ்ஜி²ஸ்ஸாமீ’’தி ஹி வத³ந்தோ ந யுஜ்ஜ²தி, ஜீவிதே பன ஆலயங் விஸ்ஸஜ்ஜெத்வா ‘‘ஹத்த²பாதா³தி³ச்சே²தோ³ வா ஹோது மரணங் வா, க³ண்ஹிஸ்ஸாமேதங் இஸ்ஸரிய’’ந்தி உஸ்ஸஹந்தோவ யுஜ்ஜ²தி . ‘‘போ⁴கே³ ச ரக்கி²ஸ்ஸாமி, தா³னஞ்ச த³ஸ்ஸாமீ’’தி வத³ந்தோபி ந த³தா³தி, போ⁴கே³ஸு பன ஆலயங் பிஸ்ஸஜ்ஜெத்வா ‘‘மஹாதா³னங் த³ஸ்ஸாமீ’’தி உஸ்ஸஹந்தோவ தே³தி. ஏவங் தா³னஞ்ச யுத்³த⁴ஞ்ச ஸமங் ஹோதி. கிஞ்ச பி⁴ய்யோ – அப்பாபி ஸந்தா ப³ஹுகே ஜினந்தி, யதா² ச யுத்³தே⁴ அப்பகாபி வீரபுரிஸா ப³ஹுகே பீ⁴ருபுரிஸே ஜினந்தி, ஏவங் ஸத்³தா⁴தி³ஸம்பன்னோ அப்பகம்பி தா³னங் த³த³ந்தோ ப³ஹுவித⁴ங் லோப⁴தோ³ஸஇஸ்ஸாமச்ச²ரியதி³ட்டி²விசிகிச்சா²தி³பே⁴த³ங் தப்படிபக்க²ங் அபி⁴ப⁴வதி, ப³ஹுஞ்ச தா³னவிபாகங் அதி⁴க³ச்ச²தி. ஏவம்பி தா³னஞ்ச யுத்³த⁴ஞ்ச ஸமானங். தேனாஹ ‘‘அப்பம்பி சே ஸத்³த³ஹானோ த³தா³தி, தேனேவ ஸோ ஹோதி ஸுகீ² பரத்தா²’’தி.
2. Dutiye ubhatobyūḷhasaṅgāmappavesanasadisanti yuddhatthāya ubhatorāsikatacaturaṅginisenāmajjhappavesanasadisaṃ. Dānañca yuddhañca samānamāhūti ettha kathaṃ panīdamubhayaṃ samānaṃ? Jīvitavināsabhīruko hi yujjhituṃ na sakkoti, bhogakkhayabhīruko dānaṃ dātuṃ na sakkoti. ‘‘Jīvitañca rakkhissāmi, yujjhissāmī’’ti hi vadanto na yujjhati, jīvite pana ālayaṃ vissajjetvā ‘‘hatthapādādicchedo vā hotu maraṇaṃ vā, gaṇhissāmetaṃ issariya’’nti ussahantova yujjhati . ‘‘Bhoge ca rakkhissāmi, dānañca dassāmī’’ti vadantopi na dadāti, bhogesu pana ālayaṃ pissajjetvā ‘‘mahādānaṃ dassāmī’’ti ussahantova deti. Evaṃ dānañca yuddhañca samaṃ hoti. Kiñca bhiyyo – appāpi santā bahuke jinanti, yathā ca yuddhe appakāpi vīrapurisā bahuke bhīrupurise jinanti, evaṃ saddhādisampanno appakampi dānaṃ dadanto bahuvidhaṃ lobhadosaissāmacchariyadiṭṭhivicikicchādibhedaṃ tappaṭipakkhaṃ abhibhavati, bahuñca dānavipākaṃ adhigacchati. Evampi dānañca yuddhañca samānaṃ. Tenāha ‘‘appampi ce saddahāno dadāti, teneva so hoti sukhī paratthā’’ti.
