| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
3-4. பதா⁴னியங்க³ஸுத்தாதி³வண்ணனா
3-4. Padhāniyaṅgasuttādivaṇṇanā
53-54. ததியே பத³ஹதீதி பத³ஹனோ, பா⁴வனமனுயுத்தோ யோகீ³, தஸ்ஸ பா⁴வோ பா⁴வனானுயோகோ³ பத³ஹனபா⁴வோ. பதா⁴னமஸ்ஸ அத்தீ²தி பதா⁴னிகோ, க-காரஸ்ஸ ய-காரங் கத்வா ‘‘பதா⁴னியோ’’தி வுத்தங். ‘‘அபி⁴னீஹாரதோ பட்டா²ய ஆக³தத்தா’’தி வுத்தத்தா பச்சேகபோ³தி⁴ஸத்தஸாவகபோ³தி⁴ஸத்தானம்பி பணிதா⁴னதோ பபு⁴தி ஆக³தஸத்³தா⁴ ஆக³மனஸத்³தா³ ஏவ, உக்கட்ட²னித்³தே³ஸேன பன ‘‘ஸப்³ப³ஞ்ஞுபோ³தி⁴ஸத்தான’’ந்தி வுத்தங். அதி⁴க³மதோ ஸமுதா³க³தத்தா அக்³க³மக்³க³ப²லஸம்பயுத்தா சாபி அதி⁴க³மஸத்³தா⁴ நாம, யா ஸோதாபன்னஸ்ஸ அங்க³பா⁴வேன வுத்தா. அசலபா⁴வேனாதி படிபக்கே²ன அனதி⁴ப⁴வனீயத்தா நிச்சலபா⁴வேன. ஓகப்பனந்தி ஓக்கந்தி³த்வா அதி⁴முச்சனங், பஸாது³ப்பத்தியா பஸாத³னீயவத்து²ஸ்மிங் பஸீத³னமேவ. ஸுப்படிவித்³த⁴ந்தி ஸுட்டு² படிவித்³த⁴ங். யதா² தேன படிவித்³தே⁴ன ஸப்³ப³ஞ்ஞுதஞ்ஞாணங் ஹத்த²க³தங் அஹோஸி, ததா² படிவித்³த⁴ங். யஸ்ஸ பு³த்³த⁴ஸுபு³த்³த⁴தாய ஸத்³தா⁴ அசலா அஸம்பவேதி⁴, தஸ்ஸ த⁴ம்மஸுத⁴ம்மதாய ஸங்க⁴ஸுப்படிபன்னதாய தேன படிவேதே⁴ன ஸத்³தா⁴ ந ததா²தி அட்டா²னமேதங் அனவகாஸோ. தேனாஹ ப⁴க³வா – ‘‘யோ, பி⁴க்க²வே, பு³த்³தே⁴ பஸன்னோ த⁴ம்மே பஸன்னோ ஸங்கே⁴ பஸன்னோ’’திஆதி³. பதா⁴னவீரியங் இஜ்ஜ²தி ‘‘அத்³தா⁴ இமாய படிபதா³ய ஜராமரணதோ முச்சிஸ்ஸாமீ’’தி ஸக்கச்சங் பத³ஹனதோ.
53-54. Tatiye padahatīti padahano, bhāvanamanuyutto yogī, tassa bhāvo bhāvanānuyogo padahanabhāvo. Padhānamassa atthīti padhāniko, ka-kārassa ya-kāraṃ katvā ‘‘padhāniyo’’ti vuttaṃ. ‘‘Abhinīhārato paṭṭhāya āgatattā’’ti vuttattā paccekabodhisattasāvakabodhisattānampi paṇidhānato pabhuti āgatasaddhā āgamanasaddā eva, ukkaṭṭhaniddesena pana ‘‘sabbaññubodhisattāna’’nti vuttaṃ. Adhigamato samudāgatattā aggamaggaphalasampayuttā cāpi adhigamasaddhā nāma, yā sotāpannassa aṅgabhāvena vuttā. Acalabhāvenāti paṭipakkhena anadhibhavanīyattā niccalabhāvena. Okappananti okkanditvā adhimuccanaṃ, pasāduppattiyā pasādanīyavatthusmiṃ pasīdanameva. Suppaṭividdhanti suṭṭhu paṭividdhaṃ. Yathā tena paṭividdhena sabbaññutaññāṇaṃ hatthagataṃ ahosi, tathā paṭividdhaṃ. Yassa buddhasubuddhatāya saddhā acalā asampavedhi, tassa dhammasudhammatāya saṅghasuppaṭipannatāya tena paṭivedhena saddhā na tathāti aṭṭhānametaṃ anavakāso. Tenāha bhagavā – ‘‘yo, bhikkhave, buddhe pasanno dhamme pasanno saṅghe pasanno’’tiādi. Padhānavīriyaṃ ijjhati ‘‘addhā imāya paṭipadāya jarāmaraṇato muccissāmī’’ti sakkaccaṃ padahanato.
