| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) |
2. පධානසුත්‌තවණ්‌ණනා
2. Padhānasuttavaṇṇanā
2. දුතියෙ පධානානීති වීරියානි. වීරියඤ්‌හි පදහිතබ්‌බතො පධානභාවකරණතො වා පධානන්‌ති වුච්‌චති. දුරභිසම්‌භවානීති දුස්‌සහානි දුප්‌පූරියානි, දුක්‌කරානීති අත්‌ථො. අගාරං අජ්‌ඣාවසතන්‌ති අගාරෙ වසන්‌තානං. චීවරපිණ්‌ඩපාතසෙනාසනගිලානපච්‌චයභෙසජ්‌ජපරික්‌ඛාරානුප්‌පදානත්‌ථං පධානන්‌ති එතෙසං චීවරාදීනං චතුන්‌නං පච්‌චයානං අනුප්‌පදානත්‌ථාය පධානං නාම දුරභිසම්‌භවන්‌ති දස්‌සෙති. චතුරතනිකම්‌පි හි පිලොතිකං, පසතතණ්‌ඩුලමත්‌තං වා භත්‌තං, චතුරතනිකං වා පණ්‌ණසාලං, තෙලසප්‌පිනවනීතාදීසු වා අප්‌පමත්‌තකම්‌පි භෙසජ්‌ජං පරෙසං දෙථාති වත්‌තුම්‌පි නීහරිත්‌වා දාතුම්‌පි දුක්‌කරං උභතොබ්‍යූළ්‌හසඞ්‌ගාමප්‌පවෙසනසදිසං. තෙනාහ භගවා –
2. Dutiye padhānānīti vīriyāni. Vīriyañhi padahitabbato padhānabhāvakaraṇato vā padhānanti vuccati. Durabhisambhavānīti dussahāni duppūriyāni, dukkarānīti attho. Agāraṃ ajjhāvasatanti agāre vasantānaṃ. Cīvarapiṇḍapātasenāsanagilānapaccayabhesajjaparikkhārānuppadānatthaṃ padhānanti etesaṃ cīvarādīnaṃ catunnaṃ paccayānaṃ anuppadānatthāya padhānaṃ nāma durabhisambhavanti dasseti. Caturatanikampi hi pilotikaṃ, pasatataṇḍulamattaṃ vā bhattaṃ, caturatanikaṃ vā paṇṇasālaṃ, telasappinavanītādīsu vā appamattakampi bhesajjaṃ paresaṃ dethāti vattumpi nīharitvā dātumpi dukkaraṃ ubhatobyūḷhasaṅgāmappavesanasadisaṃ. Tenāha bhagavā –
‘‘දානඤ්‌ච යුද්‌ධඤ්‌ච සමානමාහු,
‘‘Dānañca yuddhañca samānamāhu,
අප්‌පාපි සන්‌තා බහුකෙ ජිනන්‌ති;
Appāpi santā bahuke jinanti;
අප්‌පම්‌පි චෙ සද්‌දහානො දදාති,
Appampi ce saddahāno dadāti,
තෙනෙව සො හොති සුඛී පරත්‌ථා’’ති. (ජා. 1.8.72; සං. නි. 1.33);
Teneva so hoti sukhī paratthā’’ti. (jā. 1.8.72; saṃ. ni. 1.33);
අගාරස්‌මා අනගාරියං පබ්‌බජිතානන්‌ති ගෙහතො නික්‌ඛමිත්‌වා අගාරස්‌ස ඝරාවාසස්‌ස හිතාවහෙහි කසිගොරක්‌ඛාදීහි විරහිතං අනගාරියං පබ්‌බජ්‌ජං උපගතානං. සබ්‌බූපධිපටිනිස්‌සග්‌ගත්‌ථාය පධානන්‌ති සබ්‌බෙසං ඛන්‌ධූපධිකිලෙසූපධිඅභිසඞ්‌ඛාරූපධිසඞ්‌ඛාතානං උපධීනං පටිනිස්‌සග්‌ගසඞ්‌ඛාතස්‌ස නිබ්‌බානස්‌ස අත්‌ථාය විපස්‌සනාය චෙව මග්‌ගෙන ච සහජාතවීරියං. තස්‌මාති යස්‌මා ඉමානි ද්‌වෙ පධානානි දුරභිසම්‌භවානි, තස්‌මා. දුතියං.
Agārasmā anagāriyaṃ pabbajitānanti gehato nikkhamitvā agārassa gharāvāsassa hitāvahehi kasigorakkhādīhi virahitaṃ anagāriyaṃ pabbajjaṃ upagatānaṃ. Sabbūpadhipaṭinissaggatthāya padhānanti sabbesaṃ khandhūpadhikilesūpadhiabhisaṅkhārūpadhisaṅkhātānaṃ upadhīnaṃ paṭinissaggasaṅkhātassa nibbānassa atthāya vipassanāya ceva maggena ca sahajātavīriyaṃ. Tasmāti yasmā imāni dve padhānāni durabhisambhavāni, tasmā. Dutiyaṃ.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 2. පධානසුත්‌තං • 2. Padhānasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 2. පධානසුත්‌තවණ්‌ණනා • 2. Padhānasuttavaṇṇanā
