| Library / Tipiṭaka / திபிடக • Tipiṭaka / மஹாவிப⁴ங்க³-அட்ட²கதா² • Mahāvibhaṅga-aṭṭhakathā |
7. பாது³கவக்³க³வண்ணனா
7. Pādukavaggavaṇṇanā
638. அக்கந்தஸ்ஸாதி ச²த்தத³ண்ட³கே அங்கு³லந்தரங் அப்பவேஸெத்வா கேவலங் பாது³கங் அக்கமித்வா டி²தஸ்ஸ. படிமுக்கஸ்ஸாதி படிமுஞ்சித்வா டி²தஸ்ஸ. உபாஹனாயபி ஏஸேவ நயோ. ஓமுக்கோதி பனெத்த² பண்ஹிகப³த்³த⁴ங் ஓமுஞ்சித்வா டி²தோ வுச்சதி.
638.Akkantassāti chattadaṇḍake aṅgulantaraṃ appavesetvā kevalaṃ pādukaṃ akkamitvā ṭhitassa. Paṭimukkassāti paṭimuñcitvā ṭhitassa. Upāhanāyapi eseva nayo. Omukkoti panettha paṇhikabaddhaṃ omuñcitvā ṭhito vuccati.
640. யானக³தஸ்ஸாதி எத்த² ஸசேபி த்³வீஹி ஜனேஹி ஹத்த²ஸங்கா⁴டேன க³ஹிதோ, ஸாடகே வா ட²பெத்வா வங்ஸேன வய்ஹதி, அயுத்தே வா வய்ஹாதி³கே யானே , விஸங்க²ரித்வா வா ட²பிதே சக்கமத்தேபி நிஸின்னோ யானக³தொத்வேவ ஸங்க்²யங் க³ச்ச²தி. ஸசே பன த்³வேபி ஏகயானே நிஸின்னா ஹொந்தி, வட்டதி. விஸுங் நிஸின்னேஸுபி உச்சே யானே நிஸின்னேன நீசே நிஸின்னஸ்ஸ தே³ஸேதுங் வட்டதி, ஸமப்பமாணேபி வட்டதி. புரிமே யானே நிஸின்னேன பச்சி²மே நிஸின்னஸ்ஸ வட்டதி. பச்சி²மே பன உச்சதரேபி நிஸின்னேன தே³ஸேதுங் ந வட்டதி.
640.Yānagatassāti ettha sacepi dvīhi janehi hatthasaṅghāṭena gahito, sāṭake vā ṭhapetvā vaṃsena vayhati, ayutte vā vayhādike yāne , visaṅkharitvā vā ṭhapite cakkamattepi nisinno yānagatotveva saṅkhyaṃ gacchati. Sace pana dvepi ekayāne nisinnā honti, vaṭṭati. Visuṃ nisinnesupi ucce yāne nisinnena nīce nisinnassa desetuṃ vaṭṭati, samappamāṇepi vaṭṭati. Purime yāne nisinnena pacchime nisinnassa vaṭṭati. Pacchime pana uccatarepi nisinnena desetuṃ na vaṭṭati.
641. ஸயனக³தஸ்ஸாதி அந்தமஸோ கடஸாரகேபி பகதிபூ⁴மியம்பி நிபன்னஸ்ஸ உச்சேபி மஞ்சபீடே² வா பூ⁴மிபதே³ஸே வா டி²தேன நிஸின்னேன வா தே³ஸேதுங் ந வட்டதி. ஸயனக³தேன பன ஸயனக³தஸ்ஸ உச்சதரே வா ஸமப்பமாணே வா நிபன்னேன தே³ஸேதுங் வட்டதி. நிபன்னேன ச டி²தஸ்ஸ வா நிஸின்னஸ்ஸ வா தே³ஸேதுங் வட்டதி, நிஸின்னேனாபி டி²தஸ்ஸ வா நிஸின்னஸ்ஸ வா வட்டதி. டி²தேன டி²தஸ்ஸேவ வட்டதி.
