| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) |
೨. ಪಧಾನಸುತ್ತವಣ್ಣನಾ
2. Padhānasuttavaṇṇanā
೨. ದುತಿಯೇ ಪಧಾನಾನೀತಿ ವೀರಿಯಾನಿ। ವೀರಿಯಞ್ಹಿ ಪದಹಿತಬ್ಬತೋ ಪಧಾನಭಾವಕರಣತೋ ವಾ ಪಧಾನನ್ತಿ ವುಚ್ಚತಿ। ದುರಭಿಸಮ್ಭವಾನೀತಿ ದುಸ್ಸಹಾನಿ ದುಪ್ಪೂರಿಯಾನಿ, ದುಕ್ಕರಾನೀತಿ ಅತ್ಥೋ। ಅಗಾರಂ ಅಜ್ಝಾವಸತನ್ತಿ ಅಗಾರೇ ವಸನ್ತಾನಂ। ಚೀವರಪಿಣ್ಡಪಾತಸೇನಾಸನಗಿಲಾನಪಚ್ಚಯಭೇಸಜ್ಜಪರಿಕ್ಖಾರಾನುಪ್ಪದಾನತ್ಥಂ ಪಧಾನನ್ತಿ ಏತೇಸಂ ಚೀವರಾದೀನಂ ಚತುನ್ನಂ ಪಚ್ಚಯಾನಂ ಅನುಪ್ಪದಾನತ್ಥಾಯ ಪಧಾನಂ ನಾಮ ದುರಭಿಸಮ್ಭವನ್ತಿ ದಸ್ಸೇತಿ। ಚತುರತನಿಕಮ್ಪಿ ಹಿ ಪಿಲೋತಿಕಂ, ಪಸತತಣ್ಡುಲಮತ್ತಂ ವಾ ಭತ್ತಂ, ಚತುರತನಿಕಂ ವಾ ಪಣ್ಣಸಾಲಂ, ತೇಲಸಪ್ಪಿನವನೀತಾದೀಸು ವಾ ಅಪ್ಪಮತ್ತಕಮ್ಪಿ ಭೇಸಜ್ಜಂ ಪರೇಸಂ ದೇಥಾತಿ ವತ್ತುಮ್ಪಿ ನೀಹರಿತ್ವಾ ದಾತುಮ್ಪಿ ದುಕ್ಕರಂ ಉಭತೋಬ್ಯೂಳ್ಹಸಙ್ಗಾಮಪ್ಪವೇಸನಸದಿಸಂ। ತೇನಾಹ ಭಗವಾ –
2. Dutiye padhānānīti vīriyāni. Vīriyañhi padahitabbato padhānabhāvakaraṇato vā padhānanti vuccati. Durabhisambhavānīti dussahāni duppūriyāni, dukkarānīti attho. Agāraṃ ajjhāvasatanti agāre vasantānaṃ. Cīvarapiṇḍapātasenāsanagilānapaccayabhesajjaparikkhārānuppadānatthaṃ padhānanti etesaṃ cīvarādīnaṃ catunnaṃ paccayānaṃ anuppadānatthāya padhānaṃ nāma durabhisambhavanti dasseti. Caturatanikampi hi pilotikaṃ, pasatataṇḍulamattaṃ vā bhattaṃ, caturatanikaṃ vā paṇṇasālaṃ, telasappinavanītādīsu vā appamattakampi bhesajjaṃ paresaṃ dethāti vattumpi nīharitvā dātumpi dukkaraṃ ubhatobyūḷhasaṅgāmappavesanasadisaṃ. Tenāha bhagavā –
‘‘ದಾನಞ್ಚ ಯುದ್ಧಞ್ಚ ಸಮಾನಮಾಹು,
‘‘Dānañca yuddhañca samānamāhu,
ಅಪ್ಪಾಪಿ ಸನ್ತಾ ಬಹುಕೇ ಜಿನನ್ತಿ।
Appāpi santā bahuke jinanti;
ಅಪ್ಪಮ್ಪಿ ಚೇ ಸದ್ದಹಾನೋ ದದಾತಿ,
Appampi ce saddahāno dadāti,
ತೇನೇವ ಸೋ ಹೋತಿ ಸುಖೀ ಪರತ್ಥಾ’’ತಿ॥ (ಜಾ॰ ೧.೮.೭೨; ಸಂ॰ ನಿ॰ ೧.೩೩)।
Teneva so hoti sukhī paratthā’’ti. (jā. 1.8.72; saṃ. ni. 1.33);
ಅಗಾರಸ್ಮಾ ಅನಗಾರಿಯಂ ಪಬ್ಬಜಿತಾನನ್ತಿ ಗೇಹತೋ ನಿಕ್ಖಮಿತ್ವಾ ಅಗಾರಸ್ಸ ಘರಾವಾಸಸ್ಸ ಹಿತಾವಹೇಹಿ ಕಸಿಗೋರಕ್ಖಾದೀಹಿ ವಿರಹಿತಂ ಅನಗಾರಿಯಂ ಪಬ್ಬಜ್ಜಂ ಉಪಗತಾನಂ। ಸಬ್ಬೂಪಧಿಪಟಿನಿಸ್ಸಗ್ಗತ್ಥಾಯ ಪಧಾನನ್ತಿ ಸಬ್ಬೇಸಂ ಖನ್ಧೂಪಧಿಕಿಲೇಸೂಪಧಿಅಭಿಸಙ್ಖಾರೂಪಧಿಸಙ್ಖಾತಾನಂ ಉಪಧೀನಂ ಪಟಿನಿಸ್ಸಗ್ಗಸಙ್ಖಾತಸ್ಸ ನಿಬ್ಬಾನಸ್ಸ ಅತ್ಥಾಯ ವಿಪಸ್ಸನಾಯ ಚೇವ ಮಗ್ಗೇನ ಚ ಸಹಜಾತವೀರಿಯಂ। ತಸ್ಮಾತಿ ಯಸ್ಮಾ ಇಮಾನಿ ದ್ವೇ ಪಧಾನಾನಿ ದುರಭಿಸಮ್ಭವಾನಿ, ತಸ್ಮಾ। ದುತಿಯಂ।
Agārasmā anagāriyaṃ pabbajitānanti gehato nikkhamitvā agārassa gharāvāsassa hitāvahehi kasigorakkhādīhi virahitaṃ anagāriyaṃ pabbajjaṃ upagatānaṃ. Sabbūpadhipaṭinissaggatthāya padhānanti sabbesaṃ khandhūpadhikilesūpadhiabhisaṅkhārūpadhisaṅkhātānaṃ upadhīnaṃ paṭinissaggasaṅkhātassa nibbānassa atthāya vipassanāya ceva maggena ca sahajātavīriyaṃ. Tasmāti yasmā imāni dve padhānāni durabhisambhavāni, tasmā. Dutiyaṃ.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಅಙ್ಗುತ್ತರನಿಕಾಯ • Aṅguttaranikāya / ೨. ಪಧಾನಸುತ್ತಂ • 2. Padhānasuttaṃ
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೨. ಪಧಾನಸುತ್ತವಣ್ಣನಾ • 2. Padhānasuttavaṇṇanā
