| Library / Tipiṭaka / ತಿಪಿಟಕ • Tipiṭaka / ಬುದ್ಧವಂಸಪಾಳಿ • Buddhavaṃsapāḷi |
೧೦. ಪದುಮಬುದ್ಧವಂಸೋ
10. Padumabuddhavaṃso
೧.
1.
ಅನೋಮದಸ್ಸಿಸ್ಸ ಅಪರೇನ, ಸಮ್ಬುದ್ಧೋ ದ್ವಿಪದುತ್ತಮೋ।
Anomadassissa aparena, sambuddho dvipaduttamo;
ಪದುಮೋ ನಾಮ ನಾಮೇನ, ಅಸಮೋ ಅಪ್ಪಟಿಪುಗ್ಗಲೋ॥
Padumo nāma nāmena, asamo appaṭipuggalo.
೨.
2.
ತಸ್ಸಾಪಿ ಅಸಮಂ ಸೀಲಂ, ಸಮಾಧಿಪಿ ಅನನ್ತಕೋ।
Tassāpi asamaṃ sīlaṃ, samādhipi anantako;
ಅಸಙ್ಖೇಯ್ಯಂ ಞಾಣವರಂ, ವಿಮುತ್ತಿಪಿ ಅನೂಪಮಾ॥
Asaṅkheyyaṃ ñāṇavaraṃ, vimuttipi anūpamā.
೩.
3.
ತಸ್ಸಾಪಿ ಅತುಲತೇಜಸ್ಸ, ಧಮ್ಮಚಕ್ಕಪ್ಪವತ್ತನೇ।
Tassāpi atulatejassa, dhammacakkappavattane;
ಅಭಿಸಮಯಾ ತಯೋ ಆಸುಂ, ಮಹಾತಮಪವಾಹನಾ॥
Abhisamayā tayo āsuṃ, mahātamapavāhanā.
೪.
4.
ಪಠಮಾಭಿಸಮಯೇ ಬುದ್ಧೋ, ಕೋಟಿಸತಮಬೋಧಯಿ।
Paṭhamābhisamaye buddho, koṭisatamabodhayi;
ದುತಿಯಾಭಿಸಮಯೇ ಧೀರೋ, ನವುತಿಕೋಟಿಮಬೋಧಯಿ॥
Dutiyābhisamaye dhīro, navutikoṭimabodhayi.
೫.
5.
ಯದಾ ಚ ಪದುಮೋ ಬುದ್ಧೋ, ಓವದೀ ಸಕಮತ್ರಜಂ।
Yadā ca padumo buddho, ovadī sakamatrajaṃ;
ತದಾ ಅಸೀತಿಕೋಟೀನಂ, ತತಿಯಾಭಿಸಮಯೋ ಅಹು॥
Tadā asītikoṭīnaṃ, tatiyābhisamayo ahu.
೬.
6.
ಸನ್ನಿಪಾತಾ ತಯೋ ಆಸುಂ, ಪದುಮಸ್ಸ ಮಹೇಸಿನೋ।
Sannipātā tayo āsuṃ, padumassa mahesino;
ಕೋಟಿಸತಸಹಸ್ಸಾನಂ, ಪಠಮೋ ಆಸಿ ಸಮಾಗಮೋ॥
Koṭisatasahassānaṃ, paṭhamo āsi samāgamo.
೭.
7.
ಕಥಿನತ್ಥಾರಸಮಯೇ , ಉಪ್ಪನ್ನೇ ಕಥಿನಚೀವರೇ।
Kathinatthārasamaye , uppanne kathinacīvare;
೮.
8.
ತದಾ ತೇ ವಿಮಲಾ ಭಿಕ್ಖೂ, ಛಳಭಿಞ್ಞಾ ಮಹಿದ್ಧಿಕಾ।
Tadā te vimalā bhikkhū, chaḷabhiññā mahiddhikā;
ತೀಣಿ ಸತಸಹಸ್ಸಾನಿ, ಸಮಿಂಸು ಅಪರಾಜಿತಾ॥
Tīṇi satasahassāni, samiṃsu aparājitā.
೯.
9.
ತದಾ ಸಮಾಗಮೋ ಆಸಿ, ದ್ವಿನ್ನಂ ಸತಸಹಸ್ಸಿನಂ॥
Tadā samāgamo āsi, dvinnaṃ satasahassinaṃ.
೧೦.
10.
ಅಹಂ ತೇನ ಸಮಯೇನ, ಸೀಹೋ ಆಸಿಂ ಮಿಗಾಧಿಭೂ।
Ahaṃ tena samayena, sīho āsiṃ migādhibhū;
ವಿವೇಕಮನುಬ್ರೂಹನ್ತಂ , ಪವನೇ ಅದ್ದಸಂ ಜಿನಂ॥
Vivekamanubrūhantaṃ , pavane addasaṃ jinaṃ.
೧೧.
11.