641.Sayanagatassāti antamaso kaṭasārakepi pakatibhūmiyampi nipannassa uccepi mañcapīṭhe vā bhūmipadese vā ṭhitena nisinnena vā desetuṃ na vaṭṭati. Sayanagatena pana sayanagatassa uccatare vā samappamāṇe vā nipannena desetuṃ vaṭṭati. Nipannena ca ṭhitassa vā nisinnassa vā desetuṃ vaṭṭati, nisinnenāpi ṭhitassa vā nisinnassa vā vaṭṭati. Ṭhitena ṭhitasseva vaṭṭati.
642. பல்லத்தி²காயாதி ஆயோக³பல்லத்தி²காய வா ஹத்த²பல்லத்தி²காய வா து³ஸ்ஸபல்லத்தி²காய வா யாய காயசி பல்லத்தி²காய நிஸின்னஸ்ஸ அகி³லானஸ்ஸ தே³ஸேதுங் ந வட்டதி.
642.Pallatthikāyāti āyogapallatthikāya vā hatthapallatthikāya vā dussapallatthikāya vā yāya kāyaci pallatthikāya nisinnassa agilānassa desetuṃ na vaṭṭati.
643. வேடி²தஸீஸஸ்ஸாதி து³ஸ்ஸவேட²னேன வா மோளிஆதீ³ஹி வா யதா² கேஸந்தோ ந தி³ஸ்ஸதி; ஏவங் வேடி²தஸீஸஸ்ஸ.
643.Veṭhitasīsassāti dussaveṭhanena vā moḷiādīhi vā yathā kesanto na dissati; evaṃ veṭhitasīsassa.
644. ஓகு³ண்டி²தஸீஸஸ்ஸாதி ஸஸீஸங் பாருதஸ்ஸ.
644.Oguṇṭhitasīsassāti sasīsaṃ pārutassa.
645. ச²மாயங் நிஸின்னேனாதி பூ⁴மியங் நிஸின்னேன. ஆஸனே நிஸின்னஸ்ஸாதி அந்தமஸோ வத்த²ம்பி திணானிபி ஸந்த²ரித்வா நிஸின்னஸ்ஸ.
645.Chamāyaṃ nisinnenāti bhūmiyaṃ nisinnena. Āsane nisinnassāti antamaso vatthampi tiṇānipi santharitvā nisinnassa.
647. ச²பகஸ்ஸாதி சண்டா³லஸ்ஸ. ச²பகீதி சண்டா³லீ. நிலீனோதி படிச்ச²ன்னோ ஹுத்வா. யத்ர ஹி நாமாதி யோ ஹி நாம. ஸப்³ப³மித³ங் சரிமங் கதந்தி தத்தே²வ பரிபதீதி ‘‘ஸப்³போ³ அயங் லோகோ ஸங்கரங் க³தோ நிம்மரியாதோ³’’தி இமங் வசனங் வத்வா தத்தே²வ தேஸங் த்³வின்னம்பி அந்தரா ருக்க²தோ பதிதோ. பதித்வா ச பன உபி⁴ன்னம்பி புரதோ ட²த்வா இமங் கா³த²ங் அபா⁴ஸி –
647.Chapakassāti caṇḍālassa. Chapakīti caṇḍālī. Nilīnoti paṭicchanno hutvā. Yatra hi nāmāti yo hi nāma. Sabbamidaṃ carimaṃ katanti tattheva paripatīti ‘‘sabbo ayaṃ loko saṅkaraṃ gato nimmariyādo’’ti imaṃ vacanaṃ vatvā tattheva tesaṃ dvinnampi antarā rukkhato patito. Patitvā ca pana ubhinnampi purato ṭhatvā imaṃ gāthaṃ abhāsi –
‘‘உபோ⁴ அத்த²ங் ந ஜானந்தி…பே॰… அஸ்மா கும்ப⁴மிவாபி⁴தா³’’தி.
