| Library / Tipiṭaka / д̇ибидага • Tipiṭaka / саарад̇т̇ад̣̇ийбаний-дийгаа • Sāratthadīpanī-ṭīkā |
7. баад̣̇угаваг̇г̇аван̣н̣анаа
7. Pādukavaggavaṇṇanā
647. сад̇д̇амаваг̇г̇з бадижчанно худ̇ваад̇и со гира рад̇д̇ибхааг̇з уяяаанам̣ г̇анд̇ваа амб̣ам̣ абхирухид̇ваа саакааяа саакам̣ амб̣ам̣ ологзнд̇о вижари. д̇асса д̇ат̇аа гаронд̇ассзва рад̇д̇и вибхааяи. со жинд̇зси ‘‘сажз ид̣̇аани од̇арид̇ваа г̇амиссаами, д̣̇исваа мам̣ жород̇и г̇ахзссанд̇и, рад̇д̇ибхааг̇з г̇амиссаамий’’д̇и. ат̇згам̣ видабам̣ абхирухид̇ваа нилийно ажчи. д̇ам̣ санд̇хааязд̇ам̣ вуд̇д̇ам̣. со ругкад̇о од̇аранд̇о згам̣ оламб̣инисаакам̣ г̇ахзд̇ваа д̇зсам̣ убхиннамби анд̇арз бад̇идтааси. д̇ам̣ санд̇хааяа вуд̇д̇ам̣ ‘‘д̇зсам̣ д̣̇виннамби анд̇араа ругкад̇о бад̇ид̇о’’д̇и. баал̣ияаа ад̇т̇ам̣ на ж̇аананд̇ийд̇и ад̇д̇ано г̇ахан̣асса ад̇т̇ам̣ на ж̇аананд̇и.
647. Sattamavagge paṭicchanno hutvāti so kira rattibhāge uyyānaṃ gantvā ambaṃ abhiruhitvā sākhāya sākhaṃ ambaṃ olokento vicari. Tassa tathā karontasseva ratti vibhāyi. So cintesi ‘‘sace idāni otaritvā gamissāmi, disvā maṃ coroti gahessanti, rattibhāge gamissāmī’’ti. Athekaṃ viṭapaṃ abhiruhitvā nilīno acchi. Taṃ sandhāyetaṃ vuttaṃ. So rukkhato otaranto ekaṃ olambinisākhaṃ gahetvā tesaṃ ubhinnampi antare patiṭṭhāsi. Taṃ sandhāya vuttaṃ ‘‘tesaṃ dvinnampi antarā rukkhato patito’’ti. Pāḷiyā atthaṃ na jānantīti attano gahaṇassa atthaṃ na jānanti.
ж̇аад̇агабаал̣ияам̣ (ж̇аа. 1.4.33) бана аяам̣ г̇аат̇аа –
Jātakapāḷiyaṃ (jā. 1.4.33) pana ayaṃ gāthā –
‘‘саб̣б̣амид̣̇ам̣ жаримам̣ гад̇ам̣, убхо д̇хаммам̣ на бассарз;
‘‘Sabbamidaṃ carimaṃ kataṃ, ubho dhammaṃ na passare;
убхо багад̇ияаа жуд̇аа, яо жааяам̣ манд̇зж̇жхаабзд̇и;
Ubho pakatiyā cutā, yo cāyaṃ mantejjhāpeti;
яо жа манд̇ам̣ ад̇хийяад̇ий’’д̇и. –
Yo ca mantaṃ adhīyatī’’ti. –
звамааг̇ад̇аа. д̇ассааяамад̇т̇о (ж̇аа. адта. 3.4.33) – саб̣б̣амид̣̇ам̣ жаримам̣ гад̇анд̇и яам̣ амхзхи д̇ийхи ж̇анзхи гад̇ам̣, саб̣б̣амид̣̇ам̣ гижжам̣ лаамагам̣ ниммарияаад̣̇ам̣ ад̇хаммигам̣. звам̣ ад̇д̇ано жорабхаавам̣ д̇зсан̃жа манд̇зсу аг̇ааравам̣ г̇арахид̇ваа буна ид̇арз д̣̇взязва г̇араханд̇о ‘‘убхо д̇хаммам̣ на бассарз’’д̇иаад̣̇имааха. д̇ад̇т̇а убход̇и имз д̣̇взби ж̇анаа г̇аругаараарахам̣ бораан̣агад̇хаммам̣ на бассанд̇и, д̇ад̇ова д̇хаммабагад̇ид̇о жуд̇аа. д̇хаммо хи батамуббад̇д̇ивасзна багад̇и наама. вуд̇д̇амби жзд̇ам̣ –
