| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
৭. পাদুকৰগ্গ-অত্থযোজনা
7. Pādukavagga-atthayojanā
৬৩৮. অঙ্গুলন্তরন্তি পাদঙ্গুলৰিৰরং। পাদুকন্তি উপাহনৰিসেসো। সো হি পজ্জতে ইমাযাতি পাদুকাতি ৰুচ্চতি, সা বহুপটলা চম্মমযা ৰা হোতি কট্ঠমযা ৰা। পটিমুঞ্চিত্ৰাতি পাদুকং পটিমুঞ্চীত্ৰা।
638.Aṅgulantaranti pādaṅgulavivaraṃ. Pādukanti upāhanaviseso. So hi pajjate imāyāti pādukāti vuccati, sā bahupaṭalā cammamayā vā hoti kaṭṭhamayā vā. Paṭimuñcitvāti pādukaṃ paṭimuñcītvā.
৬৪০. দ্ৰীহি জনেহি গহিতোতি সম্বন্ধো। ৰংসেনাতি ৰেণুনা, যানে নিসিন্নোতি সম্বন্ধো। ৰিসঙ্খরিত্ৰাতি ৰিপত্তিং করিত্ৰা। দ্ৰেপীতি ধম্মকথিকধম্মপটিগ্গাহকসঙ্খাতা উভোপি জনা। ৰট্টতীতি দেসেতুং ৰট্টতি।
640. Dvīhi janehi gahitoti sambandho. Vaṃsenāti veṇunā, yāne nisinnoti sambandho. Visaṅkharitvāti vipattiṃ karitvā. Dvepīti dhammakathikadhammapaṭiggāhakasaṅkhātā ubhopi janā. Vaṭṭatīti desetuṃ vaṭṭati.
৬৪১. সযনগতস্সাতি সযনং গতস্স, সযনে নিপন্নস্সাতি অত্থো। নিপন্নস্স দেসেতুং ন ৰট্টতীতি সম্বন্ধো।
641.Sayanagatassāti sayanaṃ gatassa, sayane nipannassāti attho. Nipannassa desetuṃ na vaṭṭatīti sambandho.
৬৪২. তীসু পল্লত্থিকাসু যায কাযচি পল্লত্থিকায নিসিন্নস্স ধম্মং দেসেতুং ন ৰট্টতীতি দস্সেন্তো আহ ‘‘পল্লত্থিকাযা’’তিআদি।
642. Tīsu pallatthikāsu yāya kāyaci pallatthikāya nisinnassa dhammaṃ desetuṃ na vaṭṭatīti dassento āha ‘‘pallatthikāyā’’tiādi.
৬৪৩. যথা ৰেঠিযমানে কেসন্তো ন দিস্সতি, এৰং ৰেঠিতসীসস্সাতি যোজনা।
643. Yathā veṭhiyamāne kesanto na dissati, evaṃ veṭhitasīsassāti yojanā.
৬৪৭. ছপকসদ্দস্স চ চণ্ডালসদ্দস্স চ ৰেৰচনত্তা ৰুত্তং ‘‘চণ্ডালস্সা’’তি। চণ্ডালো হি সং সুনখং পচতীতি ছপকোতি ৰুচ্চতি সকারস্স ছকারং কত্ৰা। ছপকস্স এসা ছপকী, চণ্ডালভরিযা। যত্রাতি এত্থ ত্রপচ্চযো পচ্চত্তে হোতীতি আহ ‘‘যো হি নামা’’তি। যো রাজা উচ্চে আসনে নিসীদিত্ৰা মন্তং পরিযাপুণিস্সতি নাম, অযং রাজা যাৰ অতিৰিয অধম্মিকোতি ৰুত্তং হোতি। ‘‘সব্বমিদ’’ন্তি অযং সদ্দো লিঙ্গৰিপল্লাসোতি আহ ‘‘সব্বো অয’’ন্তি । ‘‘লোকো’’তি ইমিনা ইধসদ্দস্স ৰিসযং দস্সেতি। চরিমসদ্দো অন্তিমপরিযাযো। অন্তিমোতি চ লামকো। লামকোতি চ নাম ইধ ৰিপত্তীতি আহ ‘‘সঙ্কর’’ন্তি। সঙ্করন্তি ৰিপত্তিং। ‘‘নিম্মরিযাদো’’তি ইমিনা ‘‘সঙ্করং গতো’’তি পদানং অধিপ্পাযত্থং দস্সেতি। চরিমং গতং চরিমগতং, সব্বো অযং লোকো চরিমগতোতি অত্থো। ইধ চ জাতকে (জা॰ ১.৪.৩৩) চ কেসুচি পোত্থকেসু ‘‘চমরিকত’’ন্তি পাঠো অত্থি, সো অযুত্তোযেৰ। তত্থেৰাতি অম্বরুক্খমূলেযেৰ। তেসন্তি রাজব্রাহ্মণানং।