‘‘Ubho atthaṃ na jānanti…pe… asmā kumbhamivābhidā’’ti.
தத்த² உபோ⁴ அத்த²ங் ந ஜானந்தீதி த்³வேபி ஜனா பாளியா அத்த²ங் ந ஜானந்தி. த⁴ம்மங் ந பஸ்ஸரேதி பாளிங் ந பஸ்ஸந்தி. கதமே தே உபோ⁴தி? ‘‘யோ சாயங் மந்தங் வாசேதி, யோ சாத⁴ம்மேனதீ⁴யதீ’’தி. ஏவங் ப்³ராஹ்மணஞ்ச ராஜானஞ்ச உபோ⁴பி அத⁴ம்மிகபா⁴வே ட²பேஸி.
Tattha ubho atthaṃ na jānantīti dvepi janā pāḷiyā atthaṃ na jānanti. Dhammaṃ na passareti pāḷiṃ na passanti. Katame te ubhoti? ‘‘Yo cāyaṃ mantaṃvāceti, yo cādhammenadhīyatī’’ti. Evaṃ brāhmaṇañca rājānañca ubhopi adhammikabhāve ṭhapesi.
ததோ ப்³ராஹ்மணோ ஸாலீனந்தி கா³த²மாஹ. தஸ்ஸத்தோ² – ஜானாமஹங் போ⁴ ‘‘அயங் அத⁴ம்மோ’’தி; அபி ச கோ² மயா தீ³க⁴ரத்தங் ஸபுத்ததா³ரபரிஜனேன ரஞ்ஞோ ஸந்தகோ ஸாலீனங் ஓத³னோ பு⁴த்தோ. ஸுசிமங்ஸூபஸேசனோதி நானப்பகாரவிகதிஸம்பாதி³தங் ஸுசிமங்ஸூபஸேசனங் மிஸ்ஸீகரணமஸ்ஸாதி ஸுசிமங்ஸூபஸேசனோ. தஸ்மா த⁴ம்மே ந வத்தாமீதி யஸ்மா ஏவங் மயா ரஞ்ஞோ ஓத³னோ பு⁴த்தோ, அஞ்ஞே ச ப³ஹூ லாபா⁴ லத்³தா⁴, தஸ்மா த⁴ம்மே அஹங் ந வத்தாமி உத³ரே ப³த்³தோ⁴ ஹுத்வா, ந த⁴ம்மங் அஜானந்தோ. அயஞ்ஹி த⁴ம்மோ அரியேஹி வண்ணிதோ பஸத்தோ² தோ²மிதோதி ஜானாமி.
Tato brāhmaṇo sālīnanti gāthamāha. Tassattho – jānāmahaṃ bho ‘‘ayaṃ adhammo’’ti; api ca kho mayā dīgharattaṃ saputtadāraparijanena rañño santako sālīnaṃ odano bhutto. Sucimaṃsūpasecanoti nānappakāravikatisampāditaṃ sucimaṃsūpasecanaṃ missīkaraṇamassāti sucimaṃsūpasecano. Tasmā dhamme na vattāmīti yasmā evaṃ mayā rañño odano bhutto, aññe ca bahū lābhā laddhā, tasmā dhamme ahaṃ na vattāmi udare baddho hutvā, na dhammaṃ ajānanto. Ayañhi dhammo ariyehi vaṇṇito pasattho thomitoti jānāmi.