Evamāgatā. Tassāyamattho (jā. aṭṭha. 3.4.33) – sabbamidaṃ carimaṃ katanti yaṃ amhehi tīhi janehi kataṃ, sabbamidaṃ kiccaṃ lāmakaṃ nimmariyādaṃ adhammikaṃ. Evaṃ attano corabhāvaṃ tesañca mantesu agāravaṃ garahitvā puna itare dveyeva garahanto ‘‘ubho dhammaṃ na passare’’tiādimāha. Tattha ubhoti ime dvepi janā garukārārahaṃ porāṇakadhammaṃ na passanti, tatova dhammapakatito cutā. Dhammo hi paṭhamuppattivasena pakati nāma. Vuttampi cetaṃ –
‘‘д̇хаммо хавз баад̇урахоси буб̣б̣з,
‘‘Dhammo have pāturahosi pubbe,
бажчаа ад̇хаммо уд̣̇абаад̣̇и логз’’д̇и. (ж̇аа. 1.11.28);
Pacchā adhammo udapādi loke’’ti. (jā. 1.11.28);
яо жааяанд̇и яо жа аяам̣ нийжз нисийд̣̇ид̇ваа манд̇з аж̇жхаабзд̇и, яо жа ужжз нисийд̣̇ид̇ваа ад̇хийяад̇ийд̇и.
Yo cāyanti yo ca ayaṃ nīce nisīditvā mante ajjhāpeti, yo ca ucce nisīditvā adhīyatīti.
саалийнанд̇и аяам̣ г̇аат̇ааби –
Sālīnanti ayaṃ gāthāpi –
‘‘саалийнам̣ од̣̇анам̣ бхун̃ж̇з, сужим̣ мам̣суубасзжанам̣;
‘‘Sālīnaṃ odanaṃ bhuñje, suciṃ maṃsūpasecanaṃ;
д̇асмаа зд̇ам̣ на сзваами, д̇хаммам̣ исийхи сзвид̇а’’нд̇и. (ж̇аа. 1.4.34) –
Tasmā etaṃ na sevāmi, dhammaṃ isīhi sevita’’nti. (jā. 1.4.34) –
звам̣ ж̇аад̇агз ааг̇ад̇аа. д̇ад̇т̇а сужинд̇и бан̣д̣арам̣ барисуд̣̇д̇хам̣. мам̣суубасзжананд̇и наанаббагаарааяа мам̣савигад̇ияаа сид̇д̇ам̣ бхун̃ж̇з, бхун̃ж̇аамийд̇и ад̇т̇о. сзсам̣ баагадамзва.
Evaṃ jātake āgatā. Tattha sucinti paṇḍaraṃ parisuddhaṃ. Maṃsūpasecananti nānappakārāya maṃsavikatiyā sittaṃ bhuñje, bhuñjāmīti attho. Sesaṃ pākaṭameva.
д̇хирад̇т̇ууд̇и д̇хи ад̇т̇у, нинд̣̇аа бхавад̇ууд̇и ад̇т̇о, г̇арахаама д̇ам̣ маяанд̇и вуд̇д̇ам̣ ход̇и. лад̣̇д̇халаабход̇и д̇ханалаабхам̣ яасалаабхан̃жа санд̇хааяа вад̣̇ад̇и. винибаад̇анахзд̇унаад̇и винибаад̇анасса хзд̇убхаавзна. вуд̇д̇и наама ход̇ийд̇и яат̇аавуд̇д̇о д̣̇увид̇хоби лаабхо абааяасам̣вад̇д̇анигад̇ааяа самбарааяз винибаад̇анахзд̇убхаавзна бавад̇д̇анад̇о самбад̇и ад̇хаммажаран̣зна бавад̇д̇анад̇о жа вуд̇д̇и наама ход̇ийд̇и ад̇т̇о. зваруубаа яаа вуд̇д̇ийд̇и зваруубаа д̇ханалаабхаяасалаабхасан̇каад̇аа яаа вуд̇д̇и. ад̇хаммажаран̣зна ваад̇и ваа-сад̣̇д̣̇о самбин̣д̣анад̇т̇о. д̇ванд̇и убаяог̇ад̇т̇з бажжад̇д̇аважанам̣, д̇ам̣ ижжзва ваа баато. асмаад̇и баасаан̣аад̇хиважанамзд̇ам̣.
