| Library / Tipiṭaka / तिपिटक • Tipiṭaka / अपदान-अट्ठकथा • Apadāna-aṭṭhakathā |
६. पदुमच्छदनियत्थेरअपदानवण्णना
6. Padumacchadaniyattheraapadānavaṇṇanā
निब्बुते लोकनाथम्हीतिआदिकं आयस्मतो पदुमच्छदनियत्थेरस्स अपदानं। अयम्पि पुरिमबुद्धेसु कतपुञ्ञसम्भारो तत्थ तत्थ भवे विवट्टूपनिस्सयानि पुञ्ञानि उपचिनन्तो विपस्सिस्स भगवतो काले एकस्मिं कुलगेहे निब्बत्तो विञ्ञुतं पत्तो रतनत्तये पसन्नो परिनिब्बुतस्स विपस्सिस्स भगवतो चितकं पदुमपुप्फेहि पूजेसि। सो तेनेव चित्तप्पसादेन यावतायुकं ठत्वा ततो सुगतीसुयेव संसरन्तो दिब्बसम्पत्तिं मनुस्ससम्पत्तिञ्चाति द्वे सम्पत्तियो अनेकक्खत्तुं अनुभवित्वा इमस्मिं अम्हाकं सम्मासम्बुद्धकाले एकस्मिं कुलगेहे निब्बत्तो विञ्ञुतं पत्तो सत्थरि पसीदित्वा सासने पब्बजितो घटेन्तो वायमन्तो नचिरस्सेव अरहा अहोसि। तस्स रत्तिट्ठानदिवाट्ठानादीसु तत्थ तत्थ विहरन्तस्स विहारो पदुमपुप्फेहि छादीयति, तेन सो पदुमच्छदनियत्थेरोति पाकटो।
Nibbutelokanāthamhītiādikaṃ āyasmato padumacchadaniyattherassa apadānaṃ. Ayampi purimabuddhesu katapuññasambhāro tattha tattha bhave vivaṭṭūpanissayāni puññāni upacinanto vipassissa bhagavato kāle ekasmiṃ kulagehe nibbatto viññutaṃ patto ratanattaye pasanno parinibbutassa vipassissa bhagavato citakaṃ padumapupphehi pūjesi. So teneva cittappasādena yāvatāyukaṃ ṭhatvā tato sugatīsuyeva saṃsaranto dibbasampattiṃ manussasampattiñcāti dve sampattiyo anekakkhattuṃ anubhavitvā imasmiṃ amhākaṃ sammāsambuddhakāle ekasmiṃ kulagehe nibbatto viññutaṃ patto satthari pasīditvā sāsane pabbajito ghaṭento vāyamanto nacirasseva arahā ahosi. Tassa rattiṭṭhānadivāṭṭhānādīsu tattha tattha viharantassa vihāro padumapupphehi chādīyati, tena so padumacchadaniyattheroti pākaṭo.
८३. अत्तनो पुब्बकम्मं सरित्वा सोमनस्सवसेन पुब्बचरितापदानं पकासेन्तो निब्बुते लोकनाथम्हीतिआदिमाह। तत्थ निब्बुतेति खन्धपरिनिब्बानेन परिनिब्बुते सत्थरि, विपस्सिस्स सम्मासम्बुद्धस्स सरीरे चितमानियमाने चितके आरोपिते सुफुल्लं पदुमकलापं अहं गहेत्वा चितकं आरोपयिं पूजेसिन्ति अत्थो। सेसगाथासु हेट्ठा वुत्तनयत्ता उत्तानत्थमेवाति।
83. Attano pubbakammaṃ saritvā somanassavasena pubbacaritāpadānaṃ pakāsento nibbute lokanāthamhītiādimāha. Tattha nibbuteti khandhaparinibbānena parinibbute satthari, vipassissa sammāsambuddhassa sarīre citamāniyamāne citake āropite suphullaṃ padumakalāpaṃ ahaṃ gahetvā citakaṃ āropayiṃ pūjesinti attho. Sesagāthāsu heṭṭhā vuttanayattā uttānatthamevāti.
पदुमच्छदनियत्थेरअपदानवण्णना समत्ता।
Padumacchadaniyattheraapadānavaṇṇanā samattā.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / खुद्दकनिकाय • Khuddakanikāya / अपदानपाळि • Apadānapāḷi / ६. पदुमच्छदनियत्थेरअपदानं • 6. Padumacchadaniyattheraapadānaṃ