அத² நங் ச²பகோ ‘‘தி⁴ரத்தூ²’’திஆதி³னா கா³தா²த்³வயேன அஜ்ஜ²பா⁴ஸி. தஸ்ஸத்தோ² – யோ தயா த⁴னலாபோ⁴ ச யஸலாபோ⁴ ச லத்³தோ⁴, தி⁴ரத்து² தங் த⁴னலாப⁴ங் யஸலாப⁴ஞ்ச ப்³ராஹ்மண. கஸ்மா? யஸ்மா அயங் தயா லத்³தோ⁴ லாபோ⁴ ஆயதிங் அபாயேஸு வினிபாதனஹேதுனா ஸம்பதி ச அத⁴ம்மசரணேன வுத்தி நாம ஹோதி. ஏவரூபா யா வுத்தி ஆயதிங் வினிபாதேன இத⁴ அத⁴ம்மசரணேன வா நிப்பஜ்ஜதி, கிங் தாய வுத்தியா? தேன வுத்தங் –
Atha naṃ chapako ‘‘dhiratthū’’tiādinā gāthādvayena ajjhabhāsi. Tassattho – yo tayā dhanalābho ca yasalābho ca laddho, dhiratthu taṃ dhanalābhaṃ yasalābhañca brāhmaṇa. Kasmā? Yasmā ayaṃ tayā laddho lābho āyatiṃ apāyesu vinipātanahetunā sampati ca adhammacaraṇena vutti nāma hoti. Evarūpā yā vutti āyatiṃ vinipātena idha adhammacaraṇena vā nippajjati, kiṃ tāya vuttiyā? Tena vuttaṃ –
‘‘தி⁴ரத்து² தங் த⁴னலாப⁴ங், யஸலாப⁴ஞ்ச ப்³ராஹ்மண;
‘‘Dhiratthu taṃ dhanalābhaṃ, yasalābhañca brāhmaṇa;
யா வுத்தி வினிபாதேன, அத⁴ம்மசரணேன வா’’தி.
Yā vutti vinipātena, adhammacaraṇena vā’’ti.
பரிப்³ப³ஜ மஹாப்³ரஹ்மேதி மஹாப்³ராஹ்மண இதோ தி³ஸா ஸீக⁴ங் பலாயஸ்ஸு. பசந்தஞ்ஞேபி பாணினோதி அஞ்ஞேபி ஸத்தா பசந்தி சேவ பு⁴ஞ்ஜந்தி ச; ந கேவலங் த்வஞ்சேவ ராஜா ச. மா த்வங் அத⁴ம்மோ ஆசரிதோ அஸ்மா கும்ப⁴மிவாபி⁴தா³தி ஸசே ஹி த்வங் இதோ அபரிப்³ப³ஜித்வா இமங் அத⁴ம்மங் ஆசரிஸ்ஸஸி , ததோ த்வங் ஸோ அத⁴ம்மோ ஏவங் ஆசரிதோ யதா² உத³ககும்ப⁴ங் பாஸாணோ பி⁴ந்தெ³ய்ய; ஏவங் பெ⁴ச்ச²தி, தேன மயங் தங் வதா³ம –
Paribbaja mahābrahmeti mahābrāhmaṇa ito disā sīghaṃ palāyassu. Pacantaññepi pāṇinoti aññepi sattā pacanti ceva bhuñjanti ca; na kevalaṃ tvañceva rājā ca. Mā tvaṃ adhammo ācarito asmā kumbhamivābhidāti sace hi tvaṃ ito aparibbajitvā imaṃ adhammaṃ ācarissasi , tato tvaṃ so adhammo evaṃ ācarito yathā udakakumbhaṃ pāsāṇo bhindeyya; evaṃ bhecchati, tena mayaṃ taṃ vadāma –
‘‘பரிப்³ப³ஜ மஹாப்³ரஹ்மே, பசந்தஞ்ஞேபி பாணினோ;
‘‘Paribbaja mahābrahme, pacantaññepi pāṇino;
மா த்வங் அத⁴ம்மோ ஆசரிதோ, அஸ்மா கும்ப⁴மிவாபி⁴தா³’’தி.
Mā tvaṃ adhammo ācarito, asmā kumbhamivābhidā’’ti.
உச்சே ஆஸனேதி அந்தமஸோ பூ⁴மிப்பதே³ஸேபி உன்னதட்டா²னே நிஸின்னஸ்ஸ தே³ஸேதுங் ந வட்டதி.
Ucce āsaneti antamaso bhūmippadesepi unnataṭṭhāne nisinnassa desetuṃ na vaṭṭati.
