| Library / Tipiṭaka / တိပိဋက • Tipiṭaka / အပဒာန-အဋ္ဌကထာ • Apadāna-aṭṭhakathā |
၆. ပဒုမစ္ဆဒနိယတ္ထေရအပဒာနဝဏ္ဏနာ
6. Padumacchadaniyattheraapadānavaṇṇanā
နိဗ္ဗုတေ လောကနာထမ္ဟီတိအာဒိကံ အာယသ္မတော ပဒုမစ္ဆဒနိယတ္ထေရသ္သ အပဒာနံ။ အယမ္ပိ ပုရိမဗုဒ္ဓေသု ကတပုညသမ္ဘာရော တတ္ထ တတ္ထ ဘဝေ ဝိဝဋ္ဋူပနိသ္သယာနိ ပုညာနိ ဥပစိနန္တော ဝိပသ္သိသ္သ ဘဂဝတော ကာလေ ဧကသ္မိံ ကုလဂေဟေ နိဗ္ဗတ္တော ဝိညုတံ ပတ္တော ရတနတ္တယေ ပသန္နော ပရိနိဗ္ဗုတသ္သ ဝိပသ္သိသ္သ ဘဂဝတော စိတကံ ပဒုမပုပ္ဖေဟိ ပူဇေသိ။ သော တေနေဝ စိတ္တပ္ပသာဒေန ယာဝတာယုကံ ဌတ္ဝာ တတော သုဂတီသုယေဝ သံသရန္တော ဒိဗ္ဗသမ္ပတ္တိံ မနုသ္သသမ္ပတ္တိဉ္စာတိ ဒ္ဝေ သမ္ပတ္တိယော အနေကက္ခတ္တုံ အနုဘဝိတ္ဝာ ဣမသ္မိံ အမ္ဟာကံ သမ္မာသမ္ဗုဒ္ဓကာလေ ဧကသ္မိံ ကုလဂေဟေ နိဗ္ဗတ္တော ဝိညုတံ ပတ္တော သတ္ထရိ ပသီဒိတ္ဝာ သာသနေ ပဗ္ဗဇိတော ဃဋေန္တော ဝာယမန္တော နစိရသ္သေဝ အရဟာ အဟောသိ။ တသ္သ ရတ္တိဋ္ဌာနဒိဝာဋ္ဌာနာဒီသု တတ္ထ တတ္ထ ဝိဟရန္တသ္သ ဝိဟာရော ပဒုမပုပ္ဖေဟိ ဆာဒီယတိ, တေန သော ပဒုမစ္ဆဒနိယတ္ထေရောတိ ပာကဋော။
Nibbutelokanāthamhītiādikaṃ āyasmato padumacchadaniyattherassa apadānaṃ. Ayampi purimabuddhesu katapuññasambhāro tattha tattha bhave vivaṭṭūpanissayāni puññāni upacinanto vipassissa bhagavato kāle ekasmiṃ kulagehe nibbatto viññutaṃ patto ratanattaye pasanno parinibbutassa vipassissa bhagavato citakaṃ padumapupphehi pūjesi. So teneva cittappasādena yāvatāyukaṃ ṭhatvā tato sugatīsuyeva saṃsaranto dibbasampattiṃ manussasampattiñcāti dve sampattiyo anekakkhattuṃ anubhavitvā imasmiṃ amhākaṃ sammāsambuddhakāle ekasmiṃ kulagehe nibbatto viññutaṃ patto satthari pasīditvā sāsane pabbajito ghaṭento vāyamanto nacirasseva arahā ahosi. Tassa rattiṭṭhānadivāṭṭhānādīsu tattha tattha viharantassa vihāro padumapupphehi chādīyati, tena so padumacchadaniyattheroti pākaṭo.
၈၃. အတ္တနော ပုဗ္ဗကမ္မံ သရိတ္ဝာ သောမနသ္သဝသေန ပုဗ္ဗစရိတာပဒာနံ ပကာသေန္တော နိဗ္ဗုတေ လောကနာထမ္ဟီတိအာဒိမာဟ။ တတ္ထ နိဗ္ဗုတေတိ ခန္ဓပရိနိဗ္ဗာနေန ပရိနိဗ္ဗုတေ သတ္ထရိ, ဝိပသ္သိသ္သ သမ္မာသမ္ဗုဒ္ဓသ္သ သရီရေ စိတမာနိယမာနေ စိတကေ အာရောပိတေ သုဖုလ္လံ ပဒုမကလာပံ အဟံ ဂဟေတ္ဝာ စိတကံ အာရောပယိံ ပူဇေသိန္တိ အတ္ထော။ သေသဂာထာသု ဟေဋ္ဌာ ဝုတ္တနယတ္တာ ဥတ္တာနတ္ထမေဝာတိ။
83. Attano pubbakammaṃ saritvā somanassavasena pubbacaritāpadānaṃ pakāsento nibbute lokanāthamhītiādimāha. Tattha nibbuteti khandhaparinibbānena parinibbute satthari, vipassissa sammāsambuddhassa sarīre citamāniyamāne citake āropite suphullaṃ padumakalāpaṃ ahaṃ gahetvā citakaṃ āropayiṃ pūjesinti attho. Sesagāthāsu heṭṭhā vuttanayattā uttānatthamevāti.
ပဒုမစ္ဆဒနိယတ္ထေရအပဒာနဝဏ္ဏနာ သမတ္တာ။
Padumacchadaniyattheraapadānavaṇṇanā samattā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / ခုဒ္ဒကနိကာယ • Khuddakanikāya / အပဒာနပာဠိ • Apadānapāḷi / ၆. ပဒုမစ္ဆဒနိယတ္ထေရအပဒာနံ • 6. Padumacchadaniyattheraapadānaṃ
