| Library / Tipiṭaka / তিপিটক • Tipiṭaka / সারত্থদীপনী-টীকা • Sāratthadīpanī-ṭīkā |
৭. পাদুকৰগ্গৰণ্ণনা
7. Pādukavaggavaṇṇanā
৬৪৭. সত্তমৰগ্গে পটিচ্ছন্নো হুত্ৰাতি সো কির রত্তিভাগে উয্যানং গন্ত্ৰা অম্বং অভিরুহিত্ৰা সাখায সাখং অম্বং ওলোকেন্তো ৰিচরি। তস্স তথা করোন্তস্সেৰ রত্তি ৰিভাযি। সো চিন্তেসি ‘‘সচে ইদানি ওতরিত্ৰা গমিস্সামি, দিস্ৰা মং চোরোতি গহেস্সন্তি, রত্তিভাগে গমিস্সামী’’তি। অথেকং ৰিটপং অভিরুহিত্ৰা নিলীনো অচ্ছি। তং সন্ধাযেতং ৰুত্তং। সো রুক্খতো ওতরন্তো একং ওলম্বিনিসাখং গহেত্ৰা তেসং উভিন্নম্পি অন্তরে পতিট্ঠাসি। তং সন্ধায ৰুত্তং ‘‘তেসং দ্ৰিন্নম্পি অন্তরা রুক্খতো পতিতো’’তি। পাল়িযা অত্থং ন জানন্তীতি অত্তনো গহণস্স অত্থং ন জানন্তি।
647. Sattamavagge paṭicchanno hutvāti so kira rattibhāge uyyānaṃ gantvā ambaṃ abhiruhitvā sākhāya sākhaṃ ambaṃ olokento vicari. Tassa tathā karontasseva ratti vibhāyi. So cintesi ‘‘sace idāni otaritvā gamissāmi, disvā maṃ coroti gahessanti, rattibhāge gamissāmī’’ti. Athekaṃ viṭapaṃ abhiruhitvā nilīno acchi. Taṃ sandhāyetaṃ vuttaṃ. So rukkhato otaranto ekaṃ olambinisākhaṃ gahetvā tesaṃ ubhinnampi antare patiṭṭhāsi. Taṃ sandhāya vuttaṃ ‘‘tesaṃ dvinnampi antarā rukkhato patito’’ti. Pāḷiyā atthaṃ na jānantīti attano gahaṇassa atthaṃ na jānanti.
জাতকপাল়িযং (জা॰ ১.৪.৩৩) পন অযং গাথা –
Jātakapāḷiyaṃ (jā. 1.4.33) pana ayaṃ gāthā –
‘‘সব্বমিদং চরিমং কতং, উভো ধম্মং ন পস্সরে।
‘‘Sabbamidaṃ carimaṃ kataṃ, ubho dhammaṃ na passare;
উভো পকতিযা চুতা, যো চাযং মন্তেজ্ঝাপেতি।
Ubho pakatiyā cutā, yo cāyaṃ mantejjhāpeti;
যো চ মন্তং অধীযতী’’তি॥ –
Yo ca mantaṃ adhīyatī’’ti. –
এৰমাগতা। তস্সাযমত্থো (জা॰ অট্ঠ॰ ৩.৪.৩৩) – সব্বমিদং চরিমং কতন্তি যং অম্হেহি তীহি জনেহি কতং, সব্বমিদং কিচ্চং লামকং নিম্মরিযাদং অধম্মিকং। এৰং অত্তনো চোরভাৰং তেসঞ্চ মন্তেসু অগারৰং গরহিত্ৰা পুন ইতরে দ্ৰেযেৰ গরহন্তো ‘‘উভো ধম্মং ন পস্সরে’’তিআদিমাহ। তত্থ উভোতি ইমে দ্ৰেপি জনা গরুকারারহং পোরাণকধম্মং ন পস্সন্তি, ততোৰ ধম্মপকতিতো চুতা। ধম্মো হি পঠমুপ্পত্তিৰসেন পকতি নাম। ৰুত্তম্পি চেতং –
Evamāgatā. Tassāyamattho (jā. aṭṭha. 3.4.33) – sabbamidaṃ carimaṃ katanti yaṃ amhehi tīhi janehi kataṃ, sabbamidaṃ kiccaṃ lāmakaṃ nimmariyādaṃ adhammikaṃ. Evaṃ attano corabhāvaṃ tesañca mantesu agāravaṃ garahitvā puna itare dveyeva garahanto ‘‘ubho dhammaṃ na passare’’tiādimāha. Tattha ubhoti ime dvepi janā garukārārahaṃ porāṇakadhammaṃ na passanti, tatova dhammapakatito cutā. Dhammo hi paṭhamuppattivasena pakati nāma. Vuttampi cetaṃ –
‘‘ধম্মো হৰে পাতুরহোসি পুব্বে,
‘‘Dhammo have pāturahosi pubbe,
পচ্ছা অধম্মো উদপাদি লোকে’’তি॥ (জা॰ ১.১১.২৮)।
Pacchā adhammo udapādi loke’’ti. (jā. 1.11.28);
যো চাযন্তি যো চ অযং নীচে নিসীদিত্ৰা মন্তে অজ্ঝাপেতি, যো চ উচ্চে নিসীদিত্ৰা অধীযতীতি।
Yo cāyanti yo ca ayaṃ nīce nisīditvā mante ajjhāpeti, yo ca ucce nisīditvā adhīyatīti.
