| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
7. பாது³கவக்³க³-அத்த²யோஜனா
7. Pādukavagga-atthayojanā
638. அங்கு³லந்தரந்தி பாத³ங்கு³லவிவரங். பாது³கந்தி உபாஹனவிஸேஸோ. ஸோ ஹி பஜ்ஜதே இமாயாதி பாது³காதி வுச்சதி, ஸா ப³ஹுபடலா சம்மமயா வா ஹோதி கட்ட²மயா வா. படிமுஞ்சித்வாதி பாது³கங் படிமுஞ்சீத்வா.
638.Aṅgulantaranti pādaṅgulavivaraṃ. Pādukanti upāhanaviseso. So hi pajjate imāyāti pādukāti vuccati, sā bahupaṭalā cammamayā vā hoti kaṭṭhamayā vā. Paṭimuñcitvāti pādukaṃ paṭimuñcītvā.
640. த்³வீஹி ஜனேஹி க³ஹிதோதி ஸம்ப³ந்தோ⁴. வங்ஸேனாதி வேணுனா, யானே நிஸின்னோதி ஸம்ப³ந்தோ⁴. விஸங்க²ரித்வாதி விபத்திங் கரித்வா. த்³வேபீதி த⁴ம்மகதி²கத⁴ம்மபடிக்³கா³ஹகஸங்கா²தா உபோ⁴பி ஜனா. வட்டதீதி தே³ஸேதுங் வட்டதி.
640. Dvīhi janehi gahitoti sambandho. Vaṃsenāti veṇunā, yāne nisinnoti sambandho. Visaṅkharitvāti vipattiṃ karitvā. Dvepīti dhammakathikadhammapaṭiggāhakasaṅkhātā ubhopi janā. Vaṭṭatīti desetuṃ vaṭṭati.
641. ஸயனக³தஸ்ஸாதி ஸயனங் க³தஸ்ஸ, ஸயனே நிபன்னஸ்ஸாதி அத்தோ². நிபன்னஸ்ஸ தே³ஸேதுங் ந வட்டதீதி ஸம்ப³ந்தோ⁴.
641.Sayanagatassāti sayanaṃ gatassa, sayane nipannassāti attho. Nipannassa desetuṃ na vaṭṭatīti sambandho.
642. தீஸு பல்லத்தி²காஸு யாய காயசி பல்லத்தி²காய நிஸின்னஸ்ஸ த⁴ம்மங் தே³ஸேதுங் ந வட்டதீதி த³ஸ்ஸெந்தோ ஆஹ ‘‘பல்லத்தி²காயா’’திஆதி³.
642. Tīsu pallatthikāsu yāya kāyaci pallatthikāya nisinnassa dhammaṃ desetuṃ na vaṭṭatīti dassento āha ‘‘pallatthikāyā’’tiādi.
643. யதா² வேடி²யமானே கேஸந்தோ ந தி³ஸ்ஸதி, ஏவங் வேடி²தஸீஸஸ்ஸாதி யோஜனா.
