| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
6. பது³மச்ச²த³னியத்தே²ரஅபதா³னவண்ணனா
6. Padumacchadaniyattheraapadānavaṇṇanā
நிப்³பு³தே லோகனாத²ம்ஹீதிஆதி³கங் ஆயஸ்மதோ பது³மச்ச²த³னியத்தே²ரஸ்ஸ அபதா³னங். அயம்பி புரிமபு³த்³தே⁴ஸு கதபுஞ்ஞஸம்பா⁴ரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ விபஸ்ஸிஸ்ஸ ப⁴க³வதோ காலே ஏகஸ்மிங் குலகே³ஹே நிப்³ப³த்தோ விஞ்ஞுதங் பத்தோ ரதனத்தயே பஸன்னோ பரினிப்³பு³தஸ்ஸ விபஸ்ஸிஸ்ஸ ப⁴க³வதோ சிதகங் பது³மபுப்பே²ஹி பூஜேஸி. ஸோ தேனேவ சித்தப்பஸாதே³ன யாவதாயுகங் ட²த்வா ததோ ஸுக³தீஸுயேவ ஸங்ஸரந்தோ தி³ப்³ப³ஸம்பத்திங் மனுஸ்ஸஸம்பத்திஞ்சாதி த்³வே ஸம்பத்தியோ அனேகக்க²த்துங் அனுப⁴வித்வா இமஸ்மிங் அம்ஹாகங் ஸம்மாஸம்பு³த்³த⁴காலே ஏகஸ்மிங் குலகே³ஹே நிப்³ப³த்தோ விஞ்ஞுதங் பத்தோ ஸத்த²ரி பஸீதி³த்வா ஸாஸனே பப்³ப³ஜிதோ க⁴டெந்தோ வாயமந்தோ நசிரஸ்ஸேவ அரஹா அஹோஸி. தஸ்ஸ ரத்திட்டா²னதி³வாட்டா²னாதீ³ஸு தத்த² தத்த² விஹரந்தஸ்ஸ விஹாரோ பது³மபுப்பே²ஹி சா²தீ³யதி, தேன ஸோ பது³மச்ச²த³னியத்தே²ரோதி பாகடோ.
Nibbutelokanāthamhītiādikaṃ āyasmato padumacchadaniyattherassa apadānaṃ. Ayampi purimabuddhesu katapuññasambhāro tattha tattha bhave vivaṭṭūpanissayāni puññāni upacinanto vipassissa bhagavato kāle ekasmiṃ kulagehe nibbatto viññutaṃ patto ratanattaye pasanno parinibbutassa vipassissa bhagavato citakaṃ padumapupphehi pūjesi. So teneva cittappasādena yāvatāyukaṃ ṭhatvā tato sugatīsuyeva saṃsaranto dibbasampattiṃ manussasampattiñcāti dve sampattiyo anekakkhattuṃ anubhavitvā imasmiṃ amhākaṃ sammāsambuddhakāle ekasmiṃ kulagehe nibbatto viññutaṃ patto satthari pasīditvā sāsane pabbajito ghaṭento vāyamanto nacirasseva arahā ahosi. Tassa rattiṭṭhānadivāṭṭhānādīsu tattha tattha viharantassa vihāro padumapupphehi chādīyati, tena so padumacchadaniyattheroti pākaṭo.
83. அத்தனோ புப்³ப³கம்மங் ஸரித்வா ஸோமனஸ்ஸவஸேன புப்³ப³சரிதாபதா³னங் பகாஸெந்தோ நிப்³பு³தே லோகனாத²ம்ஹீதிஆதி³மாஹ. தத்த² நிப்³பு³தேதி க²ந்த⁴பரினிப்³பா³னேன பரினிப்³பு³தே ஸத்த²ரி, விபஸ்ஸிஸ்ஸ ஸம்மாஸம்பு³த்³த⁴ஸ்ஸ ஸரீரே சிதமானியமானே சிதகே ஆரோபிதே ஸுபு²ல்லங் பது³மகலாபங் அஹங் க³ஹெத்வா சிதகங் ஆரோபயிங் பூஜேஸிந்தி அத்தோ². ஸேஸகா³தா²ஸு ஹெட்டா² வுத்தனயத்தா உத்தானத்த²மேவாதி.
83. Attano pubbakammaṃ saritvā somanassavasena pubbacaritāpadānaṃ pakāsento nibbute lokanāthamhītiādimāha. Tattha nibbuteti khandhaparinibbānena parinibbute satthari, vipassissa sammāsambuddhassa sarīre citamāniyamāne citake āropite suphullaṃ padumakalāpaṃ ahaṃ gahetvā citakaṃ āropayiṃ pūjesinti attho. Sesagāthāsu heṭṭhā vuttanayattā uttānatthamevāti.
பது³மச்ச²த³னியத்தே²ரஅபதா³னவண்ணனா ஸமத்தா.
Padumacchadaniyattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 6. பது³மச்ச²த³னியத்தே²ரஅபதா³னங் • 6. Padumacchadaniyattheraapadānaṃ