সালীনন্তি অযং গাথাপি –
Sālīnanti ayaṃ gāthāpi –
‘‘সালীনং ওদনং ভুঞ্জে, সুচিং মংসূপসেচনং।
‘‘Sālīnaṃ odanaṃ bhuñje, suciṃ maṃsūpasecanaṃ;
তস্মা এতং ন সেৰামি, ধম্মং ইসীহি সেৰিত’’ন্তি॥ (জা॰ ১.৪.৩৪) –
Tasmā etaṃ na sevāmi, dhammaṃ isīhi sevita’’nti. (jā. 1.4.34) –
এৰং জাতকে আগতা। তত্থ সুচিন্তি পণ্ডরং পরিসুদ্ধং। মংসূপসেচনন্তি নানপ্পকারায মংসৰিকতিযা সিত্তং ভুঞ্জে, ভুঞ্জামীতি অত্থো। সেসং পাকটমেৰ।
Evaṃ jātake āgatā. Tattha sucinti paṇḍaraṃ parisuddhaṃ. Maṃsūpasecananti nānappakārāya maṃsavikatiyā sittaṃ bhuñje, bhuñjāmīti attho. Sesaṃ pākaṭameva.
ধিরত্থূতি ধি অত্থু, নিন্দা ভৰতূতি অত্থো, গরহাম তং মযন্তি ৰুত্তং হোতি। লদ্ধলাভোতি ধনলাভং যসলাভঞ্চ সন্ধায ৰদতি। ৰিনিপাতনহেতুনাতি ৰিনিপাতনস্স হেতুভাৰেন। ৰুত্তি নাম হোতীতি যথাৰুত্তো দুৰিধোপি লাভো অপাযসংৰত্তনিকতায সম্পরাযে ৰিনিপাতনহেতুভাৰেন পৰত্তনতো সম্পতি অধম্মচরণেন পৰত্তনতো চ ৰুত্তি নাম হোতীতি অত্থো। এৰরূপা যা ৰুত্তীতি এৰরূপা ধনলাভযসলাভসঙ্খাতা যা ৰুত্তি। অধম্মচরণেন ৰাতি ৰা-সদ্দো সম্পিণ্ডনত্থো। ত্ৰন্তি উপযোগত্থে পচ্চত্তৰচনং, তং ইচ্চেৰ ৰা পাঠো। অস্মাতি পাসাণাধিৰচনমেতং।
Dhiratthūti dhi atthu, nindā bhavatūti attho, garahāma taṃ mayanti vuttaṃ hoti. Laddhalābhoti dhanalābhaṃ yasalābhañca sandhāya vadati. Vinipātanahetunāti vinipātanassa hetubhāvena. Vutti nāma hotīti yathāvutto duvidhopi lābho apāyasaṃvattanikatāya samparāye vinipātanahetubhāvena pavattanato sampati adhammacaraṇena pavattanato ca vutti nāma hotīti attho. Evarūpā yā vuttīti evarūpā dhanalābhayasalābhasaṅkhātā yā vutti. Adhammacaraṇena vāti vā-saddo sampiṇḍanattho. Tvanti upayogatthe paccattavacanaṃ, taṃ icceva vā pāṭho. Asmāti pāsāṇādhivacanametaṃ.
পাদুকৰগ্গৰণ্ণনা নিট্ঠিতা।
Pādukavaggavaṇṇanā niṭṭhitā.
সেসং উত্তানমেৰ।
Sesaṃ uttānameva.
সেখিযকণ্ডং নিট্ঠিতং।
Sekhiyakaṇḍaṃ niṭṭhitaṃ.
অধিকরণসমথেসু যং ৰত্তব্বং, তং অট্ঠকথাযং আগতট্ঠানেযেৰ দস্সযিস্সাম।
Adhikaraṇasamathesu yaṃ vattabbaṃ, taṃ aṭṭhakathāyaṃ āgataṭṭhāneyeva dassayissāma.
ইতি সমন্তপাসাদিকায ৰিনযট্ঠকথায সারত্থদীপনিযং
Iti samantapāsādikāya vinayaṭṭhakathāya sāratthadīpaniyaṃ
ভিক্খুৰিভঙ্গৰণ্ণনা নিট্ঠিতা।
Bhikkhuvibhaṅgavaṇṇanā niṭṭhitā.
মহাৰিভঙ্গো নিট্ঠিতো।
Mahāvibhaṅgo niṭṭhito.
॥ নমো তস্স ভগৰতো অরহতো সম্মাসম্বুদ্ধস্স॥
Namo tassa bhagavato arahato sammāsambuddhassa
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ৭. পাদুকৰগ্গো • 7. Pādukavaggo
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰিভঙ্গ-অট্ঠকথা • Mahāvibhaṅga-aṭṭhakathā / ৭. পাদুকৰগ্গৰণ্ণনা • 7. Pādukavaggavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ৭. পাদুকৰগ্গৰণ্ণনা • 7. Pādukavaggavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ৭. পাদুকৰগ্গৰণ্ণনা • 7. Pādukavaggavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ৭. পাদুকৰগ্গ-অত্থযোজনা • 7. Pādukavagga-atthayojanā