அகா³ரஸ்ஸ ஹிதங் கஸிகோ³ரக்கா²தி³ அகா³ரியங், தங் நத்தி² எத்தா²தி அனகா³ரியங், பப்³ப³ஜ்ஜாதி ஆஹ ‘‘அகா³ரஸ்ஸ…பே॰… அனகா³ரியங் பப்³ப³ஜ்ஜ’’ந்தி. ஸப்³பூ³பதி⁴படினிஸ்ஸக்³க³த்தா²யாதி எத்த² சத்தாரோ உபதீ⁴ – காமுபதி⁴, க²ந்து⁴பதி⁴, கிலேஸுபதி⁴, அபி⁴ஸங்கா²ருபதீ⁴தி. காமாபி ஹி ‘‘யங் பஞ்ச காமகு³ணே படிச்ச உப்பஜ்ஜதி ஸுக²ங் ஸோமனஸ்ஸங், அயங் காமானங் அஸ்ஸாதோ³’’தி (அ॰ நி॰ 9.34) ஏவங் வுத்தஸ்ஸ ஸுக²ஸ்ஸ, தத³ஸ்ஸாத³னிமித்தஸ்ஸ வா து³க்க²ஸ்ஸ அதி⁴ட்டா²னபா⁴வதோ உபதீ⁴யதி எத்த² ஸுக²ந்தி இமினா வசனத்தே²ன ‘‘உபதீ⁴’’தி வுச்சந்தி. க²ந்தா⁴பி க²ந்த⁴மூலகஸ்ஸ து³க்க²ஸ்ஸ அதி⁴ட்டா²னபா⁴வதோ, கிலேஸாபி அபாயது³க்க²ஸ்ஸ அதி⁴ட்டா²னபா⁴வதோ, அபி⁴ஸங்கா²ராபி ப⁴வது³க்க²ஸ்ஸ அதி⁴ட்டா²னபா⁴வதோ ‘‘உபதீ⁴’’தி வுச்சந்தி. ஸப்³பே³ஸங் உபதீ⁴னங் படினிஸ்ஸக்³கோ³ பஹானங் எத்தா²தி ஸப்³பூ³பதி⁴படினிஸ்ஸக்³க³ங், நிப்³பா³னங். தேனாஹ ‘‘ஸப்³பே³ஸங் க²ந்தூ⁴பதி⁴…பே॰… நிப்³பா³னஸ்ஸ அத்தா²யா’’தி.
Agārassa hitaṃ kasigorakkhādi agāriyaṃ, taṃ natthi etthāti anagāriyaṃ, pabbajjāti āha ‘‘agārassa…pe… anagāriyaṃ pabbajja’’nti. Sabbūpadhipaṭinissaggatthāyāti ettha cattāro upadhī – kāmupadhi, khandhupadhi, kilesupadhi, abhisaṅkhārupadhīti. Kāmāpi hi ‘‘yaṃ pañca kāmaguṇe paṭicca uppajjati sukhaṃ somanassaṃ, ayaṃ kāmānaṃ assādo’’ti (a. ni. 9.34) evaṃ vuttassa sukhassa, tadassādanimittassa vā dukkhassa adhiṭṭhānabhāvato upadhīyati ettha sukhanti iminā vacanatthena ‘‘upadhī’’ti vuccanti. Khandhāpi khandhamūlakassa dukkhassa adhiṭṭhānabhāvato, kilesāpi apāyadukkhassa adhiṭṭhānabhāvato, abhisaṅkhārāpi bhavadukkhassa adhiṭṭhānabhāvato ‘‘upadhī’’ti vuccanti. Sabbesaṃ upadhīnaṃ paṭinissaggo pahānaṃ etthāti sabbūpadhipaṭinissaggaṃ, nibbānaṃ. Tenāha ‘‘sabbesaṃ khandhūpadhi…pe… nibbānassa atthāyā’’ti.
பதா⁴னஸுத்தவண்ணனா நிட்டி²தா.
Padhānasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 2. பதா⁴னஸுத்தங் • 2. Padhānasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 2. பதா⁴னஸுத்தவண்ணனா • 2. Padhānasuttavaṇṇanā