648. ந டி²தோ நிஸின்னஸ்ஸாதி ஸசேபி தே²ருபட்டா²னங் க³ந்த்வா டி²தங் த³ஹரபி⁴க்கு²ங் ஆஸனே நிஸின்னோ மஹாதே²ரோ பஞ்ஹங் புச்ச²தி, ந கதே²தப்³ப³ங். கா³ரவேன பன தே²ரங் உட்ட²ஹித்வா புச்ச²தா²தி வத்துங் ந ஸக்கா, பஸ்ஸே டி²தபி⁴க்கு²ஸ்ஸ கதே²மீதி கதே²துங் வட்டதி.
648.Naṭhito nisinnassāti sacepi therupaṭṭhānaṃ gantvā ṭhitaṃ daharabhikkhuṃ āsane nisinno mahāthero pañhaṃ pucchati, na kathetabbaṃ. Gāravena pana theraṃ uṭṭhahitvā pucchathāti vattuṃ na sakkā, passe ṭhitabhikkhussa kathemīti kathetuṃ vaṭṭati.
649. ந பச்ச²தோ க³ச்ச²ந்தேனாதி எத்த² ஸசே புரதோ க³ச்ச²ந்தோ பச்ச²தோ க³ச்ச²ந்தங் பஞ்ஹங் புச்ச²தி, ந கதே²தப்³ப³ங். பச்சி²மஸ்ஸ பி⁴க்கு²னோ கதே²மீதி கதே²துங் வட்டதி. ஸத்³தி⁴ங் உக்³க³ஹிதத⁴ம்மங் பன ஸஜ்ஜா²யிதுங் வட்டதி. ஸமது⁴ரேன க³ச்ச²ந்தஸ்ஸ கதே²துங் வட்டதி.
649.Na pacchato gacchantenāti ettha sace purato gacchanto pacchato gacchantaṃ pañhaṃ pucchati, na kathetabbaṃ. Pacchimassa bhikkhuno kathemīti kathetuṃ vaṭṭati. Saddhiṃ uggahitadhammaṃ pana sajjhāyituṃ vaṭṭati. Samadhurena gacchantassa kathetuṃ vaṭṭati.
650. ந உப்பதே²னாதி எத்தா²பி ஸசே த்³வேபி ஸகடபதே² ஏகேகசக்கபதே²ன வா உப்பதே²ன வா ஸமது⁴ரங் க³ச்ச²ந்தி, வட்டதி.
650.Na uppathenāti etthāpi sace dvepi sakaṭapathe ekekacakkapathena vā uppathena vā samadhuraṃ gacchanti, vaṭṭati.
651. அஸஞ்சிச்சாதி படிச்ச²ன்னட்டா²னங் க³ச்ச²ந்தஸ்ஸ ஸஹஸா உச்சாரோ வா பஸ்ஸாவோ வா நிக்க²மதி, அஸஞ்சிச்ச கதோ நாம அனாபத்தி.
651.Asañciccāti paṭicchannaṭṭhānaṃ gacchantassa sahasā uccāro vā passāvo vā nikkhamati, asañcicca kato nāma anāpatti.
652. ந ஹரிதேதி எத்த² யம்பி ஜீவருக்க²ஸ்ஸ மூலங் பத²வியங் தி³ஸ்ஸமானங் க³ச்ச²தி, ஸாகா² வா பூ⁴மிலக்³கா³ க³ச்ச²தி, ஸப்³ப³ங் ஹரிதஸங்கா²தமேவ. க²ந்தே⁴ நிஸீதி³த்வா அப்பஹரிதட்டா²னே பாதேதுங் வட்டதி. அப்பஹரிதட்டா²னங் ஓலோகெந்தஸ்ஸேவ ஸஹஸா நிக்க²மதி, கி³லானட்டா²னே டி²தோ ஹோதி, வட்டதி. அப்பஹரிதே கதோதி அப்பஹரிதங் அலப⁴ந்தேன திணண்டு³பகங் வா பலாலண்டு³பகங் வா ட²பெத்வா கதோபி பச்சா² ஹரிதங் ஒத்த²ரதி, வட்டதியேவ. கே²ளேன செத்த² ஸிங்கா⁴ணிகாபி ஸங்க³ஹிதாதி மஹாபச்சரியங் வுத்தங்.
