| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) |
೩. ಪಧಾನಸುತ್ತವಣ್ಣನಾ
3. Padhānasuttavaṇṇanā
೧೩. ತತಿಯೇ ಸಮ್ಮಪ್ಪಧಾನಾನೀತಿ ಸುನ್ದರಪಧಾನಾನಿ ಉತ್ತಮವೀರಿಯಾನಿ। ಸಮ್ಮಪ್ಪಧಾನಾತಿ ಪರಿಪುಣ್ಣವೀರಿಯಾ। ಮಾರಧೇಯ್ಯಾಭಿಭೂತಾತಿ ತೇಭೂಮಕವಟ್ಟಸಙ್ಖಾತಂ ಮಾರಧೇಯ್ಯಂ ಅಭಿಭವಿತ್ವಾ ಸಮತಿಕ್ಕಮಿತ್ವಾ ಠಿತಾ। ತೇ ಅಸಿತಾತಿ ತೇ ಖೀಣಾಸವಾ ಅನಿಸ್ಸಿತಾ ನಾಮ। ಜಾತಿಮರಣಭಯಸ್ಸಾತಿ ಜಾತಿಞ್ಚ ಮರಣಞ್ಚ ಪಟಿಚ್ಚ ಉಪ್ಪಜ್ಜನಕಭಯಸ್ಸ, ಜಾತಿಮರಣಸಙ್ಖಾತಸ್ಸೇವ ವಾ ಭಯಸ್ಸ। ಪಾರಗೂತಿ ಪಾರಙ್ಗತಾ। ತೇ ತುಸಿತಾತಿ ತೇ ಖೀಣಾಸವಾ ತುಟ್ಠಾ ನಾಮ। ಜೇತ್ವಾ ಮಾರಂ ಸವಾಹಿನಿನ್ತಿ ಸಸೇನಕಂ ಮಾರಂ ಜಿನಿತ್ವಾ ಠಿತಾ। ತೇ ಅನೇಜಾತಿ ತೇ ಖೀಣಾಸವಾ ತಣ್ಹಾಸಙ್ಖಾತಾಯ ಏಜಾಯ ಅನೇಜಾ ನಿಚ್ಚಲಾ ನಾಮ। ನಮುಚಿಬಲನ್ತಿ ಮಾರಬಲಂ। ಉಪಾತಿವತ್ತಾತಿ ಅತಿಕ್ಕನ್ತಾ। ತೇ ಸುಖಿತಾತಿ ತೇ ಖೀಣಾಸವಾ ಲೋಕುತ್ತರಸುಖೇನ ಸುಖಿತಾ ನಾಮ। ತೇನೇವಾಹ –
13. Tatiye sammappadhānānīti sundarapadhānāni uttamavīriyāni. Sammappadhānāti paripuṇṇavīriyā. Māradheyyābhibhūtāti tebhūmakavaṭṭasaṅkhātaṃ māradheyyaṃ abhibhavitvā samatikkamitvā ṭhitā. Te asitāti te khīṇāsavā anissitā nāma. Jātimaraṇabhayassāti jātiñca maraṇañca paṭicca uppajjanakabhayassa, jātimaraṇasaṅkhātasseva vā bhayassa. Pāragūti pāraṅgatā. Te tusitāti te khīṇāsavā tuṭṭhā nāma. Jetvā māraṃ savāhininti sasenakaṃ māraṃ jinitvā ṭhitā. Teanejāti te khīṇāsavā taṇhāsaṅkhātāya ejāya anejā niccalā nāma. Namucibalanti mārabalaṃ. Upātivattāti atikkantā. Te sukhitāti te khīṇāsavā lokuttarasukhena sukhitā nāma. Tenevāha –
‘‘ಸುಖಿತಾ ವತ ಅರಹನ್ತೋ, ತಣ್ಹಾ ನೇಸಂ ನ ವಿಜ್ಜತಿ।
‘‘Sukhitā vata arahanto, taṇhā nesaṃ na vijjati;
ಅಸ್ಮಿಮಾನೋ ಸಮುಚ್ಛಿನ್ನೋ, ಮೋಹಜಾಲಂ ಪದಾಲಿತ’’ನ್ತಿ॥ (ಸಂ॰ ನಿ॰ ೩.೭೬)।
Asmimāno samucchinno, mohajālaṃ padālita’’nti. (saṃ. ni. 3.76);
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಅಙ್ಗುತ್ತರನಿಕಾಯ • Aṅguttaranikāya / ೩. ಪಧಾನಸುತ್ತಂ • 3. Padhānasuttaṃ
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೩. ಪಧಾನಸುತ್ತವಣ್ಣನಾ • 3. Padhānasuttavaṇṇanā
