| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) |
༨. པདཱིཔོཔམསུཏྟཝཎྞནཱ
8. Padīpopamasuttavaṇṇanā
༩༨༤. ཨཊྛམེ ནེཝ ཀཱཡོཔི ཀིལམཏི ན ཙཀྑཱུནཱིཏི ཨཉྙེསུ ཧི ཀམྨཊྛཱནེསུ ཀམྨཾ ཀརོནྟསྶ ཀཱཡོཔི ཀིལམཏི, ཙཀྑཱུནིཔི ཝིཧཉྙནྟི། དྷཱཏུཀམྨཊྛཱནསྨིཉྷི ཀམྨཾ ཀརོནྟསྶ ཀཱཡོ ཀིལམཏི, ཡནྟེ པཀྑིཔིཏྭཱ པཱིལ༹ནཱཀཱརཔྤཏྟོ ཝིཡ ཧོཏི། ཀསིཎཀམྨཊྛཱནེ ཀམྨཾ ཀརོནྟསྶ ཙཀྑཱུནི ཕནྡནྟི ཀིལམནྟི, ནིཀྑམིཏྭཱ པཏནཱཀཱརཔྤཏྟཱནི ཝིཡ ཧོནྟི། ཨིམསྨིཾ པན ཀམྨཊྛཱནེ ཀམྨཾ ཀརོནྟསྶ ནེཝ ཀཱཡོ ཀིལམཏི, ན ཨཀྑཱིནི ཝིཧཉྙནྟི། ཏསྨཱ ཨེཝམཱཧ།
984. Aṭṭhame neva kāyopi kilamati na cakkhūnīti aññesu hi kammaṭṭhānesu kammaṃ karontassa kāyopi kilamati, cakkhūnipi vihaññanti. Dhātukammaṭṭhānasmiñhi kammaṃ karontassa kāyo kilamati, yante pakkhipitvā pīḷanākārappatto viya hoti. Kasiṇakammaṭṭhāne kammaṃ karontassa cakkhūni phandanti kilamanti, nikkhamitvā patanākārappattāni viya honti. Imasmiṃ pana kammaṭṭhāne kammaṃ karontassa neva kāyo kilamati, na akkhīni vihaññanti. Tasmā evamāha.
སབྦསོ རཱུཔསཉྙཱནནྟིཨཱདི ཀསྨཱ ཝུཏྟཾ, ཀིཾ ཨཱནཱཔཱནེ ཀསིཎུགྒྷཱཊནཾ ལབྦྷཏཱིཏི? ཏིཔིཊཀཙཱུལཱ༹བྷཡཏྠེརོ པནཱཧ – ‘‘ཡསྨཱ ཨཱནཱཔཱནནིམིཏྟཾ ཏཱརཀརཱུཔམུཏྟཱཝལིཀཱདིསདིསཾ ཧུཏྭཱ པཉྙཱཡཏི, ཏསྨཱ ཏཏྠ ཀསིཎུགྒྷཱཊནཾ ལབྦྷཏཱི’’ཏི། ཏིཔིཊཀཙཱུལ༹ནཱགཏྠེརོ ‘‘ན ལབྦྷཏེཝཱ’’ཏི ཨཱཧ། ཨལབྦྷནྟེ ཨཡཾ ཨརིཡིདྡྷིཨཱདིཀོ པབྷེདོ ཀསྨཱ གཧིཏོཏི? ཨཱནིསཾསདསྶནཏྠཾ། ཨརིཡཾ ཝཱ ཧི ཨིདྡྷིཾ ཙཏྟཱརི ཝཱ རཱུཔཱཝཙརཛ྄ཛྷཱནཱནི ཙཏསྶོ ཝཱ ཨརཱུཔསམཱཔཏྟིཡོ ནིརོདྷསམཱཔཏྟིཾ ཝཱ པཏྠཡམཱནེན བྷིཀྑུནཱ ཨཡཾ ཨཱནཱཔཱནསྶཏིསམཱདྷི སཱདྷུཀཾ མནསིཀཱཏབྦོ། ཡཐཱ ཧི ནགརེ ལདྡྷེ ཡཾ ཙཏཱུསུ དིསཱསུ ཨུཊྛཱནཀབྷཎྜཾ, ཏཾ ཙཏཱུཧི དྭཱརེཧི ནགརམེཝ པཝིསཏཱིཏི, ཛནཔདོ ལདྡྷོ ཙ ཧོཏི། ནགརསྶེཝ ཧེསོ ཨཱནིསཾསོ། ཨེཝཾ ཨཱནཱཔཱནསྶཏིསམཱདྷིབྷཱཝནཱཡ ཨཱནིསཾསོ ཨེས ཨརིཡིདྡྷིཨཱདིཀོ པབྷེདོ, སབྦཱཀཱརེན བྷཱཝིཏེ ཨཱནཱཔཱནསྶཏིསམཱདྷིསྨིཾ སབྦམེཏཾ ཡོགིནོ ནིཔྥཛྫཏཱིཏི ཨཱནིསཾསདསྶནཏྠཾ ཝུཏྟཾ། སུཁཉྩེཏི ཨེཏྠ སོཏི ཀསྨཱ ན ཝུཏྟཾ? ཡསྨཱ བྷིཀྑཱུཏི ཨིམསྨིཾ ཝཱརེ ནཱགཏཾ།
Sabbasorūpasaññānantiādi kasmā vuttaṃ, kiṃ ānāpāne kasiṇugghāṭanaṃ labbhatīti? Tipiṭakacūḷābhayatthero panāha – ‘‘yasmā ānāpānanimittaṃ tārakarūpamuttāvalikādisadisaṃ hutvā paññāyati, tasmā tattha kasiṇugghāṭanaṃ labbhatī’’ti. Tipiṭakacūḷanāgatthero ‘‘na labbhatevā’’ti āha. Alabbhante ayaṃ ariyiddhiādiko pabhedo kasmā gahitoti? Ānisaṃsadassanatthaṃ. Ariyaṃ vā hi iddhiṃ cattāri vā rūpāvacarajjhānāni catasso vā arūpasamāpattiyo nirodhasamāpattiṃ vā patthayamānena bhikkhunā ayaṃ ānāpānassatisamādhi sādhukaṃ manasikātabbo. Yathā hi nagare laddhe yaṃ catūsu disāsu uṭṭhānakabhaṇḍaṃ, taṃ catūhi dvārehi nagarameva pavisatīti, janapado laddho ca hoti. Nagarasseva heso ānisaṃso. Evaṃ ānāpānassatisamādhibhāvanāya ānisaṃso esa ariyiddhiādiko pabhedo, sabbākārena bhāvite ānāpānassatisamādhismiṃ sabbametaṃ yogino nipphajjatīti ānisaṃsadassanatthaṃ vuttaṃ. Sukhañceti ettha soti kasmā na vuttaṃ? Yasmā bhikkhūti imasmiṃ vāre nāgataṃ.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / སཾཡུཏྟནིཀཱཡ • Saṃyuttanikāya / ༨. པདཱིཔོཔམསུཏྟཾ • 8. Padīpopamasuttaṃ
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) / ༨. པདཱིཔོཔམསུཏྟཝཎྞནཱ • 8. Padīpopamasuttavaṇṇanā