643. Yathā veṭhiyamāne kesanto na dissati, evaṃ veṭhitasīsassāti yojanā.
647. ச²பகஸத்³த³ஸ்ஸ ச சண்டா³லஸத்³த³ஸ்ஸ ச வேவசனத்தா வுத்தங் ‘‘சண்டா³லஸ்ஸா’’தி. சண்டா³லோ ஹி ஸங் ஸுனக²ங் பசதீதி ச²பகோதி வுச்சதி ஸகாரஸ்ஸ ச²காரங் கத்வா. ச²பகஸ்ஸ ஏஸா ச²பகீ, சண்டா³லப⁴ரியா. யத்ராதி எத்த² த்ரபச்சயோ பச்சத்தே ஹோதீதி ஆஹ ‘‘யோ ஹி நாமா’’தி. யோ ராஜா உச்சே ஆஸனே நிஸீதி³த்வா மந்தங் பரியாபுணிஸ்ஸதி நாம, அயங் ராஜா யாவ அதிவிய அத⁴ம்மிகோதி வுத்தங் ஹோதி. ‘‘ஸப்³ப³மித³’’ந்தி அயங் ஸத்³தோ³ லிங்க³விபல்லாஸோதி ஆஹ ‘‘ஸப்³போ³ அய’’ந்தி . ‘‘லோகோ’’தி இமினா இத⁴ஸத்³த³ஸ்ஸ விஸயங் த³ஸ்ஸேதி. சரிமஸத்³தோ³ அந்திமபரியாயோ. அந்திமோதி ச லாமகோ. லாமகோதி ச நாம இத⁴ விபத்தீதி ஆஹ ‘‘ஸங்கர’’ந்தி. ஸங்கரந்தி விபத்திங். ‘‘நிம்மரியாதோ³’’தி இமினா ‘‘ஸங்கரங் க³தோ’’தி பதா³னங் அதி⁴ப்பாயத்த²ங் த³ஸ்ஸேதி. சரிமங் க³தங் சரிமக³தங், ஸப்³போ³ அயங் லோகோ சரிமக³தோதி அத்தோ². இத⁴ ச ஜாதகே (ஜா॰ 1.4.33) ச கேஸுசி பொத்த²கேஸு ‘‘சமரிகத’’ந்தி பாடோ² அத்தி², ஸோ அயுத்தோயேவ. தத்தே²வாதி அம்ப³ருக்க²மூலேயேவ. தேஸந்தி ராஜப்³ராஹ்மணானங்.
647. Chapakasaddassa ca caṇḍālasaddassa ca vevacanattā vuttaṃ ‘‘caṇḍālassā’’ti. Caṇḍālo hi saṃ sunakhaṃ pacatīti chapakoti vuccati sakārassa chakāraṃ katvā. Chapakassa esā chapakī, caṇḍālabhariyā. Yatrāti ettha trapaccayo paccatte hotīti āha ‘‘yo hi nāmā’’ti. Yo rājā ucce āsane nisīditvā mantaṃ pariyāpuṇissati nāma, ayaṃ rājā yāva ativiya adhammikoti vuttaṃ hoti. ‘‘Sabbamida’’nti ayaṃ saddo liṅgavipallāsoti āha ‘‘sabbo aya’’nti . ‘‘Loko’’ti iminā idhasaddassa visayaṃ dasseti. Carimasaddo antimapariyāyo. Antimoti ca lāmako. Lāmakoti ca nāma idha vipattīti āha ‘‘saṅkara’’nti. Saṅkaranti vipattiṃ. ‘‘Nimmariyādo’’ti iminā ‘‘saṅkaraṃ gato’’ti padānaṃ adhippāyatthaṃ dasseti. Carimaṃ gataṃ carimagataṃ, sabbo ayaṃ loko carimagatoti attho. Idha ca jātake (jā. 1.4.33) ca kesuci potthakesu ‘‘camarikata’’nti pāṭho atthi, so ayuttoyeva. Tatthevāti ambarukkhamūleyeva. Tesanti rājabrāhmaṇānaṃ.
தத்தா²தி திஸ்ஸங் கா³தா²யங். பாளியாதி அத்தனோ ஆசாரபகாஸகக³ந்த²ஸங்கா²தாய பாளியா. ந பஸ்ஸரேதி எத்த² ரேஸத்³தோ³ அந்திஸ்ஸ காரியோதி ஆஹ ‘‘ந பஸ்ஸந்தீ’’தி. யோ சாயந்தி யோ ச அயங். அயங்ஸத்³தோ³ பதா³லங்காரமத்தோ, ப்³ராஹ்மணோதி அத்தோ². அதீ⁴யதீதி அஜ்ஜா²யதி, ஸிக்க²தீதி அத்தோ².
Tatthāti tissaṃ gāthāyaṃ. Pāḷiyāti attano ācārapakāsakaganthasaṅkhātāya pāḷiyā. Na passareti ettha resaddo antissa kāriyoti āha ‘‘na passantī’’ti. Yo cāyanti yo ca ayaṃ. Ayaṃsaddo padālaṅkāramatto, brāhmaṇoti attho. Adhīyatīti ajjhāyati, sikkhatīti attho.