652.Na hariteti ettha yampi jīvarukkhassa mūlaṃ pathaviyaṃ dissamānaṃ gacchati, sākhā vā bhūmilaggā gacchati, sabbaṃ haritasaṅkhātameva. Khandhe nisīditvā appaharitaṭṭhāne pātetuṃ vaṭṭati. Appaharitaṭṭhānaṃ olokentasseva sahasā nikkhamati, gilānaṭṭhāne ṭhito hoti, vaṭṭati. Appaharite katoti appaharitaṃ alabhantena tiṇaṇḍupakaṃ vā palālaṇḍupakaṃ vā ṭhapetvā katopi pacchā haritaṃ ottharati, vaṭṭatiyeva. Kheḷena cettha siṅghāṇikāpi saṅgahitāti mahāpaccariyaṃ vuttaṃ.
653. ந உத³கேதி ஏதங் பரிபோ⁴க³உத³கமேவ ஸந்தா⁴ய வுத்தங், வச்சகுடிஸமுத்³தா³தி³உத³கேஸு பன அபரிபோ⁴கே³ஸு அனாபத்தி. தே³வே வஸ்ஸந்தே ஸமந்ததோ உத³கோகோ⁴ ஹோதி, அனுத³கட்டா²னங் ஓலோகெந்தஸ்ஸேவ நிக்க²மதி, வட்டதி. மஹாபச்சரியங் வுத்தங் – ‘‘ஏதாதி³ஸே காலே அனுத³கட்டா²னங் அலப⁴ந்தேன காதுங் வட்டதீ’’தி. ஸேஸங் ஸப்³ப³ஸிக்கா²பதே³ஸு உத்தானத்த²மேவ.
653.Na udaketi etaṃ paribhogaudakameva sandhāya vuttaṃ, vaccakuṭisamuddādiudakesu pana aparibhogesu anāpatti. Deve vassante samantato udakogho hoti, anudakaṭṭhānaṃ olokentasseva nikkhamati, vaṭṭati. Mahāpaccariyaṃ vuttaṃ – ‘‘etādise kāle anudakaṭṭhānaṃ alabhantena kātuṃ vaṭṭatī’’ti. Sesaṃ sabbasikkhāpadesu uttānatthameva.
ஸத்தமோ வக்³கோ³.
Sattamo vaggo.
ஸமுட்டா²னாதி³தீ³பனத்தா²ய பனெத்த² இத³ங் பகிண்ணகங் – உஜ்ஜக்³கி⁴கஉச்சாஸத்³த³படிஸங்யுத்தானி சத்தாரி, ஸகப³ளேன முகே²ன ப்³யாஹரணங் ஏகங், ச²மானீசாஸனடா²னபச்ச²தோக³மனஉப்பத²க³மனபடிஸங்யுத்தானி பஞ்சாதி இமானி த³ஸ ஸிக்கா²பதா³னி ஸமனுபா⁴ஸனஸமுட்டா²னானி காயவாசாசித்ததோ ஸமுட்ட²ஹந்தி, கிரியானி, ஸஞ்ஞாவிமொக்கா²னி , ஸசித்தகானி, லோகவஜ்ஜானி, காயகம்மவசீகம்மானி, அகுஸலசித்தானி, து³க்க²வேத³னானீதி.
Samuṭṭhānādidīpanatthāya panettha idaṃ pakiṇṇakaṃ – ujjagghikauccāsaddapaṭisaṃyuttāni cattāri, sakabaḷena mukhena byāharaṇaṃ ekaṃ, chamānīcāsanaṭhānapacchatogamanauppathagamanapaṭisaṃyuttāni pañcāti imāni dasa sikkhāpadāni samanubhāsanasamuṭṭhānāni kāyavācācittato samuṭṭhahanti, kiriyāni, saññāvimokkhāni , sacittakāni, lokavajjāni, kāyakammavacīkammāni, akusalacittāni, dukkhavedanānīti.