ವನ್ದಿತ್ವಾ ಸಿರಸಾ ಪಾದೇ, ಕತ್ವಾನ ತಂ ಪದಕ್ಖಿಣಂ।
Vanditvā sirasā pāde, katvāna taṃ padakkhiṇaṃ;
ತಿಕ್ಖತ್ತುಂ ಅಭಿನಾದಿತ್ವಾ, ಸತ್ತಾಹಂ ಜಿನಮುಪಟ್ಠಹಂ॥
Tikkhattuṃ abhināditvā, sattāhaṃ jinamupaṭṭhahaṃ.
೧೨.
12.
ಸತ್ತಾಹಂ ವರಸಮಾಪತ್ತಿಯಾ, ವುಟ್ಠಹಿತ್ವಾ ತಥಾಗತೋ।
Sattāhaṃ varasamāpattiyā, vuṭṭhahitvā tathāgato;
ಮನಸಾ ಚಿನ್ತಯಿತ್ವಾನ, ಕೋಟಿಭಿಕ್ಖೂ ಸಮಾನಯಿ॥
Manasā cintayitvāna, koṭibhikkhū samānayi.
೧೩.
13.
ತದಾಪಿ ಸೋ ಮಹಾವೀರೋ, ತೇಸಂ ಮಜ್ಝೇ ವಿಯಾಕರಿ।
Tadāpi so mahāvīro, tesaṃ majjhe viyākari;
‘‘ಅಪರಿಮೇಯ್ಯಿತೋ ಕಪ್ಪೇ, ಅಯಂ ಬುದ್ಧೋ ಭವಿಸ್ಸತಿ॥
‘‘Aparimeyyito kappe, ayaṃ buddho bhavissati.
೧೪.
14.
‘‘ಪಧಾನಂ ಪದಹಿತ್ವಾನ…ಪೇ॰… ಹೇಸ್ಸಾಮ ಸಮ್ಮುಖಾ ಇಮಂ’’॥
‘‘Padhānaṃ padahitvāna…pe… hessāma sammukhā imaṃ’’.
೧೫.
15.
ತಸ್ಸಾಪಿ ವಚನಂ ಸುತ್ವಾ, ಭಿಯ್ಯೋ ಚಿತ್ತಂ ಪಸಾದಯಿಂ।
Tassāpi vacanaṃ sutvā, bhiyyo cittaṃ pasādayiṃ;
ಉತ್ತರಿಂ ವತಮಧಿಟ್ಠಾಸಿಂ, ದಸಪಾರಮಿಪೂರಿಯಾ॥
Uttariṃ vatamadhiṭṭhāsiṃ, dasapāramipūriyā.
೧೬.
16.
ಚಮ್ಪಕಂ ನಾಮ ನಗರಂ, ಅಸಮೋ ನಾಮ ಖತ್ತಿಯೋ।
Campakaṃ nāma nagaraṃ, asamo nāma khattiyo;
ಅಸಮಾ ನಾಮ ಜನಿಕಾ, ಪದುಮಸ್ಸ ಮಹೇಸಿನೋ॥
Asamā nāma janikā, padumassa mahesino.
೧೭.
17.
ದಸವಸ್ಸಸಹಸ್ಸಾನಿ , ಅಗಾರಂ ಅಜ್ಝ ಸೋ ವಸಿ।
Dasavassasahassāni , agāraṃ ajjha so vasi;
ನನ್ದಾವಸುಯಸುತ್ತರಾ , ತಯೋ ಪಾಸಾದಮುತ್ತಮಾ॥
Nandāvasuyasuttarā , tayo pāsādamuttamā.
೧೮.
18.
ತೇತ್ತಿಂಸ ಚ ಸಹಸ್ಸಾನಿ, ನಾರಿಯೋ ಸಮಲಙ್ಕತಾ।
Tettiṃsa ca sahassāni, nāriyo samalaṅkatā;
ಉತ್ತರಾ ನಾಮ ಸಾ ನಾರೀ, ರಮ್ಮೋ ನಾಮಾಸಿ ಅತ್ರಜೋ॥
Uttarā nāma sā nārī, rammo nāmāsi atrajo.
೧೯.
19.
ನಿಮಿತ್ತೇ ಚತುರೋ ದಿಸ್ವಾ, ರಥಯಾನೇನ ನಿಕ್ಖಮಿ।
Nimitte caturo disvā, rathayānena nikkhami;
ಅನೂನಅಟ್ಠಮಾಸಾನಿ, ಪಧಾನಂ ಪದಹೀ ಜಿನೋ॥
Anūnaaṭṭhamāsāni, padhānaṃ padahī jino.
೨೦.
20.
ಬ್ರಹ್ಮುನಾ ಯಾಚಿತೋ ಸನ್ತೋ, ಪದುಮೋ ಲೋಕನಾಯಕೋ।
Brahmunā yācito santo, padumo lokanāyako;
ವತ್ತಿ ಚಕ್ಕಂ ಮಹಾವೀರೋ, ಧನಞ್ಚುಯ್ಯಾನಮುತ್ತಮೇ॥
Vatti cakkaṃ mahāvīro, dhanañcuyyānamuttame.
೨೧.
21.