ததோதி போ³தி⁴ஸத்தேன வுத்தகா³தா²தோ பரந்தி ஸம்ப³ந்தோ⁴. தஸ்ஸாதி கா³தா²ய. போ⁴தி போ³தி⁴ஸத்தங் ஆமந்தேதி. ‘‘பு⁴த்தோ’’தி பத³ஸ்ஸ கம்மவாசகபா⁴வமாவிகாதுங் வுத்தங் ‘‘மயா’’தி. அஸ்ஸாதி ஓத³னஸ்ஸ. இமினா ஸுசி பரிஸுத்³த⁴ங் மங்ஸங் ஸுசிமங்ஸங், தேன உபஸேசனமஸ்ஸாதி ஸுசிமங்ஸூபஸேசனோதி பா³ஹிரத்த²ஸமாஸங் த³ஸ்ஸேதி. த⁴ம்மேதி ஆசாரத⁴ம்மே. ப³த்³தோ⁴ ஹுத்வாதி த²த்³தோ⁴ ஹுத்வா, அயமேவ வா பாடோ² . வண்ணஸத்³த³ஸ்ஸ ஸண்டா²னாதி³கே அஞ்ஞே அத்தே² படிக்கி²பிதுங் வுத்தங் ‘‘பஸத்தோ²’’தி. தோ²மிதோதி தஸ்ஸேவ வேவசனங்.
Tatoti bodhisattena vuttagāthāto paranti sambandho. Tassāti gāthāya. Bhoti bodhisattaṃ āmanteti. ‘‘Bhutto’’ti padassa kammavācakabhāvamāvikātuṃ vuttaṃ ‘‘mayā’’ti. Assāti odanassa. Iminā suci parisuddhaṃ maṃsaṃ sucimaṃsaṃ, tena upasecanamassāti sucimaṃsūpasecanoti bāhiratthasamāsaṃ dasseti. Dhammeti ācāradhamme. Baddho hutvāti thaddho hutvā, ayameva vā pāṭho . Vaṇṇasaddassa saṇṭhānādike aññe atthe paṭikkhipituṃ vuttaṃ ‘‘pasattho’’ti. Thomitoti tasseva vevacanaṃ.
அதா²தி அனந்தரே. நந்தி ப்³ராஹ்மணங். தஸ்ஸாதி கா³தா²த்³வயஸ்ஸ. ப்³ராஹ்மணாதி புரோஹிதங் ஆலபதி. ஸம்பதீதி ஸந்தீ³ட்டி²கே. ‘‘யா வுத்தி வினிபாதேன, அத⁴ம்மசரணேன வா’’தி பதா³னங் ஸம்ப³ந்த⁴ங் த³ஸ்ஸேதுங் வுத்தங் ‘‘நிப்பஜ்ஜதீ’’தி.
Athāti anantare. Nanti brāhmaṇaṃ. Tassāti gāthādvayassa. Brāhmaṇāti purohitaṃ ālapati. Sampatīti sandīṭṭhike. ‘‘Yā vutti vinipātena, adhammacaraṇena vā’’ti padānaṃ sambandhaṃ dassetuṃ vuttaṃ ‘‘nippajjatī’’ti.
மஹாப்³ரஹ்மேதி எத்த² ப்³ரஹ்மஸத்³தோ³ ப்³ராஹ்மணவாசகோதி ஆஹ ‘‘மஹாப்³ராஹ்மணா’’தி. அஞ்ஞேபீதி ராஜப்³ராஹ்மணேஹி அபரேபி. ‘‘பசந்தீ’’தி வுத்தே அவினாபா⁴வதோ ‘‘பு⁴ஞ்ஜந்தீ’’தி அத்தோ²பி க³ஹேதப்³போ³தி ஆஹ ‘‘பசந்தி சேவ பு⁴ஞ்ஜந்தி சா’’தி. ‘‘ந கேவல’’ந்திஆதி³னா அஞ்ஞேபீதி எத்த² பிஸத்³த³ஸ்ஸ ஸம்பிண்ட³னத்த²ங் த³ஸ்ஸேதி, த்வங் ஆசரிஸ்ஸஸீதி ஸம்ப³ந்தோ⁴. புன த்வந்தி தங், உபயோக³த்தே² சேதங் பச்சத்தவசனங், ‘‘மா பி⁴தா³’’திஇமினா ஸம்ப³ந்தி⁴தப்³ப³ங். ‘‘பாஸாணோ’’திஇமினா அஸ்மஸத்³தோ³ பாஸாணபரியாயோதி த³ஸ்ஸேதி. தேனாதி பி⁴ந்த³னஹேதுனா.
