| Library / Tipiṭaka / තිපිටක • Tipiṭaka / භික්‌ඛුනීවිභඞ්‌ග • Bhikkhunīvibhaṅga |
7. පාදුකවග්‌ගො
7. Pādukavaggo
1241. තෙන සමයෙන බුද්‌ධො භගවා සාවත්‌ථියං විහරති ජෙතවනෙ අනාථපිණ්‌ඩිකස්‌ස ආරාමෙ. තෙන ඛො පන සමයෙන ඡබ්‌බග්‌ගියා භික්‌ඛුනියො උදකෙ උච්‌චාරම්‌පි පස්‌සාවම්‌පි ඛෙළම්‌පි කරොන්‌ති. මනුස්‌සා උජ්‌ඣායන්‌ති ඛිය්‍යන්‌ති විපාචෙන්‌ති – ‘‘කථඤ්‌හි නාම භික්‌ඛුනියො උදකෙ උච්‌චාරම්‌පි පස්‌සාවම්‌පි ඛෙළම්‌පි කරිස්‌සන්‌ති, සෙය්‍යථාපි ගිහිනියො කාමභොගිනියො’’ති! අස්‌සොසුං ඛො භික්‌ඛුනියො තෙසං මනුස්‌සානං උජ්‌ඣායන්‌තානං ඛිය්‍යන්‌තානං විපාචෙන්‌තානං. යා තා භික්‌ඛුනියො අප්‌පිච්‌ඡා, තා උජ්‌ඣායන්‌ති ඛිය්‍යන්‌ති විපාචෙන්‌ති – ‘‘කථඤ්‌හි නාම ඡබ්‌බග්‌ගියා භික්‌ඛුනියො උදකෙ උච්‌චාරම්‌පි පස්‌සාවම්‌පි ඛෙළම්‌පි කරිස්‌සන්‌තී’’ති! අථ ඛො භික්‌ඛුනියො භික්‌ඛූනං එතමත්‌ථං ආරොචෙසුං. භික්‌ඛූ 1 භගවතො එතමත්‌ථං ආරොචෙසුං. අථ ඛො භගවා…පෙ.… භික්‌ඛූ පටිපුච්‌ඡි – ‘‘සච්‌චං කිර, භික්‌ඛවෙ, ඡබ්‌බග්‌ගියා භික්‌ඛුනියො උදකෙ උච්‌චාරම්‌පි පස්‌සාවම්‌පි ඛෙළම්‌පි කරොන්‌තී’’ති? ‘‘සච්‌චං, භගවා’’ති. විගරහි බුද්‌ධො භගවා…පෙ.… කථඤ්‌හි නාම, භික්‌ඛවෙ, ඡබ්‌බග්‌ගියා භික්‌ඛුනියො උදකෙ උච්‌චාරම්‌පි පස්‌සාවම්‌පි ඛෙළම්‌පි කරිස්‌සන්‌ති! නෙතං, භික්‌ඛවෙ, අප්‌පසන්‌නානං වා පසාදාය…පෙ.… එවඤ්‌ච පන, භික්‌ඛවෙ, භික්‌ඛුනියො ඉමං සික්‌ඛාපදං උද්‌දිසන්‌තු –
1241. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena chabbaggiyā bhikkhuniyo udake uccārampi passāvampi kheḷampi karonti. Manussā ujjhāyanti khiyyanti vipācenti – ‘‘kathañhi nāma bhikkhuniyo udake uccārampi passāvampi kheḷampi karissanti, seyyathāpi gihiniyo kāmabhoginiyo’’ti! Assosuṃ kho bhikkhuniyo tesaṃ manussānaṃ ujjhāyantānaṃ khiyyantānaṃ vipācentānaṃ. Yā tā bhikkhuniyo appicchā, tā ujjhāyanti khiyyanti vipācenti – ‘‘kathañhi nāma chabbaggiyā bhikkhuniyo udake uccārampi passāvampi kheḷampi karissantī’’ti! Atha kho bhikkhuniyo bhikkhūnaṃ etamatthaṃ ārocesuṃ. Bhikkhū 2 bhagavato etamatthaṃ ārocesuṃ. Atha kho bhagavā…pe… bhikkhū paṭipucchi – ‘‘saccaṃ kira, bhikkhave, chabbaggiyā bhikkhuniyo udake uccārampi passāvampi kheḷampi karontī’’ti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, chabbaggiyā bhikkhuniyo udake uccārampi passāvampi kheḷampi karissanti! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
‘‘න උදකෙ උච්‌චාරං වා පස්‌සාවං වා ඛෙළං වා කරිස්‌සාමීති සික්‌ඛා කරණීයා’’ති .
‘‘Na udake uccāraṃ vā passāvaṃ vā kheḷaṃ vā karissāmīti sikkhā karaṇīyā’’ti .
