| Library / Tipiṭaka / д̇ибидага • Tipiṭaka / сам̣яуд̇д̇анигааяа • Saṃyuttanikāya |
8. бад̣̇ийбобамасуд̇д̇ам̣
8. Padīpopamasuttaṃ
984. ‘‘аанаабаанассад̇исамаад̇хи , бхигкавз, бхаавид̇о б̣ахулийгад̇о махабпало ход̇и махаанисам̣со. гат̇ам̣ бхаавид̇о жа, бхигкавз, аанаабаанассад̇исамаад̇хи гат̇ам̣ б̣ахулийгад̇о махабпало ход̇и махаанисам̣со?
984. ‘‘Ānāpānassatisamādhi , bhikkhave, bhāvito bahulīkato mahapphalo hoti mahānisaṃso. Kathaṃ bhāvito ca, bhikkhave, ānāpānassatisamādhi kathaṃ bahulīkato mahapphalo hoti mahānisaṃso?
‘‘ид̇ха , бхигкавз, бхигку аран̃н̃аг̇ад̇о ваа ругкамуулаг̇ад̇о ваа сун̃н̃ааг̇аараг̇ад̇о ваа нисийд̣̇ад̇и баллан̇гам̣ аабхуж̇ид̇ваа уж̇ум̣ гааяам̣ бан̣ид̇хааяа баримукам̣ сад̇им̣ убадтабзд̇ваа. со сад̇ова ассасад̇и, сад̇ова бассасад̇и. д̣̇ийгхам̣ ваа ассасанд̇о ‘д̣̇ийгхам̣ ассасаамий’д̇и баж̇аанаад̇и…бз… ‘бадиниссаг̇г̇аанубассий ассасиссаамий’д̇и сигкад̇и, ‘бадиниссаг̇г̇аанубассий бассасиссаамий’д̇и сигкад̇и. звам̣ бхаавид̇о ко, бхигкавз, аанаабаанассад̇исамаад̇хи звам̣ б̣ахулийгад̇о махабпало ход̇и махаанисам̣со.
‘‘Idha , bhikkhave, bhikkhu araññagato vā rukkhamūlagato vā suññāgāragato vā nisīdati pallaṅkaṃ ābhujitvā ujuṃ kāyaṃ paṇidhāya parimukhaṃ satiṃ upaṭṭhapetvā. So satova assasati, satova passasati. Dīghaṃ vā assasanto ‘dīghaṃ assasāmī’ti pajānāti…pe… ‘paṭinissaggānupassī assasissāmī’ti sikkhati, ‘paṭinissaggānupassī passasissāmī’ti sikkhati. Evaṃ bhāvito kho, bhikkhave, ānāpānassatisamādhi evaṃ bahulīkato mahapphalo hoti mahānisaṃso.
‘‘ахамби суд̣̇ам̣, бхигкавз, буб̣б̣зва самб̣од̇хаа анабхисамб̣уд̣̇д̇хо б̣од̇хисад̇д̇ова самаано иминаа вихаарзна б̣ахулам̣ вихараами. д̇асса маяхам̣, бхигкавз, иминаа вихаарзна б̣ахулам̣ вихарад̇о нзва гааяо гиламад̇и на жагкууни; анубаад̣̇ааяа жа мз аасавзхи жид̇д̇ам̣ вимужжи.
‘‘Ahampi sudaṃ, bhikkhave, pubbeva sambodhā anabhisambuddho bodhisattova samāno iminā vihārena bahulaṃ viharāmi. Tassa mayhaṃ, bhikkhave, iminā vihārena bahulaṃ viharato neva kāyo kilamati na cakkhūni; anupādāya ca me āsavehi cittaṃ vimucci.
‘‘д̇асмаад̇иха, бхигкавз, бхигку жзби ааган̇кзяяа – ‘нзва мз гааяо гиламзяяа на жагкууни, анубаад̣̇ааяа жа мз аасавзхи жид̇д̇ам̣ вимужжзяяаа’д̇и, аяамзва аанаабаанассад̇исамаад̇хи саад̇хугам̣ манаси гаад̇аб̣б̣о.
‘‘Tasmātiha, bhikkhave, bhikkhu cepi ākaṅkheyya – ‘neva me kāyo kilameyya na cakkhūni, anupādāya ca me āsavehi cittaṃ vimucceyyā’ti, ayameva ānāpānassatisamādhi sādhukaṃ manasi kātabbo.
‘‘д̇асмаад̇иха, бхигкавз, бхигку жзби ааган̇кзяяа – ‘яз мз г̇зхасид̇аа сарасан̇габбаа д̇з бахийязяяу’нд̇и, аяамзва аанаабаанассад̇исамаад̇хи саад̇хугам̣ манаси гаад̇аб̣б̣о.
‘‘Tasmātiha, bhikkhave, bhikkhu cepi ākaṅkheyya – ‘ye me gehasitā sarasaṅkappā te pahīyeyyu’nti, ayameva ānāpānassatisamādhi sādhukaṃ manasi kātabbo.
‘‘д̇асмаад̇иха, бхигкавз, бхигку жзби ааган̇кзяяа – ‘аббадигуулз бадигууласан̃н̃ий вихарзяяа’нд̇и, аяамзва аанаабаанассад̇исамаад̇хи саад̇хугам̣ манаси гаад̇аб̣б̣о.
‘‘Tasmātiha, bhikkhave, bhikkhu cepi ākaṅkheyya – ‘appaṭikūle paṭikūlasaññī vihareyya’nti, ayameva ānāpānassatisamādhi sādhukaṃ manasi kātabbo.
‘‘д̇асмаад̇иха , бхигкавз, бхигку жзби ааган̇кзяяа – ‘бадигуулз аббадигууласан̃н̃ий вихарзяяа’нд̇и, аяамзва аанаабаанассад̇исамаад̇хи саад̇хугам̣ манаси гаад̇аб̣б̣о.
‘‘Tasmātiha , bhikkhave, bhikkhu cepi ākaṅkheyya – ‘paṭikūle appaṭikūlasaññī vihareyya’nti, ayameva ānāpānassatisamādhi sādhukaṃ manasi kātabbo.
‘‘д̇асмаад̇иха, бхигкавз, бхигку жзби ааган̇кзяяа – ‘бадигуулз жа аббадигуулз жа бадигууласан̃н̃ий вихарзяяа’нд̇и, аяамзва аанаабаанассад̇исамаад̇хи саад̇хугам̣ манаси гаад̇аб̣б̣о.
‘‘Tasmātiha, bhikkhave, bhikkhu cepi ākaṅkheyya – ‘paṭikūle ca appaṭikūle ca paṭikūlasaññī vihareyya’nti, ayameva ānāpānassatisamādhi sādhukaṃ manasi kātabbo.
‘‘д̇асмаад̇иха, бхигкавз, бхигку жзби ааган̇кзяяа – ‘бадигуулз жа аббадигуулз жа аббадигууласан̃н̃ий вихарзяяа’нд̇и, аяамзва аанаабаанассад̇исамаад̇хи саад̇хугам̣ манаси гаад̇аб̣б̣о.
‘‘Tasmātiha, bhikkhave, bhikkhu cepi ākaṅkheyya – ‘paṭikūle ca appaṭikūle ca appaṭikūlasaññī vihareyya’nti, ayameva ānāpānassatisamādhi sādhukaṃ manasi kātabbo.
‘‘д̇асмаад̇иха, бхигкавз, бхигку жзби ааган̇кзяяа – ‘аббадигуулан̃жа бадигуулан̃жа д̇ад̣̇убхаяам̣ абхиниваж̇ж̇зд̇ваа убзгкаго вихарзяяам̣ сад̇о самбаж̇аано’д̇и, аяамзва аанаабаанассад̇исамаад̇хи саад̇хугам̣ манаси гаад̇аб̣б̣о.
‘‘Tasmātiha, bhikkhave, bhikkhu cepi ākaṅkheyya – ‘appaṭikūlañca paṭikūlañca tadubhayaṃ abhinivajjetvā upekkhako vihareyyaṃ sato sampajāno’ti, ayameva ānāpānassatisamādhi sādhukaṃ manasi kātabbo.
‘‘д̇асмаад̇иха, бхигкавз, бхигку жзби ааган̇кзяяа – ‘вивижжзва гаамзхи вивижжа агусалзхи д̇хаммзхи савид̇аггам̣ савижаарам̣ вивзгаж̇ам̣ бийд̇исукам̣ батамам̣ жхаанам̣ убасамбаж̇ж̇а вихарзяяа’нд̇и, аяамзва аанаабаанассад̇исамаад̇хи саад̇хугам̣ манаси гаад̇аб̣б̣о.
‘‘Tasmātiha, bhikkhave, bhikkhu cepi ākaṅkheyya – ‘vivicceva kāmehi vivicca akusalehi dhammehi savitakkaṃ savicāraṃ vivekajaṃ pītisukhaṃ paṭhamaṃ jhānaṃ upasampajja vihareyya’nti, ayameva ānāpānassatisamādhi sādhukaṃ manasi kātabbo.
‘‘д̇асмаад̇иха, бхигкавз, бхигку жзби ааган̇кзяяа – ‘вид̇аггавижаараанам̣ вуубасамаа аж̇жхад̇д̇ам̣ самбасаад̣̇анам̣ жзд̇асо згод̣̇ибхаавам̣ авид̇аггам̣ авижаарам̣ самаад̇хиж̇ам̣ бийд̇исукам̣ д̣̇уд̇ияам̣ жхаанам̣ убасамбаж̇ж̇а вихарзяяа’нд̇и, аяамзва аанаабаанассад̇исамаад̇хи саад̇хугам̣ манаси гаад̇аб̣б̣о.
‘‘Tasmātiha, bhikkhave, bhikkhu cepi ākaṅkheyya – ‘vitakkavicārānaṃ vūpasamā ajjhattaṃ sampasādanaṃ cetaso ekodibhāvaṃ avitakkaṃ avicāraṃ samādhijaṃ pītisukhaṃ dutiyaṃ jhānaṃ upasampajja vihareyya’nti, ayameva ānāpānassatisamādhi sādhukaṃ manasi kātabbo.
‘‘д̇асмаад̇иха бхигкавз, бхигку жзби ааган̇кзяяа – ‘бийд̇ияаа жа вирааг̇аа убзгкаго жа вихарзяяам̣ сад̇о жа самбаж̇аано, сукан̃жа гааязна бадисам̣взд̣̇зяяам̣, яам̣ д̇ам̣ арияаа аажигканд̇и – убзгкаго сад̇имаа сукавихаарийд̇и д̇ад̇ияам̣ жхаанам̣ убасамбаж̇ж̇а вихарзяяа’нд̇и, аяамзва аанаабаанассад̇исамаад̇хи саад̇хугам̣ манаси гаад̇аб̣б̣о.
‘‘Tasmātiha bhikkhave, bhikkhu cepi ākaṅkheyya – ‘pītiyā ca virāgā upekkhako ca vihareyyaṃ sato ca sampajāno, sukhañca kāyena paṭisaṃvedeyyaṃ, yaṃ taṃ ariyā ācikkhanti – upekkhako satimā sukhavihārīti tatiyaṃ jhānaṃ upasampajja vihareyya’nti, ayameva ānāpānassatisamādhi sādhukaṃ manasi kātabbo.
‘‘д̇асмаад̇иха, бхигкавз, бхигку жзби ааган̇кзяяа – ‘сукасса жа бахаанаа д̣̇угкасса жа бахаанаа буб̣б̣зва соманассад̣̇оманассаанам̣ ад̇т̇ан̇г̇амаа ад̣̇угкамасукам̣ убзгкаасад̇ибаарисуд̣̇д̇хим̣ жад̇уд̇т̇ам̣ жхаанам̣ убасамбаж̇ж̇а вихарзяяа’нд̇и, аяамзва аанаабаанассад̇исамаад̇хи саад̇хугам̣ манаси гаад̇аб̣б̣о.