Dhiratthūti dhi atthu, nindā bhavatūti attho, garahāma taṃ mayanti vuttaṃ hoti. Laddhalābhoti dhanalābhaṃ yasalābhañca sandhāya vadati. Vinipātanahetunāti vinipātanassa hetubhāvena. Vutti nāma hotīti yathāvutto duvidhopi lābho apāyasaṃvattanikatāya samparāye vinipātanahetubhāvena pavattanato sampati adhammacaraṇena pavattanato ca vutti nāma hotīti attho. Evarūpā yā vuttīti evarūpā dhanalābhayasalābhasaṅkhātā yā vutti. Adhammacaraṇena vāti vā-saddo sampiṇḍanattho. Tvanti upayogatthe paccattavacanaṃ, taṃ icceva vā pāṭho. Asmāti pāsāṇādhivacanametaṃ.
баад̣̇угаваг̇г̇аван̣н̣анаа нидтид̇аа.
Pādukavaggavaṇṇanā niṭṭhitā.
сзсам̣ уд̇д̇аанамзва.
Sesaṃ uttānameva.
сзкияаган̣д̣ам̣ нидтид̇ам̣.
Sekhiyakaṇḍaṃ niṭṭhitaṃ.
ад̇хигаран̣асамат̇зсу яам̣ вад̇д̇аб̣б̣ам̣, д̇ам̣ адтагат̇ааяам̣ ааг̇ад̇адтаанзязва д̣̇ассаяиссаама.
Adhikaraṇasamathesu yaṃ vattabbaṃ, taṃ aṭṭhakathāyaṃ āgataṭṭhāneyeva dassayissāma.
ид̇и саманд̇абаасаад̣̇игааяа винаяадтагат̇ааяа саарад̇т̇ад̣̇ийбанияам̣
Iti samantapāsādikāya vinayaṭṭhakathāya sāratthadīpaniyaṃ
бхигкувибхан̇г̇аван̣н̣анаа нидтид̇аа.
Bhikkhuvibhaṅgavaṇṇanā niṭṭhitā.
махаавибхан̇г̇о нидтид̇о.
Mahāvibhaṅgo niṭṭhito.
намо д̇асса бхаг̇авад̇о арахад̇о саммаасамб̣уд̣̇д̇хасса
Namo tassa bhagavato arahato sammāsambuddhassa
Related texts:
д̇ибидага (муула) • Tipiṭaka (Mūla) / винаяабидага • Vinayapiṭaka / махаавибхан̇г̇а • Mahāvibhaṅga / 7. баад̣̇угаваг̇г̇о • 7. Pādukavaggo
адтагат̇аа • Aṭṭhakathā / винаяабидага (адтагат̇аа) • Vinayapiṭaka (aṭṭhakathā) / махаавибхан̇г̇а-адтагат̇аа • Mahāvibhaṅga-aṭṭhakathā / 7. баад̣̇угаваг̇г̇аван̣н̣анаа • 7. Pādukavaggavaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / важ̇ираб̣уд̣̇д̇хи-дийгаа • Vajirabuddhi-ṭīkā / 7. баад̣̇угаваг̇г̇аван̣н̣анаа • 7. Pādukavaggavaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / вимад̇ивинод̣̇аний-дийгаа • Vimativinodanī-ṭīkā / 7. баад̣̇угаваг̇г̇аван̣н̣анаа • 7. Pādukavaggavaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / баажид̇яаад̣̇ияож̇анаабаал̣и • Pācityādiyojanāpāḷi / 7. баад̣̇угаваг̇г̇а-ад̇т̇аяож̇анаа • 7. Pādukavagga-atthayojanā