647. Chapakasaddassa ca caṇḍālasaddassa ca vevacanattā vuttaṃ ‘‘caṇḍālassā’’ti. Caṇḍālo hi saṃ sunakhaṃ pacatīti chapakoti vuccati sakārassa chakāraṃ katvā. Chapakassa esā chapakī, caṇḍālabhariyā. Yatrāti ettha trapaccayo paccatte hotīti āha ‘‘yo hi nāmā’’ti. Yo rājā ucce āsane nisīditvā mantaṃ pariyāpuṇissati nāma, ayaṃ rājā yāva ativiya adhammikoti vuttaṃ hoti. ‘‘Sabbamida’’nti ayaṃ saddo liṅgavipallāsoti āha ‘‘sabbo aya’’nti . ‘‘Loko’’ti iminā idhasaddassa visayaṃ dasseti. Carimasaddo antimapariyāyo. Antimoti ca lāmako. Lāmakoti ca nāma idha vipattīti āha ‘‘saṅkara’’nti. Saṅkaranti vipattiṃ. ‘‘Nimmariyādo’’ti iminā ‘‘saṅkaraṃ gato’’ti padānaṃ adhippāyatthaṃ dasseti. Carimaṃ gataṃ carimagataṃ, sabbo ayaṃ loko carimagatoti attho. Idha ca jātake (jā. 1.4.33) ca kesuci potthakesu ‘‘camarikata’’nti pāṭho atthi, so ayuttoyeva. Tatthevāti ambarukkhamūleyeva. Tesanti rājabrāhmaṇānaṃ.
তত্থাতি তিস্সং গাথাযং। পাল়িযাতি অত্তনো আচারপকাসকগন্থসঙ্খাতায পাল়িযা। ন পস্সরেতি এত্থ রেসদ্দো অন্তিস্স কারিযোতি আহ ‘‘ন পস্সন্তী’’তি। যো চাযন্তি যো চ অযং। অযংসদ্দো পদালঙ্কারমত্তো, ব্রাহ্মণোতি অত্থো। অধীযতীতি অজ্ঝাযতি, সিক্খতীতি অত্থো।
Tatthāti tissaṃ gāthāyaṃ. Pāḷiyāti attano ācārapakāsakaganthasaṅkhātāya pāḷiyā. Na passareti ettha resaddo antissa kāriyoti āha ‘‘na passantī’’ti. Yo cāyanti yo ca ayaṃ. Ayaṃsaddo padālaṅkāramatto, brāhmaṇoti attho. Adhīyatīti ajjhāyati, sikkhatīti attho.
ততোতি বোধিসত্তেন ৰুত্তগাথাতো পরন্তি সম্বন্ধো। তস্সাতি গাথায। ভোতি বোধিসত্তং আমন্তেতি। ‘‘ভুত্তো’’তি পদস্স কম্মৰাচকভাৰমাৰিকাতুং ৰুত্তং ‘‘মযা’’তি। অস্সাতি ওদনস্স। ইমিনা সুচি পরিসুদ্ধং মংসং সুচিমংসং, তেন উপসেচনমস্সাতি সুচিমংসূপসেচনোতি বাহিরত্থসমাসং দস্সেতি। ধম্মেতি আচারধম্মে। বদ্ধো হুত্ৰাতি থদ্ধো হুত্ৰা, অযমেৰ ৰা পাঠো । ৰণ্ণসদ্দস্স সণ্ঠানাদিকে অঞ্ঞে অত্থে পটিক্খিপিতুং ৰুত্তং ‘‘পসত্থো’’তি। থোমিতোতি তস্সেৰ ৰেৰচনং।
Tatoti bodhisattena vuttagāthāto paranti sambandho. Tassāti gāthāya. Bhoti bodhisattaṃ āmanteti. ‘‘Bhutto’’ti padassa kammavācakabhāvamāvikātuṃ vuttaṃ ‘‘mayā’’ti. Assāti odanassa. Iminā suci parisuddhaṃ maṃsaṃ sucimaṃsaṃ, tena upasecanamassāti sucimaṃsūpasecanoti bāhiratthasamāsaṃ dasseti. Dhammeti ācāradhamme. Baddho hutvāti thaddho hutvā, ayameva vā pāṭho . Vaṇṇasaddassa saṇṭhānādike aññe atthe paṭikkhipituṃ vuttaṃ ‘‘pasattho’’ti. Thomitoti tasseva vevacanaṃ.
অথাতি অনন্তরে। নন্তি ব্রাহ্মণং। তস্সাতি গাথাদ্ৰযস্স। ব্রাহ্মণাতি পুরোহিতং আলপতি। সম্পতীতি সন্দীট্ঠিকে। ‘‘যা ৰুত্তি ৰিনিপাতেন, অধম্মচরণেন ৰা’’তি পদানং সম্বন্ধং দস্সেতুং ৰুত্তং ‘‘নিপ্পজ্জতী’’তি।
Athāti anantare. Nanti brāhmaṇaṃ. Tassāti gāthādvayassa. Brāhmaṇāti purohitaṃ ālapati. Sampatīti sandīṭṭhike. ‘‘Yā vutti vinipātena, adhammacaraṇena vā’’ti padānaṃ sambandhaṃ dassetuṃ vuttaṃ ‘‘nippajjatī’’ti.
মহাব্রহ্মেতি এত্থ ব্রহ্মসদ্দো ব্রাহ্মণৰাচকোতি আহ ‘‘মহাব্রাহ্মণা’’তি। অঞ্ঞেপীতি রাজব্রাহ্মণেহি অপরেপি। ‘‘পচন্তী’’তি ৰুত্তে অৰিনাভাৰতো ‘‘ভুঞ্জন্তী’’তি অত্থোপি গহেতব্বোতি আহ ‘‘পচন্তি চেৰ ভুঞ্জন্তি চা’’তি। ‘‘ন কেৰল’’ন্তিআদিনা অঞ্ঞেপীতি এত্থ পিসদ্দস্স সম্পিণ্ডনত্থং দস্সেতি, ত্ৰং আচরিস্সসীতি সম্বন্ধো। পুন ত্ৰন্তি তং, উপযোগত্থে চেতং পচ্চত্তৰচনং, ‘‘মা ভিদা’’তিইমিনা সম্বন্ধিতব্বং। ‘‘পাসাণো’’তিইমিনা অস্মসদ্দো পাসাণপরিযাযোতি দস্সেতি। তেনাতি ভিন্দনহেতুনা।
Mahābrahmeti ettha brahmasaddo brāhmaṇavācakoti āha ‘‘mahābrāhmaṇā’’ti. Aññepīti rājabrāhmaṇehi aparepi. ‘‘Pacantī’’ti vutte avinābhāvato ‘‘bhuñjantī’’ti atthopi gahetabboti āha ‘‘pacanti ceva bhuñjanti cā’’ti. ‘‘Na kevala’’ntiādinā aññepīti ettha pisaddassa sampiṇḍanatthaṃ dasseti, tvaṃ ācarissasīti sambandho. Puna tvanti taṃ, upayogatthe cetaṃ paccattavacanaṃ, ‘‘mā bhidā’’tiiminā sambandhitabbaṃ. ‘‘Pāsāṇo’’tiiminā asmasaddo pāsāṇapariyāyoti dasseti. Tenāti bhindanahetunā.
৬৪৮. অত্তনো কঙ্খাঠানস্স পুচ্ছনং সন্ধায ৰুত্তং ‘‘ন কথেতব্ব’’ন্তি।
648. Attano kaṅkhāṭhānassa pucchanaṃ sandhāya vuttaṃ ‘‘na kathetabba’’nti.
৬৪৯. সমধুরেনাতি সমং ধুরেন, সমং মুখেনাতি অত্থো।
649.Samadhurenāti samaṃ dhurena, samaṃ mukhenāti attho.
৬৫২. যং মূলং ৰা যা সাখা ৰা গচ্ছতীতি যোজনা। খন্ধেতি রুক্খস্স খন্ধে। নিক্খমতীতি উচ্চারপস্সাৰো নিক্খমতি। তিণণ্ডুপকন্তি তিণেন কতং, তিণমযং ৰা অণ্ডুপকং। এত্থাতি উচ্চারপস্সাৰখেল়েসু।
652. Yaṃ mūlaṃ vā yā sākhā vā gacchatīti yojanā. Khandheti rukkhassa khandhe. Nikkhamatīti uccārapassāvo nikkhamati. Tiṇaṇḍupakanti tiṇena kataṃ, tiṇamayaṃ vā aṇḍupakaṃ. Etthāti uccārapassāvakheḷesu.
৬৫৩. অধিপ্পেতউদকং দস্সেতুং ৰুত্তং ‘‘পরিভোগউদকমেৰা’’তি। সত্তমো ৰগ্গো।
653. Adhippetaudakaṃ dassetuṃ vuttaṃ ‘‘paribhogaudakamevā’’ti. Sattamo vaggo.
এত্থাতি সেখিযেসু। সূপব্যঞ্জনপটিচ্ছাদনেতি সূপব্যঞ্জনে ওদনেন পটিচ্ছাদেতি। সমত্তা সেখিযা।
Etthāti sekhiyesu. Sūpabyañjanapaṭicchādaneti sūpabyañjane odanena paṭicchādeti. Samattā sekhiyā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ৭. পাদুকৰগ্গো • 7. Pādukavaggo
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰিভঙ্গ-অট্ঠকথা • Mahāvibhaṅga-aṭṭhakathā / ৭. পাদুকৰগ্গৰণ্ণনা • 7. Pādukavaggavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ৭. পাদুকৰগ্গৰণ্ণনা • 7. Pādukavaggavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ৭. পাদুকৰগ্গৰণ্ণনা • 7. Pādukavaggavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ৭. পাদুকৰগ্গৰণ্ণনা • 7. Pādukavaggavaṇṇanā