‘‘Tasmātiha, bhikkhave, bhikkhu cepi ākaṅkheyya – ‘sukhassa ca pahānā dukkhassa ca pahānā pubbeva somanassadomanassānaṃ atthaṅgamā adukkhamasukhaṃ upekkhāsatipārisuddhiṃ catutthaṃ jhānaṃ upasampajja vihareyya’nti, ayameva ānāpānassatisamādhi sādhukaṃ manasi kātabbo.
‘‘д̇асмаад̇иха, бхигкавз, бхигку жзби ааган̇кзяяа – ‘саб̣б̣асо руубасан̃н̃аанам̣ самад̇иггамаа бадигхасан̃н̃аанам̣ ад̇т̇ан̇г̇амаа наанад̇д̇асан̃н̃аанам̣ аманасигаараа ананд̇о аагаасод̇и аагаасаанан̃жааяад̇анам̣ убасамбаж̇ж̇а вихарзяяа’нд̇и, аяамзва аанаабаанассад̇исамаад̇хи саад̇хугам̣ манаси гаад̇аб̣б̣о.
‘‘Tasmātiha, bhikkhave, bhikkhu cepi ākaṅkheyya – ‘sabbaso rūpasaññānaṃ samatikkamā paṭighasaññānaṃ atthaṅgamā nānattasaññānaṃ amanasikārā ananto ākāsoti ākāsānañcāyatanaṃ upasampajja vihareyya’nti, ayameva ānāpānassatisamādhi sādhukaṃ manasi kātabbo.
‘‘д̇асмаад̇иха, бхигкавз, бхигку жзби ааган̇кзяяа – ‘саб̣б̣асо аагаасаанан̃жааяад̇анам̣ самад̇иггамма ананд̇ам̣ вин̃н̃аан̣анд̇и вин̃н̃аан̣ан̃жааяад̇анам̣ убасамбаж̇ж̇а вихарзяяа’нд̇и, аяамзва аанаабаанассад̇исамаад̇хи саад̇хугам̣ манаси гаад̇аб̣б̣о.
‘‘Tasmātiha, bhikkhave, bhikkhu cepi ākaṅkheyya – ‘sabbaso ākāsānañcāyatanaṃ samatikkamma anantaṃ viññāṇanti viññāṇañcāyatanaṃ upasampajja vihareyya’nti, ayameva ānāpānassatisamādhi sādhukaṃ manasi kātabbo.
‘‘д̇асмаад̇иха, бхигкавз, бхигку жзби ааган̇кзяяа – ‘саб̣б̣асо вин̃н̃аан̣ан̃жааяад̇анам̣ самад̇иггамма над̇т̇и гин̃жийд̇и аагин̃жан̃н̃ааяад̇анам̣ убасамбаж̇ж̇а вихарзяяа’нд̇и, аяамзва аанаабаанассад̇исамаад̇хи саад̇хугам̣ манаси гаад̇аб̣б̣о.
‘‘Tasmātiha, bhikkhave, bhikkhu cepi ākaṅkheyya – ‘sabbaso viññāṇañcāyatanaṃ samatikkamma natthi kiñcīti ākiñcaññāyatanaṃ upasampajja vihareyya’nti, ayameva ānāpānassatisamādhi sādhukaṃ manasi kātabbo.
‘‘д̇асмаад̇иха , бхигкавз, бхигку жзби ааган̇кзяяа – ‘саб̣б̣асо аагин̃жан̃н̃ааяад̇анам̣ самад̇иггамма нзвасан̃н̃аанаасан̃н̃ааяад̇анам̣ убасамбаж̇ж̇а вихарзяяа’нд̇и, аяамзва аанаабаанассад̇исамаад̇хи саад̇хугам̣ манаси гаад̇аб̣б̣о.