Mahābrahmeti ettha brahmasaddo brāhmaṇavācakoti āha ‘‘mahābrāhmaṇā’’ti. Aññepīti rājabrāhmaṇehi aparepi. ‘‘Pacantī’’ti vutte avinābhāvato ‘‘bhuñjantī’’ti atthopi gahetabboti āha ‘‘pacanti ceva bhuñjanti cā’’ti. ‘‘Na kevala’’ntiādinā aññepīti ettha pisaddassa sampiṇḍanatthaṃ dasseti, tvaṃ ācarissasīti sambandho. Puna tvanti taṃ, upayogatthe cetaṃ paccattavacanaṃ, ‘‘mā bhidā’’tiiminā sambandhitabbaṃ. ‘‘Pāsāṇo’’tiiminā asmasaddo pāsāṇapariyāyoti dasseti. Tenāti bhindanahetunā.
648. அத்தனோ கங்கா²டா²னஸ்ஸ புச்ச²னங் ஸந்தா⁴ய வுத்தங் ‘‘ந கதே²தப்³ப³’’ந்தி.
648. Attano kaṅkhāṭhānassa pucchanaṃ sandhāya vuttaṃ ‘‘na kathetabba’’nti.
649. ஸமது⁴ரேனாதி ஸமங் து⁴ரேன, ஸமங் முகே²னாதி அத்தோ².
649.Samadhurenāti samaṃ dhurena, samaṃ mukhenāti attho.
652. யங் மூலங் வா யா ஸாகா² வா க³ச்ச²தீதி யோஜனா. க²ந்தே⁴தி ருக்க²ஸ்ஸ க²ந்தே⁴. நிக்க²மதீதி உச்சாரபஸ்ஸாவோ நிக்க²மதி. திணண்டு³பகந்தி திணேன கதங், திணமயங் வா அண்டு³பகங். எத்தா²தி உச்சாரபஸ்ஸாவகே²ளேஸு.
652. Yaṃ mūlaṃ vā yā sākhā vā gacchatīti yojanā. Khandheti rukkhassa khandhe. Nikkhamatīti uccārapassāvo nikkhamati. Tiṇaṇḍupakanti tiṇena kataṃ, tiṇamayaṃ vā aṇḍupakaṃ. Etthāti uccārapassāvakheḷesu.
653. அதி⁴ப்பேதஉத³கங் த³ஸ்ஸேதுங் வுத்தங் ‘‘பரிபோ⁴க³உத³கமேவா’’தி. ஸத்தமோ வக்³கோ³.
653. Adhippetaudakaṃ dassetuṃ vuttaṃ ‘‘paribhogaudakamevā’’ti. Sattamo vaggo.
எத்தா²தி ஸேகி²யேஸு. ஸூபப்³யஞ்ஜனபடிச்சா²த³னேதி ஸூபப்³யஞ்ஜனே ஓத³னேன படிச்சா²தே³தி. ஸமத்தா ஸேகி²யா.
Etthāti sekhiyesu. Sūpabyañjanapaṭicchādaneti sūpabyañjane odanena paṭicchādeti. Samattā sekhiyā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 7. பாது³கவக்³கோ³ • 7. Pādukavaggo
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 7. பாது³கவக்³க³வண்ணனா • 7. Pādukavaggavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 7. பாது³கவக்³க³வண்ணனா • 7. Pādukavaggavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 7. பாது³கவக்³க³வண்ணனா • 7. Pādukavaggavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 7. பாது³கவக்³க³வண்ணனா • 7. Pādukavaggavaṇṇanā