ಸಾಲೋ ಚ ಉಪಸಾಲೋ ಚ, ಅಹೇಸುಂ ಅಗ್ಗಸಾವಕಾ।
Sālo ca upasālo ca, ahesuṃ aggasāvakā;
ವರುಣೋ ನಾಮುಪಟ್ಠಾಕೋ, ಪದುಮಸ್ಸ ಮಹೇಸಿನೋ॥
Varuṇo nāmupaṭṭhāko, padumassa mahesino.
೨೨.
22.
ರಾಧಾ ಚೇವ ಸುರಾಧಾ ಚ, ಅಹೇಸುಂ ಅಗ್ಗಸಾವಿಕಾ।
Rādhā ceva surādhā ca, ahesuṃ aggasāvikā;
ಬೋಧಿ ತಸ್ಸ ಭಗವತೋ, ಮಹಾಸೋಣೋತಿ ವುಚ್ಚತಿ॥
Bodhi tassa bhagavato, mahāsoṇoti vuccati.
೨೩.
23.
ಭಿಯ್ಯೋ ಚೇವ ಅಸಮೋ ಚ, ಅಹೇಸುಂ ಅಗ್ಗುಪಟ್ಠಕಾ।
Bhiyyo ceva asamo ca, ahesuṃ aggupaṭṭhakā;
ರುಚೀ ಚ ನನ್ದರಾಮಾ ಚ, ಅಹೇಸುಂ ಅಗ್ಗುಪಟ್ಠಿಕಾ॥
Rucī ca nandarāmā ca, ahesuṃ aggupaṭṭhikā.
೨೪.
24.
ಅಟ್ಠಪಣ್ಣಾಸರತನಂ, ಅಚ್ಚುಗ್ಗತೋ ಮಹಾಮುನಿ।
Aṭṭhapaṇṇāsaratanaṃ, accuggato mahāmuni;
ಪಭಾ ನಿದ್ಧಾವತೀ ತಸ್ಸ, ಅಸಮಾ ಸಬ್ಬಸೋ ದಿಸಾ॥
Pabhā niddhāvatī tassa, asamā sabbaso disā.
೨೫.
25.
ಚನ್ದಪ್ಪಭಾ ಸೂರಿಯಪ್ಪಭಾ, ರತನಗ್ಗಿಮಣಿಪ್ಪಭಾ।
Candappabhā sūriyappabhā, ratanaggimaṇippabhā;
ಸಬ್ಬಾಪಿ ತಾ ಹತಾ ಹೋನ್ತಿ, ಪತ್ವಾ ಜಿನಪಭುತ್ತಮಂ॥
Sabbāpi tā hatā honti, patvā jinapabhuttamaṃ.
೨೬.
26.
ವಸ್ಸಸತಸಹಸ್ಸಾನಿ, ಆಯು ವಿಜ್ಜತಿ ತಾವದೇ।
Vassasatasahassāni, āyu vijjati tāvade;
ತಾವತಾ ತಿಟ್ಠಮಾನೋ ಸೋ, ತಾರೇಸಿ ಜನತಂ ಬಹುಂ॥
Tāvatā tiṭṭhamāno so, tāresi janataṃ bahuṃ.
೨೭.
27.
ಪರಿಪಕ್ಕಮಾನಸೇ ಸತ್ತೇ, ಬೋಧಯಿತ್ವಾ ಅಸೇಸತೋ।
Paripakkamānase satte, bodhayitvā asesato;
ಸೇಸಕೇ ಅನುಸಾಸಿತ್ವಾ, ನಿಬ್ಬುತೋ ಸೋ ಸಸಾವಕೋ॥
Sesake anusāsitvā, nibbuto so sasāvako.
೨೮.
28.
ಉರಗೋವ ತಚಂ ಜಿಣ್ಣಂ, ವದ್ಧಪತ್ತಂವ ಪಾದಪೋ।
Uragova tacaṃ jiṇṇaṃ, vaddhapattaṃva pādapo;
ಜಹಿತ್ವಾ ಸಬ್ಬಸಙ್ಖಾರೇ, ನಿಬ್ಬುತೋ ಸೋ ಯಥಾ ಸಿಖೀ॥
Jahitvā sabbasaṅkhāre, nibbuto so yathā sikhī.
೨೯.
29.
ಪದುಮೋ ಜಿನವರೋ ಸತ್ಥಾ, ಧಮ್ಮಾರಾಮಮ್ಹಿ ನಿಬ್ಬುತೋ।
Padumo jinavaro satthā, dhammārāmamhi nibbuto;
ಧಾತುವಿತ್ಥಾರಿಕಂ ಆಸಿ, ತೇಸು ತೇಸು ಪದೇಸತೋತಿ॥
Dhātuvitthārikaṃ āsi, tesu tesu padesatoti.
ಪದುಮಸ್ಸ ಭಗವತೋ ವಂಸೋ ಅಟ್ಠಮೋ।
Padumassa bhagavato vaṃso aṭṭhamo.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಬುದ್ಧವಂಸ-ಅಟ್ಠಕಥಾ • Buddhavaṃsa-aṭṭhakathā / ೧೦. ಪದುಮಬುದ್ಧವಂಸವಣ್ಣನಾ • 10. Padumabuddhavaṃsavaṇṇanā