‘‘Tasmātiha , bhikkhave, bhikkhu cepi ākaṅkheyya – ‘sabbaso ākiñcaññāyatanaṃ samatikkamma nevasaññānāsaññāyatanaṃ upasampajja vihareyya’nti, ayameva ānāpānassatisamādhi sādhukaṃ manasi kātabbo.
‘‘д̇асмаад̇иха, бхигкавз, бхигку жзби ааган̇кзяяа – ‘саб̣б̣асо нзвасан̃н̃аанаасан̃н̃ааяад̇анам̣ самад̇иггамма сан̃н̃аавзд̣̇аяид̇анирод̇хам̣ убасамбаж̇ж̇а вихарзяяа’нд̇и, аяамзва аанаабаанассад̇исамаад̇хи саад̇хугам̣ манаси гаад̇аб̣б̣о.
‘‘Tasmātiha, bhikkhave, bhikkhu cepi ākaṅkheyya – ‘sabbaso nevasaññānāsaññāyatanaṃ samatikkamma saññāvedayitanirodhaṃ upasampajja vihareyya’nti, ayameva ānāpānassatisamādhi sādhukaṃ manasi kātabbo.
‘‘звам̣ бхаавид̇з ко, бхигкавз, аанаабаанассад̇исамаад̇химхи звам̣ б̣ахулийгад̇з, сукам̣ жз взд̣̇анам̣ взд̣̇аяад̇и, саа ‘анижжаа’д̇и баж̇аанаад̇и, ‘анаж̇жхосид̇аа’д̇и баж̇аанаад̇и, ‘анабхинанд̣̇ид̇аа’д̇и баж̇аанаад̇и; д̣̇угкам̣ жз взд̣̇анам̣ взд̣̇аяад̇и, ‘саа анижжаа’д̇и баж̇аанаад̇и, ‘анаж̇жхосид̇аа’д̇и баж̇аанаад̇и, ‘анабхинанд̣̇ид̇аа’д̇и баж̇аанаад̇и; ад̣̇угкамасукам̣ жз взд̣̇анам̣ взд̣̇аяад̇и, ‘саа анижжаа’д̇и баж̇аанаад̇и, ‘анаж̇жхосид̇аа’д̇и баж̇аанаад̇и, ‘анабхинанд̣̇ид̇аа’д̇и баж̇аанаад̇и’’.
‘‘Evaṃ bhāvite kho, bhikkhave, ānāpānassatisamādhimhi evaṃ bahulīkate, sukhaṃ ce vedanaṃ vedayati, sā ‘aniccā’ti pajānāti, ‘anajjhositā’ti pajānāti, ‘anabhinanditā’ti pajānāti; dukkhaṃ ce vedanaṃ vedayati, ‘sā aniccā’ti pajānāti, ‘anajjhositā’ti pajānāti, ‘anabhinanditā’ti pajānāti; adukkhamasukhaṃ ce vedanaṃ vedayati, ‘sā aniccā’ti pajānāti, ‘anajjhositā’ti pajānāti, ‘anabhinanditā’ti pajānāti’’.
‘‘сукам̣ 1 жз взд̣̇анам̣ взд̣̇аяад̇и, висам̣яуд̇д̇о нам̣ взд̣̇аяад̇и; д̣̇угкам̣ жз взд̣̇анам̣ взд̣̇аяад̇и, висам̣яуд̇д̇о нам̣ взд̣̇аяад̇и; ад̣̇угкамасукам̣ жз взд̣̇анам̣ взд̣̇аяад̇и, висам̣яуд̇д̇о нам̣ взд̣̇аяад̇и. со гааяабарияанд̇игам̣ взд̣̇анам̣ взд̣̇аяамаано ‘гааяабарияанд̇игам̣ взд̣̇анам̣ взд̣̇аяаамий’д̇и баж̇аанаад̇и, ж̇ийвид̇абарияанд̇игам̣ взд̣̇анам̣ взд̣̇аяамаано ‘ж̇ийвид̇абарияанд̇игам̣ взд̣̇анам̣ взд̣̇аяаамий’д̇и баж̇аанаад̇и, ‘гааяасса бхзд̣̇аа уд̣̇д̇хам̣ ж̇ийвид̇абарияаад̣̇аанаа ид̇хзва саб̣б̣авзд̣̇аяид̇аани анабхинанд̣̇ид̇аани сийд̇ийбхависсанд̇ий’д̇и баж̇аанаад̇и’’.