ஸூபோத³னவிஞ்ஞத்திஸிக்கா²பத³ங் தெ²ய்யஸத்த²ஸமுட்டா²னங் காயசித்ததோ காயவாசாசித்ததோ ச ஸமுட்டா²தி, கிரியங், ஸஞ்ஞாவிமொக்க²ங், ஸசித்தகங், லோகவஜ்ஜங், காயகம்மங், வசீகம்மங், அகுஸலசித்தங், து³க்க²வேத³னந்தி.
Sūpodanaviññattisikkhāpadaṃ theyyasatthasamuṭṭhānaṃ kāyacittato kāyavācācittato ca samuṭṭhāti, kiriyaṃ, saññāvimokkhaṃ, sacittakaṃ, lokavajjaṃ, kāyakammaṃ, vacīkammaṃ, akusalacittaṃ, dukkhavedananti.
ச²த்தபாணித³ண்ட³பாணிஸத்த²பாணிஆவுத⁴பாணிபாது³கஉபாஹனயானஸயனபல்லத்தி²கவேடி²தஓகு³ண்டி²தனாமகானி ஏகாத³ஸ ஸிக்கா²பதா³னி த⁴ம்மதே³ஸனஸமுட்டா²னானி வாசாசித்ததோ ஸமுட்ட²ஹந்தி, கிரியாகிரியானி, ஸஞ்ஞாவிமொக்கா²னி, ஸசித்தகானி, லோகவஜ்ஜானி, வசீகம்மானி, அகுஸலசித்தானி, து³க்க²வேத³னானீதி.
Chattapāṇidaṇḍapāṇisatthapāṇiāvudhapāṇipādukaupāhanayānasayanapallatthikaveṭhitaoguṇṭhitanāmakāni ekādasa sikkhāpadāni dhammadesanasamuṭṭhānāni vācācittato samuṭṭhahanti, kiriyākiriyāni, saññāvimokkhāni, sacittakāni, lokavajjāni, vacīkammāni, akusalacittāni, dukkhavedanānīti.
அவஸேஸானி தேபண்ணாஸ ஸிக்கா²பதா³னி பட²மபாராஜிகஸமுட்டா²னானீதி.
Avasesāni tepaṇṇāsa sikkhāpadāni paṭhamapārājikasamuṭṭhānānīti.
ஸப்³ப³ஸேகி²யேஸு ஆபா³த⁴பச்சயா அனாபத்தி, தூ²பீகதபிண்ட³பாதே ஸூபப்³யஞ்ஜனேன படிச்சா²த³னே உஜ்ஜா²னஸஞ்ஞிம்ஹீதி தீஸு ஸிக்கா²பதே³ஸு கி³லானோ நத்தீ²தி.
Sabbasekhiyesu ābādhapaccayā anāpatti, thūpīkatapiṇḍapāte sūpabyañjanena paṭicchādane ujjhānasaññimhīti tīsu sikkhāpadesu gilāno natthīti.
ஸேகி²யவண்ணனா நிட்டி²தா.
Sekhiyavaṇṇanā niṭṭhitā.
ஸேகி²யகண்ட³ங் நிட்டி²தங்.
Sekhiyakaṇḍaṃ niṭṭhitaṃ.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 7. பாது³கவக்³கோ³ • 7. Pādukavaggo
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 7. பாது³கவக்³க³வண்ணனா • 7. Pādukavaggavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 7. பாது³கவக்³க³வண்ணனா • 7. Pādukavaggavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 7. பாது³கவக்³க³வண்ணனா • 7. Pādukavaggavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 7. பாது³கவக்³க³-அத்த²யோஜனா • 7. Pādukavagga-atthayojanā
