| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
8. பதீ³போபமஸுத்தவண்ணனா
8. Padīpopamasuttavaṇṇanā
984. அட்ட²மே நேவ காயோபி கிலமதி ந சக்கூ²னீதி அஞ்ஞேஸு ஹி கம்மட்டா²னேஸு கம்மங் கரொந்தஸ்ஸ காயோபி கிலமதி, சக்கூ²னிபி விஹஞ்ஞந்தி. தா⁴துகம்மட்டா²னஸ்மிஞ்ஹி கம்மங் கரொந்தஸ்ஸ காயோ கிலமதி, யந்தே பக்கி²பித்வா பீளனாகாரப்பத்தோ விய ஹோதி. கஸிணகம்மட்டா²னே கம்மங் கரொந்தஸ்ஸ சக்கூ²னி ப²ந்த³ந்தி கிலமந்தி, நிக்க²மித்வா பதனாகாரப்பத்தானி விய ஹொந்தி. இமஸ்மிங் பன கம்மட்டா²னே கம்மங் கரொந்தஸ்ஸ நேவ காயோ கிலமதி, ந அக்கீ²னி விஹஞ்ஞந்தி. தஸ்மா ஏவமாஹ.
984. Aṭṭhame neva kāyopi kilamati na cakkhūnīti aññesu hi kammaṭṭhānesu kammaṃ karontassa kāyopi kilamati, cakkhūnipi vihaññanti. Dhātukammaṭṭhānasmiñhi kammaṃ karontassa kāyo kilamati, yante pakkhipitvā pīḷanākārappatto viya hoti. Kasiṇakammaṭṭhāne kammaṃ karontassa cakkhūni phandanti kilamanti, nikkhamitvā patanākārappattāni viya honti. Imasmiṃ pana kammaṭṭhāne kammaṃ karontassa neva kāyo kilamati, na akkhīni vihaññanti. Tasmā evamāha.
ஸப்³ப³ஸோ ரூபஸஞ்ஞானந்திஆதி³ கஸ்மா வுத்தங், கிங் ஆனாபானே கஸிணுக்³கா⁴டனங் லப்³ப⁴தீதி? திபிடகசூளாப⁴யத்தே²ரோ பனாஹ – ‘‘யஸ்மா ஆனாபானநிமித்தங் தாரகரூபமுத்தாவலிகாதி³ஸதி³ஸங் ஹுத்வா பஞ்ஞாயதி, தஸ்மா தத்த² கஸிணுக்³கா⁴டனங் லப்³ப⁴தீ’’தி. திபிடகசூளனாக³த்தே²ரோ ‘‘ந லப்³ப⁴தேவா’’தி ஆஹ. அலப்³ப⁴ந்தே அயங் அரியித்³தி⁴ஆதி³கோ பபே⁴தோ³ கஸ்மா க³ஹிதோதி? ஆனிஸங்ஸத³ஸ்ஸனத்த²ங். அரியங் வா ஹி இத்³தி⁴ங் சத்தாரி வா ரூபாவசரஜ்ஜா²னானி சதஸ்ஸோ வா அரூபஸமாபத்தியோ நிரோத⁴ஸமாபத்திங் வா பத்த²யமானேன பி⁴க்கு²னா அயங் ஆனாபானஸ்ஸதிஸமாதி⁴ ஸாது⁴கங் மனஸிகாதப்³போ³. யதா² ஹி நக³ரே லத்³தே⁴ யங் சதூஸு தி³ஸாஸு உட்டா²னகப⁴ண்ட³ங், தங் சதூஹி த்³வாரேஹி நக³ரமேவ பவிஸதீதி, ஜனபதோ³ லத்³தோ⁴ ச ஹோதி. நக³ரஸ்ஸேவ ஹேஸோ ஆனிஸங்ஸோ. ஏவங் ஆனாபானஸ்ஸதிஸமாதி⁴பா⁴வனாய ஆனிஸங்ஸோ ஏஸ அரியித்³தி⁴ஆதி³கோ பபே⁴தோ³, ஸப்³பா³காரேன பா⁴விதே ஆனாபானஸ்ஸதிஸமாதி⁴ஸ்மிங் ஸப்³ப³மேதங் யோகி³னோ நிப்ப²ஜ்ஜதீதி ஆனிஸங்ஸத³ஸ்ஸனத்த²ங் வுத்தங். ஸுக²ஞ்சேதி எத்த² ஸோதி கஸ்மா ந வுத்தங்? யஸ்மா பி⁴க்கூ²தி இமஸ்மிங் வாரே நாக³தங்.
Sabbasorūpasaññānantiādi kasmā vuttaṃ, kiṃ ānāpāne kasiṇugghāṭanaṃ labbhatīti? Tipiṭakacūḷābhayatthero panāha – ‘‘yasmā ānāpānanimittaṃ tārakarūpamuttāvalikādisadisaṃ hutvā paññāyati, tasmā tattha kasiṇugghāṭanaṃ labbhatī’’ti. Tipiṭakacūḷanāgatthero ‘‘na labbhatevā’’ti āha. Alabbhante ayaṃ ariyiddhiādiko pabhedo kasmā gahitoti? Ānisaṃsadassanatthaṃ. Ariyaṃ vā hi iddhiṃ cattāri vā rūpāvacarajjhānāni catasso vā arūpasamāpattiyo nirodhasamāpattiṃ vā patthayamānena bhikkhunā ayaṃ ānāpānassatisamādhi sādhukaṃ manasikātabbo. Yathā hi nagare laddhe yaṃ catūsu disāsu uṭṭhānakabhaṇḍaṃ, taṃ catūhi dvārehi nagarameva pavisatīti, janapado laddho ca hoti. Nagarasseva heso ānisaṃso. Evaṃ ānāpānassatisamādhibhāvanāya ānisaṃso esa ariyiddhiādiko pabhedo, sabbākārena bhāvite ānāpānassatisamādhismiṃ sabbametaṃ yogino nipphajjatīti ānisaṃsadassanatthaṃ vuttaṃ. Sukhañceti ettha soti kasmā na vuttaṃ? Yasmā bhikkhūti imasmiṃ vāre nāgataṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 8. பதீ³போபமஸுத்தங் • 8. Padīpopamasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 8. பதீ³போபமஸுத்தவண்ணனா • 8. Padīpopamasuttavaṇṇanā