அப்ப-ஸத்³தோ³ அபா⁴வத்தோ² ‘‘அப்பஸத்³த³ஸ்ஸ…பே॰… கோ² பனா’’திஆதீ³ஸு வியாதி ஆஹ ‘‘அரோகோ³’’தி. ஸமவேபாகினியாதி யதா²பு⁴த்தமாஹாரங் ஸமாகாரேனேவ பசனஸீலாய. த³ள்ஹங் கத்வா பசந்தீ ஹி க³ஹணீ கோ⁴ரபா⁴வேன பித்தவிகாராதி³வஸேன ரோக³ங் ஜனேதி, ஸிதி²லங் கத்வா பசந்தீ மந்த³பா⁴வேன வாதவிகாராதி³வஸேன தேனாஹ ‘‘நாதிஸீதாய நாச்சுண்ஹாயா’’தி. க³ஹணிதேஜஸ்ஸ மந்த³படுதாவஸேன ஸத்தானங் யதா²க்கமங் ஸீதுண்ஹஸஹதாதி ஆஹ ‘‘அதிஸீதலக்³க³ஹணிகோ’’திஆதி³. யாதா²வதோ அச்சயதே³ஸனா அத்தனோ ஆவிகரணங் நாமாதி ஆஹ ‘‘யதா²பூ⁴தங் அத்தனோ அகு³ணங் பகாஸேதா’’தி. உத³யத்த²கா³மினியாதி ஸங்கா²ரானங் உத³யஞ்ச வயஞ்ச படிவிஜ்ஜ²ந்தியாதி அயமெத்த² அத்தோ²தி ஆஹ ‘‘உத³யஞ்சா’’திஆதி³. பரிஸுத்³தா⁴யாதி நிருபக்கிலேஸாய. நிப்³பி³ஜ்ஜி²துங் ஸமத்தா²யாதி தத³ங்க³வஸேன ஸவிஸேஸங் பஜஹிதுங் ஸமத்தா²ய. தஸ்ஸ து³க்க²ஸ்ஸ க²யகா³மினியாதி யங் து³க்க²ங் இமஸ்மிங் ஞாணே அனதி⁴க³தே பவத்திரஹங், அதி⁴க³தே ந பவத்தி, தங் ஸந்தா⁴ய வத³தி. ததா²ஹேஸ யோகா³வசரோ ‘‘சூளஸோதாபன்னோ’’தி வுச்சதி. சதுத்த²ங் உத்தானமேவ.
Appa-saddo abhāvattho ‘‘appasaddassa…pe… kho panā’’tiādīsu viyāti āha ‘‘arogo’’ti. Samavepākiniyāti yathābhuttamāhāraṃ samākāreneva pacanasīlāya. Daḷhaṃ katvā pacantī hi gahaṇī ghorabhāvena pittavikārādivasena rogaṃ janeti, sithilaṃ katvā pacantī mandabhāvena vātavikārādivasena tenāha ‘‘nātisītāya nāccuṇhāyā’’ti. Gahaṇitejassa mandapaṭutāvasena sattānaṃ yathākkamaṃ sītuṇhasahatāti āha ‘‘atisītalaggahaṇiko’’tiādi. Yāthāvato accayadesanā attano āvikaraṇaṃ nāmāti āha ‘‘yathābhūtaṃ attano aguṇaṃ pakāsetā’’ti. Udayatthagāminiyāti saṅkhārānaṃ udayañca vayañca paṭivijjhantiyāti ayamettha atthoti āha ‘‘udayañcā’’tiādi. Parisuddhāyāti nirupakkilesāya. Nibbijjhituṃ samatthāyāti tadaṅgavasena savisesaṃ pajahituṃ samatthāya. Tassa dukkhassa khayagāminiyāti yaṃ dukkhaṃ imasmiṃ ñāṇe anadhigate pavattirahaṃ, adhigate na pavatti, taṃ sandhāya vadati. Tathāhesa yogāvacaro ‘‘cūḷasotāpanno’’ti vuccati. Catutthaṃ uttānameva.
பதா⁴னியங்க³ஸுத்தாதி³வண்ணனா நிட்டி²தா.
Padhāniyaṅgasuttādivaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya
3. பதா⁴னியங்க³ஸுத்தங் • 3. Padhāniyaṅgasuttaṃ
4. ஸமயஸுத்தங் • 4. Samayasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā)
3. பதா⁴னியங்க³ஸுத்தவண்ணனா • 3. Padhāniyaṅgasuttavaṇṇanā
4. ஸமயஸுத்தவண்ணனா • 4. Samayasuttavaṇṇanā