‘‘Sukhaṃ 2 ce vedanaṃ vedayati, visaṃyutto naṃ vedayati; dukkhaṃ ce vedanaṃ vedayati, visaṃyutto naṃ vedayati; adukkhamasukhaṃ ce vedanaṃ vedayati, visaṃyutto naṃ vedayati. So kāyapariyantikaṃ vedanaṃ vedayamāno ‘kāyapariyantikaṃ vedanaṃ vedayāmī’ti pajānāti, jīvitapariyantikaṃ vedanaṃ vedayamāno ‘jīvitapariyantikaṃ vedanaṃ vedayāmī’ti pajānāti, ‘kāyassa bhedā uddhaṃ jīvitapariyādānā idheva sabbavedayitāni anabhinanditāni sītībhavissantī’ti pajānāti’’.
‘‘сзяяат̇ааби, бхигкавз, д̇злан̃жа бадижжа, ваддин̃жа бадижжа д̇злаббад̣̇ийбо жхааязяяа, д̇ассзва д̇зласса жа ваддияаа жа барияаад̣̇аанаа анаахааро ниб̣б̣ааязяяа; звамзва ко, бхигкавз, бхигку гааяабарияанд̇игам̣ взд̣̇анам̣ взд̣̇аяамаано ‘гааяабарияанд̇игам̣ взд̣̇анам̣ взд̣̇аяаамий’д̇и баж̇аанаад̇и, ж̇ийвид̇абарияанд̇игам̣ взд̣̇анам̣ взд̣̇аяамаано ‘ж̇ийвид̇абарияанд̇игам̣ взд̣̇анам̣ взд̣̇аяаамий’д̇и баж̇аанаад̇и, ‘гааяасса бхзд̣̇аа уд̣̇д̇хам̣ ж̇ийвид̇абарияаад̣̇аанаа ид̇хзва саб̣б̣авзд̣̇аяид̇аани анабхинанд̣̇ид̇аани сийд̇ийбхависсанд̇ий’д̇и баж̇аанаад̇ий’’д̇и. адтамам̣.
‘‘Seyyathāpi, bhikkhave, telañca paṭicca, vaṭṭiñca paṭicca telappadīpo jhāyeyya, tasseva telassa ca vaṭṭiyā ca pariyādānā anāhāro nibbāyeyya; evameva kho, bhikkhave, bhikkhu kāyapariyantikaṃ vedanaṃ vedayamāno ‘kāyapariyantikaṃ vedanaṃ vedayāmī’ti pajānāti, jīvitapariyantikaṃ vedanaṃ vedayamāno ‘jīvitapariyantikaṃ vedanaṃ vedayāmī’ti pajānāti, ‘kāyassa bhedā uddhaṃ jīvitapariyādānā idheva sabbavedayitāni anabhinanditāni sītībhavissantī’ti pajānātī’’ti. Aṭṭhamaṃ.
Footnotes:
Related texts:
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / сам̣яуд̇д̇анигааяа (адтагат̇аа) • Saṃyuttanikāya (aṭṭhakathā) / 8. бад̣̇ийбобамасуд̇д̇аван̣н̣анаа • 8. Padīpopamasuttavaṇṇanā
дийгаа • Tīkā / суд̇д̇абидага (дийгаа) • Suttapiṭaka (ṭīkā) / сам̣яуд̇д̇анигааяа (дийгаа) • Saṃyuttanikāya (ṭīkā) / 8. бад̣̇ийбобамасуд̇д̇аван̣н̣анаа • 8. Padīpopamasuttavaṇṇanā