එවඤ්‌චිදං භගවතා භික්‌ඛුනීනං සික්‌ඛාපදං පඤ්‌ඤත්‌තං හොති.
Evañcidaṃ bhagavatā bhikkhunīnaṃ sikkhāpadaṃ paññattaṃ hoti.
තෙන ඛො පන සමයෙන ගිලානා භික්‌ඛුනියො උදකෙ උච්‌චාරම්‌පි පස්‌සාවම්‌පි ඛෙළම්‌පි කාතුං කුක්‌කුච්‌චායන්‌ති. භගවතො එතමත්‌ථං ආරොචෙසුං…පෙ.… අනුජානාමි, භික්‌ඛවෙ, ගිලානාය භික්‌ඛුනියා උදකෙ උච්‌චාරම්‌පි පස්‌සාවම්‌පි ඛෙළම්‌පි කාතුං. එවඤ්‌ච පන, භික්‌ඛවෙ, භික්‌ඛුනියො ඉමං සික්‌ඛාපදං උද්‌දිසන්‌තු –
Tena kho pana samayena gilānā bhikkhuniyo udake uccārampi passāvampi kheḷampi kātuṃ kukkuccāyanti. Bhagavato etamatthaṃ ārocesuṃ…pe… anujānāmi, bhikkhave, gilānāya bhikkhuniyā udake uccārampi passāvampi kheḷampi kātuṃ. Evañca pana, bhikkhave, bhikkhuniyo imaṃ sikkhāpadaṃ uddisantu –
‘‘න උදකෙ අගිලානා උච්‌චාරං වා පස්‌සාවං වා ඛෙළං වා කරිස්‌සාමීති සික්‌ඛා කරණීයා’’ති.
‘‘Na udake agilānā uccāraṃ vā passāvaṃ vā kheḷaṃ vā karissāmīti sikkhā karaṇīyā’’ti.
න උදකෙ අගිලානාය උච්‌චාරො වා පස්‌සාවො වා ඛෙළො වා කාතබ්‌බො. යා අනාදරියං පටිච්‌ච උදකෙ අගිලානා උච්‌චාරං වා පස්‌සාවං වා ඛෙළං වා කරොති, ආපත්‌ති දුක්‌කටස්‌ස.
Na udake agilānāya uccāro vā passāvo vā kheḷo vā kātabbo. Yā anādariyaṃ paṭicca udake agilānā uccāraṃ vā passāvaṃ vā kheḷaṃ vā karoti, āpatti dukkaṭassa.
අනාපත්‌ති අසඤ්‌චිච්‌ච, අස්‌සතියා, අජානන්‌තියා, ගිලානාය, ථලෙ කතො උදකං ඔත්‌ථරති, ආපදාසු, උම්‌මත්‌තිකාය, ඛිත්‌තචිත්‌තාය, වෙදනාට්‌ටාය, ආදිකම්‌මිකායාති.
Anāpatti asañcicca, assatiyā, ajānantiyā, gilānāya, thale kato udakaṃ ottharati, āpadāsu, ummattikāya, khittacittāya, vedanāṭṭāya, ādikammikāyāti.
පන්‌නරසමසික්‌ඛාපදං නිට්‌ඨිතං.
Pannarasamasikkhāpadaṃ niṭṭhitaṃ.
පාදුකවග්‌ගො සත්‌තමො.
Pādukavaggo sattamo.
උද්‌දිට්‌ඨා ඛො, අය්‍යායො, සෙඛියා ධම්‌මා. තත්‌ථාය්‍යායො පුච්‌ඡාමි – ‘‘කච්‌චිත්‌ථ පරිසුද්‌ධා’’? දුතියම්‌පි පුච්‌ඡාමි – ‘‘කච්‌චිත්‌ථ පරිසුද්‌ධා’’? තතියම්‌පි පුච්‌ඡාමි – ‘‘කච්‌චිත්‌ථ පරිසුද්‌ධා’’? පරිසුද්‌ධෙත්‌ථාය්‍යායො, තස්‌මා තුණ්‌හී, එවමෙතං ධාරයාමීති.
Uddiṭṭhā kho, ayyāyo, sekhiyā dhammā. Tatthāyyāyo pucchāmi – ‘‘kaccittha parisuddhā’’? Dutiyampi pucchāmi – ‘‘kaccittha parisuddhā’’? Tatiyampi pucchāmi – ‘‘kaccittha parisuddhā’’? Parisuddhetthāyyāyo, tasmā tuṇhī, evametaṃ dhārayāmīti.
සෙඛියකණ්‌ඩං නිට්‌ඨිතං.
Sekhiyakaṇḍaṃ niṭṭhitaṃ.
Footnotes:
